Vaxtalækkun kemur í bakið á ASÍ

Alþýðusambandið tók þátt í síbylju atvinnurekenda að hröð vaxtalækkun væri forsenda endurreisnar efnahagskerfisins. Það er rugl vegna þess að ekki var búið að ormahreinsa atvinnulífið af útrásarekstri. Vextir eru ein leið til að skilja hafrana frá sauðunum í atvinnurekstri (og raunar heimilarekstri).

Holskefla hækkana ýtir upp verðbólgu sem mun hækka húsnæðislán og önnur lán tengd vístölu. Krónan veikist og þar myndast nýr hvati til verðbólgu.

Sparifjáreigendur horfa upp á peningana sína brenna á reikningum sem bera lægri vexti en nemur verðbólgu.

Alþýðusambandið átti aldrei að láta hrunverjana í SA teyma sig út vaxtalækkunarvitleysuna.

„Gagnrýnisvert hvernig fyrirtækin hegða sér"

Afútrásun bankakerfisins er óunnið verk

Stærstu efnahagsglæpir útrásarinnar voru framdir í bankakerfinu. Dýrustu mistökin voru sömuleiðis gerð í fjármálastofnunum, nægir þar að nefna Icesave. Eftir hrun og gjaldþrot bankanna tóku nýir eigendur við, sem fæstir vita hverjir raunverulega eru, en stjórnendahópurinn að frátöldum sjálfum bankastjórunum stýrir enn daglegri bankastarfsemi.

Afútrásun bankakerfisins er óunnið verk. Hingað til hafa verið gerðar reddingar til að bankastarfsemin haldi áfram. Augljóst er að djúptækt inngrip þarf í rekstur bankanna og lög og reglugerðir sem í gildi eru um þessa starfsemi.

Bankarnir nýju hafa sýnt sig ónæma fyrir almennum siðferðiskröfum en það var einmitt siðblindni þeirra sem olli hruninu.

 

Sjávarútvegur gerður að þjóðaróvini

Sjávarútvegur og ferðaþjónusta eru öflugustu verkfæri þjóðarinnar til að vinna sig úr kreppunni. Í þessum atvinnugreinum eru hvað mestar gjaldeyristekjur. Ætla mætti að ríkisstjórn myndi leggja sig fram um að treysta stoðir grunnatvinnuveganna við þær kringumstæður sem nú eru uppi.

Jóhönnustjórnin ætlar sér ekki að leggja grunn að heilbrigðu atvinnulífi. Ríkisstjórnin leggur sig í líma við að gera sjávarútveg að þjóðaróvini. Ástæðan fyrir þessari stjórnvisku er að fyrir aldarfjórðungi hafi veiði gerð mistök þegar framseljanlegum kvóta var útdeilt.

Kvótinn sem var úthlutaður fyrir margt löngu er margsinnis búinn að skipta um hendur. Óréttlætið sem kann að hafa verið framið fyrir 25 árum verður ekki réttlætt með nýjum rangindum. 

Stjórnlist Jóhönnustjórnarinnar felst í að ala á sundrungu í samfélaginu. Líklega í þeirri von að heiftin sem gýs upp beini athyglinni um stund frá ráðþrota ríkisstjórn.