Siggi G. staðfestir mykjuregluna

Mykjureglan segir að málstaður er verri eftir því sem fleiri orð þarf að hafa til að verja hann. Frétt Morgunblaðsins um að Sigurður G. Guðjónsson baugslögmaður ætlaði sér að verja hagsmuni Jóns Ásgeirs Jóhannessonar gegn þrotabúi Fons með því að kaupa kröfu Skeljungs var um það bil helmingi styttri en varnarræða Sigga G. í dag.

Mykjureglan er ágæt aðferð til að komast á snoðir um kjaftæðið sem tröllríður eftirhrunssamfélaginu. Jón Ásgeir og hrunverjadeild Sjálfstæðisflokksins halda úti 365 miðlum sem dag hvern staðfestir lögmælti mykjureglunnar.

Rétt eins og ofvaxnir efnahagsreikningar bankanna voru einkenni útrásarbullsins eru baugsmiðlar og leigulögfræðingar hrunmanna vísbending um hversu sterk ítök hrunverjar eiga enn í íslensku samfélagi.

Stjórnarpólitík í skötulíki

Stjórnarpólitíkin er í skötulíki vegna þess að hvorugur stjórnarflokkanna býr að heildstæðu mati á því hvernig nýja Ísland eigi að líta út. Samfylkingin bauð Evrópusambandsaðild en þjóðin segir ákveðið nei við þeirri framtíðarsýn.

Vinstri grænir lögðu fram hugmyndir um norræna velferðarstjórn sem er jafnheimskulegasta stjórnmálahugmynd seinni ára. Hér hefur um árabil verið rekið norrænt velferðarkerfi. Tilvísun í norræna velferð er hálfri öld of seint á ferðinni.

Þegar pólitísk sýn jafn óglögg og raun ber vitni verða vinnubrögðin ómarkviss og taugaveiklun grípur um sig. Stjórn Jóhönnu Sig. hrekst fyrir veðrum og vindum. Eymdarstaða stjórnarinnar var auglýst sérstaklega í vikunni þegar tilkynnt var að Ögmundur yrði ráðherra á ný. Vá, hvað það mun breyta miklu.

DV fær ,,nýja" eigendur fyrir hrunskýrslu

DV Hreins Loftssonar og Baugs setti á flot hugtakið náhirðin um Davíð Oddsson og samstarfsmenn hans, en Hreinn var einu sinni aðstoðarmaður Davíðs áður en hann gekk þjónustu Baugs. DV gengur iðulega feti framar en móðurútgáfa Baugs, Fréttablaðið, í hagsmunagæslu fyrir eigendur sína. Háttur Fréttablaðsins er að þegja um misfellur í ásjónu Baugs en DV öskrar um ágalla flestra annarra en eigenda sinna.

Vika er í að hrunskýrsla nefndar alþingis kemur loks út og fréttir að DV sé að skipta um eigendur hljóta að vekja ugg í brjósti þeirra sem treystu á að DV Hreins myndi setja ,,réttan" vinkil á skýrsluna.

Við skulum þó ekki örvænta. Miðað við fyrri reynslu af baugsfléttum í viðskiptum eru allar líkur að nýir útgefendur verði á mála hjá Baugi þótt breitt verði yfir nafn og númer bakhjarla. Jón Ásgeir Baugsstjóri tók þannig snúning þegar hann eignaðist Fréttablaðið. Farið var leynt með eignarhaldið á meðan Baugur, sem þá var almenningshlutafélag, mokaði auglýsingafé í Fréttablaðið.

DV lifir ekki án Baugs/Haga.