Ríkisstjórnin og vinveittir auðmenn

Bankarnir og ríkisstjórnin brugðust þjóðinni eftir hrun með því að ganga ekki fram fyrir skjöldu með þann boðskap að útrásarauðmenn ættu enga framtíð fyrir sér í íslensku atvinnulífi. Þegar fréttist af tugmilljarða afskriftum til auðmanna eins og Ólafs Ólafssonar og Baugsfeðga á meðan almenningur er píndur til síðustu krónu rís reiðibylgja í samfélaginu.

Fyrir síðustu kosningar var rætt um almenna 20 prósent skuldaniðurfellingu á einstaklinga og fyrirtæki. Í umræðunni var hugmyndin slegin út af borðinu með þeim rökum að hún væri í senn siðlaus og of dýr.

Fólk horfir upp á að auðmenn fái margfalt stærri skuldir afskrifaðar en nemur 20 prósentum og spyr með vaxandi þunga hvaða hagsmunum sé verið að þjóna.

Er ríkisstjórn Jóhönnu Sig. að koma sér upp vinveittum auðmönnum sem fá niðurfelldar skuldir gegn fjárhagsstuðningi og málafylgju við vinstriflokkana?

Njóta heimilin afskriftanna?

Grisjun atvinnulífsins og endurreisnin

Á meðan útrásarviðrini eins og Ólafur Ólafsson, Baugfeðgar og Björgólfar eiga greiðan aðgang að nýju bönkunum halda heiðarlegir rekstrarmenn að sér höndum. Ríkisstjórninni og nýju bönkunum hefur algerlega mistekist að grisja atvinnulífið og uppræta útrásarillgresið.

Atvinnulífið er í lamasessi vegna þess að útrársaröfl ráða þar enn ríkjum. Almenningur heldur að sér höndum, á reikningum eru núna tvö þúsund milljarðar króna. Engum heilvita manni dettur í hug að setja peninga í rekstur sem keppir við siðlausa útrásarauðmenn með nýja bakhjarla hjá Samfylkingu/Vg annars vegar og hins vegar nýju bankafurstunum.

Ef hægt er að nefna einn sökudólg utan ríkisstjórnarinnar í þessu máli er það Finnur fávísi Sveinbjörnsson bankastjóri Arion. Hann heldur verndarhendi yfir Baugsfeðgum og Ólafi Ólafssyni.

Næsta gremjukast verður þegar almenningur nennir ekki þessu kjaftæði lengur. Búsáhaldabyltingin verður eins og skátamót í samanburði.

 

Kjaftæðið er bakspuni ríkisstjórnarinnar

Steingrímur J. biður atvinnulífið og þjóðina almennt að hætta þessu kjaftæði að ríkisstjórnin sé aðgerðalaus. Hér hittir Steingrímur J. sjálfan sig fyrir. Spuni ríkisstjórnarinnar undanfarna mánuði er að ekkert gerist á meðan Icesave-deilan sé óleyst. Eflaust var hugmyndin að nota þennan spuna til að brjóta á bak aftur innlenda andstöðu við skuldaklafasamninga við Breta og Hollendinga sem gerðir voru síðasta sumar.

Þjóðin hafnaði Icesave-frumvarpi stjórnarinnar og þá kemur bakspuninn: Ríkisstjórnin hefur staðið aðgerðalaus og leyft atvinnulífinu að blæða út á meðan innanlandsófriður var um Icesave. Hótun Steingríms og Jóhönnu um að himinn og jörð myndu farast ef ekki yrði samið við Breta og Hollendinga sýndi sig vera innantóm hótun. Til hvers var jafn mikið lagt undir af hálfu stjórnarinnar?

Jú, vegna þess að stjórnin hefur enga framtíðarsýn um hvernig nýja Ísland á að líta út. Ríkisstjórnin veit ekki í hvort fótinn hún á að stíga og kemur því fyrir sem aðgerðalaus.

Þreyttur á þessu kjaftæði

Ísland á vini í Færeyjum og Noregi

Norðurlönd eru klofin í afstöðunni til lánveitinga til Íslands, aðeins Norðmenn eru tilbúnir að veita Íslendingum lán án skilyrða frá Alþjóða gjaldeyrissjóðnum. Á þessa leið er uppsláttur í stærsta blaði Noregs í dag, Aftenposten.

Færeyingar voru þeir fyrstu sem skilyrðislaust  lánuðu okkur eftir hrun. Norðmenn, sem eiga víðtækari hagsmuna að gæta í alþjóðlegu samhengi, tóku sér lengri tíma til að skoða málið ofan í kjölinn. Norsk stjórnvöld voru beitt þrýstingi heimafyrir og það sneri þeim á endanum. Afstaða Norðmanna staðfestir að samkennd okkar og þeirra yfirstígur hagsmuni.

Svíar, aftur á móti, geta ekki fyrir nokkurn mun fallist á annað en að Íslandi beygi sig fyrir tilskipunum frá Alþjóða gjaldeyrissjóðnum. Sænskir bankar eiga tröllaukna hagsmuni í Eystrasaltsríkjunum, þar sem Alþjóða gjaldeyrissjóðurinn stýrir efnahagsaðgerðum líkt og hér. Ef Svíar fallast á sérsjónarmið hvað Ísland varðar er viðbúið að Lettar, Litháar og Eistar krefjist sömu þjónustu.

Afstaða Færeyinga og Norðmanna til okkar tekur af öll tvímæli um hvar Ísland á heima meðal þjóðanna. Við eigum að byggja upp samvinnu við þessar tvær þjóðir auk Grænlendinga. Engin þessara þjóða er á leiðinni í Evrópusambandið.