Stiglitz vill ESB-vörn fyrir Grikki

Grikkland stefnir í annað tveggja gjaldþrot eða þjóðfélagslega upplausn vegna niðurskurðar ríkisútgjalda samhliða launalækkun yfir línuna. Joe Stiglitz hagfræðingur er ráðgjafi grísku ríkisstjórnarinnar. Hann fer fram á stuðning bræðraþjóða Grikklands í Evrópusambandinu sem hafa dregið lappirnar.

Stiglitz segir spákaupmenn herja á Grikkland líkt og þeir gerðu gagnvart Hong Kong 1997/1998. Til að verjast þessum árásum verði að bregðast eins við, þ.e. hækka vexti og grípa inn í hlutabréfamarkaðinn.

Evrópusambandið stendur frammi fyrir tveim kostum og hvorugum góðum. Í fyrsta lagi að bjarga Grikklandi, t.d. með því að hækka vexti, sem hentar efnahagskerfum þjóða í Norðurhluta álfunnar ekki vel. Eða að láta Grikkland róa sem er ekki ýkja góð auglýsing fyrir evrópska samstöðu.

Gangi það fram að Grikkir verða dregnir að landi, sem er líklegast, munu Þjóðverjar krefjast þess að ESB fái stóraukinn íhlutunarrétt í málefni einstakra ríkja til að Suður-Evrópuþjóðir fari ekki að gera út á þýska ríkissjóðinn.

Hér umfjöllun um stöðuna í Grikklandi í kvöld í Telegraph.

Arion þjónar auðmönnum með blessun stjórnarinnar

Ólafur Ólafsson sannfærði Arion banka að nauðsynlegt væri að hann ætti stóran hlut í Samskip. Arion samþykkti jafnvel þótt Ólafur hefur stöðu grunaðs manns í fjársvikamáli og subbulegan fjármálaferil. Baugsfeðgar fengu Arion banka til að fallast á að þeir ættu heimtingu að halda áfram með Haga, sem skulda 40 - 50 milljarða króna og þarf á stórum afskriftum að halda. Sonurinn Jón Ásgeir var dæmdur  í Baugsmálinu fyrir fjármálabrot.

Arion banki er með sama mannskap og var í bankanum þegar hann hét Kaupþing. Þær óverulegu breytingar sem hafa orðið á yfirstjórn breyttu engu um að Arion hlustar á þá í dag sem Kaupþing hlýddi á útrásarárunum.

Aðgengi auðmanna að bönkum sem ýmist eru í ríkiseigu eða stjórnað af ríkisvaldinu vekur furðu. Frá ríkisstjórninni skortir skýr og ákveðin pólitísk skilaboð um hvernig efnahagslíf nýja Íslands á að líta út.

Ríkisstjórnin er ekki trúverðug þegar hún hampar einum auðmanni, Björgólfi Thor, og ætlar að setja lög fyrir gagnaver í hans eigu. Trúverðugleiki krefst samræmis.

 

 

Össur án umboðs Vinstri grænna

Vinstrimenn sjá fram á heldur rýra uppskeru í sveitarstjórnarkosningum í vor. Sterk niðurstaða stjórnarandstöðunnar í vor myndi enn frekar grafa undan trúverðugleika ríkisstjórnarinnar. Eins og vandræðin þar séu ekki nóg fyrir.

Jóhanna forsætisráðherra má ekki vera að þessu og fer í frí með Icesave-samningana í uppnámi. Steingrímur J. yfir-forætisráðherra er stendur í vegi fyrir nýjum Icesave-samningum enda margbúinn að lýsa því yfir að engin leið sé að fá betri samninga en hann og Svavar Gestsson gerðu í sumar.

Überplottari Samfylkingarinnar, Össur Skarphéðinsson, hefur undanfarnar vikur þreifað á framsóknarmönnum. Bylgjufréttir um helgina og Morgunblaðið í dag staðfesta orðróminn um að forysta Samfylkingar, þ.e. sá hluti hennar sem er á landinu, vilji Framsóknarflokkinn inn í ríkisstjórn.

Össur hefur ekkert umboð frá Vinstri grænum til að bjóða Framsóknarflokknum aðild að ríkisstjórninni.

Þegar forystumaður ríkisstjórnarflokks er farinn að leita hófanna hjá stjórnarandstöðuflokki um myndun nýrrar ríkisstjórnar er það spurning um daga hvenær stjórnin springur. Ætli Jóhanna komist heim í tæka tíð?

Biðla til Framsóknarmanna

Launalækkun með valdboði ESB

Meginstef í Evrópusambandinu er evrópsk samvitund sem, samkvæmt kenningunni, kemur hægt en sígandi í stað gamaldags þjóðernisvitundar. Evrópusambandið er býsna lagið að hampa evrópskri samvitund og notar ógrynni fjármuna til að auglýsa hverju samvitundin fær áorkað.

Sundlaug í krummaskuði í Skotlandi skrýðir málmskjöldur í anddyri sem segir að evrópskir peningar komu hér svið sögu. Árlega rennur ógrynni fjár til Spánar í byggðastyrki; evrópsk samvitund í verki.

Evrópusambandið státar af árangri og getur með sanni sagt að undanfarnir áratugir hafi verið samfelld sigurganga. Sambandið sér leik á borði þegar kreppir að og gerir sér mat úr vandræðum þjóðríkja. Þegar t.d. þýsku ríkin tvö vildu sameinast fyrir 20 árum gerði ESB þá kröfu að Þjóðverjar fórnuðu myntinni sinni, markinu, og samþykktu að evra yrði gjaldmiðill álfunnar. Þjóðverjar samþykktu.

Fyrir tíu árum var evran gerð út og kjarnaríkin gerðu hana að sinni. Jaðarríki sömuleiðis, t.d. Grikkland sem núna er i verulegum vandræðum og þarf virkilega á aðstoð að halda.

Evrópska samvitundin sem Grikkjum býðst núna felst í almennri launalækkun grískumælandi íbúa Evrópusambandsins.

Forvitnilegt verður að sjá hvernig samvitundinni reiðir af þegar Brusselhagsstjórnin tekur yfir efnahagskerfi einstakra landa sem hafa gengið full hratt um gleðinnar dyr undanfarin ár.

Hér er Gunnar Rögnvaldsson með pælingu.