Heiður lands og þjóðar og ESB-umsóknin

Viðskiptaráð, útvegsmenn og bændur eru á móti aðildarumsókninni sem Samfylkingin sendi til Brussel. Meirihluti alþingis vill ekki aðild. Þjóðin er á móti aðild samkvæmt endurteknum mælingum. Samt sem áður virðist Samfylkingin ætla að halda til streitu feigðarflaninu.

Álit þjóðarinnar beið hnekki við hrunið almennt og Icesave sérstaklega. Haldi Samfylkingin áfram að berjast fyrir framgangi umsóknarinnar verða Íslendingar á ný úthrópaðir fyrir vingulshátt.

Samfylkingin þarf að draga umsóknina tilbaka.

Samfylkingin ein gerir bjölluat í Brussel

Könnun sem sýnir sex af hverjum tíu forsvarsmönnum fyrirtækja hér á landi telja hag Íslands betur borgið utan Evrópusambandsins er síðasta hálmstrá Samfylkingarinnar. Þjóðin vill ekki fara inn í ESB og atvinnulífið ekki heldur. Samt ætlar Össur að eyða hálfum öðrum milljarði króna í aðildarferli og éta upp tíma starfsmanna stjórnarráðsins sem annars gætu lagt lið við landsstjórnina og veitir ekki af.

Samfylkingin sótti um aðild að Evrópusambandinu og þvingaði Vinstri græna til að samþykkja. Andstæðingar aðildar í Vg náðu vopnum sínum á flokkráðsfundi um miðjan janúar og samþykktu harðorða ályktun gegn aðildarferli. 

Þegar atvinnulífið leggst gegn aðild Íslands að Evrópusambandinu með jafn afgerandi hætti og hér er lýst er fokið í flest skjól fyrir Samfylkinguna.

Meðal þess sem fram kemur í könnun Capacent Gallup fyrir Viðskiptaráð eru breytt viðhorf forsvarsmanna fyrirtækja til aðildar að Evrópusambandinu.  Tæplega 60% forsvarsmanna íslenskra fyrirtækja telja hagsmunum íslensks viðskiptalífs betur borgið utan Evrópusambandsins. Þó viðhorf séu skipt eftir atvinnugreinum, þá taldi einungis 31% aðspurðra að íslensku viðskiptalífi væri betur borgið innan ESB.
Þessi afstaða gegn aðild að Evrópusambandinu er á skjön við könnun sem Viðskiptaráð framkvæmdi fyrir ári síðan í tengslum við Viðskiptaþingið 2009. Í þeirri könnun var meirihluti hlynntur umsókn um aðild að Evrópusambandinu og taldi hana hafa jákvæð áhrif á stöðu efnahagsmála. Því má segja að veruleg breyting hafi orðið í viðhorfi íslenskra atvinnurekenda í garð ESB undanfarna 12 mánuði.

Samfylkingin stendur ein og berstrípuð með blástjörnufána ESB í hendi.

Íslensk viðrini og útlend

Röksemd fyrir inngöngu Íslands í Evrópusambandið er að íslenskir ráðamenn séu svo illa gerðir að þeim sé ekki treystandi fyrir landsstjórninni. Illskárra sé að hafa útlenda ráðamenn. Margt er til í þessum rökum. Svo dæmi sé tekið þykist utanríkisráðherra, Össur Skarphéðinsson, jafnaðarmaður en hugsjónin ristir ekki dýpra en honum þykir sjálfsagt að hirða 30 milljónir króna í hagnað af braski með gjaldþrota Spron-bréf.

Flokkssystir Össurar heitir Jóhanna og er Sigurðardóttir. Hún er titluð forsætisráðherra og á sem slík að tala máli Íslendinga í útlöndum. Jóhanna er frekja heima en kann ekki útlend mál og verður okkur til hneisu í hvert skipti sem hún hverfur af landi brott.

Rökin eru sterk fyrir því að við ættum að losa okkur við íslensku eymingjana sem nú um stundir hafa mannaforráð á Fróni. Aftur er að því að gæta að héti Össur Heinrich og Jóhanna Angela væri snúnara fyrir Íslendinga að losna við skötuhjúin en ef þau aðeins hétu íslenskum skírnarnöfnum.