Öskjuhlíðar-Pálmi enn utan fangelsis

Pálmi Haraldsson kenndur við Fons skrifaði sig í sögubækur íslensks viðskiptalífs í Öskjuhlíðarsamsærinu til að féfletta almenning með samræmdu útsöluverði ávaxta. Pálmi varð síðar náinn viðskiptafélagi Jóns Ásgeirs í Baugi og saman tóku nokkra snúninga á Skeljungi, Sterling og FL-group.

RÚV segir í kvöld frá lánaviðskiptum Fons kortéri fyrir gjaldþrot þar sem veitt var þriggja milljarða króna kúlulán til skúffufyrirtækis. Lánið var með gjalddaga eftir þrjú ár en afskrifað rétt eftir að það var veitt.

Viðskiptafléttur Pálma í Fons liggja frá Öskjuhlíð til Panama án viðkomu á Litla-Hrauni. Og það er merkilegt.

Icesave tortímir orðspori

Samtök atvinnulífsins, hagfræðingar eins og Þórólfur Matthíasson og fleiri eru með orðspor sitt í hættu vegna Icesave, - auk ríkisstjórnarinnar, vitanlega. Allir þessir aðilar máluðu skrattann á veggin og töldu að Íslandi yrði hornkerling í samfélagi þjóðanna ef ekki yrðu drápsklyfjar Icesave-samkomulagsins lagðir á almenning.

Þjóðin sagði nei í allsherjaratkvæðagreiðslu við Icesave-frumvarpi ríkisstjórnar Jóhönnu Sig. fyrr á árinu.

Þjóðin hafði rétt fyrir sér - en vit og dómgreind hjá mörgum bilaði illilega.

Evran þarf eldvegg - pólitíkin leyfir ekki

Evru-svæðið er við það að furða upp og þarf á eldvegg að halda, skrifar John Give í Telegraph þar sem hann ber saman aðdraganda falls Lehmans bankans og yfirvofandi stóráhlaups á evruna. Give þekkir vel til gangverks fjármálamarkaðarins og hann telur að ekkert minna en sameiginleg skuldbinding allra evruríkjanna um að standa sameiginlega vörn um myntina geti hrundið áhlaupinu.

Nær engar líkur eru á því að Þjóðverjar samþykki sameiginlega ábyrgð á skuldum evruríkjanna þar sem jafnvel þýski ríkissjóðurinn er ekki ótæmandi.

Hönnuðir evrunnar gerðu ráð fyrir góðkynja kreppu sem myndi leiða evruríkin nær sameiginlegu markmiði embættismanna í Brussel um Stór-Evrópu. Kreppan sem nú er skollin á er líklegri til að tæta í sundur Evrópusamstarfið.

 

Óeining um efnahagsaðgerðir

ESB kveikir ekki á perunni

Evrópusambandið bannaði glóperur til að spara orku. Í stað glópera skyldi almenningur nota sparperur, þótt þær væru margfalt dýrari. Embættismannakerfið í Brussel þvingaði fram þessa niðurstöðu þrátt fyrir efasemdir margra. Niðurstaða þýskrar rannsóknastofu bendir til að ESB hafi fórnað heilsu fólks fyrir orkusparnað.

Samkvæmt fréttum þýskra fjölmiðla er kvikasilfursinnihald sparpera 20 sinnum meira en leyfilegt er.

Íslendingum stóð til boða að segja sig frá þessari ESB-vitleysu en gerðu ekki.

Rekur alþingi bankaeftirlit?

Svör bankastjóra Landsbankans í viðtalsþætti í síðustu viku er tilefni kröfu þingmanna Sjálfstæðisflokksins um fund í viðskiptanefnd alþingis. Steinþór Pálsson bankastjóri segir fullum fetum að eftirlitsnefnd alþingis hafi samþykkt vafasama gjörninga bankans. Hér er brot af viðtalinu, útskriftin er fengin af síðu Guðlaugs Þórs Þórðarssonar þingmanns

Spyrill:Jakob Valgeir, afskriftir hans og lán sem hann fær að ábyrgjast upp á einn milljarð. Hann eignast eftir kennitöluflakk eignir útgerðarfyrirtækisins Festi sem var sett í þrot af hálfu Landsbankans.
Bankastjóri:„Ég skal bara benda á eitt – við erum með eftirlitsnefnd frá alþingi, inni hjá okkur sem er að yfirfara hvernig við stöndum að málum.  Þeir eru að skoða mál alveg niður í smæstu smáatriði.  Og þeir segja, ... og þeir gefa okkur góða umsögn... að jafnræðis sé gætt.“

Þingnefnd hefur fundað af minna tilefni.

 

 

Ófriður á vinnumarkaði í aðsigi

Handvömm, forystuleysi og vangeta ríkisstjórnar Jóhönnu Sig. í endurreisnarstarfinu mun reynast dýrkeypt. Frestun á frestun ofan í málefnum skuldara frestar efnahagsbatanum um 12 til 18 mánuði. Ríkisstjórnin mun ekki vinna tilbaka þann tíma og getur ekki endalaust gengið á langlundargeð fólks.

Á vinnumarkaði hefur verið í gildi friðarskylda. Tilhlaup einstakra hópa til að skara eld að eigin köku hafa verið barin niður í nafni samstöðu um endurreisn efnahags þjóðarinnar.

Eftir því sem vangeta ríkisstjórnarinnar kemur betur í ljós verður ókyrrðin á vinnumarkaði meiri. Tiltrúin ríkisstjórnina minnkar og flóðgáttir opnast þegar friðarskyldan rofnar.

Kennarar ekki með í samfloti

Ísland, Írland og hugleysi Jóhönnustjórnar

Sjálfstæðismenn í ríkisstjórn Geirs H. Haarde björguðu því sem bjargað varð í október 2008 þegar íslensku bankarnir fóru í þrot. Neyðarlögin sem voru studd af Framsóknarflokknum, eins og Sigmundur Davíð Gunnlaugsson, formaður flokksins, bendir á í Morgunblaðsgrein í dag, komu í veg fyrir að almenningur á Íslandi yrði lagður í skuldafjötra að írskum hætti.

Í október 2008 stóð valið milli þess að þóknast erlendum kröfuhöfum eða verja íslenska hagsmuni. Forsætisráðherra og fjármálaráðherra, Geir H. Haarde og Árni Mathiesen, tóku þjóðarhagsmuni fram yfir kröfur útlendra fjármagnseigenda.

Icesave-kröfur Breta og Hollendinga komu upp í eftirmála hrunins. Hugleysi ríkisstjórnar Jóhönnu Sig. var komið í stað kjarks í stjórnarráðinu. Aðeins með liðsinni forsetans tókst að bjarga íslenskum almenningi frá skuldaklafa með því að þjóðin hafnaði Icesave-samkomulaginu í þjóðaratkvæðagreiðslu.

Jóhanna Sig. tilkynnti að hún sæti heima í Icesave-atkvæðagreiðslunni sem og fjármálaráðherra, Steingrímur J. Sigfússon.