Samkeppni um hægri hentistefnuflokk

Samkvæmt Eyjunni undirbýr Guðbjörn Guðbjörnsson stofnun hægriflokks og er kominn á það stig að velja liti á flokksfánann. Áður hafa Þorsteinn Pálsson og Þorgerður Katrín Gunnarsdóttir gefið slíkri flokksstofnun undir fótinn, og Þorsteinn reyndar rúmlega það.

Það má hafa gaman af þessum tilburðum. Gamanið gæti þó farið að kárna ef forysta Sjálfstæðisflokksins fer ekki að gera upp við sig hvers konar flokkur stendur kjósendum til boða í næstu kosningum. Misvísandi skilaboð koma frá móðurflokki íslenskra stjórnmála. Önnur segja að flokkurinn hafi lært af hruninu en hin að ætlunin sé að græða áfram á daginn til að grilla sjálfan sig á kvöldin.

Kosningar gætu skollið á með skömmum fyrirvara.

Vextir, tilraunir í dollurum og evru og Kína

Vextir hækka í Kína vegna þenslu í efnahagskerfinu. Í Bandaríkjunum munu vextir hækka á næsta ári til að bregðast við verðbólgu sem peningaprentun gegn verðhjöðnun veldur - það er tilraun í efnahagspólitík. Önnur tilraun sem stendur yfir er pólitík íklædd myntsamstarfi og heitir evra.

Kínverjar hafa um árabil geymt sístækkandi gjaldeyrisforða í dollurum og evrum. Peningaprentun Bandaríkjanna var þeim þyrnir í augum enda grunar Kínverja að um sé að ræða dulda gengisfellingu. 

Gengisfelling er eitt en annað er ef gjaldmiðill leysist upp í frumeindir sínar. Kínverjar eru um það bil að missa þolinmæðina gagnvart evrunni, eins og fram kemur í greiningu Telegraph.

Hvenær kemur að því að Samfylkingin biðjist afsökunar ESB/evru-stefnu sinni?

Vextir hækka í Kína

Lissabonsáttmálinn var brotinn

Evrópusambandið braut grunnlög sín, Lissabonsáttmálann, þegar Grikkjum var veitt neyðaraðstoð og jafnfaramt þegar viðlagasjóði vegna fjárhagserfiðleika evru-ríkjanna var komið á fót. Fjármálaráðherra Frakklands viðurkennir brotin en hingað til hafa bæði framkvæmdastjórnin og helstu ríki sambandsins, s.s. Frakkland og Þýskaland, haldið því fram að Lissabonsáttmálinn veiti heimild til þeirra ráðstafana sem grípa hefur þurft til að bjarga evru-svæðinu.

Frankfürter Allgemeine Zeitung vekur athygli á því að viðurkenning Christine Lagarde fjármálaráðherra Frakklands á brotum gegn sáttmálanum hafi ólíka þýðingu fyrir Frakka annars vegar og hins vegar Þjóðverja. Í Þýskalandi varðar málið stjórnarskrána og er stórpólitískt eftir því.

Á síðasta leiðtogafundi Evrópusambandsríkjanna var samþykkt viðbótarmálsgrein við Lissabonsáttmálann sem ætlað er að skjóta lagastoð undir viðlagasjóðinn sem verður varanlega til taks fyrir evru-þjóðir sem komast í hann krappan.

Þýsk stjórnvöld hafa gefið eftir kröfum annarra evru-ríkja um að veita þýsku fjármagni til að koma óreiðuríkjum til hjálpar. Andstaða við eftirgjöfina vex í Þýskalandi. Í flokki Frjálsra demókrata, sem er annar stjórnarflokkanna, hefur verið stofnað til hreyfingar gegn evru-stefnu stjórnvalda.

Viðurkenning fjármálaráðherra Frakklands á brotum gegn grunnlögum Evrópusambandsins mun herða andstöðuna við evruna í Þýskalandi.