Taugastríð á alþingi

Tilboð Jóhönnu Sig. til stjórnarandstöðunnar um að leggja fram vantraust á ríkisstjórnina er liður í taugastríði á alþingi sem á eftir að magnast næstu daga. Markmiðið er að sitja ekki uppi með Svarta Pétur; bera ábyrgð á stjórnleysi.

Stjórnarandstaðan á að svara með tilboði til Vinstri grænna um að mynda minnihlutastjórn í fjóra mánuði.

Við lifum áhugaverða tíma.

Semur ESB fyrir hönd Íslands?

Strandríkin fjögur í Norður-Atlantshafi, Grænland, Ísland, Færeyjar og Noregur standa frammi fyrir því verkefni að skilgreina nánar, innan gildandi alþjóðaréttar, hvernig skuli fara með umráðaréttinn á hafsvæðinu sem löndin liggja að. Löndin fjögur standa öll utan Evrópusambandsins.

Þótt Ísland ákvæði að ganga í Evrópusambandið myndi verkefnið ekki breytast. Það sem myndi hins vegar breytast væri að Ísland hefði ekki sjálfstæða aðkomu að málinu. Framkvæmdastjórnin í Brussel og utanríkisþjónusta ESB myndi semja fyrir hönd Íslands, alveg eins og embættismennirnir á meginlandinu koma fram fyrir hönd írskra og skoskra sjómanna í makríldeilunni við Íslendinga og Færeyinga.

Framsal á samningsrétti í hafréttarmálum er framsal á fullveldi.

Jóhanna hótar þjóðinni

Hótun Jóhönnu Sig. um að sitja út kjörtímabilið er ósvífni sem gerir ekki annað en að magna andstöðuna við ríkisstjórnina. Valdahroki Jóhönnu verður naktari eftir því sem málefnafátækt stjórnarinnar eykst. Ríkisstjórnin talar niður til fólks og það sem hún segir er tómt rugl og í engu samræmi við verkefni stjórnarinnar.

Þjóðin kaus sér nýtt alþingi fyrir hálfu öðru ári til að gera tvennt. Í fyrsta lagi að reisa við efnahag landsins eftir hrun. Í öðru lagi að gera upp pólitískt og siðferðilega við hrunvalda.

Ríkisstjórn Jóhönnu Sig. réð ekki við verkefnið. Hún kveikti elda í stað þess að lægja öldur; gerði fyrrum ráðherra Samfylkingar ósakhæfa.

Ef enn er til ærlegur þráður í Jóhönnu Sig. segir hún af sér og boðar til kosninga.

Jóhanna: sit út kjörtímabilið