Steingrímur J. leikur fábjána

Steingrímur J. Sigfússon leikur sig fábjána þegar hann segir Vg á móti inngöngu en málefnaleg rök þurfi til að slíta aðlögunarferli Íslands að Evrópusambandinu. Fábjánaleikur formanns Vg gengur út á að halda ríkisstjórnarsamstarfi Vg og Samfylkingar áfram þótt annar flokkurinn, þ.e. Vg sé alfarið á móti inngöngu í Evrópusambandið, en hinn flokkurinn byggir sjálfa tilveru sína á væntanlegri ESB-aðild.

Steingrímur J. ætti að vera of greindur til að fara í trúðshlutverk þótt ráðherrastóll sé í húfi. Hann er enn ungur maður en þvættingur um að málefnaleg rök skorti til að draga tilbaka umsókn að Evrópusambandinu eykur ekki líkur á geðþekkri pólitískri minningargrein.

Valdagræðgi blindar dómgreind formanns Vg.

Byr, SpKef og græðgin

Í áratugi þjónuðu sparisjóðirnir heimabyggðum vel og dyggilega. Upp úr aldamótum síðustu voru við stjórnvölinn í fjarska mörgum sparisjóðum fláræðisfábjánar sem fundu sig vel í græðgisvæðingunni er breiddi úr sér í samfélaginu.

Byr var búinn til úr héraðssparisjóðum og Sparisjóði vélstjóra. Lygamerðir mergsugu Byr og skyldu eftir gjaldþrota. Sparisjóðurinn í Keflavík virðist hafa orðið fyrir áþekku áhlaupi. Samkvæmt frétt Víkurfrétta af fundi vonsvikinna stofnfjárhafa er margt líkt með gjaldþroti sparisjóðanna tveggja. Sveinn Margeirsson sem er hvað kunnugastur Byr-málum var fenginn á fundinn suður með sjó

Sveinn sagði að skoða yrði lánamálin hjá SpKef– hverjir hafi fengið lán á sérstökum kjörum, hvaða fjárfestingar hafi verið framkvæmdar, hverjir hafi tekið út peninga og í hvað lánveitingarnar fóru. „Þetta er í rauninni ekkert sérstaklega flókið,“ sagði Sveinn og vitnaði til orða Evu Joly: „Follow the money”.
Sveinn hvatti stofnfjárhafana jafnframt til að lýsa kröfum í búið. „Það voru fjölmargir stofnfjáreigendur í BYR sem gerðu slíkt, að mínu mati mjög með réttu. Vegna þess að þær upplýsingar sem menn fengu í BYR, nánast á sama tíma og þið fengið upplýsingar, þær voru bara djöfulsins lygaplagg,“ sagði Sveinn sem hóf á loft áðurnefnda lýsingu á stofnfjárútboði SpKef og uppskar mikið lófaklapp viðstaddra. 

Ísland, Írak og ESB

Frekari uppljóstranir um framferði Bandaríkjanna í Írak vekja hörð viðbrögð hjá íslenskum bloggurum. Hafðar eru uppi kröfur um að Ísland segi sig úr Nató og sýni með öðrum hætti samstöðu með þeim sem líða þjáningar vegna heimsvaldastefnu og hernaðarbrölts.

Sumir af þessum íslensku bloggurum sem hneykslast á stöðu mála í Írak vilja eindregið að Ísland gangi í Evrópusambandið. 

Evrópusambandið hefur sína eigin heimsvaldastefnu og hyggur á hernaðarbrölt. Og það sem meira er: Utan Evrópusambandsins getur Ísland rekið eigin utanríkisstefnu og hafi i frammi skoðanir á alþjóðamálum. Innan Evrópusambandsins er okkur ætlað að hafa sömu skoðun og Brusselvaldið.

Má ekki biðja um örlítið meiri samkvæmni?

Stöðvuðu ekki misþyrmingar

Trúnaður á milli kjósenda og flokka

Í siðuðu stjórnmálasamfélagi verða kjósendur að treysta því að stefna stjórnmálaflokks haldi eftir kosningar, að flokkur snúist ekki í 180 gráður um leið og hann kemst í tæri við völdin. Svigrúm sem stjórnmálaflokkar hafa til að mynda samsteypustjórnir og miðla málum sín á milli er hluti af hinu lýðræðislega ferli. Grundvallarmál stjórnmálaflokks geta ekki verið hluti af þeirri málmiðlun.

Flokkar sem fara fram með annað hvort eða mál mega vita að nái þeir ekki meirihlutafylgi verið þeir að gefa málið eftir. Samfylkingin fór fram með aðild að Evrópusambandinu í kosningunum 1999, 2003 og aftur 2007. Í hvert sinn sló flokkurinn málið af strax í kosningabaráttunni þar sem engar líkur voru á meirihlutasamstöðu.

Eftir kosningarnar 2009 bilaði trúnaður Vinstrihreyfingarinnar græns framboðs við kjósendur sína. Forysta Vg féllst á afarkosti Samfylkingar um að veita stuðning þingsályktun um að sækja um aðild að Evrópusambandinu.

Forysta Vinstrihreyfingarinnar græns framboðs þarf að laga bilunina frá vorinu 2009 áður en það verður um seinan. 

Skorað á þingflokk VG að fylgja ESB-stefnu flokksins