Jónas og valkvæða Evrópa

Jónas er þekktasta vörumerki íslenskra bloggheima. Þar stendur skrifað

Ísland er gengishrun, Evrópa er gengisfesta. Ísland er vaxtaokur, Evrópa er lágir vextir. Ísland er gerræði, Evrópa er skrifræði. Ísland er óregla, Evrópa er regla, Ísland er króna, Evrópa er evra. Ísland er gæludýraríki, Evrópa er jafnréttisríki. Ísland er bankahrun, Evrópa er bankafesta. Ísland er villimennska, Evrópa er siðmenning. Ísland er frændhygli, Evrópa er fagennska. Ísland er flokkshygli, Evrópa er fagmennska. Ísland er óráðsía, Evrópa er sparsemi. Hundruð eru skelfingu lostin yfir, að Evrópa taki völd af innlendum óþjóðalýð, sem hefur stjórnað Íslandi frá upphafi sjálfstæðis. 

Jónas dregur upp valkvæða mynd af Evrópu. Hann gleymir Auschwitch, fyrri heimsstyrjöld og seinni, nýlenduskeiði Evrópu. Grimmd, ofbeldi og áþján sem ríki Evrópusambandsins hafa staðið fyrir í gegnum aldirnar gerir alla íslenska yfirstétt allra tíma að kórdrengjum.

Valkvæð mynd af Evrópu er ekki sönn mynd af álfunni.

Hugleysi sem pólitískt vandamál

Engir peningar eru til að mæta kröfum um niðurfærslu skulda. Lífeyrissjóðir eiga ekki peninga og heldur ekki Íbúðarlánasjóður. Skuldarar fengu eina almenna aðgerð frá dómstólum, sem dæmdu gengislán ólögleg. Aðrar aðgerðir eru sértækar og beinast að afmörkuðum hópum sem út frá sanngirnissjónarmiðum eiga kröfu um leiðréttingu.

Ríkisstjórnin á að segja þjóðinni sannleikann. Ríkisstjórn sem ýmist hleypur í felur eða hagræðir sannleikanum um þjóðþrifamál er ekki á vetur setjandi.

Engin lausn í sjónmáli

Samfylkingin í klúbb kynþáttahaturs

Á heimasíðu Heimssýnar segir frá harðri gagnrýni Noam Chomsky á kynþáttahatur Evrópusambandsins gagnvart Tyrkjum. Í áratugi hafa Tyrkir óskað eftir inngöngu í sambandið en komið að lokuðum dyrum.

Chomsky, sem er bandarískur ríkisborgari, segir kynþáttahatur stjórna afstöðu Evrópusambandsins til Tyrkja sem eru múslímar. Í viðtali við tyrkneskt dagblað, sem birtist í endursögn hins danska Politiken, segir Chomsky einu raunverulegu ástæðuna fyrir því að Tyrkjum sé haldið utan Evrópusambandsins vera að þeir séu múslímar. Hann vitnar til orða Angelu Merkel, kanslara Þýskalands, sem sagði arfleifð Evrópu byggjast á gyðingdómi og kristni. Múslímar verða að sætta sig við þá staðreynd, er haft eftir Merkel.

Samfylkingin er helsti talsmaður Evrópusambandsins á Íslandi. Er ekki rétt að flokkurinn geri hreint fyrir sínum dyrum um afstöðu sína til múslíma í ljósi gagnrýni Íslandsvinarins Noam Chomsky?

Landsbankinn bakhjarl auðmanna í stríði

Útrásarauðmenn eru í stríði gegn slitastjórn Glitnis sem lögsækir Jón Ásgeir, Pálma í Fons, Hannes Smára og fleiri í New York. Helsta vopn auðmanna er Baugsmiðlar sem síðustu daga færast í aukana í árásum á slitastjórn Glitnis. Landsbankinn heldur móðurfélagi Baugsmiðla, 365-miðlum, á floti með sérstökum samningi við Jón Ásgeir.

Eignarhaldi Jóns Ásgeirs á fjölmiðlum fylgir misnotkun enda er tilgangurinn með eignarhaldinu beinlínis að hafa áhrif á opinbera umræðu.

Landsbankinn er nær alfarið í eigu ríkisins og ætlað að vera hornsteinn í endurreisn fjármálastofnana. Horsteinn lagður í kviksyndi spillingar útrásarauðmanna mun vitanlega sökkva fyrr heldur en seinna.