Grasrót og lýðræði

Ómögulegt er að hvort klofningur þingflokks Borgarahreyfingarinnar frá hreyfingunni sjálfri hafi verið óhjákvæmileg. Borgarahreyfingin var grasrótarhreyfing og fékk stuttan tíma til að þroskast áður en út í alvöruna var komið. Samstaða var ekki í þingflokknum og ekkert skipulag utan þingflokksins sem gat leyst úr vandanum. Þegar festa átti skipulag voru skotgrafirnar þegar teknar og án samstöðu um félagsform er lítt hægt að komast áfram.

Á Íslandi er tiltölulega einfalt að stofna stjórnmálaflokk en fjarska flókið að láta hann lifa og dafna. Með fjóra starfandi flokka er eiginlega búið að dekka valkostina sem raunhæft er að bjóða fram. Sérmálsflokkar gera sig annað slagið þegar fjórflokkarnir sinna einu máli illa, eða gerast sekir um meinlokur þar sem ekki er hlustað á raddir út í í samfélaginu, s.s. í kvótamálinu, jafnréttisbaráttu og núna síðast í hrunuppgjöri.

Lýðræðið þarf form og stjórnmálaflokkar sem ekki geta sett sér formreglur eiga ekkert erindi í stjórnmál.

Íhuga áframhald á samstarfi

Össur plottar nýja ríkisstjórn

Á meðan kastljósinu er beint að Jóhönnu Sigurðardóttur forsætisráðherra, þreytu hennar og fjölmiðlafælni, er Össur Skarphéðinsson hæstráðandi til sjós og lands í Samfylkingunni að plotta nýja ríkisstjórn. Frétt um tíða fundi Össurar og Þorsteins Pálssonar fyrrum formanns Sjálfstæðisflokksins var hvorki tilviljun, né var um afmarkað viðfangsefni að ræða, þ.e. Evrópumálin. Fréttin átti að sýna að Samfylkingin og Sjálfstæðisflokkurinn geta talað saman.

Samfylkingin er stjórnsæknasti flokkur landsins, getur ekki þrifist nema hafa völd. Í Sjálfstæðisflokknum hittir Samfylkingin fyrir tækifærissinnaða stjórnmálamenn eins og Þorgerði Katrínu Gunnarsdóttur, Illuga Gunnarsson og Guðlaug Þór sem ekki mega til þess hugsa að fara í gengum kosningar á næstunni.

Það mun gliðna á milli ríkisstjórnarflokkanna í vetur þegar reynir á samstarfið í erfiðum niðurskurði. Bakland Vg er í uppreisnarhug eftir svik forystunnar í ESB-málinu og óeining er í þingflokknum þar sem klíkan í kringum Steingrím J. er í minnihluta. Vegna eftirgjafar í ESB-málinu þarf flokkurinn að vera fastur fyrir í umhverfismálum og það mun verða virkjunarsinnum í Samfylkingunni þyrnir í augum.

Samfylkingin er flokkur án leiðtoga, Jóhanna hættir á kjörtímabilinu. Össur getur boðið Sjálfstæðisflokknum forsætisráðuneytið.

Vetur langra hnífa er genginn í garð.