Rányrkja ESB-flotans

Sameiginleg sjávarútvegsstefna ESB var sett á laggirnar til að skapa meginlandsríkjunum samningsstöðu þegar Bretar, Írar, Danir og Norðmenn sóttu um aðild í byrjun áttunda áratug síðustu aldar. Sjávarútvegsstefnan hefur reynst illa, segir leiðarahöfundur Sydsvenska Dagbladet fyrir helgi, bæði fyrir evrópskt hafsvæði þar sem rányrkja skilur eftir sig dauða sjó en ekki síður fyrir fátæk Afríkuríki sem selja alltof stórum evrópskum fiskveiðiflota aðgang að heimamiðum.

Leiðarahöfundurinn á ekki orð til að lýsa því ráðslagi að skattgreiðendur í ESB-ríkjum skuli látnir borga hálfan annan milljarð sænskra króna fyrir útgerðina úti fyrir ströndum Vestur-Afríku.

Hér er leiðarinn.

Icesave er spurning um reisn eða uppgjöf

Icesave-samningurinn er tveggja þátta. Annars vegar er hann afleiðing af óheftri fjármálastarfsemi óreiðufólks og hins vegar milliríkjasamningur þar sem í húfi er það litla sem eftir er af orðspori landsins.  Óheft fjárplógsstarfsemi íslensku bankanna í útlöndum var í skjóli regluverks Evrópusambandsins. Samningurinn leggur alla ábyrgðina á herðar Íslendinga og er aukinheldur þannig úr garði gerður að við stöndum undir hærri fjárhæðum en lög standa til, sbr. gagnrýni Ragnars Hall.

Efnahagslegu, lagalegu og siðferðislegu álitamálin í Icesave-samningunum eru slík að óráð er að samþykkja hann. Umræðan er nær öll á þann veg að forsenda fyrir endurreisn þjóðarinnar er að við höfnum samningnum með þeim orðum að semja verði upp á nýtt þar sem sanngirni kæmi í stað yfirgangs.

Þjóðin er tilbúin að berjast fyrir réttlætinu í Icesave. Ríkisstjórnin er á hinn bóginn búinn að gefast upp. 

 

Utanumhaldari Jóhönnu gefur línuna

Á eftir Steingrími J. og Össuri Skarphéðins er Hrannar B. Arnarsson valdamesti maðurinn í ríkisstjórninni. Hann er önnur kynslóð utanumhaldara Jóhönnu Sigurðardóttur, tók við því hlutverki af fóstra sínum Óskari Guðmundssyni. Smettiskrudduskot Hrannars B. á Evu Joly var hugsað sem línugefandi í besta anda vinstristjórnmála þar sem valdamiðjan lætur hjörðina vita hvaða skoðun sé góð og gild.

Ríkisstjórnin vill samþykkja Icesave-samningana og færa Evrópusambandinu landið og miðin á silfurfati. Allt sem truflar óþurftarverk ríkisstjórnarinnar er vanheilagt, Eva Joly meðtalin.

Viðbrögðin við línugjöf Hrannars B. sýna að ríkisstjórnin er algjörlega úr takti við þjóðina. Almenningur vill ekki gefast upp fyrir ofríki Breta, Hollendinga og Evrópusambandsins en ríkisstjórnin er komin í neðanjarðarbyrgið og hefur tryggt sér besta rýmið.

Þjóðin á ekki skilið þessa ríkisstjórn.