Vinstri grænir og óvitinn með eldspýturnar

Vinstri grænir féllust á það að utanríkisráðherra, Össur Skarphéðinsson, myndi leggja fram þingsályktunartillögu um aðildarumsókn að Evrópusambandinu. Á fyrsta blaðamannafundi oddvita nýrrar ríkisstjórnar talaði Steingrímur J. Sigfússon formaður Vinstri grænna í austur og vestur um afstöðu flokksins til málsins.

Formaðurinn sagði að Vinstri grænir væru áfram andstæðingar inngöngu Íslands en jafnframt að þingmenn væru ekki bundnir af öðru en samvisku sinni þegar þeir greiddu atkvæði. Hvort það þýddi að gefið væri út sérstakt Júdasarleyfi til þingmanna að svíkja kjósendur sína í þessu tiltekna máli eða að sérhver þingmaður væri orðinn þingflokkur út af fyrir sig með eigin stefnuskrá verður formaðurinn að útskýra. Viðstaddir blaðamenn, allir íslenskir og eftir því rænulausir, inntu Steingrím J. ekki eftir því hvort Vinstri grænir væru að uppgötva það í dag að samkvæmt stjórnarskrá væru þingmenn aðeins bundnir sannfæringu sinni - og það gildir í öllum þingmálum.

 

Hér er kaflinn um Evrópumál í samstarfsyfirlýsingu ríkisstjórnarinnar:

 

Ákvörðun um aðild Íslands að Evrópusambandinu verði í höndum íslensku þjóðarinnar sem mun greiða atkvæði um samning í þjóðaratkvæðagreiðslu að loknum aðildarviðræðum. Utanríkisráðherra mun leggja fram á Alþingi tillögu um aðildarumsókn að Evrópusambandinu á vorþingi. Stuðningur stjórnvalda við samninginn þegar hann liggur fyrir er háður ýmsum fyrirvörum um niðurstöðuna út frá hagsmunum Íslendinga í sjávarútvegs-, landbúnaðar-, byggða- og gjaldmiðilsmálum, í umhverfis- og auðlindamálum og um almannaþjónustu. Víðtækt samráð verður á vettvangi Alþingis og við hagsmunaaðila um samningsmarkmið og umræðugrundvöll viðræðnanna. Flokkarnir eru sammála um að virða ólíkar áherslur hvors um sig gagnvart aðild að Evrópusambandinu og rétt þeirra til málflutnings og baráttu úti í samfélaginu í samræmi við afstöðu sína og hafa fyrirvara um samningsniðurstöðuna líkt og var í Noregi á sínum tíma.

 

Textinn er undarlegur, svo ekki sé meira sagt. Samkvæmt orðanna hljóðan mun utanríkisráðherra leggja fram tillögu um aðildarumsókn áður en skilgreind samningsmarkmið liggja fyrir. En þegar þingið er búið að afgreiða tillöguna á að efna til víðtæks samráðs og skilgreina samningsmarkmið. Hér er málum snúið á hvolf. Enginn með réttu viti sækir fyrst um aðild að félagsskap eins og Evrópusambandinu án þess að vera áður búinn að hafa samráð, skilgreina samningsmarkmið og fá umboð á þeim grundvelli. Eins og textinn stendur þá fær óvitinn eldspýtustokk í hendur og við hin eigum að vona að hann kveiki ekki í þjóðarheimilinu.

Athygli vekur að ekkert er sagt til um skuldbindingar þingmanna Vinstri grænna um það hvort þeir ætli að greiða tillögunni atkvæði sitt. Machiavelli hefði verið fullsæmdur af þessu pólitíska kukli.

Ný ríkisstjórn

Valdaflokkur og andstöðuflokkur para sig

Fyrir áratug var stofnað til Samfylkingarinnar til að félagsmenn hallærisflokka gætu náð völdum. Á sama tíma stofnaði Steingrímur J. Vinstri græna til að vera í andstöðu við ríkjandi stjórnmálahugmyndir. Flokkarnir ganga í ríkisstjórnarsamstarf eftir stutt tilhugalíf í starfsstjórn. Dægurmálin eru nokkur þegar komin á borð stjórnarinnar, svo sem tæplega tíu prósent atvinnuleysi, tröllaukinn halli á ríkissjóði og niðurskurðarkröfur Alþjóða gjaldeyrissjóðsins á ríkisútgjöldum

Dægurmálin falla í skugga stærsta úrlausnarefnis lýðveldissögunnar: Hvort Ísland fórni fullveldinu og sæki um aðild að Evrópusambandinu eða verði áfram með forræði eigin mála.

Stjórnarflokkarnir báðir kenna sig við vinstristjórnmál. Nokkur kaldhæðni liggur í þeirri staðreynd að þá fyrst ná íslensku vinstriflokkarnir að mynda meirihlutastjórn þegar hugtökin vinstri og hægri skipta engu máli í stjórnmálaumræðunni. Til marks um það er að enginn stjórnmálamaður á vinstri kanti litrófsins hefur vakið máls á auknum ríkisrekstri í kjölfar stórkostlegasta hruns einkarekstrar sem sögur fara af. Samanlagðir íslenskri vinstrimenn gera ráð fyrir að þegar öldur lægir muni einkareksturinn taka við þeim fyrirtækjum sem núna eru gjaldþrota í höndum ríkisvaldsins.

Hvernig stjórn verður ríkisstjórn Samfylkingar og Vinstri grænna? Í fyrsta lagi verður hún úrvinnslustjórn fjármálahrunsins. Í öðru lagi verður hún ráðleysisstjórn þar sem engin merki sjást um að heildstæð hugmynd liggi fyrir um hvert beri að stefna með íslenskt samfélag.

Opin spurning er hvort ríkisstjórn Samfylkingar og Vinstri grænna verði samstjórn kvislinga og júdasa. Úr því fæst skorið síðdegis sunnudaginn tíunda maí tvöþúsundogníu.

Ný ríkisstjórn á morgun