Icesave hindraði sameiningu ráðuneyta

Frumvarp um sameiningu ráðuneyta iðnaðar, sjávarútvegs og landbúnaðar er tilbúið á skrifstofu forsætisráðherra. Til stóð að leggja frumvarpið fram í desember en á síðustu stundu var hætt við. Jón Bjarnason sjávarútvegs- og landbúnaðarráðherra er andvígur sameiningu ráðuneytanna.

Jóhanna Sigurðardóttir og Össur Skarphéðinsson, sem helst véla um þessi mál fyrir Samfylkinguna töldu að ef frumvarpið yrði lagt fram myndi Jón Bjarnason greiða atkvæði gegn Icesave-frumvarpi ríkisstjórnarinnar. Það frumvarp stendur tæpt og líkur á að stjórnin falli með frumvarpinu.

Jóhanna, össur og Steingrímur J. hættu við í bili að leggja fram frumvarp um sameiningu ráðuneytanna.

Meistari Óskar

Ævisaga Snorra Sturlusonar er í höndum Óskars Guðmundssonar aldarspegill íslenskra miðalda, söguleg valdastúdía og nákvæmasta greining, sem heimildir leyfa, á lífshlaupi mesta höfundar sem Ísland hefur alið.

Óskar var vel nestaður þegar hann hóf Snorraleiðangur sinn. Hann hafði sökkt sér í miðaldatexta við útgáfu á  minnisverðum tíðindum frá  landnámi til fimmtándu aldar og verið meðritstjóri að útgáfu sögu biskupsstólanna. Ekki síður notadrjúg er reynsla Óskars af stjórnmáladeilum samtímans en hann er höfundur átakasögu Alþýðubandalagsins (1987). Óskar var handgenginn Ólafi Ragnari þegar Alþýðubandalagið logaði stafnanna á milli í átökum sitjandi forseta lýðveldisins og aðalsamningamanns Icesave-deilunnar, Svavars Gestssonar. Þar á eftir var Óskar utanumhaldari Jóhönnu Sigurðardóttur á Þjóðvakatímabilinu og þar í kjölfarið.

Innsæi aðferðafræði stjórnmálanna, t.d. hvernig menn klæða persónulegan metnað í málefnalegan búning, er forsenda fyrir því að skilja valdastreitu hvort heldur hún er á miðöldum eða samtímanum.

Óskari fyrirgefst að reyna stöku sinnum að gera norrænan menningarheim evrópskari en efni standa til.

Stíll Óskars hæfir efninu vel. Látlaus og hæfilega fyrnskur án þess að verða tilgerðarlegur. Hér er dæmi þar sem ræddar eru ástæður þess að nýkvæntur Snorri gerir sér ekki bú á Vesturlandi þar sem er föðurarfleifðin heldur sunnanlands hjá Oddaverjum sem fóstruðu hann.

...drengur sem alinn hafði verið upp innan um bækur á Suðurlandi en ekki kropið um lyng fyrir vestan.

Bókin um Snorra er höfundarverk Óskars en hann fékk liðstyrk til að sitja við skriftir. Gamall samherji hans úr Alþýðubandalaginu og áhugamaður um Sturlungu reyndist góður liðsmaður við að ná í þær bjargir sem gerðu rannsóknavinnuna mögulega. Árið í ár hefur verið Einari Karli Haraldssyni mótdrægt. Hann getur þó sem forseti Snorrasambandsins stoltur sagt 2009 merkisár og verið ánægður með sinn hlut; þá kom út Snorri Sturluson eftir Óskar Guðmundsson.