Spron og Byr í gjaldþrot

Sparisjóðir voru á sínum tíma stofnaðir til að þjóna almenningi og gerðu það skammlaust lengi vel. Þegar græðgisvæðingin skall á vildu stjórnendur og stofnfjáreigendur komast yfir eigið fé sparisjóðanna með vafasömum hætti. Alþingi reyndi að stemma stigu við yfirganginum og samþykkti frumvarp í febrúar 2004 með 43 atkvæðum gegn einu sem átti að vernda almannahagsmuni.

Græðgisliðið linnti samt ekki látunum fyrr en það tókst að févæða sparisjóðina til fulls og þá tóku snillingarnir við að véla með peninga sem þeir áttu ekki. Alþjóð veit afleiðingarnar, Guðmundur Hauksson og félagar keyrðu sjóðina í þrot.

Spron og Byr koma núna með betlistaf í hendi til ríkivaldsins og vilja endurfjármögnun með almannafé. Ríkisstjórnin á að segja nei - stóru sparisjóðirnir Spron og Byr gegna engu hlutverki lengur fyrir almenning og það á ekki að láta þá fá krónu með gati.

 

 

 

Ódæmdir glæpamenn og atvinnulífið

Talsmaður Samtaka atvinnulífsins stekkur upp á nef sér þegar forsætisráðherra segir siðleysi að fyrirtæki komi sér undan að greiða starfsfólki umsamin laun en borgar eigendum sínum á sama tíma arð. Til skamms tíma réðu ríkjum hjá Samtökum atvinnulífsins fjármálafurstar sem komu þjóðinni á vonarvöl með svikum og prettum.

Talsmaður atvinnulífsins verður að virða forsætisráðherra og þjóðinni allri það til vorkunnar að á meðan ódæmdir glæpamenn valsa um götur og torg er þolinmæðin lítil gagnvart atvinnulífinu almennt. 

Samtök atvinnulífsins skulda þjóðinni greinargerð fyrir sínum þætti í hruninu. Á meðan engin merki iðrunar og sjálfsgagnrýni sjást hjá samtökum atvinnurekenda verða þau í skammarkróknum. Og þeir atvinnurekendur sem víkja tommu frá þröngum vegi dyggðarinnar kalla yfir sig fordæmingu.

Atvinnurekendur reiðir Jóhönnu

Hverjum er treystandi fyrir bankarekstri?

Þórður Friðjónsson forstjóri Kauphallarinnar segist vilja einkavæða bankana sem fyrst. En hverjum er treystandi fyrir bankarekstri á Íslandi? Fyrir nokkrum vikum var á dagskrá að útlendingar kæmu að bankarekstri hér en fátt segir af þeirri ráðagerð. Þá voru uppi meldingar frá atvinnulífinu að stofna banka en loftið fór úr þeirri blöðru.

Fyrirsjáanlega mun ríkið reka bankastarfsemi hér um nokkra hríð. Til að gefa svigrúm fyrir nýja aðila að koma inn á þennan markað ætti að leyfa sparisjóðunum að fara lóðbeint á hausinn. Það þjónar engum tilgangi að ríkið reki þrjá banka og endurfjármagni bullrekstur sparisjóðanna í ofanálag. Þeir sparisjóðir sem keyrðu sig í þrot eiga ekkert tilkall til almannafjár.

Ókeypis peningar Framsóknartryggva

Víða í þróuðum hagkerfum Vesturlanda eru áhyggjur af vítahring verðhjöðnunar sem felur í sér almenna og langvarandi verðlækkun og veldur samdrætti í hagkerfum. Til að forðast kreppu verðhjöðnunar eru uppi hugmyndir um að seðlabankar auki peningamagn í umferð. Á hagfræðimáli heitir það quantative easing - en á mannamáli að prenta peninga.

Kreppan er alþjóðleg og síðustu daga er til umræðu að auka peninga í umferð á alþjóðavísu. Ástæðan fyrir því að margir gjalda varhug við þessum hugmyndum er sú að peningaprentun mun auka verðbólgu. 

Íslenska útgáfan af peningaprentun, kennd við Framsóknartryggva, er að fella niður fimmtung skulda almennings og fyrirtækja.

Tillagan er siðlaus vegna þess að hún hyglar óráðssíu en refsar ráðdeild.

Þeir sem telja ástæðu til að auka peningamagn í umferð á Íslandi ættu að leggja til að hver Íslendingur fengi tiltekna upphæð inn á reikning sinn. Við erum neysluglöð þjóð og engin hætta á að fólk myndi liggja á ókeypis peningum.

Málið er leyst, Framsóknartryggur, afsakið, Framsóknartryggvi.

 

20% niðurfelling skulda er lélegt tilboð

Tryggvi Þór Herbertsson þingmannsefni Sjálfstæðisflokksins er kominn í framsóknarbrækurnar og býður fimmtungs niðurfærslu á skuldum einstaklinga og fyrirtækja. Þetta er nánasarlegt tilboð í ljósi þess að pennastrikið á skuldir getur allt eins verið 100% - það kostar alls ekkert meira blek.

Þess vegna: Afnemum allar skuldir heimila og fyrirtækja. Verum eins og árið 2007 vari að eilífu.

Læmingjahneigð Sjálfstæðisflokksins

Læmingjar eiga það til að efna til fjöldasjálfsmorða með því að þramma allir sem einn fram af bjargbrúninni. Prófkjör Sjálfstæðisflokksins sýnir áþekka tilburði. Ættarauðvald, Glitnissjóður 9, Árni Johnsen og mosfellska Framkonan sem vill fyrst ganga inn í Evrópusambandið og spyrja síðan hvort það henti okkur: Þetta er liðsuppstillingin fyrir kosningarnar í vor. Hver skrifaði eiginlega þennan tragíkómíska brandara?

Skyldulesning um Evrópu og heimskreppuna

Annað slagið rekst maður á skýra og beitta greiningu á málefnum líðandi stundar. Hér er ein slík. Höfundurinn er Simon Johnson, fyrrum aðalhagfræðingur Alþjóða gjaldeyrissjóðsins og nú prófessor hjá MIT í Bandaríkjunum.

Sjálfstæðisflokkurinn verður unglingaflokkur

Tvíeykið Illugi Gunnarsson og Bjarni Benediktsson ætlar að taka efstu sætin í stærstu kjördæmunum. Báðir eru á stjórnmálalegum unglingsaldri og hvorugur býr að ráðherrareynslu. Ein túlkun á úrslitum prófkjörsins er að Sjálfstæðisflokkurinn sé að refsa ráðherrum sínum í síðustu ríkisstjórn, Guðlaugi Þór og Þorgerði Katrínu.

Önnur túlkun er að gamla ættarauðvaldið, afgangurinn af fjölskyldunum fjórtán, hafi komið ár sinni vel fyrir borð í prófkjörinu.

Sjálfstæðisflokkurinn veikist við blóðtökuna sem flokkurinn verður fyrir með brotthvarfi manna eins og Geirs H. Haarde og Björns Bjarnasonar. Bjarni Benediktsson verður krýndur formaður á landsfundi flokksins á næstunni og þótt hann þyki álitlegt foringjaefni er of stutt til kosninga til að hann nái að sanna sig.

 

Krónan virkar

Svissneski seðlabankinn reynir að veikja svissneska frankann með því að kaupa evrur. Sterlingspundið hefur lækkað um tugi prósenta gagnvart helstu gjaldmiðlum síðasta misseri og sænska krónan sömuleiðis. Í fyrstu viku mars voru gerðir nærri tuttugu þúsund skortsamningar sem veðja á veikingu evru innan fárra mánaða.

Allir gjaldmiðlar heimsins eru á flökti vegna þess að heimskreppa ríður húsum og enginn veit hvenær hún gengur yfir og hverjir verða verst úti.

Gjaldmiðlar þjóna margvíslegu hlutverki. Eitt hlutverkanna er sveiflujöfnun. Þegar högg kemur á hagkerfi gefur gjaldmiðillinn eftir. Íslenska hagkerfið varð fyrir hruni fjármálastofnana og krónan gaf eftir. Núna er hún að styrkjast hægt og bítandi.

Þeir sem hallmæla krónunni vilja gefa frá sér mikilvægt tæki til sveiflujöfnunar. Ef við hefðum ekki krónuna væri hér meira atvinnuleysi en ella, harkalegri niðurskurður ríkisfjármála og almenn kauplækkun í ofanálag.

 

Má búa vel fyrir minna en 40 milljónir króna?

Samkvæmt frétt Morgunblaðsins skulda fjögur þúsund húseigendur 40 milljónir króna eða meira í húsnæði sínu. Á Íslandi öllu munu vera 80 þúsund húseigendur og langstærsti hluti þeirra í skilum.

Þeir sem eiga húseignir fyrir 40 milljónir króna og þar yfir myndu teljast þokkalega staddir hvað efni áhrærir. Ef fólk með slíkar eignir er í vandræðum með sitt mætti kannski íhuga að það minnkaði við sig áður en almannafé er notað til að niðurgreiða húsakostinn?