Spiegel: Hanna Katrín gengur erinda ESB á Íslandi

Der Spiegel, virt þýskt tímarit, segir Evrópusambandið hyggja á stækkun í norðri, með áherslu að fá Grænland, Ísland og Noreg inn í sambandið. Sjávarútvegur er í forgrunni stækkunarstefnu ESB í norðurhöfum. Viljayfirlýsing sem Hanna Katrín atvinnuráðherra skrifaði undir í síðustu viku, án samráðs við alþingi, er liður í norðursókn ESB.

Blaðamaður Spiegel í Brüssel, höfuðstöðvum ESB, Timo Lehmann, skrifar fréttina sem birtist 3.júlí síðast liðinn, bæði í net- og prentútgáfu. Þjóðverjar eru áhugasamir um Ísland frá dögum þriðja ríkisins. Enn er sá áhugi fyrir hendi, þýskir fjölmiðlar, t.d. fréttaveitan nordost24.de, endurbirta frétt Spiegel.

Sókn ESB á norðurslóðir byrjar með samstarfi í viðkvæmum málaflokkum, s.s. fiskveiðum og varnar- og öryggismálum. Hanna Katrín atvinnuráðherra gerði sitt í þágu ESB, skrifaði undir viljayfirlýsingu í síðustu viku um ,,samstarf" við ESB í sjávarútvegi. Skælbrosandi Hanna Katrín er ljósmynduð með sjávarútvegsstjóra ESB, Costas Kadis, að selja frumburðarrétt Íslendinga í hendur útlendinga. Auðvitað, enn sem komið er, heitir það ,,samráð og samvinna". Innlimun klædd í falleg orð.

Ráðuneytið tilkynnti samkomulagið við ESB tveim dögum eftir að alþingi fór í sumarfrí. Hanna Katrín neitar að tjá sig um viljayfirlýsinguna, þegar Vísir innti ráðherra eftir hvað stæði fyrir dyrum. Hanna Katrín óttast fjölmiðlaumræðu um baktjaldamakkið þar sem þjóðarhagsmunum er fórnað fyrir ESB-þráhyggju.

Evrópusambandið á enga aðkomu að hafsvæðinu í kringum Ísland. Engin nágrannaþjóða okkar í austri og vestri eru ESB-ríki, þ.e. Grænland, Færeyjar og Noregur. Með einni undirskrift veitir ráðherra í ríkisstjórn Íslands framandi stórveldi ítök og afskiptarétt af íslensku hafsvæði. Samkomulagið er stórpólitísk aðgerð en Hanna Katrín spurði hvorki kóng né prest, enda gengur hún erinda ESB en ekki íslenskra hagsmuna.

ESB hugsar sér gott til glóðarinnar með ríkisstjórn Kristrúnar Frost við völd. Sendinefnd ESB á Íslandi bætir við starfsfólki, býður rúma milljón á mánuði. Það vantar liðsauka til að telja Íslendingum trú um að ógild umsókn sé í fullu gildi. Blekking er forsenda hraðferðar í sæluríkið í austri.

Samkomulagið sem Evrópusambandið fékk Hönnu Katrínu til að skrifa undir er liður í norðurslóðasókn ESB. Nánar um þá áætlun á morgun.

  

 

 

Mikilvægt að fá upplýsingar um viljayfirlýsinguna

Málfrelsi á alþingi skert í þágu ESB

Föstudaginn 11. júlí beitti stjórnarmeirihlutinn svokölluðu kjarnorkuákvæði í þingsköpum alþingis til að binda endi á umræður. Átyllan var löng umræða um tvöföldun veiðigjalda. Raunveruleg ástæða var löngu ákveðin heimsókn Úrsúlu von der Leyen forseta framkvæmdastjórnar ESB til Íslands, sem hófst þrem dögum eftir að alþingi var komið í sumarfrí.

Stjórnarmeirihlutinn vildi ekki að alþingi væri að störfum þegar heimsókn von der Leyen stæði yfir. Ríkisstjórnin ætlaði að leggja undir sig umræðuna með ESB-boðskap og vildi ekki andmæli á þingi.

Boðskapurinn var undirbúinn með fyrirvara. Daginn fyrir heimsókn von der Leyen tilkynnti Hanna Katrín samkomulag við ESB um sjávarútvegsmál. Varnar- og öryggismál voru næst á dagskrá, hjá Þorgerði Katrínu, Kristrúnu og von der Leyen. Engin andmæli á alþingi eða fyrirspurnir til ráðherra enda alþingi komið í sumarfrí.

Erna Bjarnadóttir kom auga á hvernig ríkisstjórnin beitti dagskrárþunga sínum til að umskapa orðræðuna um Evrópusambandið. Erna skrifar Heimssýnarblogg:

Heimsókn Ursulu von der Leyen, forseta framkvæmdastjórnar ESB í síðustu viku, virðist leynt og ljóst vera liður í því að færa Ísland í átt að aðildarferli að sambandinu. Þetta er þó vitaskuld hvergi sagt. Í orðum og yfirlýsingum er þess í stað sífellt vísað til "samstarfs", "viljayfirlýsinga" og talað um "sameiginlegra framtíðarsýn".

Sú spurning vaknar því hvort hér sé farið af stað einhvers konar "aðlögunarsamstarf". Þegar utanríkisráðherra bregst svo við gagnrýni með því að kalla hana heimóttarskap er hún ekki að taka á efnisatriðum heldur leitast við að setja neikvæðan merkimiða á gagnrýnendur sína. Þannig reynir hún að beina umræðunni frá kjarna málsins í dóm yfir þann sem tjáir sig.

Þetta er ekki nýtt fyrirbrigði. Í stað þess að færa rök fyrir pólitískum breytingum, er stundum farin sú leið að breyta einfaldlega orðræðunni sjálfri. Merking hugtaka er færð til en stefna og ákvarðanir haldast óbreyttar undir yfirborðinu. [...]

Fundur utanríkismálanefndar Alþingis í dag snýst því ekki aðeins um efnisatriði þessara viðræðna og samninga, heldur líka um þessa nýju pólitísku tækni, það er að færa umræðuna yfir á nýtt svið þar sem ekki má lengur segja "aðildarferli" aðeins "framtíðarsýn" og "samráð".

Hárrétt hjá Ernu. Undir fyrirslætti eins og ,,framtíðarsýn" og ,,samráð" skal Ísland gert að ESB-ríki. Ríkisstjórnin telur ekki eftir sér að hefta málfrelsi á alþingi til að ESB-boðskapurinn heyrist einn i umræðunni. Tilskipunarvaldi Evrópusambandsins er beitt á Íslandi af hálfu ríkisstjórnar Kristrúnar Frostadóttur.

Daginn fyrir beitingu kjarnorkuákvæðisins, afnám málfrelsis á alþingi, steig Kristrún í pontu á þjóðþinginu og sagði:

Ég lýsi því yfir fyr­ir hönd meiri­hlut­ans að við mun­um verja lýðveldið Ísland, við mun­um verja stjórn­skip­an lands­ins og heiður Alþing­is.

Undirförul Kristrún vinnur nótt sem nýtan dag að lokamarkmiðinu, að lýðveldið Ísland verði hjálenda Evrópusambandsins. Kristrún kennir vegferðina við ,,vörn og heiður". Öfugmælin verða ekki meiri.

„Allt sem við óttuðumst reyndist rétt“

Samfylking vill einangra Ísland frá Bandaríkjunum

Stefna Samfylkingar í utanríkismálum gengur er að flytja Ísland undir áhrifasvæði Evrópusambandsins. Lokamarkmiðið er að Ísland verði ESB-ríki. Samstarfi við Bandaríkin um öryggis- og varnarmál verður fórnað í þágu lokamarkmiðsins, ESB-Ísland.

Tveir stjórnarflokkanna, Samfylking og Viðreisn, eru samstíga í ESB-áherslum. Flokkur fólksins hefur ekki utanríkisstefnu. Opinber heimsókn Ursulu von der Leyen forseta framkvæmdastjórnar Evrópusambandsins er upphaf að leiftursókn ESB-sinna.

Guðrún Hafsteinsdóttir formaður Sjálfstæðisflokksins gagnrýndi Brussellóðarí krataflokkanna tveggja. Af hálfu Kristrúnar forsætis var látin svara Dagbjört Hákonardóttir þingmaður Samfylkingar og fulltrúi í utanríkismálanefnd alþingis.

Svar Dagbjartar birtist á Vísi undir yfirlætislegri fyrirsögn: Vill Sjálfstæðisflokkurinn láta taka sig alvarlega?

Í greininni, sem er um öryggis- og varnarmál, er ekki minnst einu orði á varnarsamninginn við Bandaríkin sem hefur verið hornsteinn í utanríkisstefnu Íslands í 75 ár. Í stað greiningar og yfirvegunar á utanríkismálum er boðið upp á orðafroðu sem ber vitni grátlegri grunnhyggni. Ein efnisgreinin byrjar svona:

Það þarf ekki að minna formann Sjálfstæðisflokksins að stríð geisar í Evrópu og eðli sem og form öryggisógna taka gífurlega hröðum breytingum. Þá gildir öllu að taka höndum saman við okkar helstu bandamenn í Evrópu sem eru og verða okkar mikilvægasti viðskiptavettvangur.

Ísland er á miðju Norður-Atlantshafi. ,,Evrópan" sem Dagbjört talar um er meginland kallað Evrasía. Þar geisar stríð sem er vandamál meginlandsins, ekki eyju á miðju Norður-Atlantshafi. Stríð á meginlandi Evrasíu, ekki síst stórstríð, hafa allt aðra pólitíska og menningarlega merkingu hér á landi en á heljarslóð austan hafs. Í fyrra stríði öðlast Ísland fullveldi og við stofnum lýðveldi þegar sá fyrir endalok seinna stríðs. Blessað stríðið, var sagt í íslenskum sveitum og sjávarplássum fyrir miðja síðustu öld.

Úkraínustríðið er notað af ESB-sinnum sem skálkaskjól. En það er ekkert skjól að fá hjá ESB í hörðum heimi alþjóðastjórnmála. Fari sem horfir, að Úkraínustríðinu ljúki með rússneskum sigri, mun Evrópusambandið skjálfa og nötra í áravís, ef ekki áratugi. Óvígur rússneskur á austurlandamærum ESB er ekki íslenskt vandamál - en yrði það ef Íslendingar álpuðust inn í ESB. Íslenskir ESB-sinnar, eins og Dagbjört staðfestir, eru úti í móa þegar kemur að skilningi á alþjóðapólitík. Þeir sjá aftur í hillingum þægilega innivinnu í Brussel.

Öryggis- og varnarmál Íslands taka ekki ,,gífurlega hröðum breytingum" líkt og Dagbjört vill vera láta. Aðalvarnir okkar frá í seinna stríði er nátengdar bandarískum öryggis- og varnarhagsmunum. Það gildir enn.

Til skamms tíma litu Bandaríkin svo á að útvörður þeirra í austri væri Vestur-Evrópa. Það er ástæðan fyrir stofnun Nató 1949. Á seinni árum líta Bandaríkin á svokallað GIUK-hlið sem útvörð í austri. GIUK stendur fyrir Grænland, Ísland og Bretland og hafsvæðin þar í kring. Áhugi Bandaríkjanna að ná Grænlandi undan dönskum áhrifum er afleiðing af breyttri stefnu í Washington.

Stefna Samfylkingar og Viðreisnar, að gera Ísland að ESB-ríki, mun leiða til ógæfu, bæði innanlands og í samskiptum við Bandaríkin. Fyrr heldur en seinna ris þjóðmálahreyfing hér á landi sem hefur nánari samband við Bandaríkin á stefnuskrá - gagngert til að losna undan fyrirsjáanlegri ESB-áþján. Þetta er ávísun á innanlandsófrið milli ESB-sinna og Bandaríkjasinna. Washington og Brussel munu ota sínum tota, þannig starfa stórveldi. Smáþjóð sem tvístígur í öryggis- og varnarmálum verður illa úti þegar stórveldi eiga í hlut.

Í viðsjám alþjóðastjórnmála eiga Íslendingar að kappkosta að gefa stórveldum ekki færi á sér. Við þekkjum af góðu einu samstarfið við Bandaríkin um öryggis- og varnarmál. Teflum ekki í tvísýnu varnarsamningnum frá 1951. Höldum okkur frá hryggðarmyndinni sem kallast Evrópusamband, meginlandsklúbbur gamalla nýlenduvelda og stríðsjálka er lifa á fornri frægð vestast í Evrasíu. 

 

Tjáning, hatur og hinseginfáni lögreglu

Bandarískur lögfræðingur undrast réttarfarið á Íslandi þar sem lögregla í verktöku fyrir Samtökin 78 ákæra mann og annan fyrir að andmæla transáróðri í leik- og grunnskólum. Sá bandaríski segir:

Ég skil ekki hvernig þetta komst á ákærustig, í alvöru. Í Ameríku yrði þessu hent út… eitt er ef Páll væri að kalla S78 nöfnum og saka þá um glæpi, en hann er ekki að gera það. Hann er að segja að þetta efni sé óviðeigandi fyrir börn og það er gott að hann segir það, vegna þess að mig grunar að svo sé. Það er fullkomlega viðeigandi að segja að það að sýna börnum á þessum aldri svona efni sé óviðeigandi af þessum ástæðum og eins og ég sagði, þú getur fengið vísindaleg gögn fyrir því…

Eina ástæðan fyrir því að þetta mál komst svona langt hlýtur að vera sú að íslenska ákæruvaldið er mannað aðgerðasinnum.

Einar S. Hálfdánarson hæstaréttarlögmaður furðar sig einnig á háttsemi lögreglu þegar kemur að kærum vegna hatursorðræðu. Einar kærði eftirfarandi ummæli sem maður búsettur hér á landi, Ibaa Ben Hosheyeh, viðhafði á opinberum vettvangi:

Drepið gyðingana hvar sem þið finnið þá, rífið þá á hol, mígið á þá [og] lík þeirra […] Ég sver að við munum dæma þá við hlið Paradísar. Bölvun hvíli á sonum Síons, sonum apa og svína.

Þeir sem kunna að lesa sjá að þarna er á ferðinni skefjalaust hatur í garð minnihlutahóps, gyðinga. Lögreglustjórinn á höfuðborgarsvæðinu, Halla Bergþóra Björnsdóttir, er ekki byrjuð að rannsaka hatursummælin sem Einar kærði. En Halla Bergþóra var fljót til þegar Samtökin 78 kærðu gagnrýni tilfallandi á transboðskap í skólum og skrifaði út ákæru. Einar skrifar grein í Morgunblaðið um helgina og ber málin tvö saman. Niðurstaða hans:

Lögreglustjórinn á höfuðborgar svæðinu tekur ekki málefnalega afstöðu til kærumála. Halla Bergþóra misbeitir valdi sínu og handvelur mál sem henni eru þóknanleg.

Misþyrming lögreglunnar á réttlætinu er ekki bundin við höfuðborgarsvæðið. Samtökin 78 kærðu Helgu Dögg Sverrisdóttur fyrir sömu sakir og tilfallandi, að gagnrýna trúboð lífsskoðunarfélagsins. Helga Dögg heldur úti Moggabloggi. Hún er ekki enn ákærð, en hefur verið kölluð til yfirheyrslu lögreglunnar á Norðurlandi eystra og er með stöðu sakbornings. Í gær birti Helga Dögg mynd af lögreglustöðinni þar sem hinsegin fáninn var dreginn að húni, einn fána. Í Facebook-færslu skrifar Helga Dögg:

Ég velti fyrir mér af hverju lögreglan flaggi fána kæranda í sakamáli.Ég er ein þeirra sem trans Samtökin 78 kærðu til lögreglu og vitna til sömu lagagreinar og í máli Páls Vilhjálmssonar. Hann var sýknaður. Enn hefur ekkert heyrst frá löggunni sem hefur tekið sér mjög rúman tíma til að skoða málið. Hins vegar finnst mér vafasamt að lögregla sem gerir svona sé hlutlaus. Óttast verulega að ég fái ekki réttláta málsmeðferð þegar lögreglan sýnir afstöðu sína á þennan hátt.

Lögregla sem ákærir trekk í trekk í þágu Samtakanna 78 og flaggar fána lífsskoðunarfélagsins er tæplega hlutlaust og málefnalegt yfirvald.

Líkt og flestar opinberar valdastöður eru æðstu embætti lögreglunnar í höndum kvenna. Ríkissaksóknari, sem leiðbeinir lögreglu um hverja skuli ákæra, er kona. Kynsystir þeirra, en líklega ekki skoðanabróðir, er Íris Erlingsdóttir. Í Þjóðólf skrifar Íris að Eitruð kvenlægni er stjórnsýsluvandamál. Íris sendir í leiðinni karlpeningi pillu:

Íslenskir karlmenn – ungir sem miðaldra, brjálaðir sem óbrjálaðir – eru hins vegar ófærir um að sýna eitraða karlmennsku eða karlmennsku yfirleitt. Til þess þarf testósterón, sem löngu er búið að berja úr þeim.

Konur fara með æðstu völd; kona brýnir kúgaða karla til uppreisnar gegn duttlungum valdakvenna og óreiðunni sem fylgir. Frjálslyndi pendúllinn slær tilbaka. Áhugaverðir tímar.

 

 

Bandaríkin eða ESB, Ísland fullveldi eða hjálenda

Evrópusambandið eflir hervarnir sínar og setur upp kerfi utan Nató, kallað Security and Defence Partnership eða öryggis og varnarsamvinna. Markmiðið er að tryggja hernaðarhagsmuni ESB. Ríkisstjórn Íslands ætlar að taka tilboði ESB um hernaðarsamvinnu. Samvinna við ESB grefur undan varnarsamningum við Bandaríkin sem er í gildi allar götur frá 1951, eða í 74 ár.

Hernaðarsamvinna er ekki að heimsækja tískubúðir, tvær eða fleiri, til að finna bestu tilboðin. Söguleg, menningarleg, pólitísk og landfræðileg rök eru forsendur hernaðarsamvinnu. Annað til viðbótar skiptir sköpum - traust.

Sækist smáþjóð eftir hernaðarsamvinnu við tvo aðila er það til marks um tvöfeldni. Í innanlandspólitík í litlu landi, þar sem allir þekkja alla, er hægt að bera kápuna á báðum öxlum. Harður heimur alþjóðastjórnmála leyfir það síður og allra síst bandalag smáþjóðar og stórveldis. Tvískinnungur er hafður til marks um undirferli. Stórveldi þolir illa baktjaldamakk nágranna er skiptir máli fyrir varnar- og öryggismál stórveldisins.

Tvöfeldni í utanríkismálum veldur tortryggni sem leiðir til fyrirlitningar. Þeir sem kunna sinn Machiavelli vita að fyrirlitning er hættulegasta ógn hverjum valdhafa.

Nú þegar er togstreita milli Bandaríkjanna og Evrópusambandsins um forræði yfir næsta nágranna Íslands í vestri, Grænlandi. Danir fara með æðsta yfirvald á eyjunni og óttast valdatilkall Bandaríkjanna. Danir fengu Macron Frakklandsforseta í örheimsókn til Grænlands fyrir mánuði síðan til að sýna smáríkinu Danmörku samstöðu um óbreytt ástand, að Danir ráði áfram Grænlandi. Tilfallandi bloggaði:

Smáríki innan ESB, Danmörk, er með forræði yfir Grænlandi. Trump ásælist Grænland. Danir eru smeykir. Mette Frederiksen, forsætisráðherra Danmerkur, fær Macron forseta Frakklands með sér í heimsókn til nýlendunnar. Macron lofar stuðningi við Dani að halda stærstu eyju heims innan danska ríkisins.

Trúir einhver að Frakkland myndi senda her til Grænlands að verja landið gegn Bandaríkjunum? Vel á minnst: Grænland er ekki í ESB, þeir eru eina þjóðin, utan Breta, að segja sig úr meginlandsklúbbnum með höfuðborg í Brussel.

Valdatilkall Bandaríkjamanna til Grænlands skiptir Ísland höfuðmáli. Grænlendingar eru næstu nágrannar okkar í vestri. Gangi það fram, sem líklegt er, að Bandaríkin fái Grænland viðurkennt sem sitt áhrifasvæði yrði óvinveitt af Íslandi gagnvart öryggishagsmunum Bandaríkjanna að ganga í Evrópusambandið, líkt og er markmið sitjandi Kristrúnarstjórnar.

Leiftursókn ESB-sinna, sem ræst var með heimsókn von der Leyen, er með það lokamarkmið að Ísland verði aðildarríki Evrópusambandsins. Í reynd yrði Ísland hjálenda ESB, líkt og landið var í danska konungsríkinu. Lög og reglur komu einu sinni frá Kaupmannahöfn; nú vilja skjaldmeyjar áskrift að laga- og reglufargani frá Brussel. Árlega flæða frá höfuðstöðvum ESB tugir þúsunda laga, reglna og tilskipana um stórt og smátt.

Varnarsamningurinn við Bandaríkin, sem nú er í uppnámi, er einfaldur, aðeins tvær blaðsíður. Fimmta grein samningsins segir klárt og kvitt að Íslendingar haldi fullveldi sínu:

Bandaríkin skulu framkvæma skyldur sínar samkvæmt samningi þessum þannig, að stuðlað sé svo sem frekast má verða að öryggi íslensku þjóðarinnar, og skal ávallt haft í huga, hve fámennir Íslendingar eru, svo og það, að þeir hafa ekki öldum saman vanist vopnaburði. Ekkert ákvæði þessa samnings skal skýrt þannig, að það raski úrslitayfirráðum Íslands yfir íslenskum málefnum.

 

Hvað rekur menn til að flytja forræði íslenskra mála til útlanda og í leiðinni setja í uppnám öryggis- og varnarmál þjóðarinnar sem hafa verið í föstum skorðum í hartnær 75 ár?

 

Telur að verið sé að plata þjóðina inn í ESB

Leiftursókn ESB-sinna, samstarf við Bandaríkin í hættu

ESB-sinnuð ríkisstjórn Kristrúnar Frostadóttur hyggst fjötra Ísland í viðjar Evrópusambandsins hraðar en hönd á festir. Tal um að 16 ára gömul ESB-umsókn ríkisstjórnar Jóhönnu Sig. sé enn í gildi og fréttir um varnarsamstarf við ESB staðfesta ásetning ríkisstjórnarinnar. Heimsókn Ursulu von der Leyen, forseta framkvæmdastjórnar Evrópusambandsins er startskot leiftursóknarinnar.

Ríkisstjórnin gengur fram af fullkomnu ábyrgðaleysi og setur í uppnám 75 ára öryggis- og varnarsamstarf Íslands og Bandaríkjanna. Taktískt er leiftursóknin glapræði fyrir hagsmuni Íslands í bráð og lengd og ýtir undir innanlandsófrið. ESB-aðild var ekki á dagskrá í nýafstöðnum kosningum. 

Bandaríkin hafa sinn hlut á þurru sem stórveldi. Evrópusambandið stefnir í sína mestu kreppu frá stofnun. Að láta sér til hugar koma að flytja varnar- og öryggismál Íslands frá Washington til Brussel er óskiljanlegt þeim sem fylgjast með alþjóðastjórnmálum.

Það er morgunljóst hvert stefnir og hefur verið lengi. Fyrir þremur árum, þegar Úkraínustríðið var aðeins viku gamalt og Biden enn forseti Bandaríkjanna var hægt að blogga um framhaldið:

Stóru ríkin á meginlandi Vestur-Evrópu, Frakkland og Þýskaland, verða að finna leið til að lifa með rússneska stórveldinu. Bandaríkin, og þar með Nató, verða fremur áhorfendur en gerendur í þeirri þróun.

Bandaríkin verða áfram aðilar að Nató og styðja Vestur-Evrópu gegn vaxandi veldi Rússa. En Washington mun ekki, líkt og í kalda stríðinu, telja sér lífsnauðsyn að hafa aðalvarnarlínu sína í Mið-Evrópu. Rússland mun ekki, eins og Sovétríkin, ógna bandarískum hagsmunum um víða veröld. Í fáum orðum: séð frá Bandaríkjunum verður Rússland evrópskt vandamál.

Ísland er ekki hluti Vestur-Evrópu í skilningi öryggis- og varnamála. Bandaríkin munu taka Ísland, Grænland og Bretland fyrir það sem þessi lönd eru í landfræðilegum skilningi; eyjar á milli Bandaríkjanna og meginlands Evrópu.

Af þessu leiðir að Ísland verður í fremstu varnarlínu Bandaríkjanna gagnvart mögulegri ógn úr austri. Þetta eru ekki ný tíðindi. Þeir sem teljast til raunsæisskólans í akademískri umræðu um bandarísk varnarmál, t.d. John J. Mearsheimer og Stephen M. Walt, hafa talað fyrir aftengingu við langt-í-burtu hagsmuni. Bók Walt, Víti góðra áforma, er útlegging á nýja fagnaðarerindinu í bandarískum varnarmálum.

Tilvitnunin er þriggja ára gömul og allt hefur gengið eftir sem þar er sagt. Úkraína tapar stríðinu, Bandaríkin þvo hendur sínar af meginlandi Evrópu og ætla sér Grænland. Evrópusambandið stendur eitt andspænis Rússlandi. Þriggja ára gömlu bloggi lauk með þessum orðum:

Íslendingar geta þakkað sínum sæla að Samfylkingu og Viðreisn tókst ekki að þvæla okkur inn í Evrópusambandið. Við getum tekið á málum af yfirvegun og raunsæi. Ef Ísland væri hjálenda ESB væru hagsmunar okkar í gíslingu á meginlandi Evrópu.

Hér verður tilfallandi að biðjast afsökunar. Bloggið varð að áhrínisorðum. Viðreisn og Samfylking ætla sér með leiftursókn að flytja fullveldi okkar og þjóðarhagsmuni til Brussel, gefa Evrópusambandinu Ísland til að spila með í fyrirsjáanlegum hráskinnaleik stórvelda. Mikil er skömm skjaldmeyja lýðveldisins.

 

Umsókn Íslands enn í gildi

Gabb náttúrunnar og Jesú-vísindamenn

Yngsta gosið á Reykjanesi hófst með skemmri fyrirvara en við eigum að venjast. Vísindamenn hafa áður spáð gosi með nokkurra daga fyrirvara en núna má tala um mínútur. Eldgos eru náttúrleg fyrirbæri og lúta lögmálum sem menn skilja aðeins að hluta - annars væri hægt að spá eldvirkni með nákvæmni. Í viðtengdri frétt er sérkennileg efnisgrein:

Yf­ir­leitt dreg­ur úr þess­um gos­um sem líður á en það sem gerðist samt var að eft­ir að við fór­um frá eld­gos­inu þá lengd­ist sprung­an og er núna orðin um 1,5 kíló­meter. Okk­ur virt­ist sem verið væri farið að draga úr þessu en það var bara gabb. (feitletr. pv)

Vísindamaðurinn sem þarna talar, Halldór Björnsson, virðist segja að náttúran hafi platað (gabbað) vísindamenn til að trúa einu, að gosið hjaðnaði, þegar reyndin var önnur - gosið jókst.

Náttúran og öflin sem þar eru á kreiki gabba aldrei. Náttúran er. Punktur. Gabb, fals, prettir og plat eru allt höfundarverk meðvitundarinnar. Maðurinn býr að meðvitund, náttúran ekki. Þeir sem gefa náttúrunni meðvitund eru komnir út í trúarkukl.

Verkefni náttúruvísinda er að skilja náttúruna, ferla og lögmál. Þar er margt ólært. Í stað fullvissu er iðulega stuðst við upplýsta ágiskun. Sá sem giskar á gabb í náttúrunni er ekki upplýstur.

Í fréttinni er Halldór Björnsson titlaður sérfræðingur á Veðurstofu Íslands. Sérgrein hans er ekki jarðvísindi heldur veður og loftslag. Bitamunur en ekki fjár, kynni einhver að segja. Í báðum tilvikum er eðlisfræði undirstaðan. Fljótandi hraun er, líkt og andrúmsloftið, flæðiefni. Jöfnurnar sem notaðar eru til að útskýra ferla flæðiefna eru kenndar við Navier-Stokes. Óreiða einkennir ferli flæðiefna, hugsið t.d. um vatn sem hellt er úr einu glasi í annað og margfaldið fyrir ferla kviku eða loftslags. Ómögulegt er að sjá ferlið fyrir - annað en að glasið tæmist að lokum, rétt eins og eldgos stöðvast. Navier-Stokes jöfnunar eru sem sagt óleysanlegar. 

Aðalstarf Halldórs undanfarin ár er að útbreiða þann boðskap að ein lofttegund, CO2, koltvísýringur, valdi loftslagsvá og hamfarahlýnun. Um 97 prósent af CO2 er náttúrulegur. Er Halldór á því að ,,meðvituð" náttúra sé haldin sjálfseyðingarhvöt? Neibb, það er mannkyn, er býr þó aðeins til þrjú prósent koltvísýrings í umferð, sem stefnir móður jörð í voða. Aðalboðskapurinn er heimsendir af mannavöldum. Trúboðar geta þó ekki upplýst okkur um einfaldar staðreyndir. Til dæmis hver sé kjörhiti jarðar. Tilfallandi bloggaði:

Koltvísýringur, CO2, er náttúruleg lofttegund með eitt atóm kolefnis og tvö súrefnisatóm. Lofttegundin er forsenda lífs á jörðinni. Plöntur draga að sér koltvísýring, taka kolefnið sér til vaxtar og viðurværis en skila súrefninu aftur út í andrúmsloftið. Ferlið kallast ljóstillífun. Orkan til ljóstillífunar er sólarljósið (lampar í gróðurhúsum).

Án plantna er ekki líf á jörðinni. Heildarmagn koltvísýrings er áætlað um 750 gígatonn. Af þessu magni er útblástur mannsins 3-4 prósent, um 29 gígatonn. Jörðin grænkar og plöntur taka til sín aukið magn koltvísýrings. En það er sem sagt maðurinn, ekki náttúran, sem ræður loftslagi jarðar, segja meintir sérfræðingar.

Í sama bloggi er vitnað í Will Happer loftslagsvísindamann sem kann sitthvað um eðli og ferla loftslags. Óreiða kemur aftur við sögu. 

Hvað gera vísindamenn þegar óreiða náttúrunnar er slík að fyrirsjáanleiki er ómögulegur?  Vandaðir vísindamenn setja fyrirvara og mæla af varkárni. Jesú-vísindamenn, þeir sem sjá inn í heima, sem huldir eru dauðlegum mönnum, taka stórt upp í sig, segja náttúruna búa yfir meðvitund sem Jesú-vísindamenn kunna einir að túlka. Stundum spaugar náttúran og fíflar menn að trúa einu þegar annað er tilfellið, segja handhafar sannleikans - auðvitað til að breiða yfir spádóma sem ekki rættust.  

Jesú-vísindamenn fá hljómgrunn safnaða sem gefa frá sér dómgreind og vitsmuni. Stærsti söfnuðurinn er vinstrimenn.

 

 

Dregur enn ekki úr gosinu: „Það var bara gabb“

Þorgerður Katrín tekur BYKO á ESB

Björn Bjarnason fyrrverandi ráðherra fylgist með alþingi betur en margur annar. Á síðasta þingdegi, fyrir tveim dögum, tók Björn eftir þessari uppákomu á þjóðþinginu:

Þá sést Þorgerður Katrín ganga snúðug fram hjá ræðustólnum að ráðherrabekknum þingforseta á hægri hönd. Hún biður síðan um orðið í annað skipti um atkvæðagreiðsluna til að benda á að í umræðunum um strandveiðar hafi nú myndast „samhljómur“ um málið: „Eigum við ekki að nýta þennan samhljóm í þágu strandveiða og klára málið annaðhvort í dag eða á morgun?“ spurði utanríkisráðherra og einhver hrópaði Heyr! Heyr! Ráðherrann notaði slagorð BYKO og sagði: „Gerum þetta saman.“ Ríkisstjórnarflokkarnir væru tilbúnir til að klára málið þennan sama dag eða koma til þingfundar 15. júlí til að gera það.

Enginn greip þessa tillögu á lofti. Þetta var lýðskrum í sinni tærustu mynd. Það endurspeglaði taugatitringinn í stjórnarherbúðunum. Forseti alþingis hafði tilkynnt að þingi lyki þennan dag með afgreiðslu þriggja mála auk laga um ríkisborgararétt. Forsetavaldið var lítilsvirt. Við blasti sektarkennd yfir ótrúlegum vandræðagangi og stjórnleysi samkvæmt plani verkstjórnarinnar.

Þorgerður Katrín er utanríkisráðherra. Hún á að heita reyndur og þroskaður stjórnmálamaður. En það er öðru nær. ,,Gerum þetta saman," er auglýsingafrasi BYKO, vel heppnaður bersýnilega. BYKO selur vörur á neytendamarkaði, Þorgerður Katrín er á launum almennings að þjóna hagmundum lands og þjóðar. Utanríkisráðherra er gangandi frasi. Gerum þetta saman, hvort heldur strandveiðar eða aðild að Evrópusambandinu. Auglýsingafrasi byggingavöruverslunar í munni Þorgerðar Katrínar veitir innsýn í hugarheim smekklausrar yfirborðsmennsku.

Frá ESB sækir Þorgerður Katrín frasa að vegna Úkraínustríðsins verði að þétta raðirnar. Kannski hjá ESB, en alls ekki Íslandi. Við eigum enga aðild að stríðinu, það er hvorki í okkar þágu né höfum við minnstu möguleika að hafa áhrif á framvindu hildarleiksins.

Fyrir andstæðinga ESB-aðildar er utanríkisráðherra gulls ígildi. Lítil hætta er á að Þorgerður Katrín sannfæri almenning um að ,,gera það saman" með Evrópusambandinu.

   

Vonar að Evróputengd mál verði ofarlega á blaði

Úkraínustríðið er vestrinu tapað

Ekkert magn vestrænna vopna breytir fyrirsjáanlegu tapi Úkraínu í stríðinu við Rússa. Viðskiptaþvinganir eru fullreyndar, skila ekki árangri. Útfærslan á ósigrinum er eftir.

Vopnasendingar Trump til Úkraínu núna eru til að þvo hendur Bandaríkjanna af ósigrinum. Trump getur sagt að þrátt fyrir stuðning Bandaríkjanna hafi Úkraína tapað.

Evrópusambandið leggur áherslu á að halda stríðinu gangandi eins lengi og mögulegt er. Í Brussel vonast menn eftir kraftaverki, að Pútín hrökkvi upp af eða bylting verði í Moskvu. Á meðan stríðið heldur áfram þarf ESB ekki að horfast í augu við rússneska björninn á austurlandamærum sambandsins. Allt frá lokum seinna stríðs hefur Vestur-Evrópa, ESB, vanist að fá sínu framgengt að mestu með friðsamlegum hætti. Smástríð hér og hvar voru flest í fjarlægum heimshlutum, upplausn Júgóslavíu undantekningin. 

Vestrænir fjölmiðlar endurspegla ráðandi frásögn um að allt sé betra en rússneskur sigur. Ekki er það væntumþykja fyrir úkraínsku þjóðinni sem ræður för heldur óttinn við það sem á eftir kemur.

Til að halda hildarleiknum gangandi er fólki talin trú um að eftir sigur í Úkraínu muni Pútin og félagar hyggja á frekari landvinninga í vestri. Það er langsótt röksemd. Kemur einkum þrennt til. Í fyrsta lagi hafa Rússar ekki lögmæta afsökun til að ráðast inn í Nató-lönd eins og Pólland og Eystrasaltsríkin. Í Úkraínu hafði Pútín lögmæta afsökun. Frekari útþensla Nató í austurátt, sem átti aldrei að verða samkvæmt samkomulagi við Rússland eftir fall Berlínarmúrsins, var óásættanleg Rússum þegar árið 2008. Vestrið, með Úkraínu sem verktaka, vildi láta reyna á langlund Rússa. Afleiðingin blasir við. Í öðru lagi eiga Rússar fullt í fangi að sigra Úkraínuher. Stríð við Nató yrði á öðrum og stærri skala og að líkindum háð með kjarnorkuvopnum. Pútín er ekki líklegur sjálfsmorðskandídat. Í þriðja lagi yrði rússneskur almenningur ekki ginnkeyptur fyrir hernaðarævintýrum í Vestur-Evrópu. Fyrir rúmum hundrað árum var bylting í Rússlandi vegna óvinsæls stríðs í vestri. Kremlverjar kunna sagnfræði.

Enginn veit hvernig rússneskur sigur í Úkraínu mun líta út. Kannski verður landinu skipt í tvennt eftir Dnipró-ánni. Kannski verður samið um minni skerðingu á landi og herlausa Úkraínu utan Nató en mögulega innan ESB. Þrátt fyrir að Trump vilji samninga ekki seinna en strax eru stríðsaðilar enn sannfærðir að úrslitin skulu ráðast á vígvellinum. Sú sannfæring helst í stjórnkerfi Úkraínu á meðan nokkur von er um meiri vopn og fjármagn frá vestrinu.

Vestrið notaði Úkraínu til að knýja á um að Rússland yrði pólitísk og efnahagsleg hjálenda. Með Úkraínu í Nató og ESB hefði vestrið flest ráð Rússa í hendi sér. Innrás Rússa í Úkraínu fyrir rúmum þrem árum var, af hálfu Pútín og félaga, nauðsynleg til að verja öryggishagsmuni ríkisins - og, vitanlega, stjórnkerfið sem þeir eru í fyrirsvari fyrir. Fyrstu mánuði stríðsins, jafnvel fyrsta rúma árið, var ekki ljóst hvor stríðsaðilinn hefði betur. En síðasta árið er stríðsgæfan hliðhollari Kreml en Kænugarði. Hernaðarmáttur Rússa vex en Úkraínu blæðir. Styrkleikhlutföllin, einkum hvað varðar fjölda hermanna, eru afgerandi Rússum í hag. Fyrir stríð taldi Úkraína um 43 milljónir hausa, Rússar eru rúmlega 140 milljónir. 

Um tíma var talað um beina aðild Nató-hermanna. Ekki lengur. Án beinnar aðildar Nató-herja er stríðið tapað Úkraínu.

Úkraínustríðið er staðgenglastríð vestursins gegn Rússlandi. Staðgengillinn mun mestu tapa, bæði í mannfórnum og landi. Í augum þeirra sem telja vestrið og Rússland náttúrulega bandamenn, æskilegra en t.d. bandalag vestursins og Tyrklands eða Sádí-Arabíu, er gresjustríðið fullkomlega tilgangslaust. Vel að merkja, allur þorri stríða er tilgangslaus. ,,Hrein stríð" illsku og góðmennsku eru einatt stílfærð útgáfa af veruleikanum. 

 

Vopnasendingar til Úkraínu ræddar í Hvíta húsinu

Samfylking kaupir könnun, hótar Ingu Sæland

Flokkur forsætisráherra kaupir könnun til að stilla samstarfsflokkum, einkum Flokki fólksins, upp við vegg. Annað tveggja sættir Inga Sæland sig við að vera hornkerling í stjórnarráðinu eða henni verði skipt út með eða án kosninga, eru skilaboð Samfylkingar.

Gallup-könnun sem Samfylkingin keypti var látin RÚV í té, - ókeypis vitanlega. Niðurstaðan er vinsældir Kristrúnar og afhroð Ingu Sæland. Þriðja skjaldmey stjórnarráðsins, Þorgerður Katrín, dólar þar á milli. Könnunin kemur í kjölfar þinglokasamninga þar sem málum Flokks fólksins var fórnað.

Svarhlutfallið í könnuninni er aðeins rúm 43 prósent. Meira en helmingur nennti ekki að svara. Spunaliðar Samfylkingar keyptu könnun á þeim árstíma, miðju sumri, þegar mestu líkindin eru að sítengdir háskólamenntaðir vinstrimenn svari kalli Gallup. Það er helsti kjósendahópur Samfylkingar.

Engum blöðum er um það að fletta að Samfylking og Kristrún standa best að vígi gagnvart kjósendum af stjórnarflokkunum þrem. Nýlegar skoðanakannanir staðfesta sterka stöðu krata. Hvers vegna að kaupa könnun um mitt sumar til að staðfesta það sem allir vita? Könnunin þjónar þeim tilgangi að setja þrýsting á samstarfsflokka Samfylkingar, Flokk fólksins og Viðreisn.

Fyrir tólf dögum bloggaði tilfallandi um ástæðuna. Þá var í fréttum að róttækir vinstrimenn væru að safna liði, þ.e. píratar, vinstri grænir og sósíalistar. Síðasta málsgrein bloggsins:

Freistnivandi Samfylkingar er að standast 30 prósent fylgi í könnunum og  láta ekki undan löngun að innleysa það fylgi með þingkosningum fyrir lok kjörtímabils. Eftir þrjú ár gætu róttæklingarnir boðið valkost sem þeir hafa ekki núna. Sá ljóður fylgir ráði hófsamra vinstrimanna að þeir eru tækifærissinnar fram í fingurgómana.

Keypt könnun Samfylkingar um vinsældir Kristrúnar og lítinn kjörþokka Ingu og Þorgerðar Katrínar staðfestir þessa greiningu. Samfylkingu blóðlangar í kosningar til að innleysa fylgið sem flokkurinn telur sig eiga. Verri staða samstarfslokka í fylgismælingum gerir þá móttækilegri fyrir pólitískri fjárkúgun. Beygið ykkur undir vilja Kristrúnar og Samfylkingar, annars bíður ykkar afhroð í kosningum.

  

 

Tæp 63% ánægð með störf Kristrúnar