Karlar veikara kynið og heimskari (staðfest)

Karlar eru lélegri námsmenn en konur, um það vitna opinberar tölur. Þeir karlar sem héldu að líkamsburðir þeirra bættu upp andlegt getuleysi og að þeir væru í þeim skilningi ,,sterkari" en konur verða að endurskoða afstöðu sína.

Samkvæmt valnefnd lögregluskólans er konur einfaldlega í betra formi en karlar.

Aumingja við karlarnir, þótt við séum enn með 9 prósent hærri laun en konur, að öðru jöfnu, þá er framtíðin þeirra en ekki okkar.

Konurnar einfaldlega í betra formi

Verðhjöðnun mætt til Íslands

Verðhjöðnun, andstæða verðbólgu og illvígari efnahagsmeinsemd, er þegar búin að læsa klónum í efnahagskerfi evru-ríkjanna og gæti orðið að faraldri. Snörp lækkun á verðbólgu hér á landi er vísbending um ógöngur alþjóðahagkerfisins.

Í verðhjöðnun dregst hagvöxtur saman, fjárfestingar sömuleiðis, en atvinnuleysi eykst. Skuldabyrði ríkissjóða hækkar hlutfallslega vegna lækkandi þjóðarframleiðslu.

Heimshagkerfið er í óvissuástandi og verður það næstu misserin.

Verðbólgan 3,1%

Vinstrimenn trúa á æðri verur - kínverskar

Dómgreind formanna Bjartrar framtíðar, Samfylkingar og VG, auk tólf þingmanna vinstriflokkanna, er orðin svo löskuð að þeir sækja í tólf ára gamalt mál til að lyfta á stall kínverskum sértrúarsöfnuði sem heitir Falun Gong.

Björn Bjarnason þekkir baksvið Falun Gong. Hann skrifar

Oft rugla menn saman Falun Gong og qigong. Li Hongzhi hefur sagt skilið við qi gong og ítrekað lagt áherslu á að Falun Gong sé annars eðlis. Um heim allan fjölgar iðkendum qi gong en vegur Falun Gong eykst ekki að sama skapi.
Hinn 10. maí 1999 birti bandaríska tímaritið Time viðtal við Li Hongzhi þar sem hann sagði að „mannleg siðalögmál hefðu ekki lengur gildi“ og áréttaði að Falun gong væri annað en qi gong. Hann sagði einnig að verur frá öðrum hnöttum spilltu manninum. Hann skaut sér undan spurningum um hann sjálfan og sagði: „Ég vil ekki ræða um sjálfan mig á æðra stigi. Fólk mundi ekki skilja það.“

Hvað veldur því að stjórnarandstaðan á alþingi Íslendinga árið 2014 leggur lag sitt við furðufyrirbæri sem er í sambandi við verur frá öðrum hnöttum og  segir mennsk siðalögmál ekki gilda lengur?

Biðji Falun Gong-iðkendur afsökunar

Smalað á alþingi vegna RÚV

Ríkisútvarpið er þrælpólitísk stofnun sem sést á því að hatrammar umræður voru á alþingi um skipan stjórnar stofnunarinnar og að þingmönnum var smalað í þingsal þar sem meirihluti og minnihluti tókust á.

Vinstrimenn töldu sig vera með tögl og haldir undir stjórn kratans Páls Magnússonar sem fékk embætti frá ráðherra samfylkingardeildar Sjálfstæðisflokksins, Þorgerði Katrínu Gunnarsdóttur. Hugmynd vinstrimanna að Ríkisútvarpið yrði ,,ópólitískt vinstraútvarp." 

Afsögn Páls Magnússonar leiddi til uppstokkunar og vinstriflokkarnir töldu sig missa spón úr aski sínum. Og trufluðust á alþingi.

Ný stjórn Ríkisútvarpsins kosin

Háskólinn braut á Jóni Baldvini

Háskóli Íslands lét undan upphlaupsfólki sem gerði hróp að hæfum fyrirlesara og kennara þegar Jóni Baldvini Hannibalssyni var gert að sinna ekki umsömdu hlutverki sem gestafyrirlesari.

Sérvitringahópar eiga vitanlega ekki að komast upp með það að stýra þjóðarskólanum heldur eiga fræðileg og málefnaleg sjónarmið að ráða ferðinni.

Sérviskuhópar munu ekki láta segjast, það gera þeir aldrei, en kannski að Háskólinn læri af máli Jóns Baldvins.

Greiða Jóni Baldvini hálfa milljón

Á Íslandi býr vinnandi fólk, en bótaþegar í ESB-ríkjum

Íslenskt efnahagskerfi er stillt inn á það að sem flestir hafi atvinnu. Á Íslandi er atvinnuleysi yfir 5 prósentum ekki liðið.

Meðaltalsatvinnuleysi í Evrópusambandinu er 12 prósent og það fer upp í 20 til 30 prósent í jaðarríkjum sambandsins. Atvinnuleysi ungs fólks er allt upp í 50 prósent.

Í ESB-ríkjum er talað um ,,tapaða kynslóð" ungs fólks sem útskrifast úr skóla og fer beint á atvinnuleysisbætur þar sem enga vinnu er að fá.

Dregur úr langtímaatvinnuleysi

ESB-umsókn veldur vantrausti á stjórnmálum

Í framkvæmd virkar lýðræðið þannig að stjórnmálaflokkar bjóða kjósendum valkosti sem gert er upp á milli í kosningum. Stundum eru viðfangsefnin flókin og erfitt að bjóða fram skýra valkosti. Það gildir ekki um Evrópusambandsaðild.

Aðild að Evrópusambandinu er skýr valkostur og einnig er það augljóst val að standa utan sambandsins. Aðeins einn stjórnmálaflokkur hefur á síðustu kjörtímabilum verið með ESB-aðild á stefnuskrá sinni, Samfylking. Flokkurinn fékk mest tæplega 30 prósent fylgi í kosningunum 2009. Undir eðlilegum kringumstæðum ætti það ekki að vera nóg til að leggja upp í leiðangur sem miðaði að því að gera Íslands að ESB-ríki.

VG, sem bauð fram undir merkjum andstöðu við ESB, fékk um 22 prósent atkvæðanna árið 2009. Flokkurinn sveik kjósendur sína og studdi ESB-leiðangur Samfylkingar.

Svik VG leiddu til þess að flokkurinn klofnaði á síðasta kjörtímabili, fjórir þingmenn af 14 kjörnum hættu í þingflokknum.

ESB-umsóknin, sem samþykkt var 16. júlí 2009, byggði á svikum með því að stjórnmálin brugðust þjóðinni. Allir sanngjarnir sjá það í hendi sér að 30 prósent fylgi við aðild að Evrópusambandinu er ekki lýðræðislegt umboð. 

Eina leiðin til að bæta fyrir 16. júlí-svikin er að afturkalla ESB-umsóknina. Báðir ríkisstjórnarflokkarnir gengu til kosninga með skýrar flokkssamþykktir að ESB-ferlinu skyldi hætt.

Á meðan ESB-umsóknin er látin standa heldur hún áfram að eitra stjórnmálin.

Dapurleg reynsla VG öðrum lærdómur

Fréttir RÚV eru ekki einstaklingsframtak

RÚV er opinber stofnun og starfar samkvæmt lögum þar sem segir m.a. að stofnunin skuli veita ,,víðtæka, áreiðanlega, almenna og hlutlæga frétta- og fréttaskýringarþjónustu um innlend og erlend málefni líðandi stundar."

Fréttir RÚV eru framleiddar á ritstjórn af til þess ráðnum fréttamönnum þar sem verkaskipti koma að einhverju leyti fram í starfstitlum s.s. vaktstjóri og fréttastjóri og að einhverju leyti í starfsvenjum. Á ritstjórnum er ákveðið hvaða fréttir skuli unnar í hvaða fréttatíma, hverjir viðmælendur skuli vera, hvaða sjónarhorn skuli vera á fréttinni og hvenær í fréttatíma hún er flutt.

Þegar frétt er flutt í útvarpi RÚV afkynnir þulur fréttina iðulega með þeim orðum að tiltekinn fréttamaður ,,sagði frá" eða að nafngreindur fréttamaður ,,tók saman." Í hvorugu tilvikinu er neinu slegið föstu um höfund. Ef fréttir RÚV væru einstaklingsframtak ætti kynningin vitanlega að vera á þessa leið: ,,Jón Jónsson var höfundur þessarar fréttar" eða annað sambærilegt orðalag um höfund. En þar með væri RÚV að afsala sér ábyrgð á fréttum - þær væru eingöngu og alfarið einstaklingsframtak fréttamanna. 

Í máli Önnu Kristínar Pálsdóttur gegn undirrituðum vegna bloggfærslu er um það að ræða að fréttamaður tekur til sín gagnrýni sem beint er að RÚV. Tilgangurinn er að nota meiðyrðalöggjöfina til að verja RÚV gagnrýni. Lögmaður Önnu Kristínar, Kristján Þorbergsson, starfar fyrir RÚV í nefndum og ráðum og veitir stofnuninni sérfræðiráðgjöf.

 

Sagði Önnu gera sig stærri en RÚV

Auschwitz, Disneyland dauðans

69 ár eru síðan Auschwitz-búðirnar í Póllandi voru frelsaðar undan Þjóðverjum, sem ráku þar iðnvædda morðframleiðslu á gyðingum fyrst og fremst. Á frelsunardegi Auschwitz er spurt hversu einstök helför Þjóðverja á hendur gyðingum var.

Pólskfæddi þýski blaðamaðurinn Henryk M. Broder skrifar minningargrein um helförina í Die Welt. Sem sonur eftirlifenda helfararinnar er Broder í stöðu til að skrifa frá sjónarhorni sem fáum öðrum leyfist.

Greinin í Die Welt heitir Auschwitz er í dag Disneyland dauðans. Innskotið ,,er í dag" skiptir máli; skemmtigarður er ekki orð yfir Auschwitz þegar búðirnar voru í rekstri fyrir sjö áratugum.

Skemmtigarður dauðans sakleysir fjöldamorðin þannig að þau koma fyrir sjónir eins og þau séu ekki lífshættuleg.

Broder hafnar því að iðnvædd fjöldamorð nasista séu verri en önnur fjöldamorð. Menn nota þær drápsaðferðir sem hentugastar eru hverju sinni; gasklefar eða eyðimerkurganga inn í dauðann, niðurstaðan er sú sama, segir Broder. Og bætir við að þeir sem haldi annað hafi aldrei staði frammi fyrir vali á dauðdaga.

Hversdagsillsku nasista var lengi við brugðið og hún talin sérmerkja Þjóðverja. Broder gefur ekki mikið fyrir þá stílfærslu, kannski af þeirri ástæðu að hann býr og starfar með afkomendum Þjóðverjanna sem leiddu Hitler til valda og störfuðu í þágu illskunnar.

Niðurlag greinar Broder um söguminjasafnið Auschwitz sækir hann til þýska gyðingaheimspekingsins Theodor Lessing sem skrifaði fyrir helförina að sagan gæfi merkingarleysunni merkingu.

Samfylkingin og dauðinn eftir ESB-umsóknina

Helstu rökin fyrir ESB-aðild voru að Ísland væri ónýtt. Gjaldmiðillinn okkar væri ónýtur, eftirlitið með fjármálafyrirtækjum væri ónýtt, efnahagskerfið væri ónýtt, stjórnarskráin væri ónýt og gott ef ekki þjóðin sjálf væri ónýt.

Samfylkingin hélt á lofti sjónarmiðinu Ísland-er-ónýtt samtímis sem flokkurinn var í ríkisstjórn og reyndi að telja þjóðinni trú um að vel miðaði í endurreisninni. Mótsögnin þarna á milli æpti á almenning sem sneri baki við flokknum og skar fylgi hans niður úr tæpum 30 prósentum árið 2009 niður í 12,9 prósent árið 2013.

Í sögu vinstriflokka er ,,sekterismi" þekkt fyrirbrigði sem vísar til kreddutrúar á allsherjarlausn. Kreddutrú Samfylkingar er að aðild að Evrópusambandinu sé allra meina bót.

Reynslan eftir hrun sýnir að Ísland utan Evrópusambandsins býr við hagvöxt og lítið atvinnuleysi en ESB-ríkin sem lentu í kreppu eru ömurlega stödd, með himinhátt atvinnuleysi og engan hagvöxt.

Kreddutrú forystu Samfylkingar á Evrópusambandinu lokar fyrir öll pólitísk skilningarvit. Flokkurinn heldur áfram að eina pólitíska aflið sem boðar aðild að Evrópusambandinu.

Sitjandi ríkisstjórn mun afturkalla ESB-umsóknina formlega á næstu vikum. Þar með verður Samfylkingin kom í þá stöðu að berjast fyrir nýrri ESB-umsókn - þegar fyrir liggur að ESB-umsóknin 2009 til 2014 skilaði engu, hvorki fylgi til Samfylkingar né þjóðinni bættum lífskjörum.

Björt framtíð, sem var afleggjari úr Samfylkingunni, mælist með 30 prósent fylgi í höfuðborginni. Björt framtíð er valkostur fyrir jafnaðarmenn sem hafna kreddutrú forystu Samfylkingar á því að aðild að Evrópusambandinu skili Íslendingum inn í fyrirmyndarríkið.

 

 

 

Næg tilefni til að slíta samstarfinu