12,9% pólitík

Samfylkingin fékk 12,9% fylgi í síðustu þingkosningum við utanríkisstefnu sína, að koma Íslandi inni Evrópusambandið. Samfylkingin ætlar sér núna að skipa málum fyrir botni Miðjarðarhafs.

Samfylkingin býr til stefnumál í hita augnabliksins; Ísland átti að redda sér úr hruni með aðild að ESB og núna stendur Ísraelsríki vel til höggs og þá erum að gera að slá pólitískar keilur.

Formaður Samfylkingar er með flokkinn í leiðangri sem gæti minnkað fylgið úr rauðvínsprósentu niður í bjórstærð. 

Samfylkingin fordæmir aðgerðir Ísraelsstjórnar

Árni Páll gerir fjöldamorð að pólitík

Anders Behring Breivik útskýrði fjöldamorðin í Útey með því að honum fannst tilgangslaust að skrifa í blöðin til að gera sig gildandi í umræðunni. Allt normalt fólk veit að Breivik er siðblint vesalmenni sem ekki er hægt að nálgast á neinum forsendum siðaðs samfélags - nema, auðvitað, í gegnum réttarkerfið.

Ekki þó Árni Páll Árnason formaður Samfylkingar. Árni Páll telur að Breivik hafi stundað pólitík með manndrápum í Útey. Árni Páll skrifar

Við getum ekki gleymt því að Breivik á sér mörg skoðanasystkin, fólk sem deilir þeirri sýn hans að fjölþjóðlegt samfélag feli í sér alvarlega ógn. Fólk sem deilir viðhorfum hans að einhverju leyti er að finna um allt, um allan heim og áreiðanlega líka hér á Íslandi.

Hér talar sem sagt formaður stjórnmálaflokks á Íslandi, sem vill taka upp pólitíska umræðu við siðblindan fjöldamorðingja.

Árni Páll haslar sér stjórnmálavettvang þar sem hann mun standa einn rétt eins og hvert annað viðrini.

 

Minntust fórnarlamba voðaverkanna í Útey

Tyrkjaránið, hvítur þrældómur og rétt sagnfræði

Þann 16. júlí 1627 gerðu múslímskir sjóræningjar frá Alsír strandhögg í Vestmannaeyjum til að sækja þræla og lausafé. Atburðurinn fékk nafnið Tyrkjaránið enda framinn af þegnum soldánsins í Tyrklandi.

Alls voru 242 Eyjamenn hnepptir í þrældóm. Evrópa var á þessum tíma í miðju 30 ára stríði þar sem mótmælendur og kaþólikkar murkuðu líftóruna hvor úr hinum. Í sundurþykkri Evrópu áttu múslímar sóknarfæri.

Í bók um herleiðangra múslíma, Christian Slaves, Muslim Masters: White Slavery in the Mediterranean, the Barbary Coast, and Italy, 1500-1800, er leitt að því líkum að um ein milljón Evrópubúa hafi hlotið sambærileg örlög og Eyjamennirnir fyrir tæpum 400 árum. Þetta er all nokkur tala, t.d. í samanburði við að 12 milljónir Afríkubúa voru fluttir sem þrælar vestur um haf.

Í ritdómi um bókina segir að ein ástæða fyrir því að ekki sé talað hátt um þrælahald múslíma á hvítum sé sú hún gangi í berhögg við ráðandi sagnfræði. Evrópumenn eru skrifaðir í söguna sem nýlenduherrar en Afríkumenn þrælar. Frásagnir af hvítum þrælum undir oki afrískra múslíma rímar ekki við ,,rétta sagnfræði."

Kynþáttafordómar eru í ýmsum útgáfum.

Þrír fangar við Gettysburg

Í þessum mánuði fyrir hálfri annarri öld og árinu betur var háð orusta við Gettysburg í Pennsylvaníu í Bandaríkjunum. Orustan var liður í uppgjöri landshlutanna, norður og suður, um það hvort Bandaríkin skyldu ein og óskipt eða að einstök ríki mættu segja sig úr sambandinu.

Um fimmtíu þúsund ungir menn dóu, særðust, týndust eða voru teknir til fanga í þriggja daga vopnaskaki. Hálfu ári síðar flutti forseti Bandaríkjanna, Lincoln,  272-orða ávarp á vígvellinum er þykir með þeim merkari á enskri tungu.

Suðurríkjamenn fóru halloka í Gettysburg. Ljósmynd af þrem suðurríkjaföngum eftir orustuna er sérstök fyrir þær sakir að hún sýnir ekki bugaða menn heldur stríðsglaða spjátrunga.

Lög Margrétar Pálu - ólög okkar

Margrét Pála byrjaði Hjallastefnuna fyrir áratugum á leikskólastigi. Með elju, hugviti og snjallri markaðssetningu er Margrét Pála búin að koma ár sinn svo vel fyrir borð að hún fær sérstakt lagafrumvarp samið fyrir sig í menntamálaráðuneytinu til að auðvelda stofnun fleiri Hjallastefnuskóla, sem hún rekur en almenningur borgar.

Margrét Pála er eflaust vel að nýjum lögum komin. Hvergi er á hinn bóginn gert ráð fyrir að Hjallastefnan ein og sér verði valkostur við ríkjandi rekstur sveitarfélaga á grunnskólum. Hætt er við aðrir vilji í kjölfarið komast í viðskipti við sveitarfélögin að reka skóla.

Skóli er bæði rekstur og menntun. Ýmsir s.s. trúarvinglar, græðgisgubbar og sérvitringar munu sjá sér leik á borði og bjóða sveitarfélögum að yfirtaka reksturinn. Stjórnir sveitarfélaga eru misjafnlega mannaðar og einhverjar þeirra munt taka skólatilboði sem verður til bölvunar.

Við rekum grunnskólakerfi sem virkar. Lög Margrétar Pálu munu bora gat á þetta kerfi en bæta sáralitu við skólaþróun. Allar líkur eru á að viðbótin verði dýrari, einkarekstur þarf peningagróða til að réttlæta sig. Eftirlit verður kostnaðarsamara enda mun almenningur gera kröfu um að ríkið verði með nefið ofan í koppi einkarekstursins sem fær skattfé til að skóla börn.

 

Utanríkisráðherra Breta: yfirgefum ESB

Ef Evrópusambandið verður ekki stokkað upp eiga Bretar að yfirgefa sambandið, segir nýr utanríkisráðherra Bretlands, Philip Hammond. Hann segir nauðsynlegt að fá tilbaka fullveldi þjóða og að Evrópusambandið eigi aðeins að fara með þau mál sem eru þjóðríkjum ofviða.

Hammond talar fyrir gerbreyttu Evrópusambandi, nánast fríverslunarbandalagi, á meðan ráðandi viðhorf í Brussel er að stóraukinn samruna þurfi til að festa ESB í sessi og treysta evru-samstarfið.

Hammond, á hinn bóginn, vill nýtt fyrirkomulag innan Evrópusambandið sem tekur tillit til þeirra aðildarríkja, þau eru tíu, sem ekki eru í evru-samstarfinu. En það er óvart opinber stefna ESB að allar aðildarþjóðir taki upp evru og fórni þjóðargjaldmiðli.

Með öðrum orðum: nýr utanríkisráðherra Bretlands segir á opinberum vettvangi að Bretar séu á leiðinni út úr Evrópusambandinu.

Gössur slúðrar til ófriðar í ríkisstjórnarflokkum

Gísli Baldvinsson, öðru nafni Gössur, er blogglúður Össurar Skarphéðinssonar. Í kvöld slúðrar Gössur, samkvæmt heimildum Gróu á Leiti, um seðlabankastjóra.

Niðurlagið í slúðrinu er hannað til að valda úlfúð í röðum þingflokka ríkisstjórnarinnar. Þar segir

Heimildir segja einnig að það eigi eftir að fjalla um þetta í þingflokkum stjórnarflokkana einungis þröngur hópur viti um handsalið.

Þegar þingmenn og helsta stuðningslið stjórnarinnar fá ávæning af plotti af þessari gerðinni eru gemsarnir rifnir upp til að afla frétta og taugatitringur vex.

Snjallt hjá Gössuri.

20-júlí samsærið gegn Hitler 70 ára

Eineygur og einarma ofursti í þýska hernum, Claus von Stauffenberg, stóð fyrir tilræði gegn Adolf Hitler á þessum degi fyrir 70 árum. Stauffenberg skildi eftir tösku hlaðna sprengiefni í herráðsherbergi Hitlers í Austur-Prússlandi. Einhver flutti tösku ofurstans á bakvið sveran eikarfót fundarborðs og varð það einræðisherranum sennilega til lífs.

Stauffenberg og félagar hans í samsærinu voru skotnir í portinu á Bendler-Block í Berlín en þar voru höfuðstöðvar hersins. Bendler-Block stendur enn enda varð byggingin ekki fyrir skaða í styrjöldinni. Forseti Þýskalands hélt minningarræðu um Stauffenberg og 20-júlí samsærismennina. Hann sagði þýska herinn standa í ævarandi þakkarskuld við þá sem gripu til vopna gegn órétti nasismans.

Sonur Stauffenberg, Berthold, var tíu ára þegar þegar faðir hans reyndi að drepa Hitler. Berthold gerðist líkt og faðir sinn atvinnuhermaður. Í tilefni af tilræðinu ræðir BBC við son bæklaða ofurstans sem freistaði þess að binda endi á þriðja ríki Hitlers tæpu ári áður en það féll fyrir óvinaherjum.

Frjálshyggja, samfélag og áfengi

Frjálshyggja í merkingunni lágmarksríkið sem tryggir eignaréttinn en fátt meira er í mótsögn við samfélag. Hvort heldur litið er til sögulegra dæma eða röklegs samhengis gengur frjálshyggja ekki upp í samfélagi.

Í samfélagi verða til lög og reglur um viðurkennd samskipti. Eftir atvikum eru lögin rædd og túlkuð. Meðal forn-grískra borgríkja var umræðan um hvað væri leyfilegt í samskiptum bandamanna og óvina í stríði, samkvæmt frásögn Þúkídídesar af Pelópsskagastríðinu.  Fyrir rúmum þúsund árum var á alþingi Íslendinga tekist á um hvort tvennir siðir og tvenn lög mættu gilda í landinu. Málamiðlun milli kristni og heiðni er lögð Þorgeiri Ljósvetningagoða í munn. Lykilsetning Þorgeirs  er eftirfarandi

miðlum svo mál á milli þeirra, að hvorir tveggju hafi nakkvað síns máls, og höfum allir ein lög og einn sið

Málamiðlun Þorgeirs vísar til samfélags þar sem margvísleg lög og reglur setja mönnum hömlur og mæla fyrir um hvernig skuli halda friðinn. Þó var ekkert ríkisvald á Íslandi á þjóðveldisöld og lifnaðarhættir fábrotnir í samanburði við nútíma.

Ef Þorgeir hefði verið frjálshyggjumaður myndi hann hafa sagt eitthvað á þá leið að ef heiðnir og kristnir gætu sameinast um að virða eignaréttinn og um helstu reglur um verslun og viðskipti mætti hver hafa sína trú.

Þorgeir var trúlaus í boðskap sínum, sagði að Íslendingar skyldu kristnir að nafninu til en leyfa iðkun heiðni, en hann var raunsær í áherslu sinni að lög og reglur halda samfélaginu saman. 

Kjarninn í klassískri frjálshyggju er eignarétturinn. Hversdagsleg reynsla segir að önnur gæði eru okkur ofar í huga en eignarétturinn, s.s. öryggi og heilbrigði. Við sættum okkur við margvíslegar takmarkanir á eignaréttinum. Bifreiðaeigendur mega til dæmis ekki aka bílum sínum hraðar en 30 km á klst. nærri skólum og við takmörkum skotvopnaeign.

Frjálshyggju og einstaklingsfrelsi er oft splæst saman og látið eins og þar falli flís við rass. En það er rangt. Frjálshyggjan snýst um eignaréttinn en ekki einstaklingsfrelsi. Eignarétturinn er skilgreindur af samfélagi; einn maður eyðieyju þarf ekki á eignarétti að halda.

Endrum og sinnum gýs upp umræða um að þessi og hin lögin takmarki einstaklingsfrelsi. Einatt eru frjálshyggju- og frelsisrök þar tvinnuð saman. Þessa dagana eru það áhugamenn um að dagvöruverslanir fái leyfi til að selja áfengi sem eru háværustu frjálshyggjumenn landsins.

Áfengi er vara sem hvorttveggja snertir gæði eins og öryggi, sbr. umferðaröryggi, og heilbrigði. Við búum við fyrirkomulag í áfengisverslun sem er þrautreynt til áratuga. Fyrirkomulagið tryggir aðgengi neytenda að áfengi en einnig samfélagslegt eftirlit og öryggi, t.d. með því að takmarka aðgang barna og unglinga.

Frjálshyggjurökin í áfengisumræðunni undirstrika málefnafátækt frjálshyggjumanna í tvennum skilningi. Í fyrsta lagi lítilmótlegar hugsjónir frjálshyggjumann - brennivín í búðirnar - og í öðru lagi fyrirlitningu frjálshyggjumanna á almennt viðurkenndum gæðum samfélagsins um öryggi og heilbrigði.

 

 

 

 

RÚV staðfestir stórveldi Framsóknar

Aðeins erlendar stórhörmungar ryðja umfjöllun um Framsóknarflokkinn úr fyrsta sæti frétta RÚV undanfarna daga. Með því að RÚV gerir svona vel við Framsóknarflokkinn, að setja fréttir af flokksstarfinu í fremst í hvern fréttatíma á fætur öðrum, staðfestir RÚV leiðandi hlutverk Framsóknarflokksins í íslenskum stjórnmálum.

Á vettvangi Framsóknarflokksins eru pólitísk hitamál sett á dagskrá, þau rædd í þaula þannig að neistar fljúga og maður og annar hrekkur frá borði. Enginn annar stjórnmálaflokkur getur státað af jafn mikilli pólitískri gerjun og Framsóknarflokkurinn.

Ánægjulegt er að RÚV sinni kraftmiklu pólitísku starfi Framsóknarflokksins jafn vel og raun ber vitni.

„Ég skil ekki mennina“