Auðmenn sækja í útlent réttlæti

Ásókn auðmanna í útlent réttlæti, bæði með kærum til mannréttindadómstólsins í Strassborg og keyptum álitsgerðum frá útlendum lagaspekingum, gefur til kynna að íslenska réttakerfið vinni í þágu almannahagsmuna en ekki sértækra hagsmuna auðmanna.

Í útrás áttu auðmenn Ísland nánast skuldlaust; stjórnmálamenn og heilir stjórnmálaflokkar voru í vasa þeirra sem og fjölmiðlar. Auðmenn virtust vera með ríkisvaldið í höndum sér og stofnanir eins og Fjármálaeftirlitið urðu undirdeild hjá Samtökum atvinnulífsins.

Sakamála- og réttarkerfið vinnur á hinn bóginn nokkurn veginn eins og það sé óspillt af áhrifum auðmanna. Óskum okkur til lukku með það.

Mannréttindadómstóllinn vísar frá máli Ingólfs

Skítsamabylting 800 óánægðra

,,Ætlar RÚV ekki að leiðrétta þessa tölum, við vorum að minnsta kosti 3000 til 4000 á Austurvelli," sagði feisbúkkfærslu í gærkvöldi þegar einhver hinna 800 í jæja-mótmælunum ímyndaði sér að vera hluti af margfalt stærri heild. Fjölmiðlar, sem þekktir eru fyrir að vera vinveittir aðgerðahópum af þessu tagi, sögðu tölu mótmælenda innan við eitt þúsundið. 

Þeir sem stóðu mótmælin í gær ímynduðu sig þjóðfélagsafl en reyndust lítill hópur óánægðra.

Ræðumenn jæja-hópinsins voru alkunnir talsmenn ónýta Íslands, þeir Illugi Jökulsson og Bragi Páll Sigurðsson. ,,Skítsama" hét ræðustef Illuga sem kallast á við ælu- og kúkaræðuna á fyrsta mótmælafundi jæja-hópsins. Boðskapur Illuga var að ríkisstjórninni væri sama um allt nema völdin og ætti þess vegna að fara frá.

Illugi er vanur maður að klæða persónulega óánægju í almennan búning. Bragi Páll er enn að læra fagið láta eins og hann sé að tala fyrir meiri hagsmuni en sína einkahagi. Hann missti þetta út úr sér

Ég er þreyttur á því að vilja ekki búa á Íslandi.

Sakir vankunnáttu veitir Bragi Páll óvænta innsýn í hugarheim mótmælenda. Þeir trúa því að heimurinn eigi að snúast um það sjálft. Ef Braga Páli leiðist á Íslandi á að bylta Íslandi til að landið þóknist honum.

Braga Páli er skítsama um allt og alla nema um sjálfan sig. Þar sver hann sig raunar í ætt við leiðtoga stjórnarandstöðunnar.

Skítsamafólkið verður aldrei þjóðfélagsafl. Til þess er það of lítilmótlegt. 

Stjórnarandstaða ríka fólksins

Formenn Samfylkingar, Vg og Bjartrar framtíðar eru með tvöfalt og þrefalt meðalkaup. Þau Árni Páll, Katrín og Guðmundur Steingríms sóttu öll um og fengu leiðréttingu lána sinna. Kjarninn tók eftirfarandi saman

Regluleg meðallaun vinnandi Íslendinga í fyrra voru 436 þúsund krónur. Samkvæmt tekjublaði DV var Katrín Jakobsdóttir með 1.608 þúsund krónur í mánaðarlaun á árinu 2013 (þegar hún var ráðherra), Árni Páll Árnason með 1.009 þúsund krónur á mánuði og Guðmundur Steingrímsson með 926 þúsund krónur.

Þegar ríka fólkið í landinu á jafn öfluga stjórnarandstöðu og raun ber vitni þá er eins gott að almenningur eigi hauka í horni ríkisstjórnarinnar sem hugsar um hag meðalfjölskyldunnar.

Ríkisstjórnin upp, mótmælin niður

Innan við þúsund manns mættu á þriðja mótmælafund jæja-fólksins, samkvæmt RÚV, Vísir talar um 800 manns. Fyrir tveim vikum mættu fjögur þúsund manns á mótmælin og um 1500 fyrir viku. Ríkisstjórnin mælist á sama tíma með stóraukið fylgi.

Haustatlaga vinstrimanna er farin út um þúfur enda sér almenningur í gegnum froðu ómerkilega fólksins sem mótmælir leiðréttingunni en hirðir sinn hlut engu að síður.

Vinstrimenn féllu eins og jafnan fyrrum á eigin bragði; pólitískar yfirlýsingar þeirra ríma ekki við veruleikann.

 

Mótmælt á Austurvelli

Einveldi embættismanna ekki í þágu almannahags

Umboðsmaður alþingis færir sig upp á skaftið og kemur þar í kjölfar ríkissaksóknara, sem skiptir sér af pólitík, og embættismanna í utanríkisráðneytinu er ætla sér að móta utanríkisstefnu lýðveldisins.

Valdasókn embættismanna gerist í skjóli þess að stjórnmálamenn eru í lágu rykti; ef Ísland væri með her myndi sú stofnun hnykla vöðvana þegar stjórnmálamenningin væri í upplausn, líkt og mörg dæmi eru um erlendis.

Þeir sem kunna að óskar sér aukin völd til embættismanna ættu að íhuga afleiðingarnar. Ekkert segir okkur að embættismenn séu vandaðri eða betur að sér en fólk almennt. Stjórnmálamenn eru kjörnir fulltrúar og sækja umboð sitt til almennings. Embættismenn þurfa ekki að svara fyrir embættisfærslu sína gagnvart almenningi.

Vaxandi völd embættismanna stórskaða lýðræðið með því að hola það að innan. Ef almenningur fær á tilfinninguna að embættismenn ráði ferðinni en ekki kjörnir fulltrúar þá glatast virðingin fyrir lýðræðislegum ferlum eins og kosningum sem skilar sér í minni kjörsókn og það dregur úr lögmæti alþingis.

Til skamms tíma var alþingi vettvangur helstu málamiðlana hér á landi. Eftir því sem veigameiri ákvarðanir eru teknar utan þings, af embættismönnum, verður alþingi lítilfjörlegra. Þessa þróun verður að stöðva áður en í óefni er komið.

 

Umboðsmaður krefur ráðherra svara

Pawel, Benedikt vilja Hönnu Birnu feiga í pólitík

Pawel Bartoszek og Benedikt Jóhannesson vinna að stofnun Viðreisnar sem yrði klofningur úr Sjálfstæðisflokknum. Báðir eru ESB-sinnar og sem slíkir vilja þeir Ísland inn í Evrópusambandið.

Pawel vill að Hanna Birna Kristjánsdóttir segi af sér og Benedikt óskar sér sömuleiðis Hönnu Birnu feiga úr forystusveit Sjálfstæðisflokksins.

Þegar andstæðingar Sjálfstæðisflokksins herja á Hönnu Birnu með þessum hætti þá er það ekki vegna velvildar í garð móðurflokks íslenskra stjórnmála.

Að trúa á morð, 1914 og 2014

Fyrir hundrað árum hófst fyrri heimsstyrjöld með því að stærstu Evrópuríkin ákváðu að vegna smáríkis í suðausturhluta álfunnar, Serbíu, skyldu vopnin tala frá Ermasundi til Úralfjalla. Í flestum löndum sameinuðust stjórnmálamenning og dægurmenning í stríðsákafa.

Stríðslöngun er fyrirbrigði sem gýs upp við kringumstæður velmegunar. Vestur-Evrópuríki í byrjun 20. aldar nutu meiri og almennari lífsgæða en fyrr þekktist. Engu að síður tóku ungir menn tækifærinu fagnandi að skrá sig í herinn til að drepa aðra unga menn.

Evrópskir fjölmiðlar í dag, t.d. Spiegel og BBC, segja frá þúsundum múslíma í Evrópu sem skrá sig í stríð í Mið-Austurlöndum þar sem einn meiður múslímatrúar, kenndur við súnní, lætur sér ekki vel líka að beygja sig undir veraldlegt vald.

Stríðsgleðin ágústdagana 1914 breyttist fljótt í blóðvættar forarvilpur í Flandri. Eftir fjögurra ára stríð var heimurinn ekkert betri en tíu milljónum ungra manna fátækari. Hætt er við að átökin í Mið-Austurlöndum skili engu nema ótímabærum dauða ungra manna.

 

 

 

 

Leiðrétta fólkið og ómerkilega fólkið

Tugþúsundir Íslendinga fengu leiðrétt lán sín í síðustu viku, líkt og ríkisstjórnin lofaði í upphafi kjörtímabilsins. Margir af þeim sem sóttu um og fengu leiðréttingu töldu leiðréttinguna ótæka og vildu fremur að peningarnir færu í heilbrigðiskerfið.

Meðal þeirra sem fengu leiðréttingu en formæltu henni samtímis voru formenn Vg og Samfylkingar, Katrín Jakobsdóttir og Árni Páll Árnason, auk fjölda þingmanna vinstriflokkanna.

Marinó G. Njáls­son, sem lengi hef­ur bar­ist fyr­ir hags­mun­um heim­il­anna, og eig­in­kona hans Harpa Karls­dótt­ir leggja til að þeir sem fengu leiðréttingu, og þurfa ekki á henni að halda, láti peninginn renna í sjóð til styrktar heilbrigðiskerfinu.

Fyrir viku mótmælti jæja-hreyfingin slæmri stöðu heilbrigðiskerfisins. Ef jæja-fólkið meinti eitthvað með þeim mótmælum þá hefði það boðið Marinó að flytja tölu á fundinum á morgun til að útlista hvernig mætti bæta heilbrigðiskerfið með átaki almennings.

En jæja-fólkið hefur ekki áhuga á lausnum. Jæja-fólkið tilbiður ömurleikann. Frummælendurnir á morgun eru báðir fulltrúar þess sjónarmiðs að Ísland sé ónýtt. Annar þeirra birti þennan kveðskap nýverið

Þannig að Sigmundur Davíð, éttu skít.
Hanna Birna, éttu skít.
Sigurður G., éttu skít.
Vigdís Hauks, éttu skít.

Jæja-fólkið er álíka merkilegt og þingmennirnir sem formæla leiðréttingunni en stinga sínum hluta í vasann um leið og það segir öðrum að éta skít.

„Jæja, Hanna Birna“

Saksóknari í pólitík eftir sneypuför fyrir dómi

Ríkissaksóknari fer með ákæruvaldið í landinu. Hann ákveður upp á sitt einsdæmi hverjir skulu sæta rannsókn og hvort ákært skuli í framhaldi. Þeir sem fara með ákæruvaldið ættu að haga orðum sínum þannig að heiðarleiki embættisins verður ekki dregin í efa. Sú er ekki raunin.

Vararíkissaksóknari, Helgi Magnús Gunnarsson, kemur ítrekað fram í fjölmiðlum með þeim hætti að stórlega má efast um dómgreind hans. Helgi Magnús fór sneypuför fyrir héraðsdóm Reykjavíkur á miðvikudag sem handhafi ákæruvaldsins gegn Gísla Frey Valdórssyni.

Saksóknarinn Helgi Magnús reyndi að gera upplýsingagjöf Gísla Freys til fjölmiðla að stórpólitísku máli með því að væna Gísla Frey og ráðherra um að hafa lekið upplýsingum sér til ávinnings. Dómarinn í málinu, reyndur maður í sínu fagi, Arngrímur Ísberg, blés á málatilbúnað Helga Magnúsar og sagði þetta um pólíska hluta ákærunnar:

Hins vegar er ekki fallist á að sýnt hafi verið fram á að ákærði hafi komið minnisblaðinu á framfæri í því skyni að afla sér eða öðrum óréttmæts ávinnings, hvorki fjárhagslegs né annars.

Í stað þess að taka niðurstöðu dómsins eins og manni í embætti saksóknara sæmir þá hóf Helgi Magnús upp málflutning gegn innanríkisráðherra í fjölmiðlum strax eftir niðurstöðu dómara.

Pólitískur áhugi Helga Magnúsar á málinu hófst raunar áður en lekamálið var dómtekið en þá tjáði hann sig með ótvíræðum hætti á samfélagsmiðlum með ,,læki".

Helgi Magnús lét ekki við sitja að gefa pólitískar yfirlýsingar strax eftir dóminn heldur er kappinn mættur í helgarviðtal í RÚV og heldur áfram pólitískum árásum á innanríkisráðherra.

 

Með pólitískum yfirlýsingum sínum vanvirðir Helgi Magnús niðurstöðu héraðsdóms og opinberar jafnframt að pólitísk heift fremur en málefnaleg yfirvegun ræður ferðinni hjá embætti ríkissaksóknara. Og það veldur hrolli.

Auðmaðurinn skammar Árna Pál og Helga Hjörvar

Formaður Samfylkingar, Árni Páll Árnason, og Helgi Hjörvar þingmaður sama flokks eru meðal þeirra vinstrimanna sem sóttu um leiðréttingu lána sinna og fengu.

Best auglýsti auðmaður Samfylkingar, Vilhjálmur Þorsteinsson, skrifar pistil þar sem hann segir leiðréttinguna galna. Auðmaðurinn er meira í takt kjósendur Samfylkingar en formaðurinn og Helgi. Könnun Fréttablaðsins segir að meirihluti kjósenda flokksins séu á móti leiðréttingunni.

Sannfæringakrafturinn mun geisla af Árna Páli og Helga þegar þeir á alþingi harma leiðréttinguna sem þeir þó stinga í eigin vasa.