Össur ímyndar sér endalok Davíðs og Sigmundar Davíðs

Össur Skarphéðinsson er ímyndarstjórnmálamaður. Hann ímyndar sér hluti og vonar að hugarburðurinn verði að veruleika ef nógu margi taka undir slúðrið.

Össur kemur ímyndun sinni á framfæri við ýmsa aðila og gína sumir við beitunni. Gísli Baldvinsson, til dæmis, tekur oft agn frá Össuri enda er hann kallaður Gössur. Fyrir þrem árum endurvarpaði Gísli slúðri frá Össuri um að Davíð Oddsson hætti ,,bráðlega" á Morgunblaðinu.

Núna ímyndar Össur sér endalok stjórnmálaferils Sigmundar Davíð Gunnlaugssonar forsætisráðherra. Össuri tókst ekki að selja þessa tröllasögu og varð því að birta hana sem feisbúkk færslu, Eyjan endurbirtir. 

Ímyndarstjórnmál Össurar endurspegla ótta fyrrum formanns Samfylkingar við málafylgjumenn.

Sjálftekja forstjóra og ábyrgð stjórnar

Isavia er að verða eitt af þessum subbufyrirtækjum þar sem spillingin nær frá toppi til táar. Forstjórinn kemst upp með að gera fyrirtækið að lénsveldi og raðar á garðana vinum og vandamönnum.

Stjórnin situr hjá og leyfir spillingunni að grassera líkast til vegna þess að stjórnarsetunni fylgir ábatasöm aðkoma.

Stjórnvöld verða að stinga á spillingarkýlinu, setja af sitjandi stjórn og koma skikki á Isavia áður en frekari vandræði hljótast af.

 

Greiddi ferðalög fjölskyldumeðlima

2% hagvöxtur og engar öfgatilraunir

Við brenndum okkur á örum hagvexti fyrir hrun. Of lítill hagvöxtur veldur kreppu og atvinnuleysi. Hagvöxtur mjög í nágrenni við 2 prósent er hæfilegur.

Verkefni næstu missera og ára er að tryggja að pólitískan stöðugleika í landinu til að ekki verði gerðar öfgatilraunir í efnahagspólitíkinni, hvort heldur til hægri eða vinstri.

Sitjandi ríkisstjórn er besti pólitíski kosturinn nú um stundir.

 

 

Hagvöxturinn 1,9%

Grikkir hóta ESB með Ríki íslam

Varnarmálaráðherra Grikklands hótar að hleypa flóttafólki frá Miðausturlöndum til Evrópusambandsríkja, þar á meðal hryðjuverkamönnum úr Ríki íslam, ef ESB lætur Grikki ekki fá aukna fjárhagsaðstoð.

Telegraph segir frá þessari hótun sem kemur í kjölfar stigvaxandi deilna nýmarxistastjórnarinnar í Aþenu og Brussel.

Evrusamstarfið nærir ekki beinlínis bræðraþelið.

Árni bæjó: einkaframtakið á spena bæjarsjóðs

Reykjanesbær er dæmi um ruglrekstur þar sem vinasósíalismi var í öndvegi og skóp örfáum mönnum auð á kostnað almennings. Árni Sigfússon bæjarstjóri er höfuðpaurinn í gjaldþrotaferli bæjarfélagsins.

Árni lýsir ábyrgð sinni með þessum orðum:

Ég held að ég beri ábyrgð á því að við erum búin að byggja gott og öfl­ugt sam­fé­lag,“ seg­ir Árni aðspurður hvort hann beri ekki nokkra ábyrgð á stöðunni, sem fyrr­ver­andi bæj­ar­stjóri. „Við erum búin að vera að byggja hér at­vinnu­lífið, við erum búin að vera að standa okk­ur vel í mennt­un og ég skal bera ábyrgð á því. Jafn­framt hef­ur ekki gengið að ná upp ýms­um verk­efn­um, sér­stak­lega í at­vinnu­mál­um. Það er mik­ill kostnaður og það er það sem við erum að glíma við. Svo ég skal al­veg bera ábyrgð á þessu öllu.

Hvergi vottar fyrir hjá Árna viðurkenning á því að hann og félagar hans stefndu fjárhagslegri afkomu bæjarfélags í voða með skeytingarlausum ákvörðunum í þágu hinna fáu á kostnað fjöldans.

Árni á að heita flokksmaður í stjórnmálaflokki sem treystir á ábyrgð einstaklingsins. En hann var sem bæjarstjóri - ekki einstaklingur - að ,,byggja hér atvinnulífið." Og notaði til þess fjármuni bæjarfélagsins sem núna er gjaldþrota.

Svei þér, Árni Sigfússon.

„Ég skal bera ábyrgð á þessu öllu“

Árni bæjó og vinasósíalisminn

Reykjanesbær er gjaldþrota, líkt og Sparisjóður Keflavíkur var gjaldþrota. Munurinn er sá að Reykjanesbær fær útsvarstekjur og veitir þjónustu sem ekki er hægt að flytja yfir í önnur fyrirtæki eða stofnanir. Þess vegna er Reykjanesbær enn á floti.

Árni Sigfússon bæjarstjóri Reykjanesbæjar til skamms tíma stundaði vinasósíalisma þar sem opinberu fjármagni var blandað við hálfopinbera fjármuni, t.d. SpKef, og einkahagsmuni Árna og vina hans.

Eigur bæjarins voru seldar fasteignafélagi sem leigði þær aftur til bæjarins. Hver ætli hafi verið stjórnarformaður og makað krókinn? Jú, vitanlega Árni.

Vinasósíalismi er að veita skattfé almennings til vina og vandamanna. Sjálfstæðismenn í Reykjanesbæ eru þar í úrvalsdeild.

Össur gæti sokkið með ESB-umsókninni

ESB-umsóknin er nátengd Össuri Skarphéðinssyni enda var hann utanríkisráðherra vinstristjórnar Jóhönnu Sig. sem keyrði umsóknina í gegnum alþingi 16. júlí 2009.

Kunnir vinstrimenn, m.a. úr Samfylkingunni, s.s. Stefán Ólafsson, Jón Baldvin Hannibalsson og núna Baldur Þórhallsson þvo hendur sínar af ESB-umsókninni.

Árni Páll Árnason formaður Samfylkingar er tvístígandi yfir stöðu mála og er farinn að gagnrýna einarða ESB-sinna fyrir eintrjáningshátt.

Samfylkingin stendur frammi fyrir því vali að púkka upp á ESB-umsókn Össurar og sitja þar með uppi með ónýtt mál sem skilgreinir flokkinn og í leiðinni útilokar hann frá samstarfi eða láta umsóknina og Össur lönd og leið.

 

Femínismi, fasismi og múslímatrú

Femínismi gegn fasisma er boðskapur alþjóðadags kvenna. Femínistar ættu kannski að líta sér nær eftir verðugum viðfangsefnum til að fást við fremur en hugmyndafræði sem rann sitt skeið á síðustu öld.

Til dæmis mættu femínistar íhuga að í landi eins og Sádi-Arabíu er nær helmingur kvenna barinn til óbóta á heimilum sínum.

Femínistinn Líf Magneudóttir og formaður mannréttindaráðs er ekki með minnstu áhyggjur af vexti og viðgangi sádi-arabískrar útgáfu af múslímatrú, wahabisma, hér á landi og segist treysta dómgreind múslíma.

Femínismi og dómgreind eru andstæður.

Jafnrétti yfirskin í pólitík

Lýðræði verður barefli í ESB

Grikkir töldu sig geta kosið sig frá hörðum efnahagslegum veruleika með því að kjósa til valda Syriza, sem er marxískt vinstribandalag.

Eitthvað gengur Grikkjum illa að sannfæra lánadrottna sína í öðrum ESB-ríkjum að þingkosningar í Grikklandi skuli leiða til stefnubreytingar í Brussel, Berlín og París gagnvart skuldseigum Suður-Evrópuríkjum.

Og nú er það þjóðaratkvæðagreiðsla um það hvort Grikklandi yfirgefi evruna sem er næsta stig hótunar gagnvart ráðandi öflum í ESB.

Lýðræði í ESB-ríkjum, einkum þeim minni og vanmáttugri, er orðið að barefli í milliríkjasamskiptum og haldlaust sem slíkt. Grikkland er í reynd orðið léttvægt sveitarfélag í Stór-Evrópu og með álíka vægi gagnvart Brussel og Þórshöfn gagnvart alþingi.

Þjóðaratkvæðagreiðsla möguleg

Juncker vill Evrópuher

Framkvæmdastjóri Evrópusambandsins, Jean-Claude Junceker, segir nauðsyn á Evrópuher. ,,Slíkur her," er haft eftir Juncker í Welt, ,,myndi sýna að okkur sé alvara að verja þau gildi sem Evrópusambandið stendur fyrir."

Framkvæmastjórinn segir öryggis- og varnarhagsmuni Evrópusambandsins í húfi. Evrópher myndi sýna umheiminum að ESB tæki ábyrgð sína alvarlega.

Evrópusambandið stendur fyrir deilum við Rússland um áhrifasvæði í Austur-Evrópu. Blóðugir bardagar standa yfir í Úkraínu milli stjórnarhersins, sem ESB styður, og uppreisnarmanna sem Rússar styðja.

Orð framkvæmdastjóra ESB um nauðsyn á hervæðingu sambandsins sýnir svo ekki verður um villst að eina leið ESB til að þrífast er að verða Stór-Evrópuríki með sameiginlega mynt, sameiginlegt ríkisvald og sameiginlegan her.