Barn getur ekki verið trans

Rithöfundurinn JK Rawling fagnar sigri Kemi Badenoch í leiðtogakjöri Íhaldsflokksins. Rawling, höfundur Harry Potter-bókanna, er kjósandi Verkamannaflokksins, en þekkt fyrir baráttu sína gegn yfirgangi karla í kvenlíki í kvennarýmum s.s. búningsklefum, salernum og kvennadeildum sjúkrahúsa. Samkvæmt trans ræður hugarfarið kyni, ekki líkaminn. Sumir karlar nýta sér það, t.d. til að keppa í kvennaíþróttum. 

Mér finnst Badenoch bæði greind og hugrökk og fagna kjöri hennar, segir Rawling. 

Barn getur ekki verið trans, sagði Badenoch í kappræðum vegna leiðtogakjörs Íhaldsflokksins, samkvæmt Telegraph. Hún var áður jafnréttisráðherra og vann að endurskoðun löggjafar til að tryggja rétt kvenna til kynaðgreindra rýma. Í ráðherrastarfi sagðist Badenoch hafa séð sterkar sannanir fyrir því að ungmennum sem eru samkynhneigð eða glíma við geðraskanir sé talin trú um að þau séu trans.

Hér á Íslandi eru Samtökin 78 með starfsemi í leik- og grunnskólum. Þar er börnum kennt að mögulega séu þau af röngu kyni. Nærri má geta að þau börn sem glíma við félags- og/eða þroskavanda séu líklegri en önnur til að leggja trúnað á fullorðna sem fara með sérstöku hugarfari í hlutverkaleiki með börnum. Þeir sem andmæla æskulýðsstarfi Samtakanna 78 eiga yfir höfði sér ákæru frá lögreglu.

Barn getur ekki verið trans, eins og nýkjörinn formaður breska Íhaldsflokksins segir. Lifandi nýburi fæðist með líkama og meðvitund. Líkaminn er annað tveggja karlkyns eða kvenkyns. Barn getur ekki verið í röngum líkama, ekki frekar en það gæti haft ranga meðvitund. Það er ómöguleiki. Sértrúarsamtök sem halda öðru fram eiga sinn rétt í heimi fullorðinna, sem hafa leyfi, í nafni félagafrelsis, að halda á lofti hvaða firru sem vera skal. En það á ekki að hleypa þeim nálægt leik- og grunnskólum.

Kosningabarátta stendur yfir hér á landi. Er einhver stjórnmálamaður nógu hugaður til að segja upphátt þessi sjálfsögðu sannindi: barn getur ekki verið trans.

 

Badenoch nýr leiðtogi Íhaldsflokksins

Lögreglan, guðlast og Samtökin 78

Frjáls umræða er einkenni lýðræðisríkja. Umræða er forsenda málamiðlana sem þarf í samfélagi er kýs frið fremur en ófrið, stöðugleika í stað óreiðu, jafnræði umfram yfirgang.

Í lýðræðisríki fer lögreglan ekki með dagskrárvald opinberrar umræðu. Lögreglan hefur ríkari valdheimildir en aðrar stofnanir og eru þær til að verja öryggi borgaranna, eigur þeirra og allsherjarreglu. Þá rannsakar lögreglan afbrot og kemur í veg fyrir ólögmæta starfsemi.

Fyrir tíu árum var í gildi grein í hegningarlögum:

Hver, sem opinberlega dregur dár að eða smánar trúarkenningar eða guðsdýrkun löglegs trúarbragðafélags, sem er hér á landi, skal sæta sektum eða fangelsi allt að 3 mánuðum. Mál skal ekki höfða, nema að fyrirlagi saksóknara.

Lagagreinin var afnumin árið 2015 með frumvarpi þriggja þingmanna Pírata. Þeir sögðu m.a. í greinargerð:

Fólk hefur ólíka sýn á lífið og því er viðbúið að tjáning sem einn telur eðlilega telji annar móðgandi. Sem betur fer eru upplifanir fólks af lífinu og tilverunni afskaplega ólíkar.

Náskyld lagagrein er enn í gildi, 233. gr. a. hegningarlaga. Upphaf og niðurlag er svohljóðandi:

Hver sem opinberlega hæðist að, rógber, smánar eða ógnar manni eða hópi manna með ummælum eða annars konar tjáningu [...] skal sæta sektum eða fangelsi allt að 2 árum.

Samtökin 78 kærðu til lögreglu tilfallandi fyrir brot á lagagreininni. Í framhaldi ákærði lögreglan, eins og greint var frá í bloggi gærdagsins.

Glöggir lesendur taka eftir að lagagreinin bannar háð, róg, smánun og ógn gagnvart ,,manni eða hópi manna." Tilfallandi talaði hvorki um mann né hóp manna í texta sem ákært er fyrir heldur Samtökin 78.

Lögreglan í Reykjavík, í umboði ríkissaksóknara, segir gagnrýni á félagasamtök jafngilda að eitthvað misjafnt sé sagt um aðildarfélaga samtakanna. Það er rökvilla. Félagasamtök eru sjálfstæður lögaðili, einstaklingarnir sem eiga aðild eru annað. Kannski að saksóknari lögreglu líti á Samtökin 78 sem trúfélag. Trúarkenningar um að hægt sé að fæðast í röngum líkama eru ekki hafnar yfir gagnrýni. Lagagreinin sem bannaði guðlast var afnumin fyrir bráðum tíu árum.

Lögregla og ákæruvald ættu að láta borgarana um frjálsa orðræðu. Lögreglu er ætlað að verja lýðræðið, ekki kæfa það með þöggun.   

 

 

 

Samtökin '78 kæra Pál Vilhjálmsson

Tilfallandi ákærður fyrir að andmæla trans í skólum

Vingjarnlegur lögreglumaður bankaði upp á hjá tilfallandi á miðvikudag. Erindið var að afhenda ákæru frá lögreglustjóranum í Reykjavík. Tilfallandi var kunngjört að ef hann mætti ekki í fyrirkall á tilsettum tíma í héraðsdómi Reykjavík yrði hann handtekinn og færður í járnum fyrir dóm.

Tilfallandi hélt í fyrstu að um grín væri að ræða. Næsta gisk var að blaðamennirnir í byrlunar- og símamálinu ættu hlut að máli, væru komnir með höfuðborgarlögregluna í verktakaþjónustu. Svo reyndist ekki vera. Lögreglumaðurinn vinalegi var hvorki með uppákomu í tilefni hrekkjavöku né sakborninga úr röðum blaðamanna. Hann afhenti ákæruskjalið og kvittanablað um hvenær þingfesting yrði í héraðsdómi. Rifjaðist upp fyrir tilfallandi að hafa verið kallaður síðsumars í skýrslutöku hjá lögreglu vegna ársgamallar kæru formanns lífsskoðunarfélags. Er ekkert heyrðist um framhald gerði tilfallandi ráð fyrir að kæran hefði farið í ruslið. Svo var ekki.

Og hver var þá ákæran?

Jú, tilfallandi, að mati lögreglustjórans í Reykjavík, braut gegn 233. gr. a. hegningarlaga. Lagagreinin er svohljóðandi:

Hver sem opinberlega hæðist að, rógber, smánar eða ógnar manni eða hópi manna með ummælum eða annars konar tjáningu, svo sem með myndum eða táknum, vegna þjóðernisuppruna eða þjóðlegs uppruna, litarháttar, kynþáttar, trúarbragða, fötlunar, kyneinkenna, kynhneigðar eða kynvitundar, eða breiðir slíkt út, skal sæta sektum eða fangelsi allt að 2 árum.

Þetta er sama orðalag og var á lagagrein er bannaði guðlast. Sértrúarhópar vilja skjól í lögum eins og kristni forðum.

Kemur þá að meintum brotum tilfallandi á 233. gr. a. hegningarlaga. Haustið 2023 var umræða í samfélaginu um aðgengi Samtakanna 78 að leik- og grunnskólum með áróður um kynjamál. Upplýst var að texti og myndefni frá samtökunum sem haft var til kennslu samrýmdist ekki siðferðisvitund þorra almennings. Börnum var kennt um kynlíf á þann hátt að mörgum ofbauð. Tilfallandi var á þeirri skoðun að Samtökin 78 ættu ekkert erindi í leik- og grunnskóla með sérvisku sína um kyn og kynlíf. Lífsskoðunarfélagið sem kennir sig við 78 heldur fram bábiljum um að hægt sé að fæðast í röngu kyni og mælir með limlestingu kynfæra séu þau af rangri sort.

Áður en umræðan um kennsluefnið vafasama hófst haustið 2023 hafði tilfallandi vakið athygli á að transhugmyndafræðin væri ekki barnaglingur. Í janúar 2023 skrifaði hann um veggspjaldi er dreift var leikskóla með þeim boðskap Samtakanna 78 að eðlilegt sé að óskyldur fullorðinn ræði við smábörn um ástarhug. Þar sagði m.a.:

Með leyfi, hvernig dettur nokkrum í hug að rómantískar kenndir skuli vera á dagskrá í leikskóla? Hvers vegna er ,,ást og skot" til umræðu fyrir börn 2-6 ára? Börn á þessum aldri hafa engar forsendur til að skilja rómantískar tilfinningar. Aðeins fólk með verulega brenglaða hugsun lætur sér til hugar koma að færa í tal við smábarn, sér óskylt, að verða ,,skotinn" í einhverjum.

Haustið 2023 fór umræðan um starf Samtakanna 78 á flug. Vegna umræðunnar var forsætisráðuneytið knúið til að birta yfirlýsingu. Gerist ekki á hverjum degi. Aðdragandi umræðunnar var nokkur. Í nóvember 2022 hætti starfsmaður Samtakanna 78 eftir ásakanir um kynferðisbrot gegn börnum. Sumarið 2023 var aftur frétt um karl í konulíki sem á vegum Samtakanna 78 stundaði fræðslu í einn stað en í annan stað áleitni gagnvart börnum. Í báðum tilvikum er Álfur Birkir Bjarnason formaður Samtakanna 78 til svara.

Álfur Birkir taldi haustið 2023 að nóg væri komið af neikvæðri umræðu um Samtökin 78 og starf þeirra í leik- og grunnskólum. Nú skyldi hefja gagnsókn og kæra þá fyrir hatursorðræðu sem andmæltu starfi lífsskoðunarfélagsins meðal smábarna og grunnskólakrakka. Álfur Birkir kærði í október 2023 tilfallandi til lögreglu. Í eitt ár hafði lögreglan málið til skoðunar og lætur nú til skarar skríða. Hvað fann lögreglan í bloggskrifum sem hægt væri að ákæra fyrir? Jú, blogg frá 13. september 2023. Tvær efnisgreinar eru teknar úr blogginu sem tilfallandi skal sæta fangelsi fyrir í allt að tvö ár. Efnisgreinarnar eru eftirfarandi:

1. Samtökin 78 eru regnhlífarsamtök og lífsskoðunarfélag fullorðinna sem áhugasamir eru um klám, kynlíf, kynjaveröld og tælingu barna.

2. Kennsluefnið er tæling dulbúin sem upplýsingar. Meðfædd blygðunarsemi barna er skipulega brotin niður. Börn eru gerð móttækileg fyrir þátttöku í kynlífi og það jafnvel ofbeldiskynlífi - BDSM. Börn eru gerð efins um eigin sjálfsmynd og talin trú um að þau séu mögulega fædd í röngu kyni. Ringluð börn og óörugg eru síður í stakk búin að veita viðnám fullorðnum með eitthvað misjafnt í huga. Út á það gengur tælingin.

Þetta kallar Álfur Birkir formaður Samtakanna 78 hatursorðræðu og lögreglan í Reykjavík étur það upp eftir honum. Ekkert er talað um hatur í hegningarlagagreininni, 233 gr. a., sem tilfallandi á að hafa brotið gegn. Hatursorðræða er orð upp úr handbókum aktívista sem kenna skoðanaandstæðinga um haturshug. Í meðförum aktívista og siðferðisdeildar höfuðborgarlögreglunnar verður heilbrigð skynsemi að hatri. Í lagagreininni sjálfri segir: ,,Hver sem opinberlega hæðist að, rógber, smánar eða ógnar manni eða hópi manna..."

Læsir á íslensku sjá að engin hótun er höfð í frammi, hæðni kemur ekki fyrir í kærðum texta, enginn rógur, þar sem í blogginu eru tilvísanir í efnið sem er til umræðu. Þá er eftir smánun sem er gamalt hugtak um að óvirða eitthvað. Ef lögreglan tæki upp á því að ákæra fyrir opinber ummæli er sýna viðfangsefninu ekki háttvísi myndu dómstólar gera fátt annað en að dæma menn fyrir virðingarleysi.

Með ákærunni hlutast lögreglan til um opinbera umræðu frjálsra borgara um samfélagsleg málefni. Lögreglan tekur að sér í verktöku fyrir Samtökin 78 að þagga niður í þeim sem andmæla lífsskoðunarfélaginu og sértrúarboðskap þeirra í leik- og grunnskólum.

Tilfallandi er orðinn hagvanur í dómssal. Blaðamenn í byrlunar- og símamálinu hafa stefnt honum fyrir dóm og nú lögreglan í Reykjavík. Málaferlum fylgir óhagræði og fjárútlát. Lesendur sem láta sér annt um frjálsa umræðu og gjalda varhug við ritskoðun, hvort heldur sakborninga eða lögreglu, geta sýnt stuðning með framlagi. Sjá reikning hér uppi til vinstri.

Svo má auðvitað velta fyrir sér að láta fjölmiðla eina um að halda úti reglulegum fréttum og skoðanapistlum. En tilfellið er að þeim veitir ekki af aðhaldi.

Ruslið, Trump og Sovét-Bandaríkin

Biden forseti Bandaríkjanna kallar stuðningsmenn Trump rusl. Skoski stjörnusagnfræðingurinn, Njáll Ferguson, segir Bandaríkin á sömu vegferð og Sovétríkin rétt áður en þau hrundu fyrir rúmum 30 árum. Fólkið sem Biden kallar rusl er örvæntingarfullt, einkum karlpeningurinn, og ríkulega haldið sjálfseyðingarhvöt er birtist í drykkju, dópneyslu og sjálfsmorðum. Alveg eins og karlarnir í Sovétríkjunum á sjöunda og áttunda áratug síðustu aldar.

Í fyrirlestri Ferguson eru dregnar samlíkingar milli þjóðfélagsástandsins í Sovétríkjunum sálugu og Bandaríkjunum í dag. Tölfræðin sem Ferguson vísar í dregur upp þá mynd að stórir þjóðfélagshópar, einkum karlar, hafa gefist upp á samfélaginu og hverfa inn í dimmu drykkju, fíkniefna og sjálfsvíga. Á síðustu tíu árum hafa 1,2 milljónir Bandaríkjanna sálgað sér á þennan hátt - fleiri en dóu í kófinu.

Hagvöxturinn í Bandaríkjunum blekkir, segir Ferguson, hann sé knúinn áfram af opinberri íhlutun sem ekki sé sjálfbær.

Kommúnistar stjórnuðu Sovétríkjunum en Demókrataflokkurinn Bandaríkjunum er kjarninn í samlíkingu sagnfræðingsins. Vellauðug elíta styður Demókrataflokkinn, sem vill skammta kjöt, eldsneyti og rafmagn til að bjarga heiminum frá hlýnun. Elítan er ekki í neinu sambandi við allan almenning, ekki frekar en kommúníska elítan var í tengslum við sovéskan almenning. Kommúnistar stjórnuðu fjölmiðlum í Sovétríkjunum; demókratar í Bandaríkjunum. Undantekningin sé Elon Musk, sem keypti Twitter, endurskírði sem X og gaf orðið frjálst. 

Hnignunin, mæld í lækkandi lífslíkum er skýr, þótt vestrið sé ekki enn jafn langt leitt og Sovétríkin, segir Ferguson.

Ruslið, sem Biden kallaði svo, er fólk sem afþakkar Sovét-Bandaríkin og kýs Trump. Lái þeim hver sem vill. 

 

Biden gæti hafa komið Harris í vandræði

Silfrið á RÚV sálgæsla Samfylkingar

Í fyrsta þætti Silfursins á RÚV eftir síðustu kosningar fyrir þrem árum var mætt Kristrún Frostadóttir þá nýkjörinn þingmaður og verðandi formaður Samfylkingar. Í Silfrinu fékk Kristrún tækifæri, í þægilegu og valdeflandi umhverfi, til að kvenskýra launauppbót sem hún fékk frá Kviku banka, upp á 101 milljón króna, hafi verið happadrættisvinningur. Í frásögn Eyjunnar af silfraðri kvenskýringu Kristrúnar:

Um töluverða áhættufjárfestingu var að ræða að sögn Kristrúnar en hún ákvað að slá til og keypti hlutabréf fyrir þrjár milljónir.

Hókus pókus og þrjár milljónir urðu að 101 milljón króna. ,,Fáránlegt", sagði Kristrún og þurfti sannarlega samúð og skilning eftir erfiða lífsreynslu. Ekki kom það fram í Silfrinu en Kristrún taldi gróðann fram sem fjármagnstekjur en ekki launatekjur og sparaði sér þar 25 milljónir í samneysluna. Silfruð þjónusta RÚV gengur út á hvítþvott til að forystukratarnir geti með góðri samvisku talið sér trú um að vera dyggir þjónar almannahagsmuna á meðan þeir maka krókinn og stinga undan skatti.

Í vikunni var mættur í Silfrið Dagur fyrrum borgarstjóri Eggertsson. Hafi Kristrún þurft á sálgæslu að halda fyrir þremur árum var ástand Dags akútt. Um síðustu helgi var upplýst að Kristrún skattaprinsessa telur Dag boðflennu á lista Samfylkingar. Dagur fái ekki ráðherraembætti í ríkisstjórn Kristrúnar, hann sé ,,aukaleikari" sem mætti sem best strika út af kjörseðlinum.

,,Mér var brugðið þegar ég sá skilaboðin," sagði Dagur í Silfrinu í fyrrakvöld. Þá hafði Dagur verið á flótta frá fjölmiðlum í þrjá daga. Til að takast á við hrollvekjuna mætti Dagurinn í sálgæsluna á Efstaleiti er sérhæfir sig í endurreisn glataðra forystumanna Samfylkingar. 

 

Kristrún og skattsvikin

Kristrún Frostadóttir varð uppvís að skattsvikum vorið 2023. Hún taldi fram 101 milljón króna sem fjármagnstekjur en ekki launatekjur. Með röngu framtali lækkaði Kristrún skatta sína um 25 milljónir króna.

Skattamál Kristrúnar komu til umræðu er hún bauð sig fyrst fram haustið 2021. Kristrún var aðalhagfræðingur Kviku banka 2018-2021. Hluti af launakjörum hennar var kaupa hlutabréf i bankanum á undirverði. Fyrir kosningarnar 2021 staðhæfði Kristrún að hlutabréfakaupin hafi verið áhættufjárfesting og hagnaðurinn ,,lottóvinningur". Hvort tveggja er rangt. Í raun er um launauppbót að ræða.

Kristrún sagði ósatt haustið 2021 um launakjör sín hjá Kviku banka. Einnig taldi hún rangt fram, gaf skattayfirvöldum rangar upplýsingar um launatekjur sínar. 

Í bloggi gærdagsins var sagt frá samkomulagi sem Kristrún gerði við Þórð Snæ Júlíusson þáverandi ritstjóra Heimildarinnar. Samkomulagið var að kynna skattsvik Kristrúnar sem léttvægt bókhaldsatriði. Í staðinn fékk Þórður Snær loforð Kristrúnar um að styðja hann til þingmennsku. Þórður Snær er í þriðja sæti á lista Samfylkingar í Reykjavík norður, Kristrún í fyrsta sæti. Þórður Snær er sakborningur í byrlunar- og símamálinu. Hann varð sakborningur í febrúar 2022, áður en hann hannaði fréttaskýringu um að Kristrún hefði ekki svikist um skattgreiðslur til ríkissjóðs. Þórður Snær er enn sakborningur, þar sem brotaþolinn í byrlunar- og símamálinu, Páll skipstjóri Steingrímsson, kærði niðurfellingu lögreglu á sakamálarannsókn til ríkissaksóknara.

Kristrún hefur ekki lagt fram upplýsingar um hvernig uppgjöri hennar við Skattinn var háttað. Munnleg frásögn Kristrúnar er ómarktæk enda hefur hún áður sagt ósatt um skattamál sín.

Skatturinn hringir ekki í þá sem stinga undan skatti. Formlegt bréf er sent. Ef Kristrún hefði ekkert að fela væri hún búin að leggja fram gögn sem sýndu svart á hvítu uppgjörið við Skattinn. 

Þórður Snær með pólitískt líf Kristrúnar í hendi sér

Kristrún formaður Samfylkingar lét þriðja sætið á lista sínum í Reykjavík norður í hendur sakbornings, Þórðar Snæs Júlíussonar fyrrum ritstjóra Kjarnans/Heimildarinnar. Kristrún gerði samkomulag við Þórð Snæ að styðja hann til þingmennsku gegn því að hann skæri hana úr snörunni vegna skattsvika sem hún varð uppvís að.

Kristrún var hagfræðingur Kviku banka áður en hún var kosin á þing fyrir Samfylkinguna í síðustu kosningum, haustið 2021. Hjá Kviku fékk Kristrún kaupauka upp á 101 milljón króna á þeim þrem árum sem hún starfaði í bankanum, 2018-2021. Kaupaukinn er í formi réttinda til að kaupa hlutabréf í bankanum á gengi sem almenningi býðst ekki.

Kaupauki Kristrúnar komst í fréttir fimm dögum fyrir þingkosningarnar 25. september 2021. Morgunblaðið og Viðskiptablaðið fengu upplýsingar um fjármál verðandi formanns flokksins. Kristrún hóf gagnsókn, skrifaði langa Twitter-færslu undir yfirskriftinni Uppgjöf og örvænting íhaldsins. Hún sakaði blaðamenn Morgunblaðsins og Viðskiptablaðsins um pólitíska herferð gegn sér.

Í Twitter-færslunni 20. september 2021 neitar Kristrún að um kaupauka hafi verið að ræða heldur ,,tilboð um fjárfestingu." Almenningur fékk ekki slíkt tilboð, aðeins útvaldir. Kaupaukar í formi hlutafjárkaupa, á lægra gengi en markaðsvirði, tíðkast hjá fyrirtækjum skráðum á hlutabréfamarkaði. Kristrún segir að um áhættufjárfestingu hafi verið að ræða og hún og eiginmaðurinn hafi nýtt sparnað sinn í kaupin. En þau hjón voru nýkomin heim frá námi. Fæstir nýkomnir úr námi eiga sparnað. Enda er kaupréttarfyrirkomulagið sjaldnast útfært þannig starfsmenn leggi fram peninga. Yfirleitt er dregin af launum starfsmanna fjárhæðin sem fer í hlutafjárkaupin. Kristrún blekkti í Twitter-færslunni og sagði með þjósti: „Síðast þegar ég vissi mega fleiri en sjálfstæðismenn taka þátt á hlutabréfamarkaði.“

Hér var ekki á ferðinni áhættufjárfesting, eins og formaður Samfylkingar vill vera láta, heldur kaupauki fyrir fáa útvalda. Kristrún tók enga áhættu, hún var bæði með belti og axlabönd á fjárfestingunni, gat ekki tapað, aðeins grætt. Almennum hlutafjárkaupendum bjóðast ekki þessi kjör.

Í Twitter-færslunni segir formaður Samfylkingar þessa merkilegu setningu:

ég er stuðningskona þess að fjármagn sé skattlagt meira.

Kristrún hagnaðist um 101 milljón króna af hlutabréfunum í Kviku. Ef hún í raun og sann er stuðningsmaður hærri skatta á fjármagn hefði hún talið hagnaðinn fram sem launatekjur og greitt 46 prósent skatt. En Kristrún svindlaði, bæði á yfirlýstri sannfæringu sinni og Skattinum, sem er töluvert alvarlegra. Hún taldi 101 milljón króna kaupauka fram sem fjármagnstekjur og borgaði aðeins 22 prósent skatt. Með svindlinu sparaði Kristrún sér 25 milljónir króna. Það eru tvenn árslaun framhaldsskólakennara og gott betur. En Kristrún segist jafnaðarmaður og vill hærri skatta á fjármagn, bara ekki á hennar prívatkapítal.

Nú fer að koma að Þórðar þætti Snæs.

Skatturinn var með fjármál Kristrúnar til rannsóknar veturinn 2022-2023. Um vorið fékk hún bréf frá Skattinum að hún hefði talið rangt fram, komið sér undan skattgreiðslum. Í daglegu tali kallast þetta skattsvik. Kristrún var fljót að gera upp við skattinn, borgaði þær 25 milljónir sem hún stakk undan. Óvíst er hvort Kristrúnu hafi verið gert að greiða 25 prósent álag, sem tíðkast í tilfelli skattsvika. Kristrún mátti vita að fyrr heldur en seinna kæmist upp um skattsvikin og þau yrðu fréttaefni. Í þetta sinn ætlaði hún að vera á undan fjölmiðlum, fá til liðs við sig einhvern óprúttinn sem tilbúinn var í viðskipti. 

Þórður Snær Júlíusson hefur lengi gengið með þingmanninn í maganum. Helsti bakhjarl hans er auðmaðurinn Vilhjálmur Þorsteinsson, fyrrum gjaldkeri Samfylkingar. Vorið 2023 leitaði Kristrún formaður Samfylkingar til Þórðar Snæs með vandræði sín. Þórður Snær var í þeirri stöðu að krefja Kristrúnu um allar upplýsingar skattsvikanna til að búa þeim trúverðuga málsvörn. Síðan bjuggu þau til ráðagerð sem gekk út á ítarlega frétt er tæmdi málið. Eftir þá frétt liti út eins og Kristrún hefði lagt spilin á borðið, ekkert væri meira að segja. Fréttin myndi lifa í einn til tvo daga sumardagana fyrir rúmu ári. Síðan ekki sögunni meir. Formaður Samfylkingar væri búinn að gera hreint fyrir sínum dyrum. Ekkert væri ósagt. 

Til að fronta fréttina fékk Þórður Snær ritstjóri Arnar Þór Ingólfsson blaðamann á Heimildinni til verka. Arnar Þór er liðtækur í skítverkin með Þórði Snæ; báðir eru sakborningar í byrlunar- og símamálinu. Fréttin um skattsvik Kristrúnar birtist 29. júní í fyrra. Orðið skattsvik kemur ekki fyrir í fréttinni. Talað er um að endurgreiðslu vegna ,,tilmæla" frá Skattinum. Eins og skattayfirvöld sendi út óskir um að framteljendur greiði vangoldinn skatt, svona þegar þeim henti. Eins og lagt var upp með endurbirtu fjölmiðlar vinstrimanna fréttina á sömu forsendum. RÚV notar meira að segja sömu fyrirsögn og Heimildin. Engin skattsvik, aðeins smávegis leiðrétting. Lesendur geta rétt ímyndað sér hvort uppslátturinn hefði ekki verið annar ef formaður Sjálfstæðisflokks eða Framsóknarflokks hefðu átt hlut að máli. Þegar Morgunblaðið ætlaði að þýfga formann Samfylkingar síðdegis sama dag og fréttin í Heimildinni birtist svaraði Kristrún: ,,Málinu er lokið fyrir mína parta." Áætlun Kristrúnar og Þórðar Snæs heppnaðist fullkomlega. Málið tæmt, dautt.

Þórður Snær gerir ekkert ókeypis. Hann fékk loforð frá Kristrúnu um stuðning við þingmennsku. Ritstjórinn fyrrverandi er undirförull; sést á því að hann reyndi að sölsa undir sig yfirráð yfir Heimildinni á bakvið tjöldin. Upp komst og Þórði Snæ var sparkað. Eftir ráðabruggið vorið 2023, til að bjarga pólitísku lífi formanns Samfylkingar, er Þórður Snær kominn með upplýsingar sem hann getur hvenær sem er lekið til vinveittra blaðamanna. Þar með yrði saga Kristrúnar formanns öll. Kristrún er vel meðvituð um stöðu sína gagnvart ritstjóranum sem einskins svífst til að koma ár sinni fyrir borð.

Þórður Snær er sakborningur í alvarlegu refsimáli, byrlunar- og símamálinu. Enginn stjórnmálaflokkur með réttu ráði teflir fram til þingsetu manni sem grunaður er um glæp. En það gerir Samfylkingin. Skýringin er sú að formaðurinn þar á bæ sætir pólitískri fjárkúgun vegna skattsvika.

 

Stuldur úr síma glæpur í Bandaríkjunum, verðlaunaður á Íslandi

Í Bandaríkjunum er glæpur að stela gögnum úr síma, sbr. viðtengda frétt. Hér eru slíkir glæpir verðlaunaðir. Þórður Snær blaðamaður og þingmannsefni státar af tvennum verðlaunum fyrir stolin gögn. Fyrst fékk hann verðlaun Blaðamannafélags Íslands. Í gær verðlaunaði Samfylkingin Þórði Snæ, lét hann hafa líklegt þingsæti á lista flokksins.

Þórður Snær var fullkomlega meðvitaður um að hann hefði þýfi í höndunum þegar hann birt undir sínu nafni fréttina Skæruliðadeild Samherja þann 21. maí 2021. Þórður Snær skrifaði sem ritstjóri og ábyrgðarmaður Kjarnans:

Ábyrgðarmenn Kjarnans vilja taka fram að umrædd gögn sem eru grundvöllur umfjöllunar miðilsins bárust frá þriðja aðila. Starfsfólk Kjarnans hefur engin lögbrot framið...

Í rammagreininni kemur einnig fram að Þórður Snær viti frá fyrstu hendi að gögnum frá Páli skipstjóra Steingrímssyni var stolið á meðan eigandinn lá á gjörgæslu. Þingmannsefni Samfylkingar talar um að ,,þriðji aðili" hafi skaffað gögnin. Þriðji aðilinn er Þóra Arnórsdóttir á RÚV er tók við símanum frá andlega veikri eiginkonu hans, sem hefur játað byrlun og stuld.

Játning Þórðar Snæs, að hann sé þjófsnautur, leiddi til þess að hann varð sakborningur í lögreglurannsókn á byrlun, stuldi og broti á friðhelgi. Þórður Snær er enn sakborningur og verður á meðan ríkissaksóknari er með málið til meðferðar. Engu að síður fær sakborningurinn úthlutað þriðja sæti Samfylkingar í Reykjavík norður. Efst á listanum er Kristrún Frostadóttir formaður Samfylkingar.

Sá sem skipar annað sætið, milli Kristrúnar og Þórðar Snæs, er Dagur-sem-enginn-vill fyrrum borgarstjóri. Best er að strika hann út segir Kristrún, Dagur sé ,,aukaleikari". Við það verður sakaborningurinn Þórður Snær aðalleikari. Kannski næsti dómsmálaráðherra?

Það skyldi þó ekki vera að Þórður Snær hafi þau tök á Kristrúnu formanni að hún beinlínis var knúin til að taka sakborninginn á framboðslistann? Nánar um það á morgun.

Reyndu að nálgast gögn í síma Trumps

Forysta Samfylkingar vill sakborning í þingmennsku

Einn af sakborningunum í byrlunar- og símamálinu, Þórður Snær Júlíusson ritstjóri, er þingmannsefni Samfylkingarinnar í Reykjavík. Samkvæmt fréttum skipar Þórður Snær þriðja sætið í Reykjavík norður, á lista Kristrúnar formanns. Sitjandi þingkona, Dagbjört Hákonardóttir, var látin víkja sæti til að sakborningur kæmist á þing.

Lögreglan felldi niður rannsókn á byrlunar- og símamálinu með sakfellandi yfirlýsingu. Lögreglan segir hreint út að afbrot voru framin en ekki tókst að sanna óyggjandi hvaða blaðamenn frömdu hvaða afbrot.  Brotaþolinn, Páll skipstjóri Steingrímsson, kærði niðurfellinguna til ríkissaksóknara, sem hefur þrjá mánuði til að úrskurða framhald málsins. Á meðan er réttarstaða Þórðar Snæs og fimm annarra blaðamanna óbreytt, þeir eru sakborningar í refsimáli er varðar byrlun, þjófnað og brot á friðhelgi.

Sakborningur, samkvæmt skilgreiningu, er grunaður um glæp. Stjórnmálaflokkur sem teflir frambjóðanda til þings er hefur stöðu sakbornings grefur undan réttarríkinu. Þingmenn setja landinu lög. Þingmaður grunaður um glæp er ekki til þess fallinn að auka virðingu fyrir löggjafanum. Má alþingi þó illa við að veikja tiltrú almennings á þjóðarsamkundunni. En Samfylkingin ætlar að veita Þórði Snæ uppreist æru á meðan hann er enn undir sakamálarannsókn.

Á meðan Þórður Snær var starfandi blaðamaður og ritstjóri var hann vel meðvitaður að orðspor og heiðarleiki væri höfuðkrafa gagnvart mönnum í trúnaðarstöðum. Fyrir tveim árum voru nafngreindir menn í viðskiptalífinu ásakaðir um kynferðisbrot. Athugið; þeir voru ásakaðir en ekki ákærðir og ekki sakborningar í lögreglurannsókn. Þórður Snær skrifaði fréttaskýringu í Kjarnann þar sem hann rakti hvernig hann sem blaðamaður hafði samband við stjórnir lífeyrissjóða og spurði hvort ekki yrði gripið til ráðstafana vegna ásakaðra manna er sátu í stjórnum fyrirtækja sem lífeyrissjóðir áttu hlut í. Þórður Snær beið ekki eftir málalokum - mennirnir voru aldrei ákærðir - heldur hélt hann fram strangri siðferðiskröfu gagnvart mönnum í valdastöðum.

Fyrir tveim árum, og bæði fyrr og síðar, er Þórður Snær með siðavöndinn á lofti og krefst að sakleysi sé hafið yfir allan vafa. Enginn með skemmt orðspor, beina eða óbeina aðild að lögbrotum, skal sitja í trúnaðarstöðu. Núna ætlar sakborningurinn Þórður Snær að fá kjör á alþingi. Í skjóli Samfylkingar.

Einhver skýring hlýtur að vera á valdastöðu sakbornings í Samfylkingunni. 

 

Fíkill, RSK-miðlar og saksóknari

Jóhannes uppljóstrari Stefánsson er fíkill, segir nýlega í fyrirsögn dagblaðs í Namibíu. Á Íslandi er í fimm ár rekið sakamál er byggir einvörðungu á framburði fíkils. RSK-miðlar (RÚV, Stundin og Kjarninn) bjuggu málið í hendur héraðssaksóknara með Kveiksþætti um Namibíumálið 12. nóvember 2019.

Einn blaðamanna RSK-miðla, Ingi Freyr Vilhjálmsson, átti bróðir í embætti héraðssaksóknara, Finn Þór Vilhjálmsson. Finnur Þór fór fyrir Namibíurannsókninni þangað til í fyrra að hann flæmdist frá embætti héraðssaksóknara og fékk stöðu dómara við héraðsdóm Reykjavíkur. Þar héldu hörmungarnar áfram. Landsréttur dæmdi að Finnur Þór gerði alla dómara héraðsdóms vanhæfa í Namibíumálinu. Bróðir hans, Ingi Freyr, er meðal sakborninga í byrlunar- og símamálinu.

Viðtengd frétt fjallar um baráttu Örnu McClure, eins sakborninga í Namibíumálinu, til að fá afléttri réttarstöðu sinni. Að liggja undir grun um glæp er íþyngjandi, eins og sakborningarnir sex úr röðum blaðamanna í byrlunar- og símamálinu hafa reglulega minnt á. Byrlunar- og símamálið er þriggja ára. Namibíumálið er fimm ára.

Án blaðamanna RSK-miðla hefði aldrei orðið neitt Namibíumál. Jóhannes fíkill var rekinn frá Samherja árið 2016. Í Namibíu skildi hann eftir sviðna jörð. Það er háttur fíkla, bæði i starfi og einkalífi. Hann gekk á milli íslenskra fjölmiðla og reyndi að selja þá sögu að Samherji hefði greitt mútur í Namibíu. Enginn vildi neitt að hafa með Fíkla-Jóa. Nema RSK-miðar, með Helga Seljan sem oddamann. Með falsi og spillingu var embætti héraðssaksóknara virkjað í þágu siðlausra blaðamanna sem skálduðu ásakanir í samvinnu við eiturlyfjasjúkling. 

Starfsferill helstu hvatamanna Namibíu- og byrlunar og símamála segir nokkra sögu. Finnur Þór hrökklaðist frá héraðssaksóknara, Þóra Arnórsdóttir ritstjóri Kveiks var selflutt af Glæpaleiti á Landsvirkjun, Þórður Snær ritstjóri Kjarnans/Heimildarinnar leitaði á náðir Samfylkingar, Rakel Þorbergsdóttir fréttastjóri hvarf úr starfi og nú síðast er úttaugaður Helgi Seljan kominn á götuna. Jói uppljóstari heldur til í útlöndum, þó ekki Namibíu.

Tvær ríkisstofnanir eru miðlægar í Namibíumálinu, embætti héraðssaksóknara og RÚV. Undanfari málsins kennt við Afríkuríkið er seðlabankamál. Þar brugguðu launráð Seðlabanki Íslands og RÚV.

Ríkisfjölmiðillinn er miðstöð upplýsingaóreiðu sem misnotar fíkla og andlega veika til að koma á framfæri falsfréttum.

Vilja skoða tölvu Jóhannesar