Dagur mótmælir sjálfum sér og vill fórna Íslandi

Þingmannanefnd um öryggis- og varnarmál Íslands skilaði af sér skýrslu í byrjun viku. Einn nefndarmanna er Dagur B. Eggertsson þingmaður Samfylkingar og fyrrum borgarstjóri. Í skýrslunni segir afdráttarlaust:

Bandaríkin eru eina ríkið sem hefur burði til að tryggja öryggi á Norður-Atlantshafi með fullnægjandi hætti.

Í Morgunblaðinu í dag mótmælir Dagur sjálfum sér sem nefndarmanni í þingmannanefndinni. Hann skrifar á leiðaraopnu að varnarviðbúnaður Íslands sé best tryggður með aðild að Evrópusambandinu:

Evrópusambandið hefur einnig vaxandi hlutverki að gegna á sviði varnar- og öryggismála. Það er mikilvægt að Ísland tengist ESB eins nánum böndum og kostur er í þágu öryggis og varna Íslands og sameiginlegra varnarhagsmuna.

Dagur grefur undan varnarsamningi Íslands og Bandaríkjanna frá 1951. Hann talar um að Ísland verði að ,,bregðast við breyttum viðhorfum í Bandaríkjunum." Þingmaðurinn útskýrir ekki hver þessi breyttu viðhorf séu. Skýringin kippir fótundum undan þeirri óskhyggju Dags að ESB-Evrópa sé eitthvað annað og meira en meginlandsklúbbur gamalla nýlenduvelda er lifa á fornri frægð.  

Dagur beinlínis falsar landfræðilegar og pólitískar staðreyndir þegar hann talar um ,,sameiginlega varnarhagsmuni" Íslands og ESB-Evrópu á Norður-Atlantshafi. Engin smáþjóðanna á norðurslóðum, þ.e. Grænland, Ísland, Færeyjar og Noregur, er ESB-ríki. Hitt er vitað að ESB-Evrópa vill gjarnan klófesta smáþjóðirnar og gera að sínum peðum í valdaskaki við Bandaríkin.

Bandaríkin líta ekki lengur á Vestur-Evrópu sem útvörð andspænis ógn frá austri líkt og í kalda stríðinu. Sovétríkin féllu fyrir 35 árum, einhver þyrfti að segja Degi þær fréttir. Er Trump bauð Pútín til leiðtogafundar í Alaska í sumar var það yfirlýsing um að Bandaríkin líta á Rússland, arftaka Sovétríkjanna, sem jafningja í margpóla alþjóðapólitík. 

Varnarlína Bandaríkjanna í austri í nýrri heimsskipan er GIUK-hliðið. Það er hafsvæðið milli Grænlands, Íslands og Bretlands. Í skýrslu þingmannanefndarinnar er birt mynd af landfræðilegri legu GIUK-hliðsins. Dagur veit um stöðu mála en er of mikill ESB-sinni til að draga rökrétta ályktun.

Dagur fjallaði um valdatilkall Bandaríkjanna til Grænlands í Morgunblaðspistli þann 28. ágúst síðast liðinn. Þar kemur fyrir skrítin hugsun:

Evrópa stendur með Dönum og Grænlendingum í málinu. Íslendingar ættu auðveldlega að geta sett sig í spor Grænlendinga og Dana.

Fáránlegt er að segja Dani og Grænlendinga í sömu sporum. Grænland er nýlenda en Danmörk er nýlenduveldið. Hvort eiga Íslendingar að setja sig í spor Dana eða Grænlendinga? Það er spurningin. Pólitískur geðklofi er að fara í spor beggja þjóðanna.

Grautarhugsun Dags er dæmigert ESB-heilkenni íslenskra vinstrimanna. Þeir skilja ekki að ESB-Evrópa er núll og nix á Norður-Atlantshafi. Íslenskum hagsmunum í bráð og lengd er fórnað með fyrirhugaðri aðild Íslands að Evrópusambandinu. Í fyrsta lagi yrði innanlandsófriður, milli ESB-sinna annars vegar og hins vegar fullveldissinna og Bandaríkjavina. Í öðru lagi yrði Ísland bitbein erlendra ríkja, Bandaríkjanna og ESB-Evrópu. Sagna kennir okkur að smáþjóð sem kemur sér í slíka stöðu er ekki viðbjargandi.    

Bakslag í loftslagsvá og transi, fjölmiðlar til bjargar

Samtökin 78 tala síðustu misserin um bakslag gagnvart boðskapnum um 700 kyn, eða þar um bil, og trúarkenningunni um sálnaflakk þar sem sumar sálir rati í ranga líkama. Nú kveinkar lofslagskirkjan sér undan bakslagi, segir að æ færri trúi á yfirvofandi heimsendi. Gréta Túnberg söðlaði um, gerðist Hamas-trúboði. Litla stúlkan með loftslagsflétturnar býr ekki lengur til fyrirsagnir. Hvað er til ráða? 

Björg Eva Erlendsdóttir, framkvæmdastjóri Landverndar, segir bakslagið áþreifanlegt:

Við finnum töluvert fyrir því að það er bakslag og minni umræða um náttúruvernd og loftslagsmál heldur en hefur verið. Fólk talar um að það geti verið einhver þreyta.

Bakslag i transi og loftslagsvá á sama tíma er ekki tilviljun. Sömu pólitísku öfl bera fram kynjaveröldina og ímyndaðar veðurhamfarir. Björg Eva er sjálf talandi dæmi. Hún var fréttamaður á RÚV, síðar framkvæmdastjóri Vinstri grænna og núna í Landvernd. Bakslagið er til marks um að veruleikinn sækir heim bábiljufræði er lifir á lyginni, ekki síst þeirri sem fjölmiðlar útbreiða.

Björg Eva telur helst til bjargar að fjölmiðlar ráði innvígða úr loftslagskirkjunni sem fréttamenn. Fjölmiðlar stunda málflutning, aktívisma, ekki upplýsingamiðlun. Björg Eva ætti að þekkja það, fyrrum RÚV-arinn og síðar áróðursmaður Vinstri grænna. Sorglegt ástand íslenskra fjölmiðla er staðfest með orðum fyrrum fréttamanns.

Transið og loftslagsvá er hugmyndafræði með trúarlegu ívafi. Transið trúir á sálnaflakk, að nýburi fái ekki alltaf réttri sál úthlutað við fæðingu. Þá telur transið að á bakvið líffræðilegu kynin tvö séu frummyndir margra annarra kynja sem aðeins séu aðgengileg þeim innvígðu. Allt er þetta í heimi andans, ósýnilegt venjulegu fólk. Hinsegin vísar í trúarheim með sérstökum hugtökum s.s. kynvitund og kynama. Sértrúarsöfnuðurinn er í andstöðu við heilbrigða skynsemi almennings sem efast um að sérviskan eigi erindi í leik- og grunnskóla.

Loftslagsvá, líkt og trans, var búin til í Bandaríkjunum. Fyrirbærin eru álíka gömul, komast í umferð á síðasta áratug liðinnar aldar. Loftslagvá kennir að brennsla mannsins á jarðefnaeldneyti, einkum bensín og dísil, valdi hækkun á koltvísýringi, CO2, sem er s.k. gróðurhúsalofttegund. Mælikvarðinn er ppm. CO2 í andrúmslofti jarðar er um 400 ppm. Sveltimörk plantna, svo dæmi sé tekið, eru um 150 ppm. Kjörvöxtur plantna er við 1200-1500 ppm. Til að fá góða uppskeru er koltvísýringi dælt inn í gróðurhús. Koltvísýringur er náttúruleg lofttegund lífsnauðsynleg jarðlífinu. Um 97 prósent af koltvísýringi jarðar er náttúrulegur. Aðeins 3 prósent er manngerður. En við eigum að trúa því, sem sagt, að þessi þrjú prósent valdi hlýnun jarðar - en ekki 97 prósentin sem eru náttúrulegur koltvísýringur.

Guðni heitir maður Elísson, bókmenntafræðingur og kennir við Háskóla Íslands. Hann er einn af þeim sem ruddu veginn fyrir loftslagskirkjuna á Íslandi með blaðagreinum um yfirvofandi heimsslit af völdum mannsins. Í gær tók Guðni, fyrir hönd dóttur sinnar, við styrk frá Reykjavíkurborg. Í rökstuðningi fyrir námsstyrknum sést vel hvernig yfirvaldið, borgin, fléttar saman listsköpun og stefnumótun. Gefum Reykjavíkurborg orðið:

Steinunn [Kristín Guðnadóttir] hyggst rannsaka í meistaraverkefni sínu hvernig íslensk nútímalist vinnur með hugmyndir um loftslagsmál og hvernig slík verk varpa ljósi á skynjun samfélagsins á loftslagsvánni. Megináhersla verður lögð á sjónræna list sem tekst á við loftslagsvá og umhverfismál, það er myndlist, vídeóverk, ljósmyndun, gjörningalist og sviðslist. Verkefnið tengist einnig Reykjavíkurborg sem loftslags- og menningarborg, þar sem list og stefnumótun í loftslagsmálum mætast og móta hvort annað. 

Markmið rannsóknarinnar er að auka skilning á því hvaða viðhorf til loftslagsbreytinga birtast í íslenskri list og hvernig þau geta haft áhrif á stefnumótun og hvatningu til loftslagsaðgerða. (feitletr. pv)

Þarna má lesa svart á hvítu að loftslagsstefna Reykjavíkurborgar er ekki byggð á vísindalegum gögnum heldur samspili listamanna og embættismanna sem hafa það meginverkefni að ljúga að almenningi að fjölskyldubílinn valdi ragnarökum. Fjölmiðlar lepja upp lygina og sé hún endurtekin nógu oft verða úr viðtekin sannindi.

Suma er alltaf hægt að plata. Stundum má blekkja alla. En ekki er mögulegt að leika á alla allan tímann. Stundaglasið er tæmt loftslagskirkjunni og transinu. Það er bakslagið.

 

 

Skora á fjölmiðla að ráða umhverfisfréttamenn

Bandaríkin eru vörn Íslands gegn ESB

Ísland er á áhrifasvæði Bandaríkjanna og getur ekki orðið aðildarríki Evrópusambandsins um fyrirsjáanlega framtíð. Á meðan viðsjár eru á meginlandi Evrópu er Íslendingum farsælast að treysta á varnarsamninginn við Bandaríkin og tefla ekki í tvísýnu sambandinu við Bandaríkin.

Ofanritað er tilfallandi samantekt á nýrri skýrslu samráðshóps þingmanna um stefnu í öryggis- og varnarmálum. Stjórnarráðsstíll skýrslunnar felur meginboðskapinn. Evrópusambandið er peð í varnar- og öryggismálum. Fyrir ESB-sinna, bæði á Íslandi og í Brussel, er skýrslan reiðarslag.

Evrópusambandið hratt úr vör í sumar herferð til að gera Ísland, Grænland og Noreg að ESB-ríkjum á sem skemmstum tíma. Tilfallandi fjallaði um leiftursókn ESB, sjá hér og hér.

Skýrslan er feimin við að greina pólitískan veruleika á norðurslóðum en segir þó þetta á bls. 20:

Bandaríkin eru eina ríkið sem hefur burði til að tryggja öryggi á Norður-Atlantshafi með fullnægjandi hætti.

Varnar- og öryggismál þjóðríkja eru í fyrsta sæti, langt á undan viðskipta- og menningarmálum og öðrum milliríkjasamskiptum. Ríki er býr við óvissu um tilvist sína, sakir ógnunar annars ríkis, lætur annað en öryggis- og varnarmál mæta afgangi.

Í skýrslunni er látið eins og Nató sé öflugt hernaðarbandalag. En það er öðru nær. Nató er í tilvistarvanda. Stærsta og öflugasta Nató-ríkið, Bandaríkin, ásælist yfirráð yfir Grænlandi sem annað Nató-ríki, smáríkið Danmörk, hefur forræði yfir. Ekkert er fjallað um það í skýrslunni. Menn nefna ekki snöru í hengds manns húsi.

Þorgerður Katrín utanríkis gengur manna fremst hér á landi að útmála Pútin og Rússland sem helsta ógnvald heimsbyggðarinnar. Orðræðan er innflutt frá Brussel en hefur gagnólíka merkingu hér á landi. Rússagrýlan á meginlandi Evrópu þjónar þeim tilgangi að þétta raðirnar hjá gömlu stórveldunum, Frakklandi og Þýskalandi og fylgiríkjum, sem þrisvar síðustu tvær aldir gerðu innrás í Rússland. Á Fróni afhjúpar Rússagrýlan fáviskuna að leita eftir ESB-aðild. Hagmunir Íslands eru að standa utan Evrópusambandsins.

Bandaríkin þvo hendur sínar af Úkraínustríðinu. ESB-Evrópa er ein um að ráða fram úr misheppnuðum vestrænum austurvíkingi með Úkraínu sem lepp. Mörg ár, ef ekki áratugi, tekur að ráða fram úr óreiðunni í Austur-Evrópu og finna nýtt valdajafnvægi milli Rússlands og ESB-Evrópu.

Utanríkisráðherra er ESB-sinni en virðist, já virðist, eitthvað vera að ná áttum. Í mars sendi hún Bandaríkjunum pillu í viðtali á RÚV vegna áhuga Trump forseta á Grænlandi. Í viðtalinu nefnir hún einnig hernaðarsamstarf við ESB. Ekkert slíkt er í skýrslunni. Í heimsókn Þorgerðar Katrínar til Grænlands fyrir tveim dögum er hún orðvarari, minnist ekki á stöðutöku Bandaríkjanna gagnvart Grænlandi.

Í þingmannaskýrslunni er heldur ekkert fjallað um togstreitu milli Bandaríkjanna og Danmerkur, sem er ESB-ríki, vegna Grænlands. Veruleikinn síast inn þótt hægt fari. Ísland hefur engin áhrif á afdrif Grænlands sem er orðið bitbein stórvelda, Bandaríkjanna og ESB-Evrópu.

Lexían sem Ísland þarf að tileinka sér hratt, ef ekki á illa að fara, er að verða ekki uppboðsríki á stórveldamarkaði. Úkraínumenn falbuðu sig stórveldum og guldu fyrir með blóði, eyðileggingu og ónýtu ríki. Grænlendingar búa eyju sem er hernaðarlegt nærsvæði Bandaríkjanna líkt og Kúba sem falbauð sig Sovétríkjunum sálugu með fyrirsjáanlegum afleiðingum. Ísland er eilítið fjær stórveldinu í vestri en Grænland, samt á óformlega viðurkenndu áhrifasvæði Bandaríkjanna. Harðar valdapólitískar staðreyndir sem auðvelt er að gleyma á friðartímum en verða grimmar og ósveigjanlegar er ófriðaröldur rísa og umbrot verða í alþjóðapólitík.

Þorgerður Katrín utanríkis og ríkisstjórnin í heild ætti að horfast í augu við veruleika alþjóðastjórnmála og leggja á hilluna allar hugmyndir um aðild Íslands að Evrópusambandinu. Úkraína og Kúba eru víti til að varast, ekki fordæmi til að fylgja.

 

 

Ísland er og verður herlaust ríki: Rússar gefa í

Alma ráðherra ræðir geðhjálp fyrir trans

Þeir sem telja sig í röngum líkama þurfa víðtæka geðhjálp, skrifar Alma Möller læknir og heilbrigðisráðherra. Þegar um börn er að ræða er nálgunin eftirfarandi:

Þjónustan snýst um að veita börnunum öruggt skjól til þess að kynnast kynvitund sinni. Áhersla er á að efla geðheilsu hópsins og styrkja sjálfsmyndina auk þess sem sálfélagslegri meðferð er sinnt.

Venjulegt fólk gengur að meðvitund sinni vísri og þarf hvorki sérrými né aðstoð geðlæknis. Það er ekki til neitt sem heitir ,,frumuvitund" þótt líkaminn sé gerður úr frumum. Hugtakið ,,kynvitund" er úr transfræðum og er merkingarlaust, alveg eins og ,,frumuvitund."

En meðvitund hafa allir. Þeir sem glíma við ranghugmyndir á alvarlegu stigi þurfa geðhjálp, líkt og Alma útskýrir. Markmiðið, segir ráðherra, er að ,,styrkja sjálfsmyndina."

Milljón króna spurningin er þessi: hvaða sjálfsmynd er styrkt?

Er það ranghugmyndin að hægt sé að fæðast í röngum líkama?

Er það ranghugmyndin að til séu fleiri en tvö kyn?

Eða er sjúklingum kennt að sé líkaminn í lagi þá er eitthvað í ólagi með meðvitundina sem hafnar líkama sínum?

Hugtakið ,,sjálfsmynd" er miðlægt. Allir hafa sjálfsmynd en enginn getur útskýrt sína sjálfsmynd til hlítar. Einfaldlega vegna þess að myndin af sjálfinu er aldrei fastmótuð í eitt skipti fyrir öll. Sjálfsmynd breytist og þróast með þroska. Enginn hefur sömu sjálfsmynd fimm ára, tvítugur og sextugur.

Líkami og hugsun er ekki sami hluturinn (hjákátlegt að þurfa taka þetta fram). Líkami er efnislegur en hugsun óefnisleg. Maður getur hugsað sig þetta og hitt, t.d. að vera flinkari í fótbolta en Ronaldo og Messi til samans, en veit innra með sér að það er þvættingur. Dagdraumar eru hluti af sjálfinu. Allur þorri manna kann skilin á milli dagdrauma og reyndar. 

Ef sjálfsmynd er verulega á skjön við líkama meðvitundarinnar þarf einstaklingurinn geðhjálp. Ekki skurðaðgerð til að fjarlæga heilbrigða líkamshluta sem ranghugmynd meðvitundarinnar hafnar. Meðferðin á að beinast að meðvitundinni ekki heilbrigðum líkama. 

Alma ráðherra og fyrrum landlæknir gefur frá sér læknisfræði og dómgreind þegar hún skrifar að sumir

upplifa misræmi milli kynvitundar og þess kyns sem þeim var úthlutað við fæðingu.

Úthlutun á kyni fer ekki fram við fæðingu. Ekki frekar en að lífi sé úthlutað við fæðingu. Barn einfaldlega fæðist og er af öðru hvoru kyninu, meybarn eða sveinbarn. Ekkert barn fæðist af seytjánda kyni eða fertugasta. Í algjörum undantekningatilfellum er nýburi með óræð kyneinkenni. Alveg eins og fáeinir nýburar eru með hryggskekkju eða önnur líffræðileg frávik. En við tölum ekki um hryggskekkjukynið.

Óviðkunnanlegt, svo ekki sé meira sagt, er þegar yfirvald eins og ráðherra talar um ,,úthlutun" kyns við fæðingu. Sjúkrahús eru ríkisrekin hér á landi og flestar fæðingar eru á sjúkrastofnunum. Alma lætur að því liggja að ríkið ,,úthluti" kyni þegar nýburi kemur í heiminn. Nei, Alma, ríkið úthlutar kennitölum en ekki kyni. Náttúran þarf ekki aðstoð íslenska ríkisins. Heilbrigðisráðherra mun skilja enska tungu, ólíkt sumum meðráðherrum. Líffræðingurinn Richard Dawkins útskýrir á hversdagsensku muninn á karlkyni og kvenkyni í náttúrunni, sem virðist fyrrum landlækni ráðgáta.

Í lok greinar sinnar á Vísi viðurkennir Alma að hún er sem stjórnmálamaður fangi transhugmyndafræðinnar. Hún skrifar:

Kæra trans fólk. Standið keik. Við í ríkisstjórn Kristrúnar Frostadóttur stöndum með ykkur.

Þarna talar pólitíkus en hvorki læknir né einstaklingur með dómgreindina óskerta. Alma segir í upphafi greinarinnar að transfólk þurfi víðtæka geðhjálp vegna ranghugmynda um lífsins grunnsannindi. Í lok greinar er transið orðið heilbrigðið uppmálað og eftirsóknarvert eftir því. Hér verður ekki bæði sleppt og haldið. Ef trans er heilbrigt ástand þarf enga geðhjálp. En Alma ráðherra segir að transið þurfi geðheilbrigðisteymi til að halda utan um ástand sitt. Transfólk getur ekki staðið ,,keikt" á eigin fótum. Transið þarf víðtæka heilbrigðisþjónustu enda í lífsnauð sökum ranghugmynda.

Kyndugt er að ráðherra í ríkisstjórn Íslands, heilbrigðisráðherra í ofanálag, lýsi opinberalega yfir að stefnan sé að fjölga þeim landsmönnum sem þurfa á langvinnri geðlæknaþjónustu að halda. Alma og ríkisstjórnin senda Samtökin 78 í leik- og grunnskóla landsins til að segja saklausum börnum að þau séu í röngum líkama. Afleiðingin er að sum börn útskrifist úr skóla inn á transdeild Landsspítalans. Er til ljótari uppeldisfræði? 

 

 

Drápið á Kirk og höfuð Þorgerðar Katrínar á stjaka

Eftir launmorðið á Charlie Kirk urðu engar óeirðir í bandarískum eða evrópskum stórborgum. Keppnislið í íþróttum krjúpa ekki á kné til að votta Kirk virðingu sína. Fyrir fimm árum var George Floyd drepinn i handtöku lögreglunnar í Minneapolis. Bylgja óeirða og ofbeldis reis í kjölfarið. Um víðan heim varð drápið á Floyd tilefni til óláta og andstyggðar.

Morðið á Kirk var pólitískt. Drápið á Floyd hafði ekkert með stjórnmál að gera. En það var gert pólitískt af vinstriöflum. 

Ólæti og andstyggð er sérgrein vinstrimanna. Á Austurvelli voru fyrir viku mótmæli til stuðnings Hamas-hryðjuverkasamtökunum er stjórna Gasa og frömdu fjöldamorð í Ísrael 7. október fyrir tveim árum. Í mótmælunum var á stjaka myndgert blóðugt höfuð Þorgerðar Katrínar utanríkisráðherra. Myndlíkingin er beint upp úr handbók Hamas sem eiga góða fólkið á Íslandi að bestu vinum.

Þorsteinn Pálsson fyrrverandi forsætisráðherra og flokksbróðir Þorgerðar Katrínar spyr i pistli hvers vegna þögn ríki um myrka myndverkið af höfði Þorgerðar Katrínar á stjaka. ,,Og Ríkisútvarpið spyr ekki," segir klumsa Þorsteinn.

RÚV er í þögulli afneitun vegna þess að Efstaleiti er í liði góða fólksins, rétt eins og Þorsteinn sjálfur og flokkurinn hans og Þorgerðar Katrínar, Viðreisn.

Góða fólkið, yfirleitt allt vinstrimenn, trúir að það hafi heilagan rétt til vandlætingar. Það hefur trúarlega sannfærinu um siðferðilega yfirburði. Þótt vandlætingin nái stigi viðbjóðs, morðið á Kirk og myndgert höfuð Þorgerðar Katrínar á stjaka, æmtir hvorki né skræmtir góða vinstrifólkið. Sumir, jafnvel, ganga svo langt að bera blak af óhæfunni, þótt flestir fela sig í þögninni.

Innan raða góða fólksins eru tveir hópar. Minnihlutinn, tilfallandi vill trúa lítill minnihluti, er ofstækisfólk sem á bágt andlega og sumt alvarlega veikt á geði. Stór meirihluti góða fólksins er safn af hugleysingjum með þörf fyrir vandlætingarfróun. Meirihlutinn lætur geðtæpa ofstækið, bæði innlent og aðkomið, ráða ferðinni.

Lítið dæmi um hugleysi góða fólksins er Egill Helgason. Eins og nærri má geta varð Snorra Mássyni þingmanni Miðflokksins hverft við morðinu á Charlie Kirk. Nýverið varð Snorri fyrir aðsúgi góða fólksins þegar hann sagði kynin aðeins tvö og ekki væri hægt að fæðast í röngum líkama. Snorri skrifaði færslu, sagði morðið á Kirk ,,svartan dag fyrir málfrelsi á vesturlöndum." Egill Helgason, RÚV-ari í áratugi, getur ekki á sér setið og fyllist vandlætingu gagnvart Snorra:

Játa að ég skil ekki þessa færslu hjá íslenskum alþingismanni. Við búum á Íslandi þar sem stjórnmál eru allt öðruvísi en í Bandaríkjunum. Við leyfum heldur ekki almenningi að ganga um með byssur. MAGA er okkur framandi hugmyndafræði. Hverju eigum við þá að verjast?

Egill transar sig yfir í valkvæða heimsku þegar hann þykist ekkert skilja samhengið. Öll transhugmyndafræðin á Íslandi er innflutt, mest frá Bandaríkjunum. Tilburðir hinsegin góða fólksins, með aðstoð íslensku lögreglunnar, að hefta málfrelsið hér á landi á sér fyrirmynd í Bretlandi. Stundum þykist Egill heimsborgari, vill Ísland í ESB, en á öðrum tíma sýgur hann þumalinn í hugmyndafræðilegri fósturstellingu og veit bara alls ekkert hvað gerist utan móðurkviðar.

Egill, líkt og RÚV, þegir um blóðugt höfuð Þorgerðar Katrínar á stjaka. Egill styggir ekki geðtæpa ofstækisliðið. Huglausi velmegunarvinstrimaðurinn velur sér viðfangsefni og vanskilning í samræmi við hjarðeðlið. Ofstækisliðið myrðir og setur konuhöfuð á stjaka. Egill vandlætari strýkur þeim geðtæpu meðhárs og er sakleysið uppmálað. 

Maðurinn sem vildi samræður drepinn

Heimska og hatur vinstrimanna

Útgefandi þýska fjölmiðilsins Die Welt Ulf Poschardt, skrifar dánarfregn Charlie Kirk. Hann segir óvíst hver framdi morðið en vekur athygli á hverjir það eru sem ýmist fagna ódæðinu eða hafa það í flimtingum. Poschardt ritar: 

Sömu menningarkimar vinstrimanna í Bandaríkjunum og Þýskalandi láta sér vel líka morðið og hæðast að Charlie Kirk. Andspænis algjöru hruni vinstristjórnmála og andspænis æ minni borgaralegri þolinmæði gagnvart fáránlegum vinstrihugmyndum sjá vinstrimenn þann gamalkunna kost einan í töpuðu menningarstríði að lofsyngja ofbeldið.

Heimskir vinstrimenn tóku upp á arma sína hinseginfræði sem kenna að hægt sé að fæðast í röngum líkama og hafna að kynin séu tvö. Móðursýkin sem brýst út þegar veruleikafirringunni er andmælt er ekki bundin við bandaríska vinstrimenn. Tilfallandi fjallaði um eitt hysteríukastið í byrjun árs:

Í tilefni af forsetatilskipun Trump senda heildarsamtök launþega á Íslandi, Kennarasamband Íslands meðtalið, frá sér yfirlýsingu, að áeggjan Samtakanna 78. Fyrsta málsgreinin:

Heildarsamtök launafólks taka undir kröfu Samtakanna 78 um að íslensk stjórnvöld fordæmi tilskipun Bandaríkjaforseta um tvö kyn.

Djúpheimskan í yfirlýsingunni afhjúpast með einni spurningu. Ef kynin eru fleiri en tvö, hvað eru þau þá mörg? Hvorki Kennarasambandið né forysta annarra launþegasamtaka og heldur ekki Samtökin 78 geta svarað barnslega einfaldri spurningu. Hvað eru kynin mörg? En samt eru mannréttindi í húfi þegar forseti Bandaríkjanna staðfestir óyggjandi sannindi. Ranghugmyndir, ekki frekar en hugmyndir almennt, eiga mannréttindi. Maðurinn á mannréttindi og hann er aðeins til í tveim kynjum.

Í sama bloggi er rifjað upp að heimska er iðulega undanfari haturs:

Dietrich Bonhoeffer, andæfði helstjórn nasista í Þýskalandi fyrir miðja síðustu öld og galt með lífi sínu. Bonhoeffer sagði heimsku verri en illsku. Heilbrigður einstaklingur þekkir illskuna fyrir það sem hún er. Heimskan er lævísari. Hún sýnist þrungin viti fái hún nægilega marga ábekinga. Fólk hefur samúð með smælingjum á klafa ranghugmynda. Aumingjagæsku er umbreytt í fylgisspekt við vitfirringuna. Samlandi Bonhoeffer og samtíðarmaður, Göbbels, kenndi að endurtekin fáviska verður sannleikur, séu nógu margir um endurtekninguna. Eðjótin fengu byr í seglin á lýðnetinu. Ranghugmyndir urðu viðtekin sannindi í stafrænni síbylju.

Þeir sem fagna morðinu á Charlie Kirk staðfesta samhengið milli fávisku og haturs. Vinstrimenn, sem eitthvað hafa á milli eyrnanna, ættu að ígrunda málefnastöðuna. Fábjánum í Framsókn er ekki viðbjargandi. 

 

 

„Svartur dagur fyrir málfrelsi á Vesturlöndum“

Orðræða og byssukúlur

Víetnamstríðið og launmorð Kennedy-bræðra og Martin Luther King skilgreindu sjöunda áratug síðustu aldar. Bandaríkin voru siðferðilega og menningarlega klofin í herðar niður, nægir þar að nefna mannréttindabaráttu þeldökkra. Í Vestur-Evrópu verða til alræmdir hryðjuverkahópar, Baader-Meinhof í Þýskalandi og Rauðu herdeildirnar á Ítalíu.

Óreiðan kennd við hippakynslóðina tók sinn toll en þjóðríki riðuðu ekki til falls. Meginástæðan var að vesturlönd höfðu víti til að varast, kommúnistaríkin í austri. Við upphaf þess tíunda virtist hrun kommúnismans boða fagra nýja veröld, lausa undan stríðsógnum og þjóðfélagsupplausn.

Í dag geisar mesta stríð í Evrópu frá lokum seinni heimsstyrjaldarinnar, á blóðvöllum Úkraínu. Viðsjár eru meiri í miðausturlöndum en í langan tíma. Óformleg borgarastyrjöld er í ríkjum Vestur-Evrópu þar sem takast á innfæddir og aðfluttir frá löndum spámannsins. Í Bandaríkjunum ríkir menningarstríð milli arftaka hippakynslóðarinnar, sem vita ekki hvað kyn er og halda loftslagið manngert, og raunsæismanna er kunna sæmileg skil á gangverki mannlífs og samfélags.

Raunsæismaðurinn Charlie Kirk var skotinn til bana í gær þar sem hann talaði í háskólabæ. Opnir fundir í bandarískum háskólum um málefni líðandi stundar eru rík menningarhefð þar vestra. Fyrirlesarar tefla fram sínum sjónarmiðum og fá spurningar og andsvör. Þekktir frummælendur, líkt og Kirk, sópa til sín áheyrendum, bæði stuðningsmönnum og andmælendum. Í gær voru mótrökin byssukúla launmorðingja.

Laundráp Kennedy-bræðra og King settu mark sitt á þróun bandarískra stjórnmála. Charlie Kirk var ekki á stalli með þeim bræðrum og mannréttindafrömuði þeldökkra. En hann var áberandi talsmaður raunsæismanna í bandarískum stjórnmálum. Hvort sem ódæðismaður kemst undir manna hendur eða ekki verður litið á launmorðið sem verk óreiðuafla.

Óreiðuöflin krefja aðra um umburðalyndi fyrir ólíkum skoðunum og lífsviðhorfum. Hvað grynnst er þó á virðingu fyrir skoðunum annarra en einmitt hjá þeim sem telja sig hafa höndlað sannleikann. Charlie Kirk gerði ekki annað af sér en setja fram skoðanir og sjónarmið í opinberri umræðu. Menn velja hvort þeir hlýði á eða afþakki pent. Þannig eiga hlutirnir að ganga fyrir sig í siðaðra manna samfélagi.

Menning okkar virðist í hamskiptum. Vinstrið, sem í kalda stríðinu talaði oftar fyrir friði en ofbeldi, er herskátt og heimtar blóð, bæði á heimavígstöðvum og fjarlægri heljarslóð. Þegar fækkar í röðum friðflytjenda fjarlægjast málefnin orðræðuna en nálgast með opinn faðminn ofbeldið. Nú er ekkert járntjald sem aðgreinir lífvænlega samfélagshætti frá þeim sem bera feigðina í sér. Innanmeinin i vestrinu eru komin á hættulegt stig.

Orð lifa af byssukúlur. Samfélag ofbeldis liðast í sundur.

 

 

 

Charlie Kirk látinn

Vinstrimenn gegn málfrelsi, Halla daðrar við ofstæki

Í vor tók stjórnarmeirihlutinn málfrelsið af alþingismönnum, beitti ákvæði í þingskaparlögum sem ekki hefur virkjað í meira en hálfa öld. Í vor var bloggara stefnt fyrir dóm af lögreglunni í Reykjavík fyrir hugsanaglæp, að gagnrýna transhugmyndafræðina. Í sumar var málfrelsið tekið af gyðingi sem fékk boð um að flytja fyrirlestur um gervigreind í Háskóla Íslands en var hrópaður niður.

Málfrelsið er ekki lengur sjálfsagt. Jafnvel blaðamenn, sem ættu að hafa það i hávegum, stefna bloggara fyrir dóm fyrir frásögn sem blaðamenn vildu ekki að yrði sögð.

Tilvikin, sem rakin eru hér að ofan, er öll með þeim einkennum að það eru vinstrimenn sem taka, eða reyna að taka, málfrelsið af þeim sem eru á öndverðum meiði.

Sögulega, frá 19du öld og fram á 21stu, voru vinstrimenn hvað ákafastir í vörn og sókn fyrir málfrelsið. Svo lítið dæmi nýlegt sé tekið voru það vinstrimenn á alþingi sem beittu sér fyrir afnámi lagaákvæðis er bannaði guðlast.

Núna eru það vinstrimenn sem krefjast að tilteknar skoðanir séu bannaðar. Samtökin 78, dæmigert lífsskoðunarfélag vinstrimanna, eru í samstarfi við lögreglu um að finna sem flest dæmi um ,,hugsanlega" hugsanaglæpi. Samtökin búa til tölfræði með kærum til lögreglu. Samstarfið er gagngert hugsað til að réttlæta strangari löggjöf um hvað má segja og hvað ekki um tiltekinn málaflokk, transhugmyndafræðina.

Hvers vegna eru vinstrimenn í fararbroddi fyrir takmörkun á málfrelsi?

Nærtæk skýring er að vinstrimenn skynja síðustu ár að dæmigerð málefni vinstrimanna standa höllum fæti í umræðunni. Svarið er kæfa umræðuna, banna óæskilegar skoðanir.

Málfrelsi og hugsanafrelsi eru tvær hliðar á sömu myntinni. Ef samfélag bannar sjónarmið og skoðanir er einstaklingum gert ómögulegt að láta í ljós hugsanir sínar með tjáningu. Frjálsum borgunum er gert að loka inn í skáp meðvitundarinnar hugsanir sínar.

Ekki er hægt að tala um lýðræðisríki þegar borgarar sæta verulegum hömlum að tjá hug sinn.

Halla Tómasdóttir forseti Íslands er á hálum ís þegar hún gefur til kynna að málfrelsi og lýðræði séu andstæður, með orðunum að finna þurfi leið til ,,að tryggja í senn málfrelsi og framgang lýðræðisins." Forseta til afsökunar er hann að ræða málfrelsið í samhengi við málþóf á alþingi. Málþóf er teygjanlegra og loðnara hugtak en málfrelsi. Ítarleg útskýring eins er annars málþóf.

Óhugsandi er að lýðræði ,,fái framgang" þegar borgararnir búa við skert málfrelsi. Önnur stjórnmálaöfl en þau sem kennd eru við lýðræði þrífast ekki án ritskoðunar. Lýðræði lifir af málþóf, fasismi leyfir ekki málfrelsi.

Málfrelsi er vörn gegn hugmyndum sem standast ekki skoðun. Firrur þrífast best i þögninni.

Atlaga vinstrimanna að málfrelsinu, á þingi og í samfélaginu, er skýrt merki um að það fjarar undan vinstripólitík. Sögulega eru takmarkanir á málfrelsi settar af þeim sem fara með formleg völd en skortir traust og tiltrú almennings. Valdhafar sem stjórna með ugg og ótta eru á flótta. 

Orð forsetanna við þingsetningu vekja undrun

ESB í töpuðu stríði og staða Íslands

Þýski herinn þarf að vera sá sterkasti í Evrópu, segir Friedrich Merz kanslari. Hann nefnir ekki Evrópuher. Síðast var þýski herinn sá sterkasti í Evrópu  var í upphafi seinna stríðs. Þýski herinn hélt í austurvíking, með smá stoppi í París, Niðurlöndum og Danmörku og Noregi.

Evrópusambandið var stofnað eftir seinna stríð til að binda Þjóðverja inn í vestur-evrópskt öryggiskerfi andspænis Sovétríkjunum. Bandaríkin sáu um hervarnir Evrópusambandsins og forvera í gegnum Nató. 

Eftir fall Sovétríkjanna fyrir 35 árum verður til sú hugmynd að Bandaríkin og ESB, með Nató sem verkfæri, stækkuðu áhrifasvæði sitt í austur. Greiðlega gekk að fá fyrrum hjálendur Sovétríkjanna, Pólland, Eystrasaltslöndin og fleiri, inn í Nató. Rússland, helsti arftaki Sovétríkjanna, var veikt. Er Rússlandi óx fiskur um hrygg, er leið á fyrsta áratug aldarinnar, var hermt upp á vestrið loforð, gefið við sameiningu Þýskalands, að Nató stækkaði ekki í austur. Úkraína var prófsteinninn. Vestrið lét sér rússnesk varnaðarorð engu skipta, Úkraína skyldi verða Nató-ríki.

Síðasti kafli vestræna austurvíkingsins stendur yfir. Innrás Rússlands í Úkraínu í febrúar 2022 afhjúpaði blekkinguna um að vestrið gæti með efnahagsþvingunum átt í fullu tré við Rússland. Úkraína tapar á vígvellinum, þrátt fyrir vestræn vopn og fjármagn. Hvorki Nató í heild né Evrópusambandið eru tilbúin að fórna eigin hermönnum í austurvegi. Óvíst er hvernig Úkraína tapar, en ekki hvort.

Evrópusambandið, og forverar, var ekki sett upp sem hernaðarveldi heldur efnahagsbandalag. Stór-Evrópa var markmiðið, smíðuð úr efnahagsstyrk og pólitík. Nató átti að leggja til hernaðarmáttinn. Frá og með fyrra kjörtímabili Trump 2017-2021 er ljóst að Bandaríkin ætla að láta Evrópu um að verja sig sjálfa. Á seinna forsetatímabili sínu er stefna Trump að Úkraínustríðið sé fyrst og síðast Evrópustríð sem hann vill ljúka án tafar. Máttur Bandaríkjaforseta er þó ekki meiri en svo að stríðið heldur áfram.

Ráðamenn á meginlandi Evrópu draga þá ályktun, samanber orð Friedrich Merz kanslara, að hervæðing álfunnar sé mál málanna. Bandaríkin ætla ekki að standa undir varnarviðbúnaði meginlands Evrópu líkt og þau hafa gert frá lokum seinna stríðs. Evrópuher er þó ekki á dagskrá, nema sem aukageta. Þjóðarherir einstakra ríkja verða hryggstykkið í endurvígvæðingunni.

Rússland hefur aldrei ráðist inn í Vestur-Evrópu, Finnland undanskilið, sem á landamæri að Rússlandi. Frakkar réðust á Rússland 1812 og Þjóðverjar tvisvar á síðustu öld. Merz kanslari hefur ekki áhyggjur af innrás Rússa í Þýskaland, þótt hann láti annað í veðri vaka. Hann hefur aftur áhyggjur, með réttu, af samkeppni við Rússa um völd og áhrif í Austur-Evrópu og þarf herstyrk. Tilgangurinn er að hnykla vöðvana fremur en stríðsrekstur.

Evrópusambandið, Vestur-Evrópa sérstaklega, stendur illa í komandi átökum við Rússland. ESB-Evrópa er ekki  með bandarískt bakland líkt og í kalda stríðinu. Rússland er styrkt af Kína og Indlandi. Eftir að Úkraínustríðinu lýkur á rússneskum forsendum er ESB-Evrópa í hættu að gliðna í sundur. Austurhluti álfunnar verður rússneskt áhrifasvæði. Vesturhlutinn á eftir uppgjör milli gamalla erfðafjenda, Frakklands og Þýskalands, um hvort ríkið verði miðlægt í nýrri varnar- og öryggistefnu er tekur mið að gjörbreyttum valdahlutföllum í heimshlutanum.

Ísland getur aðeins dregið eina ályktun af vígstöðunni á meginlandi Evrópu. Ályktunin er sú saman og Bandaríkjamenn hafa dregið, að eljaraglettur gömlu Evrópuveldanna koma okkur ekki við. Ekki undir nokkrum kringumstæðum á Ísland að íhuga að ganga inn í meginlandsklúbbinn sem heitir Evrópusambandið. Nærtækara væri að við yrðum nýlenda Breta eða 16da fylki Noregs - sem hvorttveggja er fáránlegt.

Evrópusambandið hefur ekkert að bjóða Íslandi nema ófrið og almenn leiðindi næstu áratugi. Ísland er eyja á Norður-Atlantshafi og á engra hagsmuna að gæta á meginlandi Evrópu. Við eigum að vara okkur á lúmskum leik Evrópusambandsins að koma ár sinni fyrir borð í okkar heimshluta með aðild Grænlands, Íslands og Noregs að ESB. Tilfallandi hefur bloggað um þau launráð.

Veikasti hlekkurinn í fullveldi þjóðarinnar er sitjandi ríkisstjórn Kristrúnar Frostadóttur. Ráðherrar eru ólæsir á þróun alþjóðamála enda blindir í aðdáun sinni á Evrópusambandinu.

 

 

 

Heimsvaldastefna Pútíns endi ekki með landvinningum

Samtökin 78 í samstarfi við lögreglu um hugsanaglæpi

Samtökin 78 eru í samstarfi við lögregluna um að ,,búa til" tölfræði um hugsanaglæpi. Verkefnastjóri Samtakanna 78 segist í formlegu samstarfi við lögregluna um 

að halda utan um tilkynningar um hatursglæpi og eiga samskipti við lögreglu um þær skráningar.

Frétt á Mbl.is birtir Facebook-færslu verkefnastjórans en þaðan er tilvitnunin tekin. Samtökin búa sjálf til hugsanaglæpi, sem þau kalla hatursglæpi, auðvitað, með því að kæra mann og annan fyrir að hafa uppi sjónarmið sem Samtökunum 78 er ekki að skapi. Eftir því kærum Samtakanna 78 fjölgar verða hugsanaglæpirnir fleiri í tölfræði lögreglu.

Tilgangurinn er að sýna fram á að í samfélaginu sé allt vaðandi í fordómum gagnvart hinseginfræðum sem Samtökin 78 bera fyrir brjósti. Á grundvelli tölfræðinnar er gerð krafa um að alþingi setji lög er banni að lífsskoðunarfélaginu sé andmælt.

Lögreglan þjónustar Samtökin 78 með því að búa til sérstakan afbrotaflokk sem kallast ,,hugsanlegir hatursglæpir." Í íslenskum lögum er hugtakið ,,hatursglæpur" ekki til. Hugtakið er ótækt í lög enda vísar það í hugarástand. Í raun er verið að tala um hugsanaglæpi - skoðanir sem bannað er að hafa. Það hljómar svo fjarska illa að tala um ,,hugsanlega hugsanaglæpi" - það vísar beint til alræðisríkja. Orðskrípin ,,hugsanlegir hatursglæpir" er feluleikur, allir vita að hatur er tilfinning og þar með huglæg. Til skamms tíma var leyft að hugsa á Íslandi. Núna eru áhöld um það.

Lögreglan mylur undir lífsskoðunarfélagið með stórvarasömum hætti, tekur sér stöðu á miðju sviði fáránleikans með afbrotaflokki sem er ,,hugsanlegur." Má búast við afbrotaflokkum sem heita hugsanleg umferðalagabrot, hugsanleg skattalagabrot, hugsanleg ofbeldisbrot, hugsanleg þjófnaðarbrot og svo framvegis? Trauðla, lögreglan yrði sökuð, með réttu, um fávitahátt. Hugsun er ekki afbrot og getur ekki verið nema í hugarheimi sértrúarsafnaða. 

Verkefnastjóri lífsskoðunarfélagsins, Þorbjörg Þorvaldsdóttir, fékk viðtal við sig nýverið á RÚV þar sem hún stolt kynnti afbrotaflokk lögreglu fyrir ,,hugsanlega" hugsanaglæpi. Þorbjörg sjálf og félagar í lífsskoðunarfélaginu bjuggu til tölfræði lögreglunnar fyrir árið 2024 með kærum. Það ár eru skráðir sex ,,hugsanlegir" hugsanaglæpir þar sem eitt uppáhalds hugtak Samtakanna 78 kemur við sögu, kynvitund.  Fimm af sex mögulegum hugsanaglæpum eru kærur sem lögmenn Samtakanna 78 sendu til lögreglu. Eldur Smári Kristinsson fékk á sig tvær kærur, Helga Dögg Sverrisdóttir, Friðgeir Sveinsson og tilfallandi Páll Vilhjálmsson eina hver.

Lögreglan, að kröfu lífsskoðunarfélagsins, ákærði tilfallandi fyrir hugsanaglæp í eftirfarandi texta í bloggi:

1. Samtökin 78 eru regnhlífarsamtök og lífsskoðunarfélag fullorðinna sem áhugasamir eru um klám, kynlíf, kynjaveröld og tælingu barna.

2. Kennsluefnið er tæling dulbúin sem upplýsingar. Meðfædd blygðunarsemi barna er skipulega brotin niður. Börn eru gerð móttækileg fyrir þátttöku í kynlífi og það jafnvel ofbeldiskynlífi - BDSM. Börn eru gerð efins um eigin sjálfsmynd og talin trú um að þau séu mögulega fædd í röngu kyni. Ringluð börn og óörugg eru síður í stakk búin að veita viðnám fullorðnum með eitthvað misjafnt í huga. Út á það gengur tælingin.

Málið fór fyrir héraðsdóm Reykjavíkur sem sýknaði tilfallandi. Það má gagnrýna lífsskoðunarfélag fyrir að hafa í frammi ótækar uppeldis- og trúarkenningar í leik- og grunnskólum. Sameiginlegri atlögu Samtakanna 78 og lögreglunnar í Reykjavík að málfrelsi borgaranna var hrundið fyrir dómi:

Tjáning hinna sérstöku, að þeir séu hinsegin, er langt komin með að kæfa skoðanafrelsi hinna venjulegu, er telja kynin tvö og að börn eigi ekki að vera tilraunadýr fullorðinna sem haldnir eru sérvisku. Hversdagslegt meðalhóf í afstöðu til menntunar og uppeldis er gert saknæmt.

En þrátt fyrir sýknun fyrir dómi er tilfallandi áfram tölfræði í bókhaldi lögreglunnar um ,,hugsanlega" glæpi. Það eru jú Samtökin 78 sem ákveða hvaða hugsun sé glæpur og lögreglan hlýðir. Á miðöldum og framan af nýöld var það kirkjan sem lagði línurnar um hugsanaglæpi sem kallaðir voru synd í þá daga. Transkirkjan hér á landi er komin í sömu stöðu og rétttrúnaðarkirkjan fyrrum, að skilgreina hugsanaglæpi. Lögreglan er hundur í bandi transkirkjunnar, geltir þegar rétttrúnaðurinn segir urrrdan bíttann.

Fulltrúi lögreglunnar, saksóknari, gelti að tilfallandi í réttarsal í vor. Saksóknarinn, ung kona á fertugsaldri, sagði brýnt að kenna lexíu ,,miðaldra körlum sem brjálast á lyklaborðinu." 

Lögreglan heldur verndarhendi yfir og gengur erinda lífsskoðunarfélags sem kennir börnum að líði þeim illa í eigin skinni sé þjóðráð að limlesta líkamann með lyfjum og skurðaðgerðum. Til að fá nýliða i transkirkjuna er kennt í skólum að börn fæðist í röngum líkama. Sama lífsskoðunarfélag útbýr kennsluefni fyrir leik- og grunnskóla sem sýnir ,,beinlínis refsivert myndefni sem og texta og það af verulega grófum og viðurstyggilegum toga," segja foreldrar sem hafa kynnt sér starfsemi Samtakanna 78 í skólum.

Ekki vera fáviti var slagorð á útihátíð til að brýna fyrir mönnum hæfilega framkomu. Lögreglan ætti að tileinka sér kjörorðið.