Stríð og fjöldamorð

Um 300 þúsund manns, hið minnsta, hafa fallið í stríði Rússa og Úkraínumanna. Enginn talar um fjöldamorð. Ástæðan er að allur þorri fallinna er hermenn. Fjöldamorð er þegar varnarlausir almennir borgarar eru myrtir. Þann 7. október frömdu hryðjuverkasamtökin Hamas fjöldamorð í Suður-Ísrael.

Ljósmyndin í viðtengdri frétt sýnir m.a. ungar konur, sennilega á leið í vinnu eða skóla morgunsárið 7. október. Hamasliðar leituðu uppi varnarlausa og drápu með köldu blóði. Tilgangurinn er ekki hernaðarlegur. Myndskeið með fréttinni sýnir hryðjuverkamann hlaupa á eftir stúlku til að skjóta kúlu í höfuð hennar. Ekki stríð heldur fjöldamorð.

Eftir fjöldamorðin flúðu Hamasliðar til heimkynna sinna í Gaza. Þeir tóku með sér yfir 200 gísla, þar af mörg börn. Þeir nýttu m.a. sjúkrahús í Gaza til að fela gíslana. Öryggismyndavélar sýna svart á hvítu að hryðjuverkamenn Hamas gengu inn um aðalinngang sjúkrahúss með vélbyssur í hendi og gísla meðferðis.

Hryðjuverkamenn nota borgara í Gaza og gísla sem mannlega skildi. 

Ísraelsher gerði innrás í Gaza í tvennum tilgangi. Í fyrsta lagi að koma morðingjum undir manna hendur. Í öðru lagi að frelsa gíslana. Í hernaðaraðgerðum Ísraela hafa margir óbreyttir borgarar fallið. Það er eðli stríðs í þéttbýli. Hamas hóf stríð með fjöldamorðunum 7. október. Ekki er til neitt sem heitir mannúðlegt stríð. En það eru til reglur, t.d. að nota ekki sjúkrahús undir hernað. Hamas virðir engar slíkar reglur. Enda hryðjuverkasamtök. 

Í stríðinu í Úkraínu er deilt um land og rétt minnihlutahópa, rússneskumælandi íbúa Úkraínu. Í deilum arabaheimsins og Ísraela er einnig deilt um land og rétt minnihlutahópa. En annað og meira hangir á spýtunni: tilveruréttur Ísraelsríkis.

Balfour-yfirlýsingin frá 1917 gaf gyðingum rétt til heimkynna í landinu helga. Saga gyðinga er eldri en Rómarveldis. Júdea er nafn á ævagömlu konungsríki Ísraela með Jerúsalem sem höfuðborg. 

Fram að Balfour-yfirlýsingunni fór lítið fyrir þjóðríkjum þar syðra um aldir. Tyrkjasoldán réð fyrir svæðinu fram að fyrra stríði en Bretar og Frakkar gerðu sig gildandi eftir fyrra stríð og fram yfir það seinna. Ný ríki, t.d. Sýrland, Líbanon, Írak og Jórdanía, voru búin til með strikum á landakorti, einkum af breskum og frönskum embættismönnum, einnig Ísrael. Þannig gerðust kaupin á eyrinni.  

Arabar, og múslímar almennt, t.d. Persar í Íran, hafa ekki fallist á búsetu gyðinga í hundrað ár. Enn síður kættust þeir 1948 er Ísraelsríki var stofnað. Stríð Ísraels við nágrannaríki 1948, 1956, 1967 og 1973 eru til marks um það.

Íslam er eingyðistrú, líkt og kristni og gyðingdómur. Íslam yngsta útgáfan, verður til á 7. öld eftir Krist, og tekur sitt lítið af hverju frá fyrirmyndum sínum. Sterk hefð i múslímatrú, sem lifir góðu lífi enn í dag, er að aðgreina trúaða frá vantrúuðum. Hvorki er þessi hefð lifandi í kristni né gyðingdómi, sem hafa veraldarvæðst síðustu par hundruð ár eða svo. Trúarmenning múslíma fór á mis við Gutenberg og upplýsinguna.

Hryggstykkið í andófi múslímaríkja gegn tilveru Ísrael er trúarmenningin, íslam. Tvær megingreinar íslam, súnni og sjíta, sameinast þar en sitja að öðru leyti ekki á sátts höfði. 

Í kalda stríðinu naut Ísrael stuðnings vestursins en arabaheimurinn hallaði sér að Sovétríkjunum. Við lok kalda stríðsins fyrir 30 árum misstu múslímar baklandið og efnahagslegt veldi þeirra þvarr, m.a. vegna olíuvinnslu með nýrri tækni. Ef vesturlönd væru einhuga um tilverurétt Ísraels myndi múslímaheimurinn sætta sig við orðinn hlut og taka gott og gilt Ísraelsríki, semja um það sem útaf stendur. En öfl á vesturlöndum eru í bandalagi með Hamas og harðlínumúslímum, sem vilja afmá Ísrael af landakortinu. Við sjáum örútgáfu bandalagsins á litla Íslandi.

Einir 315 starfsmenn Háskóla Íslands, um þriðjungur akademíska starfsliðsins, skrifa undir yfirlýsingu sem gæti verið saman á sellufundi Hamas. Ísrael er kennt við nýlendustefnu, þjóðarmorð og stríðsglæpi. Ekki eitt orð um fjöldamorðin 7. október. Norðurslóðadeild Hamas starfar af krafti í Háskóla Íslands. Á meðan hryðjuverkasamtökin eiga slíka bakhjarla vítt og breitt á vesturlöndum er engin hætta á öðru en að þau láti áfram til sín taka og leggi á ráðin um frekari fjöldamorð. 

Blóðþyrstir vestur á Melum ættu leggja við hlustir þegar sonur eins af stofnendum Hamas talar. Maðurinn heitir Mosab Hassan Yousef. Skilaboðin: valið stendur á milli villimennsku og siðmenningar.

 

   

Birtu myndskeið af aftöku ungrar konu

Hlýrra en á litlu ísöld? Gott mál

Tímabilið frá um 1300 til 1900 er kallað litla ísöld. Tímabilið á undan, frá um 900 til 1300 er miðaldahlýskeiðið. Íslendingar fluttu til Grænlands á miðaldahlýskeiðinu og stunduðu norrænan búskap með sauðfé og nautgripum. Þeir höfðu efni og tíma aflögu í skottúra til meginlands Ameríku.

Snemma á litlu ísöld, um 1450, dó síðasti norræni Grænlendingurinn. Rannsóknir á fornbeinum úr kirkjugörðum segja þá sögu að Íslendingarnir í Eystri- og Vestribyggð lifðu mest á selspiki og öðru sjávarfangi undir lokin, en ekki kvikfé eins og forfeður þeirra. Grænlandsgátan er hvað varð um þá norrænu. Ein tilgátan er að þeim hraus hugur að lifa eskimóalífi og hurfu á braut, unga fólkið fyrst. Síðustu gamlingjarnir báru beinin á víðavangi, enginn var eftir til að pota þeim niður.

Er leið á litlu ísöld varð tvísýnt um byggð á Íslandi. Eftir móðuharðindin á níunda tug 18. aldar var til umræðu að flytja landsmenn á Jótlandsheiðar. Fimmtungur þjóðarinnar, um tíu þúsund manns, hafði dáið úr hungri og vosbúð.

Í viðtengdri frétt segir

Meðalhitastig jarðar mældist í fyrsta sinn á föstudaginn meira en tveimur stigum hærra en fyrir iðnbyltinguna.

Iðnbyltingin byrjaði raunar í Englandi á tíma móðuharðindanna, en ekki 1850 eins og segir í fréttinni. Það er bitamunur en ekki fjár. Sem betur fer er hlýrra í dag en á litlu ísöld. Fólk deyr úr kulda, ekki vegna hlýinda.

Síðustu tæpu 200 árin hefur hlýnað um eina gráðu á öld. Það er gott mál að við komumst úr kulda litlu ísaldar. Nákvæmar mælingar með gervihnöttum sl. 40 ár sýna hlýnun upp á 0,1 C á áratug, sem gefur hlýnun um eina gráðu á öld. Ekki er það hamfarahlýnun heldur eðlileg þróun.

Meðalhiti jarðar er vafasamt hugtak en hann mun vera um 15 gráður. Enginn veit, og enginn þorir að segja, hvert kjörhitastig jarðarinnar er. Af því leiðir er ekki til neitt viðmið um ,,rétt" hitastig jarðkringlunnar. Í reynd er ekki eitt veðurkerfi á jörðinni og ekkert tilefni til að tala um ,,rétt" hitastig á hnattræna vísu. Fréttir og frásagnir um manngert veðurfar eru skáldskapur, eins og vikið var að í pistli gærdagsins. 

Hlýnun jarðar í fyrsta sinn yfir tveimur gráðum

Vísindi, jörð og loftslag

Jarðvísindamenn ráða í framvindu mála á Reykjanesskaga. Rauntímamælingar á skjálftavirkni í djúpi jarðar eru bornar saman við raunmælingar á yfirborði. Upplýsingarnar eru túlkaðar í samhengi viðurkenndra kenninga um hegðun efnis í iðrum jarðar.

En menn vita ekki hvort, hvenær og hvar eldsumbrot hefjast. Þaulskoðun í nokkrar vikur skilar ekki haldbærri niðurstöðu. Engin ástæða er að efast um heilindi sérfræðinganna. Þeir eru allir af vilja gerðir að spá sem réttast um næstu klukkustundir, daga og vikur, að ekki sé talað um ár og áratugi. Þrátt fyrir vísindalega þekkingu á jarðhræringum er ekki hægt að slá neinu föstu. Allt er með sterkustu fyrirvörum, í raun upplýstar ágiskanir. 

Víkur þá sögunni að öðrum náttúruvísindum, loftslagsfræðum. Þeir sem fylgjast með veðurspám vita að þokkalega áreiðanlegar veðurspár eru aðeins til 5-7 daga. Jarðvísindi eru í þeim skilningi einfaldari en loftslagsvísindi að í jörðu niðri eru færri breytur, mest berg í föstu formi eða seigfljótandi, í þremur lögum; kjarna, möttli og skorpu. Í jarðvísindum er ekki talað um óreiðu. Breyturnar eru fáar og þekktar, samspil þeirra á milli sæmilega skilið - en samt er óvissa.

Loftslag jarðar er aftur viðurkennd óreiða. Ef ekki væri óreiðunni til að dreifa yrðu áreiðanlegar veðurspár gerðar til lengri tíma en viku eða svo. Óreiða felur í sér óvissu og hana verulega. Engu að síður er til fólk, jafnvel með háskólapróf í viðeigandi fræðum, sem fullyrðir að útblástur mannsins á koltvísýringi, CO2, valdi heimshlýnun. Meintir sérfræðingar spá hlýnun upp 3 til 5 gráður næstu áratugi. Þeir vita ekki hvernig veðrið verður í næsta mánuði en fullyrða um hlýindi árið 2050.

Koltvísýringur, CO2, er náttúruleg lofttegund með eitt atóm kolefnis og tvö súrefnisatóm. Lofttegundin er forsenda lífs á jörðinni. Plöntur draga að sér koltvísýring, taka kolefnið sér til vaxtar og viðurværis en skila súrefninu aftur út í andrúmsloftið. Ferlið kallast ljóstillífun. Orkan til ljóstillífunar er sólarljósið (lampar í gróðurhúsum).

Án plantna er ekki líf á jörðinni. Heildarmagn koltvísýrings í andrúmsloftinu er áætlað um 750 gígatonn. Af þessu magni er útblástur mannsins 3-4 prósent, um 29 gígatonn. Jörðin grænkar og plöntur taka til sín aukið magn koltvísýrings. En það er sem sagt maðurinn, ekki náttúran, sem ræður loftslagi jarðar, segja meintir sérfræðingar. Í raun eru þeir ekki annað en aðgerðasinnar með háskólapróf. 

Will Happer loftslagsvísindamaður útskýrir á 5 mínútum hvers vegna meintir sérfræðingar höfðu rangt fyrir sér, hafa rangt fyrir sér og munu hafa rangt fyrir sér. Ástæðan er að í stað þess að freista þess að skilja óreiðuna, sem loftslagið er, smíða meintir sérfræðingar reiknilíkön og gefa þær forsendur að jörðin hlýni. Þetta eru ekki vísindi heldur skáldskapur.

Ef jarðvísindamenn segðu að þeir hafi keyrt reikniforrit með þeirri forsendu að eldgos kæmi upp í miðbæ Grindavíkur og spáðu á þeim grunni gosi í miðbænum - hvað yrði sagt um athæfið? Jú, spurt yrði hvort sérfræðingarnir væru ekki með öllum mjalla.

Meintir sérfræðingar í loftslagsmálum hafa leikið þennan leik í áratugi. Þeir spá hlýnun á grunni reikniforrita með fyrirframgefinni niðurstöðu, að það hlýni. Allir með reynslu af Excel-reikniforriti kunna þessa meginreglu: rusl inn rusl út. Meintir sérfræðingar í loftslagsmálum fela ruslið, skáldskapinn, sem fer inn og selja almenningi ruslið er út kemur sem vísindi.

 

 

 

Ekki lífshættuleg gos á Reykjanesi

Mamma, ég drap tíu gyðinga, tíu

,,Mamma, sonur þinn drap í dag tíu gyðinga. Með eigin hendi drap ég þá. Ég hringi til þín úr síma frá dauðum gyðingi. Ég drap tíu gyðinga, tíu. Segðu pabba. Ég drap tíu gyðinga. Hendur mínar eru ataðar blóði. Mamma, sonur þinn er hetja. Móðirin grætur. Faðirinn kallar: drepa, drepa, drepa, drepa."

Ofanritað er hljóðupptaka af búkmyndavél eins hryðjuverkamanna Hamas sem stóðu að fjöldamorðum í Suður-Ísrael 7. október. Ísraelsmenn tóku saman upplýsingar í hljóð og mynd um atburðinn 7. október og kynntu blaðamönnum, 43 mínútur alls. Textinn birtist í Die Welt. Hamas drap um 1400 manns, einkum varnarlausa borgara, og tóku yfir 200 í gíslingu. 

 

Heimsþorpið klofnar á Íslandi, Clinton sniðgengin

Hillary Clinton, þá forsetafrú, sendi frá sér bók 1996 um að til að ala börn þyrfti þorp. Undirtitill: barnalærdómur fyrir fullorðna. Bókin var ætluð bandarískum lesendum. Titill bókarinnar var óbein tilvísun til Marshall MacLuhan sem kynnti hugmynda um stafræna heimsþorpið þegar 1964. Stafrænn heimur gerir alla eins. Samanber Þokkabót, litlir kassar á lækjarbakka.

Við lok kalda stríðsins verður óformlegt samkomulag milli frjálslyndra og vinstrimanna á vesturlöndum um dagrenningu heimsþorpsins. Íhaldsmenn af gamla skólanum voru skeptískir en buðu engan valkost. Heimurinn skyldi endurskapaður á vestræna vísu. Tækni, menning og lýðræði ættað úr vestri yrði hlutskipti heimsþorpsins.

Clinton-hjónin, Bill og Hillary, og Obama forseti klöppuðu þorpssteininn. Bush-feðgarnir voru sama sinnis. Vestræna elítan fylgdi í humátt á eftir.

En nú bregður svo við að heimsþorparar á Íslandi, rithöfundar þekktir fyrir vinstrimennsku, ætla að sniðganga Hillary spámann sinn til áratuga.

Hvað gerðist? Hvers vegna hlaupa út undan sér villingarnir til vinstri? Jú, það er klofningur í söfnuðinum.

,,Heimsþorpið verður múslímsk martröð," skrifaði tilfallandi fyrir níu árum. Um miðjan síðasta áratug var orðið bert að þótt vestræn tækni ryddi sér til rúms um allar trissur heimsbyggðarinnar fylgdu ekki í kjölfarið vestrænir siðir og enn síður lýðræði og vestrænt gildismat. Vesturheimskir bjuggu til hugtakið arabíska vorið sem var án innihalds. Árið 2016, með Brexit og kjöri Trump, afhjúpuðust brestirnir. Heimsþorpið var byggt á sandi. 

Clinton er á móti vopnahlé í Gaza, segja íslenskir klyfberar vinstrimennskunnar, og skal sniðgangast. Vopnahlé í Gaza er kóði fyrir stuðning við Hamas hryðjuverkasamtökin. Hamas efndi til fjöldamorða á konum, börnum og gamalmennum 7. október, slátraði um 1400 og tók yfir 200 gísla. Í kjölfarið réðst Ísraelsher inn í Gaza til að uppræta hryðjuverkasamtökin. Hamas þarf vopnahlé og vinstrimenn á Íslandi hlýða kallinu, bæði rithöfundar og háskólaborgarar. Þeim er umhugað að hryðjuverkasamtökin nái vopnum sínum og efni til nýrra fjöldamorða í landinu helga, vestræna verkefninu fyrir botni Miðjarðarhafs.

Hvur þremillinn? Var ekki vinstrið sameinað um vestrænt heimsþorp? Ætti söfnuðurinn ekki að dásama Ísrael, eina vestræna fjölræðisríkið í arabíska og múslímska menningarheiminum? Neibb, það skal ekki dásama heldur ósama [bin landen]. Vænn hluti safnaðarins er steinaldarsinnar, og hefur alltaf verið, studdi Pol Pot á áttunda áratug síðustu aldar, Osama Bin Laden um aldamótin og nú Hamas. 

Tveggja áratuga gamalt bréf frá Osama fær dreifingu síðustu daga, á TikTok og Guardian. Þar mærir Osama mannhatur, einkum er það beinist að Ameríku og gyðingum. Vinstrimenn knéfalla, læka og deila.

Þjóðverjar þekkja afleiðingar mannvonsku klædda í fábjánahugmyndafræði. Í Die Welt skrifar Alan Posener

Þeir, sem ekki verja rétt gyðinga til þjóðríkis, við núverandi aðstæður, yfirgefa fyrstu og mikilvægustu varnarlínu siðmenningar okkar. Af þeirri ástæðu, umfram sögulega sekt, er öryggi Ísraelsríkis tilvistarrök okkar. 

Posener ræðir frumhatrið, hvernig það fyrir um átta áratugum birtist í Auschwitz, fyrir um 20 árum í árásinni á tvíturnana í New York og núna með fjöldamorðunum 7. október í Suður-Ísrael. Frumhatrið á sterk ítök í vestrænni menningu. Gleðigangan í heimsþorpinu á 21stu öld var blekking. Gleðin er yfirvarp til að kollsteypa tvö þúsund ára arfi gyðingdóms og kristni.

Þeir frjálslyndu kveikja um síðir á perunni sem alltaf tírði í höfði íhaldsmanna þótt ekki væri ljósmagninu til að dreifa. Steinaldarvinstrimenn eru á hinn bóginn njörvaðir við frumheimskuna; tala tungum en skilja ekkert.

Velkomin í heim raunsæis á mannlegt eðli, gæti verið titill næstu bókar Hillary Clinton.

 

 

Tugir höfunda sniðganga Iceland Noir

Sigríður Dögg mómælir drónabanni, þegir um húsbrot

Formaður Blaðamannafélags Íslands, Sigríður Dögg Auðunsdóttir, mótmælir að fréttamenn fái ekki að nota dróna til að mynda hamfarasvæðið í Grindavík. Sigríður Dögg skrifar í útgáfu BÍ:

Í hamfaraástandi er hlutverk blaðamanna að vera augu og eyru almennings á staðnum og flytja fólki sem heima situr sem gleggstar og nákvæmastar upplýsingar af atburðunum, þar á meðal með myndum.

Ljósmyndari RÚV var staðinn að verki við húsbrot á grindvískt heimili. Staksteinar Morgunblaðsins gáfu málinu gaum í gær:

Hvað gekk ljósmyndaranum til? Hélt hann að Páll Steingrímsson skipstjóri ætti heima þarna?! Margir hafa með réttu hneykslast á framferði ljósmyndarans, en þeir ættu að hafa hugfast að svívirðan við stuldinn á síma kapteinsins og innbrotið í hann var hálfu alvarlegra vegna þess að þar var brotið fullframið. Yfirlýsing Heiðars Arnar Sigurfinnssonar fréttastjóra Rúv. gerði málið ekki minna furðulegt, en hann bar við „misskilningi og óðagoti“, án þess að játa ábyrgð sína eða ætla nokkrum ábyrgð.

Sigríður Dögg tekur ekki meðferðar húsbrot fréttaljósmyndara RÚV í Grindavík. Enn síður að hún fjalli sem formaður Blaðamannafélagsins um aðild blaðamanna að byrlun Páls skipstjóra, stuldi á síma hans og brot á friðhelgi. Heldur ekki misnotkun blaðamanna á andlega veikri konu, sem fengin var til að byrla skipstjóranum.

Sigríður Dögg starfar á RÚV líkt og ljósmyndarinn í innbrotshug. RÚV var miðstöðin í atlögunni að Páli skipstjóra fyrir tveim árum. RÚV birti engar fréttir upp úr síma Páls, um það sáu hjáleigurnar Stundin og Kjarninn - nú Heimildin. Þóra Arnórsdóttir fyrrum ritstjóri Kveiks á RÚV er einn fimm sakborninga í lögreglurannsókn.

Auðvitað fjallar Sigríður Dögg ekki um afbrot blaðamanna. Sjálf framdi hún skattalagabrot og neitar að tjá sig um sáttina við skattrannsóknastjóra. Sigríður Dögg bæði veitir og þiggur friðhelgi. Blaðamenn fjalla lítt eða ekki um siðleysi og afbrot í eigin ranni.

Formaður Blaðamannafélagsins freistar þess að gera almenning meðsekan sakborningum RSK-miðla með orðunum að ,,hlutverk blaðamanna [sé] að vera augu og eyru almennings..."

Almenningur stundar ekki húsbrot, byrlar hvorki né stelur. ,,Augu og eyru" Sigríðar Daggar eru aftur til alls vís. Eins og raun ber vitni.

Veður-Gréta til liðs við Hamas

Sænska undrið Gréta Thunberg er andlit Sameinuðu þjóðanna og baráttusamtaka um loftslagsmál. Gréta sló í gegn sem 15 ára unglingur er hún fór í verkfall gegn manngerðri hlýnun jarðar. Fyrir nokkrum dögum gekk Gréta til liðs við hryðjuverkasamtökin Hamas og kyrjaði í hópsamkomu ,,Ekkert loftslagsréttlæti á hernumdum svæðum".

Loftslag og Hamas er sitthvað, er það ekki? sögðu fréttamaður og viðmælandi á Sky-stöðinni og áttu erfitt að halda aftur hlátrinum.

Þjóðverjum er aftur ekki hlátur í huga, taka bæði loftslagsmál og Hamas alvarlega. Ekki er háttvíst á þýsku, eftir tímabilið 1933-1945, að draga dár að andlega skertum. Kristina Schröder, fyrrum þingmaður og ráðherra, skrifar í Die Welt að gyðingaandúð Grétu sé ekki ný af nálinni. Kristina vitnar til heimasíðu samtaka, sem hafa Grétu í fyrirsvari, Föstudagar til framtíðar, og rekur dæmi gyðingaandúð Grétusinna.

Þegar Gréta gekk til liðs við Hamas á opnum fundi í Amsterdam, Hollandi, steig á sviðið miðaldra karlmaður, tók hljóðnemann af Grétu, og sagðist kominn á fund til að mótmæla loftslagsvá en ekki styðja Hamas. ,,Ég er misnotaður," sagði sá miðaldra. Mynd Spiegel sýnir kostulegu uppákomuna.

Meint loftslagsvá og raunveruleg hryðjuverk eru aðskildir heimar, sem ekki ætti að ræða í sömu andrá. Eða hvað?  ,,Ofbeldisdýrkun, sem vill útmá Ísrael af landakortinu, á sér sterkar rætur í alþjóðlegu loftslagshreyfingunni. Frjálsum lífsháttum okkar er ógnað, bæði að utan og innan," skrifar Kristina Schröder. 

Lygi og öfgar sameina Hamas og hamfarasinna. Hamas og áhangendur segja Palestínu-vandann snúast um landtöku Ísraelsmanna. Það er bláköld lygi. Palestínu-vandinn er að arabar sætta sig ekki við tilveru Ísrael. Punktur. Í trúarheimi múslíma á allt land fyrir botni Miðjarðarhafs að tilheyra ,,réttri" trú - íslam. Dauði eða rétttrúnaður.

Loftslagsmál snúast ekki um að vinda ofan af manngerðri hlýnun. Maðurinn stjórnar ekki veðurfarinu, hefur aldrei gert. Um 97% af koltvísýringi andrúmsloftsins er náttúrulegur. Þau þrjú prósent sem maðurinn er ábyrgur fyrir breyta engu um hvort hlýni eða kólni. Baráttumenn í loftslagsmálum draga til sín athygli á fölskum forsendum, mest með ógnarorðræðu um yfirvofaandi heimsslit. Dauði eða rétttrúnaður.   

Veður-Gréta og Hamas trúa á helvíti handan við hornið. Tilvist beggja gengur út á að gera öðrum lífið leitt, með fjöldamorðum í tilfelli Hamas. Hvorugur hópurinn gengst þó við tilgangi sínum.  Hryðjuverkamenn og hamfarasinnar líta á sig sem fórnarlömb. Sígrátur á samfélagsmiðlum eru krókódílatár til að afla samúðar.

 

 

Verkferlar á Glæpaleiti

Fréttaljósmyndari RÚV reyndi húsbrot í Grindavík og ætlaði sér að brjóta á friðhelgi heimilisins. Heimilisfólki var skipað, nauðugt viljugt, að yfirgefa heimili sitt. Yfirvöld hleyptu síðan fréttagangsterum RÚV inn á yfirlýst neyðarsvæði. Fréttastofa RÚV virðir hvorki siðaðra manna hætti né lög og þrætir alltaf fyrir misgjörðir. Í þetta sinn tjóaði ekki að neita, tilraunin til húsbrots og brots á friðhelgi einkalífs náðist á myndband.

Við erum voða sorrí, segir  Heiðar Örn Sig­urfinns­son fréttastjóri RÚV og kveðst ætla að ,,skerpa á verkferlum." 

Virkilega?

Verkferlar RÚV hafa hingað til leyft aðkomu fréttastofu að byrlun, gagnastuldi, brotum á friðhelgi einkalífs og misþyrmingu fólks í bágindum. Tveir starfsmenn RÚV, Aðalsteinn Kjartansson og Þóra Arnórsdóttir, eru sakborningar í lögreglurannsókn. Hvað gerði RÚV til að upplýsa aðild starfsmanna sinna að byrlun Páls skipstjóra Steingrímssonar og stuldi á síma hans? Helgi Seljan fréttamaður RÚV var í sambandi við andlega veikan byrlara Páls, fyrir og eftir verknaðinn. Rakel Þorbergsdóttir var fréttastjóri þegar byrlun og stuldur fóru fram, í byrjun maí 2021. Öll fjögur eru hætt en RÚV útskýrir ekki aðild sína að málinu. RÚV segir ekki eitt einasta orð. Eru verkferlar RÚV að hylma yfir lögbrot?

Stjórn RÚV, tilnefnd af alþingi, er farin að átta sig á að ekki er allt með felldu á stofnuninni. Fyrir sex vikum lét varaformaður stjórnar RÚV, Ingvar Smári Birgisson (ISB), bóka eftirfarandi í fundargerð:

ISB árétti mikilvægi þess að fréttastofa starfi í samræmi við lög og virði friðhelgi borgaranna í hvívetna.

Ef stjórn fyrirtækis eða stofnunar þarf að árétta að starfsmenn virði lög og friðhelgi borgaranna er augljóst að um gjörspillta starfsemi er að ræða. Eru til nokkur dæmi að varaformaður stjórnar stofnunar eða fyrirtækis bóki í fundargerð að starfsmenn fari að lögum og virði mannréttindi? Sjá menn ekki viðvörunarljósin? Loka menn augunum af ótta við að verða fyrir ofsóknum ríkisfjölmiðilsins?

Þrátt fyrir bókun varaformanns er áfram haldið að brjóta og bramla og valda saklausum miska. Fréttagangster RÚV reynir húsbrot á neyðarsvæði í Grindavík. Heiðar Örn fréttastjóri segist skerpa á verkferlum. Fréttastjórinn getur ekki einu sinni skerpt á sjálfum sér.

Fréttastofa RÚV tekur lögin ítrekað í sínar hendur og skeytir hvorki um heiður né skömm. Vinnustaðamenning sem elur á siðleysi og lögbrotum er fyrir löngu komin fram yfir síðasta söludag. Orðagjálfur um skerpingu verkferla við þessar aðstæður er siðblinda á hæsta stigi.  

Ljósmyndari Rúv reyndi að fara inn í mannlaust hús

Geðröskun og vók-vinstrið

Andfélagsleg hegðun og sjálfsdýrkun eru persónuleikaraskanir undir klasa B í fagbókmenntum. Vinstrisinnuð vók-pólitík gefur fólki með klasa B röskun tækifæri að upphefja sig á kostnað sanninda og heilbrigðrar skynsemi. Í meðförum brenglaðra verða limlestingar að læknishjálp, hatur að ást, góðviðri að hnattrænni hlýnun, hvítt svart; að ekki sé talað um vúdúið um sálir í röngum líkama. Í einu orði: firring.

Hommar styðja Hamas stóð á einu veggspjaldi í bandarískum mótmælum. Douglas Murray segir að vegna stríðsins séu ekki nógu mörg háhýsi uppistandandi í Gaza-borg  til að fleyja hommum fram af. Samkynhneigðir sem styðja Hamas lofsyngja samtök sem taka homma af lífi. Hinsegin fánar í kröfugöngum til stuðnings Hamas eru rifnir niður. Fólk á röskunarrólinu sér ekki mótsögnina.  

Líffræðingurinn Bret Weinstein heldur úti hlaðvarpinu Dark Horse. Hann fékk nýlega til sín mann sem fékk uppeldi hjá klasa B-fyrirbæri. Joshua Slocum heitir maðurinn. Ég var vók til fertugs, segir Slocum. Hann er alinn upp af móður frá helvíti. Móðirin var stjórnsöm, andstyggileg og siðblind. Dæmigerður klasi B. 

Ég var vók, tók undir allt vinstra-vókið sem í boði var, segir Slocum, og útskýrir: ég er afurð æsku og uppeldis. Stjúpfaðirinn var ofbeldismaður. Kemur ekki á óvart þegar móðirin er afstyrmi, að sögn sonarins. Hún t.d. taldi Slocum trú um að systir hans væri geðveik. Mamman, geðsjúklingurinn, staðhæfði dóttur sína andlega vanheila. Mömmustrákurinn Slocum tók það gott og gilt í uppvextinum, kom illa fram við systur sína í umboði mömmu.

Í miðri játningu Slocum grípur Weinstein frammí og segir, í anda líffræðilegrar greiningar, að fyrrum voru mæður eins og Slocum átti í takmörkuðu framboði. Náttúruval sá um að erfðaefnið fékk takmarkaða útbreiðslu. Fæstir vildu geta ruglinu afkvæmi. Fjölbreytileikinn er meiri nú til dags.

Eins og nærri má geta glímdi Slocum við margháttaðar geðraskanir auk alkahólisma. Fyrir sjö árum gerði hann sér grein fyrir samhenginu. Slocum uppgötvaði að hann hafði tekið sér móður sína til fyrirmyndar. Hann var vond manneskja, trúði bulli um lífið og tilveruna og valdi sér félagsskap sem studdi sömu fordóma og hann sjálfur var haldinn. Í framhaldi af uppreisn gegn móður sinni stokkaði Slocum upp líf sitt, sagði skilið við vók-ið og skar á öll tengsl við móður sína. (Í hlaðvarpinu bregður fyrir ankannalegri hláturskviðu þegar Slocum ræðir uppgjörið.)

Áður en samfélagsmiðlar komu til sögunnar voru margvíslegar hindranir á vegi fólks tæpt á geði að gera sig gildandi á opinberum vettvangi. Samtök, félög, fjölmiðlar og stjórnmálaflokkar hleyptu ekki hverjum sem er upp á dekk. Ekki svo að skilja að aldrei hafi verið misjafn sauður í forystufénu. Öðru nær.  En það voru hömlur.

Með samfélagsmiðlum gerist tvennt. Í fyrsta lagi gat hver sem er tekið til máls á opinberum vettvangi. Á yfirborðinu lýðræðisvænt en hjó í leiðinni að rótum félagskerfis samfélagsins, bæði því formlega og óformlega. Þar sem áður voru tiltölulega fáir samkomusalir, í yfirfærðri merkingu orðsins, urðu til fjöldi bergmálshella sem erfitt er að hafa yfirsýn yfir. Margvíslegt rugl er talað í bergmálshellum sem aðeins innvígðir eiga aðild að. Leiðrétting opinberrar, frjálsrar umræðu kemst ekki að. Ruglið hópsmitast og verður að faraldri fáránlegra skoðana.

Í öðru lagi er forystufólk, þokkalegt til hugar og handa, undir stöðugu áreiti að ganga lengra í öfgum til að vera ekki atyrt af virkum í athugasemdum og atlögum frá innvígðum í bergmálshellum. Aðstæður í opinberri umræðu eru hagfelldari klasa B fyrirbærum en þær hafa nokkru sinni verið. 

Ekki þarf að leita lengi, til dæmis á Íslandi, til að finna einstaklinga á opinberum vettvangi með klasa B röskun eins og Slocum lýsir. Gráglettni náttúrunnar er að siðblindir sjálfsdýrkendur fá iðulega í vöggugjöf sjarma, sem gagnast til að stofna söfnuð um bull, vitleysu og firru.

Helgi Seljan: Jói uppljóstrari fari ekki til Namibíu

Réttarhöld í Namibíu í Fishrot-málinu eru vegna tíu heimamanna sem ákærðir eru fyrir skatt- og umboðssvik vegna sölu á fiskveiðikvóta. RÚV og Heimildin, RSK-miðlar, staðhæfðu í Kveiks-þætti í nóvember 2019 að norðlenska útgerðin Samherji hefði með mútugjöfum keypt namibískan kvóta.

Eini maðurinn, sem heldur fram ásökunum um mútur, er Jóhannes Stefánsson uppljóstrari. RSK-miðlar gerðu Jóhannesarfrásögn að sinni. Engum öðrum heimildum er til að dreifa. Jóhannes rak útgerðina í Namibíu eins og einvaldur og hafði ítök í stjórnsýslunni í Afríkuríkinu, líkt og nýlega kom fram.

Í yfirstandandi dómsmáli í Namibíu er enginn Íslendingur á sakabekk, eingöngu heimamenn. Ekki er ákært fyrir mútur enda engar heimildir um slíka háttsemi. í mútumáli eru alltaf minnst tveir aðilar, einn mútar og annar þiggur.

Helgi Seljan fréttamaður var aðalmaðurinn á bakvið Kveiks-þáttinn á RÚV 2019. Í byrjun árs 2022 var hann fluttur yfir á Stundina, sem varð Heimildin ári síðar. Stefán Eiríksson útvarpsstjóri taldi ekki óhætt að halda Helga á Efstaleiti eftir að byrlunar- og símastuldsmálið vatt upp á sig. Ekki er vitað hvort Helgi sé sakborningur lögreglu. Yfirmaður Helga á RÚV, Þóra Arnórsdóttir, varð einnig að víkja ári síðar af sömu ástæðu. Þóra hefur stöðu sakbornings.

Hvorki Þóra né Helgi, eða fjórir blaðamenn aðrir, allir á Heimildinni, sem eru sakborningar í byrlunar- og símastuldsmálinu, hafa upplýst vitneskju sína um byrlun Páls skipstjóra Steingrímssonar og stuldi á síma hans. En öll sex búa yfir upplýsingum sem gætu aðstoðað lögreglu að komast til botns í málinu. Öll sex eiga að heita fréttamenn, hvers aðalstarf er að upplýsa, gjarnan um það sem miður fer í samfélaginu - til dæmis lögbrot og siðleysið er felst í misnota andlega veika. 

Helgi Seljan, sem ekki verður sakaður um þráhyggju, ónei, þegir um byrlun- og símastuld en heldur áfram að klappa Kveiks-steininn frá 2019. Í nýjasta tölublaði Heimildarinnar, sem haldið er á floti með ríkisstyrkjum, skrifar Helgi heilsíðu um að íslenska ríkið beri ábyrgð á fölskum ásökunum RSK-miðla og verði að bæta Namibíumönnum meintan skaða. Nokkuð langsótt hjá ekki-þráhyggjumanninum, svo ekki sé dýpra í árinni tekið. Íslenska ríkið ber ekki ábyrgð á einkafyrirtækjum. Aftur ber ríkið ábyrgð, siðferðislega og fjárhagslega, á RÚV, sem er uppspretta fréttalyga er valdið hafa skaða, bæði heima og erlendis. Engin tilviljun að Stefán útvarpsstjóri tilkynnti nýverið starfslok.

Í heilsíðufabúleringum Helga er ekki minnst orði á Jóhannes uppljóstrara Stefánsson. Þögnin um einu heimildina fyrir ásökunum um að Samherji hafi aðhafst eitthvað misjafnt þar syðra segir þá sögu að Helgi vill ekki fyrir nokkurn mun að Jóhannes fari til Namibíu og vitni.

Framburður Jóhannesar hefur verið veginn á Íslandi og fundinn léttvægur af Skattinum og héraðssaksóknara. Engar ákærur á hér á landi, enda engin lögbrot. Á meðan Jóhannes fer ekki til Namibíu geta Helgi og RSK-miðlar skákað í því skjóli að namibísk yfirvöld hafi ekki formlega úrskurðað framburð uppljóstrarans þvætting. Útflutningur á frásögn Jóhannesar og RSK-miðla til Noregs misheppnaðist. Danskur almannatengill í vinnu hjá íslensku blaðamönnunum fékk birta grein í Innsikt-Aftenposten um ásakanir Jóhannesar og RSK-miðla. Eftir athugun baðst norska útgáfan margfaldlega afsökunar að hafa birt ósannindin.

Yfirvöld í Namibíu segja óbeint að þau vilji ekkert hafa með Jóhannes að gera. Hvorki er Jóhannes beðinn að koma til Namibíu að flytja fagnaðarerindið né er framsalskrafa gerð. Helgi og RSK-miðlar eru einu aðdáendur Jóhannesar uppljóstrara.

Sælt er sameiginlegt skipbrot.