Sósíalistar og 0,1 prósentið

,,Að skoða ævintýralega dýrar eignir á Seltjarnarnesi er svo kexrugluð innsýn í 0,1 prósentið," segir í háðsfrétt DV um húseign á Nesinu með ásett verð upp á 130 milljónir.

Í meðfylgjandi frétt mbl.is segir af sölu á húseign Gunnars Smára formanns Sósíalistaflokks Íslands. Ásett verð: 119 milljónir.

Þegar talsmenn öreiga selja eignir í sama verðflokki og 0,1 prósentið sem ,,á Ísland" er einboðið að stéttabaráttan er ekki lengur háð á efnahagslegum forsendum. Baráttan stendur á milli dómgreindar og þeirra sem hafa hana ekki.

Brynhildur keypti glæsihús Gunnars Smára og Öldu Lóu

Snjall Stefán í höfuðvígi vinstrimanna á Efstaleiti

Nýskipaður útvarpsstjóri er maður margra hlutverka. Stefán Eiríksson var trúnaðarmaður Bjarna Benediktssonar við val á seðlabankastjóra. Í lekamálinu rak Stefán síðasta naglann í pólitíska líkkistu Hönnu Birnu innanríkisráðherra.

Eftir viðvik fyrir Bjarna formann réðst Stefán í vist hjá vinstrimönnum í ráðhúsi Reykjavíkur og vann sig upp hratt og vel, kveður sem borgarritari.

Og nú er kappinn orðinn húsbóndi á Efstaleiti.

Hægriúlfur eða vinstralamb?

Fátt um svör þegar stórt er spurt. 

Stefán Eiríksson ráðinn útvarpsstjóri

WOW 2: gjaldþrot er möguleiki

Endurreist WOW byrjar á fraktflugi og fer síðan yfir í farþegaflug. Í meðfylgjandi frétt er hálfs árs seinkun á WOW 2 útskýrð:

Upp­haf­lega stóð til að flugrekst­ur fé­lags­ins hæf­ist í lok októ­ber á síðasta ári, en það frestaðist af ýms­um ástæðum. Meðal ann­ars kom í ljós að aðeins flókn­ara var að end­ur­reisa fallið flug­fé­lag held­ur en gert hafði verið ráð fyr­ir. Á svipuðum tíma opnuðust svo mögu­leik­ar á því að gera verk­efnið enn stærra, í kjöl­far þess að nokk­ur lággjalda­flug­fé­lög lögðu upp laup­ana.

Já, það eru möguleikar í gjaldþroti. Til dæmis á enn öðru gjaldþroti.

WOW air í loftið um miðjan mars

Efling: meira kaup, minni menning

Endurgerð bragga við gamla Reykjavíkurflugvöll var í nafni menningar. Verkefnið, eins og ýmis önnur á sviði menningar, kostaði margfalt meira en til stóð enda vinstrimenn að verki.

Efling, stéttarfélag sósíalista, segir launakröfur sínar gagnvart borginni nema andvirði fjögurra bragga. 

Hvers vegna ekki reikna launakröfurnar í rithöfundarlaunum? Bóka- og listasöfnum? Leikhúsum? Styrkjum til íþróttafélaga?

Sósíalistar eru alþjóðasinnar. Líklega vilja þeir að Ísland verði verstöð er gefi vel í aðra hönd; menninguna má sækja til útlanda.

Kröfur Eflingar nema fjórum bröggum

Smávegis reisn, Egill Helga, bara smávegis

Egill Helga birti afmæliskveðju til Bjarna Benediktssonar formanns Sjálfstæðisflokksins, sem varð fimmtugur í gær. Afmæliskveðjan var tvær línur. En 95% af texta Egis var sneið til fimmtugsafmælis Davíðs Oddssonar sem var fyrir heilum 22 árum.

Líkt og aðrir vinstrimenn á Egill erfitt með að hemja sig þegar Davíð er annars vegar. Jafnvel þegar fyrrum forsætisráherra er hvergi nærri vettvangi - afmælisdagurinn var Bjarna - geta menn ekki á sér setið og haga sér eins og götustrákar.

Yfirskrift færslu Egils er ,,Bjarni fimmtugur - dálítið breyttir tímar". Sumt breytist þó ekki. Til dæmis neyðarleg þráhyggja Egils og félaga gagnvart Davíð Oddssyni.

Straumsvík og heimskreppan

Álverð er talið endurspegla horfurnar í heimsbúskapnum. Ál er notað í framleiðslu bíla, flugvéla og heimilistækja. Væntingar um samdrátt eða kreppu koma snemma fram í álverði.

Á síðasta ári lækkaði álverð um tæp 8 prósent.

Tilkynningin um minni framleiðslu í Straumsvík er vísbending um að heimsbúskapurinn standi ekki traustum fótum.

Áhyggjur af starfsfólkinu

Sósíalísk verkalýðsbarátta

,,Það er sjúk­lega ólýðræðis­legt og sjokk­er­andi að verða vitni að því að fólk ætli að stilla fé­lags­mönn­um Efl­ing­ar upp sem ein­hverj­um svik­ur­um við lífs­kjara­samn­ing­inn," segir Sólveig Anna formaður Eflingar.

Nýgerðir lífskjarasamningar eru, samkvæmt Sólveigu Önnu, dæmi um ,,sjúklegt órétt­læti." En formaður Eflingar taldi þá nógu góða fyrir félagsmenn Eflingar er starfa á almennum vinnumarkaði.

Dálítið ,,sjúkt", ekki satt?

Engir svikarar við lífskjarasamninginn

Fólk flýr til Íslands - í eldgos

Á ráðstefnu fyrir tveim dögum segir sóttvarnarlæknir að búast megi við flóttamannastraumi til Íslands vegna loftslagsbreytinga. Hmm, frá 1880 hefur hitastig jarðar hækkað um 0,8 gráður á Celcíus, já 0,8 C á 140 árum. 

Í meðfylgjandi frétt er sagt frá mögulegu eldgosi við Grindavík. Á 13. öld brunnu þar jarðeldar í áratugi.

Hættum móðursýkinni og reynum að lifa við þá staðreynd að náttúran, veðurfar og jarðhræringar, er handan þess sem maðurinn getur stjórnað. Við lifum með náttúrunni en stjórnum henni ekki.

„Lítur út eins og byrjun á langvarandi ferli“

ESB beitir sér gegn Bretlandi, Kanada

Aðgangur að breskum fiskimiðum verður krafa ESB í viðræðum um fríverslunarsamning við Bretland. Kanada hefur fríverslunarsamning við ESB og kvartar sáran undan tæknilegum viðskiptahindrunum í Evrópu.

Evrópusambandið er valdastofnun sem beitir sér af afli gegn ríkjum utan sambandsins þegar andstæðir hagsmunir eru í húfi.

Æ betur kemur á daginn hve misráðið var fyrir Ísland að sækja um aðild að Evrópusambandinu 16. júlí 2009.

Vinstrimenn, Samfylking og Vinstri grænir, vildu flytja fullveldið og forræði íslenskra mála til Brussel. Gleymum því ekki.

 

Frakkar vilja veiða í breskum sjó næstu 25 árin

Stefán, frjálshyggjukratismi og Trump

Stefán Ólafsson skrifar um dauða nýfrjálshyggjunnar og boðar afturhvarf til blandaðs hagkerfis. Hann vill

inn­leiða á ný bland­aða hag­kerfið sem var ríkj­andi á Vest­ur­löndum frá lokum seinni heims­styrj­aldar til um 1980 og sem þjón­aði almenn­ingi mun betur en hug­mynda­fræði nýfrjáls­hyggj­unnar hefur gert.

Blandað hagkerfi, ríkisrekstur og einkarekstur, óx og dafnaði á vesturlöndum í hagsææld eftirstríðsáranna. Nýfrjálshyggja verður vinsæl þegar vestræn hagkerfi lenda í kreppu á áttunda áratug síðustu aldar. 

Sameiginlegt blönduðu hagkerfi, oft kennt við kratisma, og nýfrjálshyggju er alþjóðahyggja. Frjáls verslun, frjáls flæði vöru og þjónustu og frjálst flæði fólks sameinaði kratisma og nýfrjálshyggju. Evrópusambandið er háborg hugmyndafræðinnar.

Um aldamótin opinberast vandræði alþjóðavæðingar. Millistéttir á vesturlöndum staðna í kaupmætti, verkafólk missir störf til þriðja heims ríkja. Kratískir hagfræðingar eins og Joseph Stiglitz segja frá vandræðunum.

Trump fékk forsetakjör í Bandaríkjunum 2016 til að stemma stigu við frjálshyggjukratískri alþjóðavæðingu. Trump tók bandarískt verkafólk fram yfir hagsmuni stórfyrirtækja.

Trump tekur þjóðhyggjuna, sem var forsenda blandaðs hagkerfis á vesturlöndum, og skrúbbar af henni alþjóðavæðinguna. Eftir standa hversdagsleg sannindi; þjóðríkið eitt tryggir hagsæld borgaranna.

Stefán kann sitthvað fyrir sér í hagfræði og öðrum félagsvísindum. En hann getur ekki, frekar en allur þorri vinstrimann, horfst í augu við þann veruleika að Trump er þjóðlegur krati.