Evrópuherinn

Evrópusambandið hefur á að skipa viðbragðshersveitum og í Lissabonsáttmálanum eru heimildir fyrir hernaðaruppbyggingu. Aðildarsinnar viðurkenna loksins þessar staðreyndir en lengi vel neituðu þeir blákalt að til væri hernaðarþáttur í starfi Evrópusambandsins.

Umræðan snýst núna um að Íslendingar munu án efa fá undaþágu frá hernaðarhluta sambandsins og er vísað til Íra í því samhengi. Sérstök bókun var gerð um að Evrópusambandið virði hlutleysi Íra. 

Stríð er aðgerð til að þvinga vilja sínum upp á andstæðinginn*, skrifaði faðir evrópskrar hernaðarhyggju, Karl von Clausewitz, fyrir 200 árum. 

Kæmi að hervæðingu Evrópusambandsins yrði Ísland með sín 0,6 prósent áhrif ekki spurt álits - færi svo illa að Íslendingar gengju sambandinu á hönd.

 

*Der Krieg ist also ein Akt der Gewalt, um den Gegner zur Erfüllung unseres Willens zu zwingen.

Samfylkingin margföld í roðinu

Tækifærismennska er innsta eðli Samfylkingarinnar. Það sást í kosningabaráttunni í vor þegar Samfylkingin í Reykjavík boðaði sérstakan hagvöxt í höfuðborginni sem var úr tengslum við ríkisstjórnarstefnu Samfylkingarinnar.

Sóley Tómasdóttir vekur athygli á að umhverfis- og náttúruverndarstefna Samfylkingarinnar er ein í ríkisstjórn og önnur í borgarráði.

Samfylkingin er ótrúverðugasta stjórnmálaafl seinni tíma sögu íslenskra stjórnmála.

Samfylkingin gagnrýnir eigin ráðherra

ESB hótar smáríki

Slóvakía hafnar þátttöku í björgunarpakka Evrópusambandsins handa Grikkjum með þeim rökum að óreiðurekstur eins ríkis eigi ekki að vera á ábyrgð annarra. Evrópusambandið lítur uppreisn Slóvaka alvarlegum augum þótt framlag þeirra skipti ekki sköpum.

Olli Rehn sem fer með efnahagsmál í framkvæmdastjórn ESB hótar Slóvökum alvarlegum pólitískum afleiðingum vegna afstöðu þeirra. Slóvakía sem telur 4 milljónir íbúa heldur fram sjónarmiðum sem ganga þvert á málamiðlun stórveldanna í Evrópusambandinu um að Grikkjum eigi að bjarga vegna þess að annars gæti evran riðað til falls.

Evrópusambandinu munar ekki um peninga frá Slóvakíu. Evrópsk samstaða er í húfi og þegar svo er ástatt eru þjóðir barðar til hlýðni með hótunum.

Eignir, viðskipti og samfélagið

Októberhrunið 2008 krefst athugunar á pólitískum undirstöðum. Ívar Páll Jónsson blaðamaður á Morgunblaðinu skrifar hugvekju í dag um eignir undir fyrirsögninni Óttinn við útlendinga er lífsseigur. Lykilsetning í greininni er eftirfarandi

Eign er einskis virði, ef ekki má selja hana.

Setningin er pólitísk yfirlýsing og hún er röng. Þær eignir eru verðmætastar sem ekki er hægt að selja. Tungumálið okkar er mikilsverð eign, svo dæmi sé tekið, og verður ekki seld.

Auðlindir okkar til lands og sjávar eru eignir sem við eigum ekki að selja vegna þess að þær eru verðmæti sem ákvarða lífsskilyrði hér á landi til langrar framtíðar. Við eigum ekki þessar eignir heldur afkomendur okkar. 

Viðskiptaeignir sem geta gengið kaupum og sölu eru, þegar grannt er skoðað, ómerkilegustu eignirnar einmitt vegna þess að þær fást fyrir fé. 

Spánn og Grikkland í gjaldþrot

Forstjóri eins stærsta vogunarsjóðs í gjaldeyrisviðskiptum, John Taylor hjá FX Concepts, spáir gjaldþroti Spánar og Grikklands á Bloomberg-sjónvarpsstöðinni.

Hér er viðtalið.

Orðin falla í lok viðtalsins.

Ungir bændur og samkeppnisyfirvöld

Samkeppniseftirlitið svaf þyrnirósarsvefni öll útrásarárin og lét gott heita að fákeppni grasseraði sem aldrei fyrr. Meðvirkni eftirlitsins með auðmönnum leyfði þeim að ræna og rupla almenning. Eftir hrun þykist eftirlitið ætla að hnykla vöðvana og sperrir sig gegn fjölskyldurekstri í landbúnaði.

Ungir bændur vekja athygli möguleikum sem opnast með breytingum á búvörulögum á heimavinnslu og er hlynnt frumvarpinu. Ungir bændur vit betur en kontóristar með útrásartimburmenn hvað landbúnaði er fyrir bestu.

Íslenskur landbúnaður er fjölskyldurekstur að stærstum hluta og verður vonandi áfram. Skipulag greinarinnar þarf að taka mið af heildarhagsmunum. Samkeppniseftirlitið ætti að finna sér annan vettvang til að láta til sín taka.

Ungir bændur fagna frumvarpi

Fullvalda fiskveiðiþjóð eða áhrifalaust smáríki

Fyrst var það Icesave sem Össur Skarphéðinsson utanríkisráðherra skýldi sér á bakvið þegar hann var spurður um yfirgnæfandi andstöðu Íslendinga við aðild að Evrópusambandinu. Makríllinn verður næsta afstöku Össurar fyrir skort á stuðningi við umsókn Samfylkingar um aðild.

Í deilum um veiðar úr deilistofnum kristallast andstæðir hagsmunir Íslands og Evrópusambandsins. Ef við værum aðilar að ESB yrði okkur skammtaður skítur úr hnefa enda aflaheimildum miðstýrt frá Brussel. Utan ESB erum við fullvalda fiskveiðiþjóð en innan sambandsins eru við smáríki sem verður að láta sér nægja brauðmola af háborði stórþjóðanna.

Aumingja Össur.

Spáir „makrílstríði" við ESB

Efnahagsbati án Magma-væðingar

Samtök afneitara sem Vilhjálmur Egilsson stýrir geta ekki neitað efnahagsbatanum sem er án Magma-fjárfestinga og ruglvæðingarinnar sem samtökin vildu hrinda af stað þar sem útsala á orkuauðlindum var í forgangi.

SA eru enn miðstöð fjárglæfrahugsunar. þeirrar sömu og var kennd við útrásina og skilaði þjóðinni hruni. Samtök afneitara hafa ekki gert upp við fortíðina og dæla út áróðri í anda 2007.

Samtök afneitara kröfðust þess að við borguðum skilyrðislaust Icesave-skuldina til að óreiðufólkið fengi svigrúm til að taka upp fyrri iðju.

Stjórnvöld eiga ekki að taka minnsta mark á Vilhjálmi og félögum.

Strandþjóðir, ESB og kokteilhænur

Hagsmunir okkar og strandþjóðanna Grænlendinga, Færeyinga og Norðmanna eru um margt sameiginlegir. Þjóðirnar eru háðar fiskveiðum og búa á hafsvæði sem verður æ mikilvægara vegna legu sinnar og umhverfisbreyta sem leiða til aðgengis að norðurskautinu.

Líkur eru á að Evrópusambandið tæki fagnandi samvinnu við svæðissamtök þessara þjóða. Evrópusambandið veit að þessar þjóðir eru ekki á leið í sambandið, þrátt fyrir íslensku umsóknina, og það er í þágu stórveldisins í Brussel að eiga samskipti við einn aðila í stað fjögurra.

Utanríkisstefna Íslendinga á vitanlega að taka mið af brýnum hagsmunum okkar sem þjóðar og þeir hagsmunir eru á nærsvæðum okkar. Á meðan Samfylkingin er við völd eru það kokteilhænur sem ráða ferðinni og þeim finnst skemmtilegra að vera áhrifalaus á meginlandi Evrópu en að vinna í þágu þjóðarhagsmuna. 

Norðmenn ekki á leiðinni í ESB

Kreppulok drepa Jóhönnustjórnina

Botninum er náð í kreppunni, sagði Seðlabankastjóri  og um leið kippti hann fótunum undan ríkisstjórn Jóhönnu Sig. Vinstristjórnin er afbrigði í íslenskum stjórnmálum og þurfti efnahagshrun til að afbrigðið næði fram að ganga. Þegar þjóðin réttir úr kútnum nennir hún ekki lengur samstjórn þjóðlegs íhalds og fíflafrjálslyndisins.

Þegar vinstriflokkarnir líta um öxl og spyrja hvar fór úrskeiðis er nærtækt að byrja á umsókninni um aðild að Evrópusambandinu. Fíflafrjálslyndið, Samfylkingin, stekkur á eitt ævintýrið þegar annað þrýtur; á eftir útrás kemur umsókn. Þjóðlega íhaldið, Vg, er í innsta eðli frábitið fíflafrjálslyndinu og fyrirlítur gleiðgosasólbrúnkustjórnmálin.

Jóhanna Sig. heldur stjórninni saman og í kreppurökkri sást ekki stimpillinn með síðasta söludag.