Þrjár konur í heimsþorpinu

Tvær afganskar konur sögðu farir sínar ekki sléttar á fréttamannafundum í Washington og Brussel. Þær töldu vesturlönd ekki standa sig í stykkinu að gera Afganistan vestrænt, nú þegar talibanar eru komnir til sögunnar.

Þriðja konan er íslenskur áhrifavaldur sem segir talibaníska ritskoðun ekki ganga nógu langt á Íslandi. Óþolandi fólk eigi alls ekki að sjást i fjölmiðlum.

Það er vandlifað í heimsþorpinu.

Afganskar fréttakonur brustu í grát

Pírati: Afganvæðum Ísland

Andrés Ingi þingmaður Pírata vill að Ísland opni flóttamannabúðir fyrir Afgana ekki seinna en í gær.

Vinstrimenn verða næstu daga í kapphlaupi með tillögur um Afgan-Ísland. Með slíkum tillögum slá þeir tvær flugur í einu höggi,  þjóna hatri sínu á öllu íslensku annars vegar og hins vegar slá sig til riddara góðmennskunnar.

En kannski er fyrst að skilja stöðuna í Afganistan. Samtal við Mike Martin er ágætis byrjun. Hann þekkir til í Afganistan og segir það vestræna ranghugmynd að talibanar séu skilgreindur hópur fólks. Málið er flóknara en svo.

En, auðvitað, vinstrimenn eru sérfræðingar í einfeldni. Þeir settu afgönsku þjóðina á námskeið í kynjafræðum. Þegar það mistókst vilja þeir flytja Afgani í flugvélaförmum til vesturlanda að læra þau sömu fræði og afganska þjóðin hafnaði á heimaslóðum.

Vinstrimenn læra aldrei af reynslunni. Veruleikinn er of stór skilningarvitum þeirra.

Flóttamannanefnd segist þurfa meiri tíma

Gunnar Smári og sósíalískar sóttvarnir

Gunnar Smári rekur Sósíalistaflokkinn og boðar nýsjálensku leiðina í sóttvörnum. Um daginn skrifaði Gunnar Smári einmitt um sósíalískar sóttvarnir. Gunnar Smári og bróðir hans, Sigurjón, hrundu af stað undirskriftarsöfnun í vor til stuðnings nýsjálensku leiðinni. 

Íslenskur maður búsettur í Nýja-Sjálandi, Sigurgeir Pétursson, útskýrir nýsjálensku leiðina í sóttvörnum:

Landamærin Nýja Sjálands hafa verið lokuð öllum nema Nýsjálendingum síðan í mars í fyrra. Nýsjálendingar sem vilja koma til Nýja Sjálands þurfa allir að fara á sóttvarnarhótel í 14 daga og borga fyrir það sem samsvarar 280.000 krónum. Þá skiptir engu máli hvort fólk sé bólusett eður ei. Allir þurfa að gera það sama. Það sem verra er, er að það þarf að bóka herbergi á þessum sóttvarnarhótelum áður en keyptur er flugmiði.

Sósíalískar sóttvarnir myndu gera Ísland að risastóru fangelsi sem aðeins myndu opna landamærin til að loka þeim aftur við fyrsta smit.

Útgöngubann í Nýja-Sjálandi vegna smits

Afganir fá landið sitt aftur

Talibanar náðu völdum í Afganistan á mettíma eftir að Bandaríkin og vesturlönd gáfust upp á að styðja valdstjórnina í Kabúl.

Talibanar hefðu ekki náð þessum árangri án víðtæks stuðnings Afgana. Stjórnvöld í Kabúl hefðu ekki lagt upp laupana jafn brátt og raun varð á ef þau nytu stuðnings almennings.

Nú er það undir Afgönum sjálfum komið að finna út hvernig samfélagi þeir vilja búa í. Uppskriftin að því samfélagi kemur, ef að líkum lætur, frá Kóraninum en ekki frá Washington eða Brussel.

Dagurinn eftir fall Kabúl í myndum

Biden fær sitt Víetnam

Víetnam og Afganistan er ekki hægt að líkja saman. Í Afganistan verða ekki björgunaraðgerðir á síðustu stundu, sagði Joe Biden á blaðamannafundi í Hvíta húsinu fyrir mánuði.

Afganistan er þegar orðið annað Víetnam. Stjórnvöld í Saigon flúðu með síðustu Bandaríkjamönnunum líkt og í Kabúl í dag.

Joe Biden, leiðtogi hins frjálsa heims, er í felum út í sveit á meðan Kabúl fellur segir Telegraph.

Meginþorri Bandaríkjamanna vildi út úr vonlausa stríðinu í Afganistan, rétt eins og Víetnam fyrir hálfri öld.

En meginþorri Bandaríkjamanna vill ekki láta niðurlægja sig.

Útreið Bandaríkjanna í Afganistan fær ekki síður alvarlegar afleiðingar fyrir bandarísk innanríkisstjórnmál en alþjóðamálin.

Biden, hvort heldur hann sé út í sveit eða kjallara Hvíta hússins, er á vaktinni þegar Bandaríkin eru niðurlægð. Það verður ekki fyrirgefið.

Fimm látnir á flugvellinum í Kabúl

Kosningabarátta á greiðslufresti - spilling pírata og sósíalista

Píratar og ósíalistar leggja til að pólitískir flokkar fá auglýsingar í RÚV á greiðslufresti. Ef flokkarnir fá ekki nægt fylgi í þingkosningum verði auglýsingakostnaðurinn afskrifaður.

Skilgreiningin á spillingu er þegar aðili notar annarra manna fé til framdráttar sérhagsmunum.

Píratar og sósíalistar gera út á opinbera fjármuni, í formi ríkisstuðnings, lána og afskrifta.

Þetta er spilling í sinni tærustu útgáfu.

Hitler, talibanar og alþjóðahyggjan

Enginn, nema kannski skrítnir fuglar eins og Winston Churchill, vöruðu við uppgangi Hitlers í Þýskalandi á fjórða áratug síðustu aldar. Churchill var afgreiddur sem sérvitur fyllibytta.

Aftur eru þeir margir sem vara síðustu daga við yfirtöku talibana á Afganistan. Breski þingmaðurinn Tom Tugenhat segir vesturlönd kjósa að tapa Afganistan. Nær væri að segja sigur talibana sögulega nauðsyn að gefinni atburðarás sem hófst með viðbrögðum vesturlanda eftir árásina á tvíburaturnana í New York 11. september 2001.

Vesturlönd, með Bandaríkin og Nató í fararbroddi, hugðust breyta lykilríkjum, Afganistan og Írak, í vestrænar vasaútgáfur. Hugmyndafræðin var úr bókinni Endalok sögunnar eftir Francis Fukuyama. 

En alveg eins og ráðandi vesturlönd, Bandaríkin, Bretland og Frakkland, misreiknuðu Þjóðverja eftir fyrra stríð urðu Bandaríkin og Nató fyrir vonbrigðum með viðbrögð múslímaríkja við kostaboði um vestræna menningu. Hitler sótti viðnámsþrótt til arísku hugmyndarinnar um hreinan kynstofn germana. Talibanar leita í texta miðaldaspámannsins eftir valkosti við borgaralega menningu vestræna.

Nasismi bauð og talibanar bjóða valkost við vestræna menningu. Og fá nokkurt fylgi á meðan afleiðingarnar af tilboðunum eru ekki komnar fram.

Neðanmálsgrein við þessa sögu er að Hitler og talibanar eru á einu máli um uppsprettu illskunnar. Gyðingar eru enda vagga vestrænnar menningar.

Talandi um guðs útvalda þjóð. Jerúsalem Post greinir frá kapphlaupi þjóðríkja að koma sér fyrir í Afganistan: Tyrkland, Íran, Rússland og Kína. Ekki beinlínis bestu vinir vesturlanda.

Alþjóðahyggja, sú vestræna hugmynd að borgaralegt lýðræði sé útflutningsvara, fær útreið í Afganistan. Rétt eins og hún fékk útreið í Úkraínu, Írak, Líbýu og Sýrlandi. 

Spámaðurinn sem fyrstur kom auga á þolmörk vestrænnar útþenslu á 21. öld heitir Donald Trump. Ekki er hann fyllibytta eins og Churchill, en óhætt að segja hann sérvitring. Það er títt um spámenn.

Ráðandi pólitísk öfl á vesturlöndum fengu flog þegar Trump hlaut forsetakjör 2016. Frjálslyndir og vinstrimenn linntu ekki látunum fyrr en Slappi-Jói Biden komst í kjallara Hvíta hússins. Slöpp hugmyndafræði fær liðleskjur fyrir leiðtoga.

 

Yfirvöld í Kabúl gefast upp

Hver er kjörhiti jarðarinnar?

Júlí­mánuður var hlýj­asti mánuður jarðar síðan mæl­ing­ar hóf­ust fyr­ir 142 árum eða 0,93 gráðum hærri en meðaltal 20. ald­ar sem var 15,8 gráður, segir í viðtengdri frétt.

Gott og vel. Er kjörhiti jarðarinnar þá 15,8 gráður? Eða er kjörhitinn eitthvað hærri líkt og hann var á rómverska hlýskeiðinu?? Eða lægri eins og á litlu ísöld 1300 til 1900?

Hæsta hitastig sem mælt hefur verið á jörðinni er 58 gráður en það lægsta mínus 88 gráður. Þarna á milli eru heilar 144 gráður. Fyrri mælingin var gerð í Líbýu en sú seinni á suðurskautinu. Engum dettur í hug að kjörhiti jarðar sé meðaltal hitastigs í eyðimörk og suðurpólsins.

Það er merkingarlaust að tala um meðalhita jarðarinnar þegar kjörhiti jarðar er óþekkt stærð. 

Hlýjasti júlímánuður í 142 ár

Hlýindi þegar ísöld nálgast

Hitamet í Evrópu og heitasti júlímánuður á jörðinni frá upphafi mælinga, segir í fréttum.

Aðrar fréttir herma að ísöld nálgist. Á suðurhveli er kaldara sem aldrei fyrr.

Fólk getur valið, að stikna eða frjósa, og sótt þau rök sem falla best að sannfæringunni.

Hversdagslegt fyrirbæri eins og veðrið er orðið að hornsteini trúarsannfæringar. Sorglega fyndið.

Evrópska hitametið slegið á Sikiley

Trójuhesturinn, 4 rit um upphaf og hrun siðmenningar

Takið vara á gjöfum Grikkja, er viðkvæði ættað frá stríðinu um Trójuborg sem Hómer gerði ódauðlegt í Ilíonskviðu. Tréhesturinn, sem var gjöfin viðsjárverða, kemur ekki við sögu í kviðunni um þá kappa Hektor og Akkilis, heldur í framhaldssögunni, Ódysseifskviðu.

Á eftir Biblíunni er Ilíonskviða mesta bókmenntaverk sögunnar. Egilssaga og Sturlunga eru í öruggu þriðja og fjórða sæti.

Ilíonskviða er stundum talið hreint bókmenntaverk, sem ekki var fest á blað fyrr en um 700 árum eftir meint Trójustríð. En þó virðist vaxandi tilhneiging að auka sannfræði kviðunnar, mínus auðvitað yfirgengilegum manndrápum Akkilisar sem fara í flokk með Agli er hóf drápin á barnaskólaaldri og linnti ekki fyrr en hann varð karlægur. Meintur fundur tréhestsins eykur áreiðanlega trú manna á kviðu Hómers.

Þrjú af þessum fjórum ritum, þ.e. Ilíonskviða, Egilssaga og Sturlunga segja frá endalokum siðmenningar. Meint Trójustríð er háð þegar siðmenning við austanvert Miðjarðarhaf hrynur, um 1200 fyrir Krist. Egilssaga er niðurlag víkingaaldar og Sturlunga er endaspretturinn á þjóðveldismenningunni. Söguefnin eru stór í harmleikjum.

Biblían á hinn bóginn er upphaf kristinnar siðmenningar. Í vestrænum menningarheimi er trúverðugleiki bókarinnar helgu á pari við Sturlungu sem er samtímaverk. Aðalhöfundur hennar, Sturla Þórðarson, tók þátt í stóratburðum eins og Örlygsstaðabardaga. Dóttir hans Ingibjörg rétt slapp úr Flugumýrarbrennu.

Harmsaga kristinnar menningar er sem sagt ekki enn skrifuð. Góðu heilli fyrir okkur.

 

Telja sig hafa fundið Trójuhestinn