Benedikt er ekki heilvita

Þjófar þrá innst inni að vera gripnir því rangindin sem þeir fremja naga samvisku þeirra; lygarar bera dulda von um að vera afhjúpaðir því innra með sér vita þeir muninn á réttu og röngu. Aðildarsinnar leitast við að auglýsa heimsku sína vegna þess að undirmeðvitundin veit muninn á glópsku og og heilbrigðri skynsemi.

Benedikt Jóhannesson er helsti talsmaður aðildarsinna á Íslandi og stóð fyrir auglýsingaherferð í aðdraganda nýafstaðinna kosninga þar sem krafist var að Ísland sækti um aðild að Evrópusambandinu. Í dag skrifar Benedikt grein í Morgunblaðið og þar stendur eftirfarandi:

Enginn heilvita maður vill afhenda öðrum þjóðum íslenskar auðlindir. Það yrði í fyrsta sinn sem Evrópusambandið sölsaði undir sig auðlindir annarra ríkja og afar illa þyrfti að halda á málum til þess að svo færi í samningum Íslendinga.

Þannig vill til að Evrópusambandið er þegar búið að ákveða að fiskveiðiauðlindir Íslendinga, ásamt fiskveiðiauðlindum annara sambandsþjóða, falli undir Brusselvaldið. Í Lissabon-sáttmálanum sem verður stjórnarskrá Evrópusambandsins í vetur segir eftirfarandi um málefni sem eingöngu verða á forræði Evrópusambandsins:

1. The Union shall have exclusive competence in the following areas:
(a) customs union;
(b) the establishing of the competition rules necessary for the functioning of the internal
market;
(c) monetary policy for the Member States whose currency is the euro;
(d) the conservation of marine biological resources under the common fisheries policy;
(e) common commercial policy.
2. The Union shall also have exclusive competence for the conclusion of an international agreement when its conclusion is provided for in a legislative act of the Union or is necessary to enable the Union to exercise its internal competence, or insofar as its conclusion may affect common rules or alter their scope.

Lissabon-sáttmálinn er meitlaður í stein. Írar höfnuðu sáttmálanum fyrir ári en munu greiða atkvæði um nákvæmlega sama sáttmála í október. Ástæðan? Jú, ef stafkrók verður breytt í sáttmálanum verða öll aðildarríkin 27 að samþykkja sáttmálann upp á nýtt. Það ferli er hörmungum stráð og Sambandið vill ekki fyrir nokkurn mun hætta á endurtekningu þess.  Það eru meiri líkur á að Íslendingar verði heimsmeistarar í fótbolta en að Brussel breyti Lissabon-sáttmálanum fyrir okkur.

Samkvæmt eigin mælikvarða er Benedikt Jóhannesson ekki heilvita, þar sem hann rekur áróður fyrir því að afhenda útlendingum auðlindir þjóðarinnar.

 

Steindauð ríkisstjórn

Icesave-klúðrið er falið á meðan ríkisstjórnin fær Vg til að myrða stefnu og fylgi flokksins í þágu blekkingar um að aðildarviðræður og  umsókn um aðild að Evrópusambandinu séu sitthvað. Þegar atkvæðagreiðslan um umsóknina er um garð gengin verður Icesave-samningurinn aftur á dagskrá.

Icesave-málið stóð illa fyrir ríkisstjórnina áður en það fór í hlé og það hefur versnað síðan. Upplýsingar um að fulltrúar Alþjóðagjaldeyrissjóðsins hafi hneykslast á framferði Breta og Hollendinga og aumingjaskap íslensku samninganefndarinnar, grein Ragnars Hall um vankunnáttu íslensku samninganefndarinnar og lögfræðileg rök Stefán Más Stefánssonar hníga öll í sömu átt; við eigum ekki að samþykkja Icesave-samninginn.

Þegar Júdas J. Sigfússon gengur á ný til þeirra verka að troða handónýtum Icesave-samningi ofan í þjóðina er hann blóðugur upp fyrir axlir vegna svika í ESB-málinu. Þótt Þistilfjarðardrengurinn sé fylginn sér eru væntanlega takmörk fyrir því hvað þingmenn Vg eru tilbúnir að brenna margar brýr að baki sér. Formaðurinn verður brátt saddur pólitískra lífdaga en í þingflokknum er fólk sem vill að sín verði minnst fyrir annað en að vera svikahyski.

Orðræðunnar vegna skulum við segja að ESB-umsóknin og Icesave-samningurinn nái hvorttveggja fram á þingi. Hvernig ætlar ríkisstjórn sem með blekkingum nær þeim áfanga að hefja formlegt framsal fullveldis og forræðis eigin mála til útlanda og leggur jafnframt drápsklyfjar á þjóðina vegna misheppnaðrar útrásar; hvernig ætlar þessi sama ríkisstjórn að fá starfsfrið, fá almenning með sér í endurreisnina? Það sem gefið hefur þessari ríkisstjórn lögmæti er flekkleysi Vinstri grænna. Frómlyndi vék fyrir tækifæriskenndu svikaeðli.

Dagar ríkisstjórnar Jóhönnu Sigurðardóttur eru taldir.

Endurreisn Sjálfstæðisflokksins

Móðurflokkur íslenskra stjórnmála er að ná vopnum sínum ef marka má fregnir um að þingmenn flokksins ætli allir að greiða atkvæði gegn þingsályktunartillögu um að Ísland sæki um aðild að Evrópusambandinu.

Gegnheill meirihluti Íslendinga er á móti inngöngu landsins í Evrópusambandið. Aðildarsinnum tókst með blekkingum um að aðildarviðræður væru eitt en umsókn annað að fá nokkrar skoðanakannanir til að staðfesta vilja meirihluta almennings til aðildarviðræðna. Á þeim grunni var rekinn áróður sem nær líklega hámarki þegar einhverjir siðferðiskrypplingar úr röðum þingmanna Vg munu greiða atkvæði með þingsályktuninni.

Andspænis svikaflokknum Vg og grillupólitík Samfylkingarinnar á Sjálfstæðisflokkurinn það tækifæri að standa heill og óskiptur í stærsta máli seinni tíma stjórnmálasögu landsins, afstöðunni til inngöngu í Evrópusambandið. Á síðasta landsfundi var afgerandi samþykkt um að áður en Ísland sækti um aðild yrði þjóðaratkvæðagreiðsla.

Sjálfstæðisflokkurinn hefur tækifæri til að endurvinna traust almennings með því að hafa eina skoðun meginmáli íslenskra stjórnmála og standa við hana. Þegar falsrökin fyrir aðild verða afhjúpuð verður eftirspurn eftir heilindum í stjórnmálum.

Sjálfstæðisflokkurinn á kost á að gera sig að réttnefndum sjálfstæðisflokki sem stendur með fullveldinu og forræði Íslendinga í eigin málum. 

Lygamaskínan afhjúpuð

Aðildarsinnum tókst að draga upp þá falsmynd af umsókn um aðild að Evrópusambandinu að Íslendingar færu í könnunarviðræður við ESB. Þegar þegar þeim viðræðum lyki vissum við hvað væri í pakkanum og gætum tekið afstöðu til þess. Samfylkingin, Morgunblaðið undir núverandi ritstjóra, Samtök iðnaðarins og fleiri hafa klifað á þessari blekkingu m.a. með því að efna til skoðanakannan til að mæla vilja fólks til aðildarviðræðna. Svona hljómar spurningin sem Samtök iðnaðarins leggja reglulega fyrir almenning:

Ertu hlynnt(ur) eða andvíg(ur) því að taka upp aðildarviðræður við Evrópusambandið? 

Þeir sem svara þessari spurningu mega halda að það séu nokkurs konar könnunarviðræður sem farið er í og maður getur ekki verið á móti viðræðum er það? Það er blekking í besta falli, ef ekki bein lygi.

Í reynd er ferlið gagnvart Evrópusambandinu þannig að stjórnvald viðkomandi ríkis sækir um aðild. Ráðherraráð, þ.e. stjórnvaldsfulltrúar aðildarríkjanna taka umsóknina fyrir og fái hún samþykki á þeim vettvangi er umsókninni vísað til framkvæmdastjórnar Evrópusambandsins. Viðræður umsóknarríkis við framkvæmdastjórnina snúast um hvernig umsóknarríkið ætlar að taka upp lög og reglur Evrópusambandsins. 

Birgitta Jónsdóttir þingmaður Borgarahreyfingarinnar sá í gegnum blekkinguna þegar hún hafði setið þó nokkra fundi í utanríkismálanefnd.

Dómgreindin skilin eftir heima

Stjórnvald fullvalda ríkis sem sækir um inngöngu í Evrópusambandið þarf að vera einbeitt i vilja sínum til inngöngu og hafa stuðning meirihluta þjóðarinn á bakvið sig. Framsal fullveldis er öllum þjóðum viðkvæmt, og oftast í öfugu hlutfalli við stærð þeirra - smáþjóðir eru viðkvæmari fyrir afsali vegna þess að fullveldi er þeim að jafnaði torfengnara en stórþjóðum.

Íslenska stjórnvaldið sem nú situr er klofið í afstöðu sinni og hefur ekki stuðning þjóðarinnar á bakvið sig. Ríkisstjórn Jóhönnu Sigurðardóttur ætlar að rusla saman stuðningi á þingi við aðildarumsókn og efna til sundrungar með þjóðinni í þjónkun við þá meinloku að Ísland eigi erindi í klúbb þjóða þar sem við framseljum fullveldi okkar og fáum innan við eitt prósent áhrif.

Til að láta sér detta í hug að óbrjáluð þjóð muni nokkru sinni samþykkja slíka vitleysu þarf maður að vera í löngu fríi frá dómgreindinni.

Pólitískt stríðsástand

Formaður Vinstri grænna handsalaði í byrjun maí ríkisstjórnarsamning við Samfylkinguna og sveik í leiðinni kjósendur sína. Þann tíunda maí samþykkti flokksráð Vg samninginn og þar með svikin. Á heimasíðu Vg er snautleg frétt um Júdasarsamninginn.

Flokksráð VG mælir með því að mynduð verði ríkisstjórn Vinstrihreyfingarinnar - græns framboðs og Samfylkingarinnar á grundvelli þeirrar samstarfsyfirlýsingar sem fyrir liggur.

Fyrir utan þennan flokksráðsfund var engin umræða um það hvað réttlætti bein svik við yfirlýsta stefnu Vg um að hagsmunum Íslands væri betur borgið utan Evrópusambandsins. Kjósendur Vg fengu ekkert að vita hvaða rök stóðu til þess að flokkurinn sem hafði auglýst sig sem stefnuföst stjórnmálasamtök og orðheldin laut í gras fyrir mesta óheilindafélagsskap síðari ára, Samfylkingunni.

Svik ala á tortryggni og því meiri sem svikin eru stærri. Aðild Vg að umsókn um að Ísland gangi í Evrópusambandið eru meiri og verri svik en dæmi eru um í seinni tíma stjórnmálasögu.

Gangi svo fram sem stefnir í að formaður og þingmenn Vg verði þeir siðferðiskrypplingar að samþykkja fyrirliggjandi tillögu um aðildarviðræður við Evrópusambandið eru þeir um leið að lýsa yfir pólitísku stríðsástandi sem mun vara lengur og hafa víðtækari afleiðingar en efnahagskreppan. 

Moskvustúdentinn verður Brusseldindill

Liðþjálfi Júdasar J. Steingrímssonar í utanríkismálanefnd er Árni Þór Sigurðsson og hæfir þar skel kjafti. Árni Þór skrifar meirihlutaálitið sem á að leiða okkur í faðm Brussevaldsins.  Árni stundaði nám við Moskvuháskóla áður en járntjaldið féll og er að upplagi þýlyndur tækifærissinni sem gekk í Samfylkinguna þegar Alþýðubandalagið lagðist af því hann hafði ekki trú á Vinstri grænum. Eftir að Vinstri grænir festu sig í sessi gekk Árni Þór til liðs við flokkinn.

Árni Þór hefur komið á fundi Heimssýnar og þóst fylgjandi fullveldi. Þegar á herðir er ekki meiri mannsbragur á Árna Þór en svo að hann lætur sig hafa að svíkja kjósendur sína. Þegar það kemur á daginn að Júdas J. Steingrímsson verður með fámenna sveit á eyðimerkurgöngu sinni mun Árni Þór leita fyrir sér að nýrri vist brosandi og smeðjulegur. 

Tvöföld þjóðaratkvæðagreiðsla óþörf

Júdas J. Sigfússon

Steingrímur J. Sigfússon sagði á Alþingi í dag að ESB málið væri bæði stórt og erfitt og hefði reynst flokki sínum erfitt. VG hafi mótað þá flokkslegu stefnu að ekki þjónaði hagsmunum landsins að ganga inn í ESB. Hins vegar hafi hlutirnir þróast og að innan raða hans væru nú fleiri sem vildu láta á reyna hvað væri í boði.

Ofanritað er endursögn af orðum formanns Vinstri grænna á Alþingi Íslendinga í dag. Ætli formaðurinn verði nógu gamall til að trúa okkur fyrir því hvernig hann komst að þessari niðurstöðu?

Erfitt mál fyrir VG

Steingrímur J: Í lagi að svíkja kjósendur

Steingrímur J. Sigfússon formaður Vinstri grænna skammar þingmann sinn fyrir að ætla að efna það sem flokkurinn lofaði fyrir kosningar; að halda Íslandi utan Evrópusambandinu. Steingrímur hefur orðið uppvís að lygum á þjóðþinginu í Icesave-málinu og gengur einarðlega fram í að svíkja kjósendur sína og flokksins.

Aldrei í lýðveldissögunni hefur valdaþorsti eins manns valdið eins miklu tjóni á siðferði í stjórnmálum og hagsmunum þjóðarinnar. Steingrímur J. stefnir hraðbyri í að verða mesta úrhrak íslenskra stjórnmála.

Sló ekki á fingurna á Ásmundi

Samfylkingin fyrirlítur lýðræðið

Samfylkingin vill ekki þjóðaratkvæðagreiðslu um það hvort Ísland eigi að sækja um Evrópusambandsaðild. Það er endurrómur af alræmdum orðum fyrrverandi formanns Samfylkingarinnar - þið eruð ekki þjóðin - frammi fyrir troðfullum sal af fólki sem mótmælti hrunstjórninni.

Ef það væri heil brú í einhverjum þingmanna Samfylkingarinnar myndi viðkomandi doka við og spyrja sig eftirfarandi: Er líklegt að ESB-málið fái eðlilegan framgang þegar málið er löðrandi í undirferlum, svikum og fyrirlitningu á lýðræðislegum stjórnarháttum?

Enginn barinn til ásta á ESB