Samtökin 78 gegn tilfallandi: dómur í dag

Héraðsdómur Reykjavíkur úrskurðar í dag hvort tilfallandi bloggari hafi brotið gegn grein 233 a. í hegningarlögum með gagnrýni á starfsemi Samtakanna 78 í leik- og grunnskólum. Samtökin kærðu til lögreglu bloggfærslu. Í framhaldi ákærði lögreglustjórinn í Reykjavík tilfallandi bloggara.

Ákært er fyrir tvær efnisgreinar í bloggfærslu, nánar tiltekið:

1. Samtökin 78 eru regnhlífarsamtök og lífsskoðunarfélag fullorðinna sem áhugasamir eru um klám, kynlíf, kynjaveröld og tælingu barna.

2. Kennsluefnið er tæling dulbúin sem upplýsingar. Meðfædd blygðunarsemi barna er skipulega brotin niður. Börn eru gerð móttækileg fyrir þátttöku í kynlífi og það jafnvel ofbeldiskynlífi - BDSM. Börn eru gerð efins um eigin sjálfsmynd og talin trú um að þau séu mögulega fædd í röngu kyni. Ringluð börn og óörugg eru síður í stakk búin að veita viðnám fullorðnum með eitthvað misjafnt í huga. Út á það gengur tælingin.

Í ákæru telst ofangeindur texti brjóta gegn grein 233 a. hegningarlaga:

Hver sem opinberlega hæðist að, rógber, smánar eða ógnar manni eða hópi manna með ummælum eða annars konar tjáningu, svo sem með myndum eða táknum, vegna þjóðernisuppruna eða þjóðlegs uppruna, litarháttar, kynþáttar, trúarbragða, fötlunar,  kyneinkenna, kynhneigðar eða kynvitundar, eða breiðir slíkt út, skal sæta sektum eða fangelsi allt að 2 árum. (feitletr. pv)

 

Lagaleg álitamál sem úr verður skorið í úrskurði héraðsdóms eru hvort Samtökin 78 njóti verndar laganna, sem tala um ,,mann eða hóp manna" - en ekki félagasamtök. Annað álitamál er hvort ummælin sem ákært er fyrir séu rógur/smánun/hæðni um ,,kyneinkenni, kynhneigð eða kynvitund."

BDSM-kynlíf er blæti, ekki kynhneigð, kyneinkenni eða vitund um kyn. Þegar BDSM sleppir standa eftir ummæli sem gagnrýna atlögu Samtakanna 78 að sjálfsvitund barna. Boðskapur samtakanna er að sum börn, ótilgreind, fæðist í röngum líkama. Tilfallandi stendur á því fastar en fótunum að ekkert barn fæðist í röngum líkama. Það er ómöguleiki. Ummælin um tælingu barna er ályktun af ranghugmyndinni að sumir fæðist í röngum líkama.

Héraðsdóms er að úrskurða hvort ummælin séu svo úr takti við lýðræðislega umræðu að ástæða sé að beita grein 233 a. Rökstuðningurinn verður upplýsandi um stöðu tjáningarfrelsisins hér á landi, hvort sem tilfallandi verður dæmdur eða sýknaður.

Annað mál, sem héraðsdómur mun ekki taka afstöðu til, er hversu eðlilegt sé að lögregla og ákæruvald skipti sér af frjálsum skoðanaskiptum á Íslandi. Það stendur upp á alþingi að breyta hegningarlagagreininni 233 a. Lög sem tálma, að ekki sé sagt banna, gagnrýni á sérvisku eru ólög.

 

Namibíubrandari héraðssaksóknara

Í gærmorgun sendi embætti héraðssaksóknara frétt á RÚV. Ríkisfjölmiðillinn sat einn að fréttinni, fékk frumbirtingu. Og hver er fréttin? Jú, búið er að flytja Namibíumálið á milli deilda hjá embætti héraðssaksóknara, frá rannsóknarsviði yfir á ákærusvið.

Hver rannsakaði og hver ákærir, sé málið ákæruhæft? Jú, einn og sami maðurinn, Ólafur Þór Hauksson héraðssaksóknari. Ekkert í fréttinni bendir til að ákærur séu líklegar. Samt vélar sami maðurinn um rannsókn og ákæru og ætti að geta í það minnsta gefið til kynna hvers sé að vænta. Fréttin er að öðru leyti ekki um neitt. 

Brandarafréttina klæðir RÚV í hátíðarfatnað:

Ólafur Þór Hauksson héraðssaksóknari tekur fram í samtali við fréttastofu að málið hafi verið umfangsmikið og náð yfir langt tímabil. Það sé áfangi, ákveðin kaflaskil, að klára þetta stóra mál. Nú sé það saksóknara að ákveða hvort ákært verði en ekki sé hægt að segja til um hvenær sú ákvörðun verði tekin. (feitletrun pv)

Ólafur Þór talar um sjálfan sig í þriðju persónu, segir saksóknara þurfa ákveða hvort skuli ákært. Saksóknarinn er hann sjálfur. Kaflaskil eru engin þótt Ólafur Þór yfirmaður rannsóknarinnar færi Ólafi Þór saksóknara pappíra.

Hvers vegna þessi brandarafrétt á RÚV, sem aðrir fjölmiðlar lepja gagnrýnislaust upp, t.d. Vísir? Er fréttin framlag héraðssaksóknara til veiðigjaldamálsins á alþingi? Er héraðssaksóknari að kaupa sér tíma, vill ekki fella málið niður á meðan þing stendur enn? Embættið fékk jú 200 milljón króna aukafjárveitingu til að sanna brot á Samherja. Helga Vala þáverandi þingmaður Samfylkingar beitti sér að setja fé til höfuðs útgerðinni, eins og tilfallandi bloggaði um:

Það sem gerist, í stuttu máli, er að fyrir þrýsting frá ósvífnasta hópi blaðamanna sem starfað hefur á Íslandi og með 200 milljón króna hvatningu frá þingmönnum Samfylkingar og Pírata, fór embætti héraðssaksóknara í leiðangur sem aldrei, aldrei átti að fara. Þessar 200 milljónir snúa að ,,að þeim tíðindum sem bárust á síðustu klukkutímum er varða framkomu Samherja í Namibíu," eins og Helga Vala Helgadóttir þingmaður Samfylkingar segir í þingræðu 13. nóvember 2019 [og er] mútufé fjárveitingavalds til ákæruvalds.

Tilfalllandi fylgdist með Namibíumálinu frá upphafi. Það sem á yfirborðinu sýndist rannsóknablaðamennska reyndist fyllibytta á launum fjölmiðla að ljúga upp á fyrrum vinnuveitanda. Blogg fyrir tveim árum setur málið í samhengi:

Hvers vegna birti RÚV, í félagi með Kjarnanum og Stundinni (nú Heimildinni) staðlausa stafi Jóhannesar uppljóstrara? Jú, RÚV og fylgimiðlar stunda ekki blaðamennsku heldur málafylgju. RÚV ætlaði að ,,taka niður" Samherja og nota til þess ásakanir Jóhannesar.

Namibíumálið er önnur atlaga RÚV að Samherja. Sú fyrri, Seðlabankamálið, hófst 2012. Þá var eina heimildin fölsuð gögn sem Helgi Seljan veifaði framan í myndavélar RÚV um leið og hann ásakaði Samherja um stórfelld brot á þágildandi gjaldeyrislögum. Ítarleg rannsókn og dómsmál leiddu í ljós sakleysi Samherja og óvönduð vinnubrögð RÚV. 

RÚV og fylgimiðlar eru í pólitísku bandalagi með vinstriflokkunum í herförinni gegn Samherja, bæði í Seðlabankamálinu og Namibíumálinu.

Brandarafrétt RÚV í gær um flutning Namibíumálsins milli deilda embættis héraðssaksóknara er tilraun að halda lífi í umræðu sem er löngu dauð. Embætti héraðssaksóknara mun skýla sér á bakvið rannsóknavinnuna sem þurfti að leggja í sakamálið, til dæmis safaríferð starfsmanna embættisins til Namibíu. Það þarf tíma og fyrirhöfn að eyða 200 milljón króna aukafjárveitingu.

Eftir er uppgjörið við RSK-miðla og vinstriþingmenn sem notuðu óvandaða og siðlausa blaðamennsku til að siga ákæruvaldi á saklausa. RÚV er miðlægur kóngulóarvefur spillingar fjölmiðlavalds og vinstrimanna á alþingi og utan. Namibíumálið er frá 2019. Tveim árum síðar hefst byrlunar- og símamálið þar sem sömu blaðamenn og fjölmiðlar stuðla að alvarlegum glæpum, setja mann í lífshættu og stela einkagögnum.  

„Sú vinna hefst í framhaldinu“

Vinstrimenn sameinast gegn Samfylkingu

Sósíalistaflokkurinn með 4 prósent fylgi í síðustu þingkosningum, Píratar 3% fylgi og Vinstri grænir 2,3% fylgi vilja sameinast, segir Gunnar Smári burtrekinn formaður Sósíalistaflokksins. Vísir veitir sameiningu brautargengi með frétt í sama stíl.

Vinstrimenn stunda á víxl klofning og sameiningu í bráðum hundrað ár. Fyrsti klofningur þeirra varð 1930 þegar kommúnistar klufu sig úr Alþýðuflokknum. Óðara eftir klofninginn 1930 tóku menn til við að ræða sameiningu og hafa æ síðan klofið og sameinast eftir því hvernig vindar blása.

Sögulega hefðin er að ákafast er rætt um að vinstrimenn gangi í eina pólitíska sæng þegar allir flokkar þeirra standa tæpt. En nú ber svo við að arftaki Alþýðuflokksins, Samfylkingin, siglir með himinskautum í könnunum með 30 prósent stuðning og fékk mest fylgi allra flokka í síðustu þingkosningum, tæp 20 prósent.

Nærtækast er fyrir vinstrimenn af sauðahúsi sósíalista, pírata og vinstri grænna að ganga fylktu liði í Samfylkinguna og berjast fyrir hugmyndum sínum á vettvangi flokks með vægi í samfélaginu. Hverjar eru líkurnar á að það gerist? Engar.

Hvers vegna?

Jú, í vinstripólitík, frá því hún mótaðist í Evrópu á 19du öld, takast á tveir menningarheimar, hófsamur annars vegar og hins vegar róttækur. Hófsamir vinstrimenn samþykkja meginreglur borgaralegs þjóðfélags en vilja breyta og bæta í þágu láglaunamanna. Róttækir vilja ganga á milli bols og höfuðs á ráðsettu samfélagi og skapa mennska paradís - sem alltaf endar með helvíti á jörð.

Hófsamir og róttækir vinstrimenn eru sem eldur og vatn.

Við síðustu kosningar þurrkuðust róttækir vinstrimenn út af alþingi. Vinstri grænir misstu sitt þinglið, Píratar einnig og Sósíalistar fengu engan fulltrúa kjörinn. Sameining vinstrimanna nú, eða öllu heldur umræðan um sameiningu, miðar að búa til valkost við Samfylkinguna, sem verður höfuðandstæðingur.

Vöxtur og viðgangur Samfylkingar í síðustu kosningum og nýlegum skoðanakönnunum er eitur í beinum róttæklinga en þeir eru án flokka sem mark er tekið á. Það gæti vitanlega breyst.

Freistnivandi Samfylkingar er að standast 30 prósent fylgi í könnunum og  láta ekki undan löngun að innleysa það fylgi með þingkosningum fyrir lok kjörtímabils. Eftir þrjú ár gætu róttæklingarnir boðið valkost sem þeir hafa ekki núna. Sá ljóður fylgir ráði hófsamra vinstrimanna að þeir eru tækifærissinnar fram í fingurgómana.

 

 

 

 

Spáir nýju félagshyggjuafli: Fólk að ræða saman

Ríkisfé spillir flokkum og fjölmiðlum

Biðröðin inn á aðalfund Vorstjörnunnar, eignarhaldfélags Sósíalistaflokksins, stafar af áskrift flokksins að ríkisfé. Árlega fær Sósíalistaflokkurinn 22 milljónir króna þótt kjósendur hafi ekki séð ástæðu til að styðja frambjóðendur flokksins til þingmennsku. Píratar, með engan þingmann, fá árlega 17 milljónir króna af ríkisfé, skv. lista ráðuneytis.

Hatrömm innanflokksátök Sósíalistaflokksins snúast um árlegt framlag ríkisins upp á 22 milljónir króna næstu fjögur árin. Ríkisfé heldur flokknum gangandi þótt kjósendur segi nei, takk. Andstæðar fylkingar takast á um opinbert fé, ekki hug og hjörtu kjósenda.

Ekki aðeins í pólitík spillir gjafafé fyrir starfsemi sem í orðin kveðnu er haldið uppi í þágu almannaheilla en er í reynd kverúlantaiðja fárra. Ríkisfé heldur fjölmiðlum gangandi sem annars færu á hausinn. Mannlíf og Heimildin, tvær útgáfur á sömu kennitölu, fá ekki lesendur en eru áskrifendur að ríkisfé, tugum milljóna króna á ári hverju.

Lýðræði notað sem réttlæting fyrir fjáraustur í flokka sem kjósendur vilja ekki og fjölmiðla sem lesendur hafna. 

Lýðræði er léleg afsökun fyrir misnotkun á almannafé. Öllum er frjálst að stofna stjórnmálasamtök og sama gildir um að hrinda úr vör fjölmiðli. Þegar menn gera eitthvað fyrir eigin reikning er lögð í framtakið meiri alúð og einbeitni en þegar annarra manna fé er í húfi.

Það er enginn skortur á stjórnmálasamtökum í landinu og samfélagsmiðlar gera jaðarfjölmiðla óþarfa.  

Samtals fer árlega um einn milljarður króna til stjórnmálaflokka og fjölmiðla af almannafé. Er þá ótalin ríkishítin RÚV sem ein og sér fær sex milljarða króna. Bruðl með skattfé almennings í flokka og fjölmiðla skilar ekki betra samfélagi. Þvert á móti stuðlar ríkisfé að óöld og óreiðu - líkt og sést á Sósíalistaflokki Íslands.    

 

Slitu fundi þegar spurt var um fjárstyrki