Fjölmiðlar þjarma að BBC, ekki RÚV

Breska ríkisútvarpið BBC sagði ranglega í frétt að bankareikningi stjórnmálamannsins Nigel Farage hefði verið lokað af viðskiptalegum ástæðum, Farage væri í fjárhagskröggum. Ástæðan reyndist vera pólitísk. Bankinn lokaði reikningi Farage vegna stjórnmálaskoðana.

Breskir fjölmiðlar herja á BBC að gera grein fyrir óverjandi fréttaflutningi. BBC hefur birt leiðréttingu á rangri frétt. En það þykir ekki nóg. Fréttamaður BBC á að biðjast afsökunar og útskýra hvers vegna röng frétt var birt, skrifar Telegraph.

RÚV sætir ekki sama aðhaldi frá íslenskum fjölmiðlum og BBC frá breskum. Fréttamenn misnotuðu andlega veika konu Páls skipstjóra Steingrímssonar til að byrla og stela síma hans, sem varð uppistaða í raðfréttum RSK-miðla (RÚV, Stundarinnar og Kjarnans).

Þrír þjóðþekktir fréttamenn, Rakel Þorbergsdóttir fréttastjóri, Helgi Seljan fréttamaður og Þóra Arnórsdóttir ritstjóri Kveiks hafa hrökklast frá RÚV eftir að lögreglurannsókn hófst á byrlunar- og símastuldsmálinu um mitt ár 2021. Ekki herja íslenskir fjölmiðlar á RÚV og krefjast upplýsinga um aðild fréttamanna ríkisfjölmiðilsins að alvarlegum afbrotum.

Annað dæmi um silkihanska fjölmiðla þegar RÚV er annars vegar er Sigríður Dögg Auðunsdóttir fréttamaður RÚV og formaður Blaðamannafélags Íslands. 

Samkvæmt Fréttinni er Sigríður Dögg þekkti blaðamaðurinn sem viðurkenndi skattalagabrot upp á tugi milljóna króna fyrir tveim árum en fékk að fela brotið sjónum almennings.

Formaður Blaðamannafélags Íslands taldi ekki fram tekjur af íbúðum sem hann leigði ferðamönnum í skammtímaleiga í gegnum Airbnb. Sigríður Dögg endurgreiddi vangoldinn skatt með 25 prósent álagi í gegnum einkahlutafélag sitt. Fyrir tveim árum skilaði einkahlutafélagið sjö milljón króna hagnaði, samkvæmt Fyrirtækjaskrá. Árin þar á undan var engum ársreikningum skilað.

Formaður stéttafélags blaðamanna fékk sérmeðferð hjá skattayfirvöldum. Aðrir í sömu sporum fengu á sig opinbera málssókn frá saksóknara. Sigríði Dögg var leyft að gera upp vantaldar leigutekjur í gegnum einkahlutafélag, gagngert til að blettur félli ekki á starfsheiður formanns Blaðamannafélags Íslands og fréttastofu RÚV.

Fjölmiðlar, Fréttin undanskilin, sjá í gegnum fingur sér. Ef Sigríður Dögg væri fréttamaður BBC og formaður breskra blaðamannasamtaka kæmist hún ekki upp með að þegja málið af sér. Þögn Sigríðar Daggar og ríkisfjölmiðilsins er sjálfstæð frétt - en ósögð. 

Kaupir Svandís niðurstöðu um Brim?

Svandís ráðherra matvæla gerir samning við Samkeppniseftirlitið um rannsókn á útgerðinni Brim. Í verksamningi er kveðið á um að ráðuneyti Svandísar fylgist með framvindu rannsóknar og hafi heimild til að stöðva greiðslur til Samkeppniseftirlitsins ef ráðuneytið fær ekki þá niðurstöðu sem að er stefnt.

Ofanritað er endursögn á orðum Guðmundar Kristjánssonar forstjóra Brims, sbr. viðtengda frétt.

Allir og amma þeirra vita að Svandís Svavarsdóttir ráðherra Vinstri grænna stundar pólitík sem gefur sér að sjávarútvegurinn sé gerspilltur. Ef frásögn forstjóra Brims er rétt misbeitir Svandís ráðherravaldi í pólitískum tilgangi, kaupir rannsókn til að staðfesta pólitíska fordóma.

Forstjóri Samkeppniseftirlitsins þvertekur fyrir að hann stundi rannsóknir til að þjóna pólitískum markmiðum Svandísar ráðherra. Haft er eftir Páli Gunn­ari Páls­syni forstjóra Samkeppniseftirlitsins:

Rann­sókn­inni mun ljúka með skýrslu sem mun birt­ast op­in­ber­lega. Ráðherra mun fá hana á sama tíma og al­menn­ing­ur. Ráðherra hef­ur ekki, eins og Guðmund­ur virðist halda, mögu­leika á því að stöðva greiðslur ef hann er ekki sátt­ur við niður­stöður Sam­keppnis­eft­ir­lits­ins. Ráðherra mun ein­fald­lega ekki sjá niður­stöður fyrr en at­hug­un er lokið. Það er mik­il­vægt að hafa í huga að í 8. grein sam­keppn­islaga er Sam­keppnis­eft­ir­lit­inu ætlað að skrifa skýrsl­ur af þessu tagi. Það er eng­inn póli­tísk­ur vink­ill á því.

Páll Gunnar viðurkennir að samningur sé á milli Samkeppniseftirlitsins og ráðuneytis Svandísar. Einfaldast er að leggja samninginn fram opinberlega. Þá geta óvilhallir myndað sér skoðun á því hvort hér sé á ferðinni eðlileg athugun á mikilvægri atvinnugrein eða vinstri græn pólitík klædd í málefnalegan búning stjórnsýslu.

Svör Páls Gunnars sögð aumkunarverð

Skoðanakúgun, BBC og RÚV

Viðskiptaritstjóri breska ríkisútvarpsins, BBC, sat við hlið yfirmanns Coutts banka í kvöldverðaboði daginn áður en viðskiptaritstjórinn skrifaði fréttatíst um bankinn hefði lokað reikningum Nigel Farage. Forsætisráðherra Bretlands gagnrýnir samstarf viðskiptabanka og ríkisútvarpsins að knésetja mann með ,,rangar" skoðanir.

Í viðtengdri frétt er haft eftir Farage

þetta mál snýst ekki bara um mig. Þú gæt­ir verið næst­ur...ef ekki er brugðist við þá för­um við hægt og ró­lega inn í fé­lags­legt skipu­lag líkt og rík­ir í Kína, þar sem bara þeir sem hafa „rétt­ar“ skoðanir geta tekið full­an þátt í sam­fé­lag­inu.

Ríkisútvarp er nærtækur samstarfsaðili valdhafa sem telja sig hafa réttar skoðanir. RÚV er til dæmis í samstarfi við starfshóp vinstrimanna í stjórnarráðinu um ,,réttar skoðanir" á málefnum flóttafólks. 

RÚV á að vera fjölmiðill sem endurspeglar þjóðfélagslega umræðu hér á landi. En RÚV birtir ekki sjónarmið sem t.d. Heiðar Guðjóns­son, fjár­fest­ir og fyrr­ver­andi for­stjóri talar fyrir:

Rík­is­stjórn­in er hálf­gert rekald og það er al­ger­lega stefnu­laust. Þannig að stór mál sem skipta okk­ur máli, eins og ís­lensk tunga og menn­ing og hvernig þetta fjöl­menn­ing­ar­sam­fé­lag mun hafa áhrif á okk­ar sam­fé­lag og breyta því var­an­lega og hugs­an­lega óaft­ur­kræft. Hvaða skoðun höf­um við á því?

Margir hafa tekið í sama streng og Heiðar síðustu vikur og mánuði, að verið sé að skipta um þjóð í landinu og það sé fyrst og fremst höfundarverk vinstrimanna.

En RÚV þaggar umræðuna, lætur eins og hún sé ekki til. Skýringuna er að finna í fundargerð stjórnar RÚV. Þar segir útvarpsstjóri, Stefán Einríkisson:

Fulltrúar RÚV áttu fund með starfshópi stjórnvalda um málefni innflytjenda og flóttafólks, en nú er unnið að heildarstefnumótun stjórnvalda á því sviði.

Vinstrimenn í stjórnarráðinu þykjast hafa rétta skoðun á þeirri þróun að Íslendingar tapa jafnt og þétt tungumáli sínu og menningu. Samstarfsaðili vinstrimanna er auðvitað ríkisfjölmiðillinn, RÚV, sem skipulega kemur í veg fyrir að sjónarmið Heiðars Guðjónssonar og margra fleiri komist á framfæri. RÚV er framkvæmdavald pólitíska rétttrúnaðarins í opinberri umræðu. Fundargerðin staðfestir það svart á hvítu.

Valdaöfl réttra skoðana nota ríkisútvarp til að framfylgja skoðanakúgun. Gildir bæði í Bretlandi og á Íslandi. 

 

  

Uppsögn bankaviðskipta af pólitískum ástæðum

Biden semur við Pútín - íslensk aðild?

Biden Bandaríkjaforseti er tilbúinn að semja við Pútín forseta Rússlands. Ástæðan er tvíþætt. Í fyrsta lagi getur Úkraína ekki sigrað Rússland á vígvellinum, - og mun tapa ef stríðið dregst á langinn. Í öðru lagi vaxandi áhyggjur af Kína. Á meðan vestrið grefur sér holu í Garðaríki styrkist Kína jafnt og þétt.

Ofanritað er ekki tilfallandi greining. Höfundurinn er Edward Luttwak. Ferlisskrá hans í bandarískum utanríkis- og öryggismálum nær aftur til kalda stríðsins á sjöunda og áttunda áratug síðustu aldar. Luttwak var innmúraður kaldastríðshaukur en læs á hernaðarlegan og pólitískan veruleika.

Neðanmáls er þess að geta að í viðtalinu segir Luttwak (11:34) að þjóðaratkvæðagreiðslu um hvoru megin landmæranna Donbass-héruðin skuli liggja verði ekki stýrt af íslenskum, já íslenskum, stjórnarindreka í hlutastarfi. Luttwak segir þetta í framhjáhlaupi. Mögulega vísar Luttwak í sögusagnir um að íslenskur stjórnmálamaður sé í umræðunni um hlutverk í væntum friðarsamningum.

Hver gæti það verið? Katrín forsætis? Ólafur Ragnar?

Byrlun og niðurgangur Hallgríms Helgasonar

Hallgrímur Helgason rithöfundur sagðist á opinni síðu á Facebook vera tilbúinn að byrla Páli skipstjóra ,,aftur". Páli var byrlað að undirlagi RSK-miðla 3. maí fyrir tveim árum. Málið er í lögreglurannsókn.

Ummælin lét Hallgrímur falla fimmtudaginn síðast liðinn. Þau fóru á flug og kölluðu á skýringar rithöfundarins. Hann lét ekki ná i sig. Mannlíf og Fréttin sögðu fréttir en ekkert bólaði á viðbrögðum byrlunarskáldsins.

Eftir að hafa ráðfært sig við almannatengla ákvað Hallgrímur krók á móti bragði. Hann bjó til frétt um sjálfan sig.

Verkefnið sem rithöfundurinn setti sér var að rita sjálfsævisögulega frétt er ryddi öðrum óþægilegri af fréttasíðum fjölmiðla. Þekkt trix almannatengla. Um nóttina sat glottið við skriftir.

Á föstudag, þegar orð Hallgríms um að byrla Páli, frá kvöldinu áður, fengu útbreiðslu og vöktu athygli fjölmiðla, var rithöfundurinn tilbúinn með frásögn er vekti samúð og dræpi umræðu um innræti á dreif. Sjálfsafhjúpunin birtist á samfélagsmiðli: ég er með niðurgang.

Á fimmtudagskvöld er Hallgrímur norður í landi með bilaðan bíl og langar að byrla Páli skipstjóra. Daginn eftir glímir rithöfundurinn við pípandi niðurgang. Hann ók sem sagt norður með iðrakveisu.

Hvaða verkstæði var tilbúið að taka við bílnum eftir sex til sjö klukkustunda ökuferð Samfylkingarskálds með skitu?

Frelsi og áhætta í beinni útsendingu

Umræða, oft hatrömm, er um hvort yfirvöld á vettvangi gossins við Litla-Hrút hafi heimild til að takmarka aðgang almennings að jarðeldunum. Skerðing á einstaklingsfrelsi segja þeir sem vilja opinn aðgang. Varúð í almannaþágu er viðkvæði þeirra sem telja eðlilegt að takmarka aðgang.

Tvær frelsisreglur eru í húfi. Í fyrsta lagi að sérhver má taka þá áhættu í lífinu sem hann kýs svo fremi að aðrir verði ekki fyrir miska eða séu settir í hættu. Þannig getur maður stungið sér í sjóinn við Gróttu og ætlað sér að synda yfir Faxaflóa. Drukkni maður á leiðinni er það ves á eigin reikning, ekki annarra. Nema, vitanlega, björgunarsveita er leita líksins.

Í öðru lagi reglan um opinn aðgang að almenningi. Allir eiga frjálsa för í óbyggðum. Hugmyndafræðin í kringum örlítinn-grenjandi-minnihluta byggir á þessari frelsisreglu. Strengur í þjóðarsálinni titraði er yfirvöld hugðust gera óbyggðaferðir háðar leyfi.

Eldgosið á Reykjanesi er ekki í óbyggðum heldur í túnfæti höfuðborgarsvæðisins. Það er í beinni útsendingu fjölmiðla og vefmyndavéla. Svæðið er nánast almannarými. Hér er ekki um að ræða frelsi til að njóta náttúrunnar einn með sjálfum sér og sínum. 

Þeir sem vilja leggja sig í hættu við að komast sem næst eldgosinu vita, eða mega vita, að fari eitthvað úrskeiðis verða þeir ekki skildir eftir upp á náð og miskunn náttúrunnar. Ef fólk lenti í sjálfheldu yrði reynt að bjarga viðkomandi. Í siðuðu samfélagi er sá háttur hafður á, guði sé lof. Þeir sem bjarga fólki í sjálfheldu við eldstöðvar eru sjálfir í hættu. Það gefur auga leið.

Við eigum að sætta okkur við að í almannarými við virkar eldstöðvar setji yfirvöld skynsamar og málefnalegar reglur um aðgang. Eðli málsins samkvæmt geta reglurnar verið einar í dag en aðrar á morgun, fer eftir eldvirkninni.

Áhættufrelsi er best iðkað utan alfaraleiðar. 

Mengun færist í átt að gönguleiðinni

1917-augnablik, eða 1918

Rússland eða Úkraína, fer eftir hver talar, nálgast hratt 1917-augnablikið er viðkvæði álitsgjafa um Úkraínustríðið.

1917-augnablikið kemur þegar önnur hvor þjóðin, rússneska eða úkraínska, segir hingað og ekki lengra. Atburðarásin verði sambærileg októberbyltingunni fyrir 106 árum. Stríðsþreytt þjóð varpar af sér okinu, krefst nýrra stjórnarhátta er tryggja frið og brauð.

Af ýmsum ástæðum er harla ólíklegt að komi til byltingar í öðru hvoru ríki stríðsaðilja. Fyrir það fyrsta eru fáar vísbendingar um stríðsþreytu. Í öðru lagi er hvergi að sjá pólitíska andstöðu í hvoru ríki um sig, sem eitthvað kveður að. Í þriðja lagi lifa íbúar utan átakasvæða tiltölulega hversdagslegum lífi. Eldsneyti byltingar er af skornum skammti. 

Meiri líkur eru á 1918-augnabliki. Snemma hausts 1918 tilkynnti þýska herráðið Vilhjálmi keisara að stríðið í landamærahéruðum Frakklands og Belgíu væri tapað. Stuttu síðar óskuðu þýsk stjórnvöld eftir vopnahléi og fengu það klukkan 11 þann 11.11. 1918. Fyrri heimsstyrjöld lauk þar með.

Á nýafstöðum leiðtogafundi Nató-ríkja í Vilníus var Selenskí forseta Úkraínu tilkynnt, herma óstaðfestar fregnir, að verði víglína Rússa í Saparosjíja ekki brotin á bak aftur í nóvember næstkomandi muni vesturlönd ekki vera Úkraínumönnum jafn rausnarleg og hingað til.

Síðustu daga ber á staðhæfingum um þrátefli á vígvellinum. Kurteist orðalag um að úkraínska sóknin sem hófst 4. júlí sé í ógöngum. Á tímalínu stríðsaðgerða er nóvember handan við hornið.

Klukkan glymur Kænugarði fyrr en Kreml. 

 

Stafrænt kynferðisofbeldi og fjölmiðlar, íslenskir og breskir

Fréttamaður BBC, Huw Edwards, er ásakaður um að kaupa kynferðislegar ljósmyndir af ungum stúlkum. Breskir fjölmiðlar fjalla ítarlega um málið í raðfréttum daginn inn og daginn út.

Starfsfélagar Huw Edwards hjá BBC tóku jafnvel til við að upplýsa ásakanir um stafrænt kynferðisofbeldi fjölmiðlamannsins. Yfirstjórn ríkisfjölmiðilsins BBC fær á linnulausa gagnrýni fyrir að grípa ekki í taumana.

Breska lögreglan segir enga rannsókn standa yfir af sinni hálfu. Hér er aðeins um ásakanir að ræða.

Á Íslandi stendur yfir virk lögreglurannsókn á byrlun, gagnastuldi, stafrænu kynferðisofbeldi og brot á friðhelgi. Fimm blaðamenn á Heimildinni (áður Stundin og Kjarninn) og RÚV eru sakborningar.

Fréttirnar af lögbrotum íslensku blaðamannanna eru fáar og strjálar. Ekki er setið um Stefán Eiríksson útvarpsstjóra og hann spurður um afritun á stolnum síma á Efstaleiti. Liggur þó fyrir óbein játning; útvarpsstjóri lét starfsmanninn fara sem keypti Samsung-síma til að afrita tæki norðlensks skipstjóra.

Stórvinir RSK-miðla, Hallgrímur Helgason til dæmis, hafa lögbrot og siðleysi blaðamanna í flimtingum, segja að endurtaka mætti byrlun og ofbeldi, þjóni það réttum málstað.  

Raunar er það helst að frétta af fimm fræknum sakborningum RSK-miðla að þeir eru árlega drekkhlaðnir verðlaunum frá Blaðamannafélagi Íslands hvers formaður stundar útleigu á Airbnb er kallaði á skattrannsókn.

Netflix-serían Fimm fræknir sakborningar og Airbnb-drottningin gæti orðið áhugaverð. Drög að handriti liggja fyrir í haust. 

Eldgosið tvöfaldar CO2-losun hagkerfisins

Koltvísýringur, CO2, er náttúruleg lofttegund kennd við gróðurhúsaáhrif. Samkvæmt tískukenningu stjórnar magn koltvísýrings í andrúmslofti veðurfari á jörðinni. Til að auðvelda skattlagningu er útblástur hagkerfa, þ.e. mannleg losun á CO2, reiknuð.

Íslenska hagkerfið losar árlega 6500 kílótonn (eitt kíltonn er þúsund tonn) af koltvísýringi, CO2, í andrúmsloftið, samkvæmt Hagstofunni. Deilt á daga ársins gerir það rúm 17 kílótonn á dag.

Mælingar vísindamanna á losun eldgossins við Litla-Hrút gefa til kynna að eldgosið losi allt að 15 kílótonn daglega af koltvísýringi, CO2.

Litla eldgosið á Reykjanesskaga stendur daglega fyrir nálega jafn mikinn útblástur koltvísýrings og allt íslenska hagkerfið.

Munurinn er einkum sá að auðvelt er að skattleggja hagkerfið. Innheimtan er aftur erfiðari neðra. Ástæðan er kannski að stjórnmálamennirnir eru flestir ættaðir þaðan. 

Vísindamenn unnu langt fram á nótt

Biden býður Rússum Austur-Úkraínu

Biden forseti Bandaríkjanna segir Úkraínu fá aðild að Nató eftir friðarsamninga við Rússa. Hér talar Biden eins og blaðafulltrúi Pútín forseta Rússlands.

Rússar hófu stríðsaðgerðir gegn Úkraínu þegar landið var á hraðferð inn í Nató. Úkraínski herinn var og er fjármagnaður og þjálfaður af Nató. Aðeins formsatriði að sippa landinu inn í vestræna hernaðarbandalagið.

Eftir að Rússar hófu hernaðaraðgerðir fyrir hálfu öðru ári var ekki hægt að kippa Úkraínu inn í Nató án þess samtímis að lýsa stríði á hendur Rússlandi.

Krafa Rússa er að Úkraína verði hlutlaust ríki á milli Rússlands og Nató-ríkja. Næst skásti kostur Rússa er að leggja undir sig suður- og austurhluta Úkraínu. Afgangurinn af Úkraínu gæti orðið Nató-ríki, Rússar væru komnir með varnarbelti. Vestur-Úkraína væri lítið ríki, fátækt af náttúruauðlindum. Til lengri tíma litið væru Rússar með álíka áhyggjur af Vestur-Úkraínu og Finnlandi.

Friðarsamningar munu taka mið af stöðunni á vígvellinum í Garðaríki. Sumarsókn Úkraínu er runnin út í sandinn. Rússar eiga næsta leik.

Afstaða Biden er nánast tilboð til Rússa að yfirtaka þá hluta Úkraínu sem þeir telja sig þurfa en leyfa Vestur-Úkraínu að ganga í Nató. Pútín tekur tilboðinu enda er það rausnarlegt.

Engin NATO-aðild meðan stríð geisar