Írskir knattspyrnuþrælar

Landslið Írlands kraup á kné fyrir knattspyrnuleik í Ungverjalandi í samstöðu með bandarískum stjórnmálasamtökum sem kallast Svört líf skipta máli, BLM. Byrjað var á þessari háttsemi á knattspyrnuleikjum á Bretlandseyjum eftir að bandarískur blökkumaður, George Floyd, lést af völdum lögreglu í Minneapolis þar vestra.

Pólitíska umræðan í framhaldi, knúin áfram af BLM, gekk út á að sem afkomandi þræla var Floyd táknmynd. En, óvart, þá voru Írar teknir til þræla, bæði af víkingum, eins og Íslendingasögur eru heimild um, síðar af Tyrkjum og Englendingum. 

Þegar Írar og aðrir Evrópumenn krjúpa fyrir Floyd og afkomendum bandarískra þræla gefa þeir til kynna að bandarísk samfélagsvandamál séu að einhverju marki á ábyrgð Íra og Evrópumanna. Svo er ekki.

Það vakti nokkra athygli þegar stjórnskipuð nefnd í Bretlandi, með blökkumann sem formann, komst að þeirri niðurstöðu nýverið að kerfislægri kynþáttamismunun væri ekki til að dreifa þar í landi. Bretar taka vara á að flytja inn ameríska pólitík undir yfirskini baráttu gegn kynþáttamismunun.

En írska landsliðið situr við sinn keip og krýpur líkt og það enska. Skotar á hinn bóginn eru hættir að krjúpa fyrir bandarísku stjórnmálasamtökunum BLM.

 

Orban segir leikmennina hafa ögrað

Einvaldurinn í Namibíu: Samherji út, Ísfélagið inn

Jóhannes uppljóstrari Stefánsson stjórnaði Namibíu-verkefni Samherja þegar það hófst 2012 þangað til hann var rekinn 2016. Samkvæmt Namibíuskjölunum tóku Samherjamenn á Íslandi að ókyrrast fyrri hluta árs 2016 vegna misnotkunar Jóhannesar á áfengi og eiturlyfjum og tilheyrandi lausatökum á rekstrinum. Einvalds-Jóa var tekið að leiðast vistin í Namibíu og sendi lausafregnir til Íslands að stærri ævintýri biðu handan við hornið, í Suður-Afríku.

Drög að uppsagnabréf til Jóhannesar var skrifað í mars 2016 og fór á milli Samherjamanna í tölvupóstum, sem eru áfestir vitnisburði Örnu Bjarkar Baldvins McClure, lögfræðings Samherja. En þegar til átti að taka lögðu Samherjamenn ekki í það að reka Jóhannes þar sem hann var með alla þræði Namibíu-verkefnisins í hendi sér. Meðal annars sá Jóhannes nánast alfarið um samskipti við meðeigendur Samherja í Articnam Fishing, þar sem Samherji var minnihlutaeigandi með 49%. Án samþykkis Namibíumanna væri ekki hægt að reka guðspjallamanninn, afsakið, Jóhannes.

Þess í stað var gerður út af örkinni maður til að greina stöðu mála í Namibíu. Jón Óttar Ólafsson, hjálparhella Samherja í seðlabankamálinu, fór til Namibíu að safna upplýsingum. Fyrst um sinn hafði Jóhannes fullan fyrirvara á Jóni Óttari en með leikþáttum, t.d. að setja á svið ágreining við yfirmenn á Íslandi, tókst útsendaranum að vinna sér traust Jóhannesar. Í engu er getið hvort kumpánarnir drukku saman eða dópuðu.

Jón Óttar tók upp símtal við Jóhannes 14. júlí 2016 þar sem verðandi uppljóstrari sagðist ætla að slíta öll tengsl við Samherja og taka upp samvinnu við Ísfélagið og fá þá til að skaffa skip að veiða namibískan kvóta. Namibíumenn áttu kvótann og gátu framselt hann hverjum sem er, þess vegna Ísfélaginu. Enginn í Samherja, utan Jóhannesar, var í þeim samskiptum við namibísku meðeigendurna að auðvelt væri að sannfæra þá um framhald á samstarfi ef einvaldurinn vildi annað.  Á Íslandi var Þorsteinn Már forstjóri rifinn út af fundi með Færeyingum til að hlusta á upptöku Jóns Óttars. Namibíu-verkefnið var orðið brennandi hús. Brennuvargurinn var æðstráðandi norðlensku útgerðarinnar til sjós og lands þar syðra.

Í hasti var send þungavigtardeild Samherjamanna til Namibíu að afsetja einvaldinn og freista þess að bjarga því sem bjargað yrði. 

Af því hlaust nokkuð ves, eins og síðar kom á daginn. Einvaldurinn var kominn með knáan kongóskan atvinnuhermann sér við hlið, Christian Yema, sem vílaði ekki fyrir sér að hóta andstæðingum einvaldsins lífláti. Yema var á þessum tíma bæði fóstbróðir og viðskiptafélagi einvaldsins, segir í tveggja ára gamalli frétt Al Jazeera. Í málsskjölunum, aftur, vitnar Yema gegn Jóa fóstbróður. Til að bæta gráu ofan á svart fyrir Samherja reyndist Einvalds-Jói í samkrulli með meðeigendum Samherja sem voru í meirihluta í Articnam Fishing og sáu sér leik á borði þegar íslenski leiðtoginn var opinskátt orðinn uppreisnarmaður gegn húsbændum sínum. Í húfi var flaggskipið Heinaste en salan á því er undirþema dómsmálsins í Namibíu.

Litla Samherjaveldið í Afríku riðaði til falls.

(Meira síðar ef tilfallandi tími finnst til tilfallandi athugasemda um einvaldinn og samherja hagsmunahópsins á Efstaleiti. Um að gera að lesa sér til enda langt í jólabókarreyfarana. RÚV þegir auðvitað þunnu hljóði. Gögnin sýna stjörnuvitni RÚV gegn Samherja sem fremur ótrúverðuga heimild, svo vægt sé til orða tekið. Drottinn minn dýri, hugsaði tilfallandi höfundurinn við lestur málsgagna, hvað þeir á Efstaleiti eru blautir á bakvið eyrun. Fréttabörnin kalla sig rannsóknablaðamenn en þekkja ekki rugludall þótt hann sitji í fanginu á þeim. Hér er slóðin og málsnúmerið er: HC-MD-CIV-MOT-POCA-2020/00429)

Engin leið að spá sumarveðri - en hlýrra eftir 75 ár

Í dag er 10. júní og gamalreyndur veðurfræðingur segir ómögulegt að spá fyrir sumarveðrinu. Það sé of mikil ,,óreiða og breyti­leiki" í veðurfarinu.

En hvernig getur fólk sagt að það verði hlýrra eftir 75 ár? Jú, ef það trúir á manngert veðurfar. Koltvísýringur,CO2, er 0,04% af andrúmsloftinu. Af öllum koltvísýringi í andrúmsloftinu ber náttúran ábyrgð á 97 prósentum en maðurinn afganginum. En við eigu að trúa því að framlag mannsins, 3% af 0,04%, skipti sköpum.

Grænland var 1,5 gráðu hlýrra á miðöldum en í dag, segir danski vísindamaðurinn Jorgen Steffenson. En það er einmitt 1,5 gráða á celcius sem ,,óttast" er að heimurinn hlýni um til næstu aldamóta. Þ.e. ef fólk hættir ekki að nota bensínsláttuvélar og fær sér orf og ljá í staðinn.

Þeir sem trúa á alheimshlýnun af mannavöldum eru með sérstaka netvarðliða til að kæfa umræðu um hina einu sönnu réttu trú.

En veðrið, sem sagt, einkennist af ,,óreiðu og breytileika". Loftslag er ekkert meira en veðurfar yfir langan tíma, 30 ár eða lengur. Og ef ekki er hægt að spá fyrir veðri næstu vikur er ekki hægt að spá fyrir hlýnun eða kólnun næstu áratugi.

Þar fyrir utan þá veit enginn kjörhita jarðarinnar. Einfaldlega vegna þess að kjörhiti jarðarinnar er ekki til. Við ættum að vara okkur á sérfræðingum er þykjast vita um eitthvað sem ekki er til.

Engin leið að spá fyrir um sumarið

Jóhannes uppljóstrari: Ég er leiðtoginn og kann á Namibíu

Ég er leiðtoginn í þessu verkefni og svara fyrir mínar gjörðir gagnvart eigendum. Þeir sem ekki fylgja reglunum verða teknir úr liðinu. Eigum við ekki að segja sumir fá núna gult spjald, í það minnsta áminningu.

Á þessa leið skrifar Jóhannes uppljóstrari Stefánsson í tölvupósti til Íslands 20. september 2015. Jóhannes stjórnaði Namibíu-verkefni Samherja og hefur játað á sig fjölmörg afbrot í starfi s.s. mútugjafir til namibískra ráðamanna, eins og fram kemur í Namibíuskjölunum.

En núna segir Jóhannes að hann hafi aðeins unnið samkvæmt fyrirskipunum frá Íslandi. Áður leiðtogi en núna starfsmaður á plani.

Viku seinna, 27. september 2015, skrifaði Jóhannes aftur heim og sagði að Samherjafólk á Íslandi héldi að hægt væri að stunda viðskipti í Namibíu eins og í hverju öðru Evrópulandi. Svo væri alls ekki.

En núna vill Jóhannes að við trúum þeirri sögu að hann hafi verið strengjabrúða Samherja í Namibíu og fjarstýrt frá Íslandi.

Sá sem situr á skrifstofu í Glerárgötu á Akureyri býr ekki til viðskiptasambönd í Namibíu með tölvupóstum. Menn þurfa að vera á staðnum. Rétt eins og uppljóstrarinn sagði áður en hann gekk í þjónustu hagsmunahópsins á Efstaleiti, sem vill fá sitt Jóhannesarguðspjall ómengað af öðru en Samherjahatri.

Þöggun Pírata: aðeins réttar skoðanir leyfðar

Af hverju stunda Píratar þöggun? spyr Einar Steingrímsson og tilfærir dæmi um ritskoðun á umræðuvettvangi Pírata.

Jú, Píratar telja sig handhafa sannleikans. Slíku fólki leiðist umræða, það krefst samþykkis á pólitískum réttum skoðunum.

Pólitískur rétttrúnaður í hnotskurn.

 

 

Þögnin rofin og markmið Pírata skýr

Frjálslyndi Vinstri grænna og Fréttablaðið

Fréttablaðið er gefið út af bakhjörlum Viðreisnar og lítur ,,frjálslyndum" augum á tilveruna. Samkvæmt Fréttablaðinu eru Vinstri grænir ekki frjálslyndir, jafnvel þótt þeir beri fram frjálslynd mál.

Einn af leiðarahöfundum Fréttablaðsins skrifar samantekt um stöðuna á alþingi síðustu dagana fyrir sumarfrí. Í inngangi segir

Frumvörp ráðherra VG um hálendisþjóðgarð, vörslu fíkniefna, rafrettur og breytingar á stjórnarskrá ná líklega ekki fram að ganga á kjörtímabilinu. Frjálslyndisfrumvörp um áfengi, mannanöfn og rekstur leigubíla munu líklega einnig daga uppi.

Lögleiðing fíkniefna, ,,afglapavæðing" með orðum Loga formanns, er sem sagt ekki ,,frjálslyndismál" í orðabók Fréttablaðsins. Rýmra aðgengi að áfengi er aftur frjálslyndi í framkvæmd.

Hugtakið frjálslyndi er orðið giska merkingarlaust í munni þeirra sem það tíðast nota.

Alþingi mun sitja að minnsta kosti út vikuna

Ef fjölmiðlar eru fávitar, þá má ég vera fáviti

Hild­ur Lilliendahl Viggós­dótt­ir og Odd­ný Arn­ars­dótt­ir sökuðu tvo unga menn um þaul­skipu­lagðar nauðgan­ir í íbúð í Hlíðahverfi í Reykja­vík. Þær voru dæmdar fyrir meiðyrði á tveim dómsstigum.

Oddný vildi að hæstiréttur endurskoðaði niðurstöðu héraðsdóms og landsréttar. Rök Oddnýjar eru athyglisverð. Þau eru, samkvæmt meðfylgjandi frétt:

Hún seg­ir um­fjöll­un fjöl­miðla hafa verið óvægna [þ.e. um meint nauðgunarmál] og til þess fallna að al­menn­ing­ur, þar með talið hún, hefðu dregið ýms­ar álykt­an­ir og þaðan hefðu um­mæl­in sprottið.

Á mannamáli þýðir þetta að ef fjölmiðill fer offari í umfjöllun þá er allt í lagi að koma í kjölfarið og bæta um betur.

Röksemdin fer nokkuð nærri því að segja að fólk beri ekki ábyrgð á eigin orðum.

Að Oddnýju, og væntanlega lögmanni hennar, skuli detta í hug þessi röksemdafærsla segir svolítið um samtímamenninguna. Maður ber ekki ábyrgð á eigin orðum, nei, sei, sei. En svo sannarlega hefur maður full mannréttindi til að tjá sig - bara án ábyrgðar.

Orð án ábyrgðar eru í grunninn merkingarlaus. Sá sem kennir öðrum um orð sín lýsir sig ósjálfráða. Ekki sniðug málsvörn fyrir þátttakendur í umræðu. Annað gildir um þá sem taka þátt í galdrabrennum undir yfirskini umræðu.

 

Hæstiréttur tekur ekki fyrir ummæli í Hlíðamálinu

Engar Namibíufréttir á RÚV

Til skamms tíma sérhæfði RÚV sig í málefnum Namibíu, einkum þeim er tengdust samherja hagsmunahópsins á Efstaleiti, Jóhannesi Stefánssyni uppljóstrara.

Nú liggur fyrir að dómssjölin í Jóhannesarmáli og Samherja eru orðin 444. Heill fjársjóður fyrir rannsóknablaðamenn hagsmunahópsins.

En það heyrist ekki múkk frá hagsmunahópnum. Ekkert að frétta efst á leiti.

Fyrir áhugasama er slóðin á málsgögnin hér. Málsnúmerið er: HC-MD-CIV-MOT-POCA-2020/00429

Svo er hægt að lesa hápunktana á íslensku hér.

Afglapavæðing Loga

Þegar Logi formaður Samfylkingar talaði um lögleiðingu fíkniefna sagði hann ,,afglapavæðing" en ekki ,,afglæpavæðing".

Þvoglumælgi formannsins fellur eins og flís við rass málstaðarins.

„Hrollvekjandi framtíðarsýn“

Femínisti bannaður á Twitter

Naomi Wolf er þekktur bandarískur femínisti. Reikningi hennar á Twitter var lokað, segir BBC, þó ekki vegna femínískra staðhæfinga.

Wolf, sem sagt, er sökuð um að dreifa rangfærslum um bólusetningar við Kínaveirunni.

Fyrir skemmstu mátti ekki segja á Twitter, og heldur ekki á Facebook, að uppruni veirunnar væri á rannsóknastofu í Wuhan í Kína, en ekki kjötmarkaði. Tæknirisarnir og kínversk stjórnvöld voru sammála um að tilgátan um rannsóknastofuna væri bannorð.

Nú er komið á daginn að uppruna veirunnar má að öllum líkindum rekja til rannsóknastofu. Afleiðingarnar verða heimspólitískar, segir dálkahöfundur Telegraph.

Rangfærslur Wolf um bóluefnið eru, samkvæmt BBC, að öllum líkindum einmitt það, rangfærslur. En það þóttu líka allar kenningar um að Kínaveiruna mætti rekja til rannsóknastofu. Þangað til að þær reyndust (líklega) sannar.

Tæknirisar eins og Twitter og Facebook eru ekki heppilegustu aðilarnir til að ákveða hvað er rétt og hvað rangt.