Þorsteinn kvabbar á krónunni

Fjármálaráðherra sagði í vikunni að guði sé lof að við höfum krónuna til að takast á við vanda hagkerfisins í kjölfar hrunsins. Þorsteini Pálssyni fyrrum ráðherra  svelgdist á við orð Steingríms J. og skrifaði andmæli á leiðaraopnu Fréttablaðsins í dag. Kjarninn í málflutningi Þorsteins er þessi

Veikleikinn í kenningu fjármálaráðherrans er hins vegar sá að í opnu alþjóðlegu hagkerfi eru það erlend markaðsöfl sem ráða gengi krónunnar. Reynslan hefur sýnt að stjórntæki Seðlabankans og ríkisstjórnarinnar duga ekki til þess. Pólitískt fullveldi yfir krónunni fæst aðeins með því að loka hagkerfinu eins og gert er um þessar mundir með gjaldeyrishöftum.

Allir gjaldmiðlar í opnu alþjóðlegu hagkerfi eru háðir markaðsöflum. Evran tók dýfu í vikunni og þrýstingar var á dollarann í vetur. Þorsteinn stillir málinu upp þannig að fyrst við getum ekki alfarið stjórnað gengi krónunnar verðum við að varpa henni fyrir róða. 

Við stöndum margfalt betur með eigin gjaldmiðil sem dregur dám af stöðu íslenska efnahagskerfisins fremur en að taka upp mynt sem lýtur hagsveiflum stórþjóða eins og Þýskalands.

Þorsteinn er aðildarsinni og kvabb hans er að skoða í því ljósi. Hann segir krónuna valda óstöðuleika sem vitanlega er rugl enda þarf ekki annað en að gjóa augunum til Evrópu til að sannfærast um að gjaldmiðlar sem slíkir valda hvorki né stöðva óstöðugleika. 

Ef við skiptum út krónu fyrir annan gjaldmiðil, norska krónu, jen, svissneskan franka, dollara eða evru gefum við frá okkur forræði á peningamálum ríkisins. Rök Þorsteins eru að Íslendingum sé ekki treystandi til að fara með eigin mál. Um fimmtungur þjóðarinnar er þessarar skoðunar. Við höfum séð það svartara.

Réttlæti, pólitík og hugmyndafræði

Handtaka forstjóra Kaupþings er umræðuvaki um mörk dómskerfis og stjórnmála. Hannes Hólmsteinn sýnir föllnum auðmönnum samúð enda eytt starfsævinni í að mæra græðgi og finnst erfitt þegar reffilegir fulltrúar viðskiptalífsins eru sýndir sem glæpamenn. Tilefni meðaumkunar Hannesar er að fjármálaráðherra hafði látið það út úr sér að hann vonaðist til að óánægja almennings fengi sefjun við handtökuna.

Dómskerfið á að framleiða réttlæti. Almenningur er orðinn langeygur eftir réttlæti handa útrásarauðmönnum. Þegar hillir undir málagjöld er ástæða til að lofa og prísa ákæruvaldið.

Hvorki Hannes né Steingrímur J. starfa á vettvangi dómskerfisins. Hannes líður önn fyrir eymdarástand hugmyndafræðinnar sem var forsenda útrásarinnar. Steingrímur J. glímir við umsátursástand í fyrstu vinstristjórn lýðveldisins.

Orð Steingríms J. og viðbrögð Hannesar fara fyrir ofan garð og neðan réttvísinnar.

Besta útrásarframboðið

Besti flokkurinn er framlag menningarinnar til stjórnmálanna. Jú, rétt til getið, sama menning og var á mála hjá útrásarauðmönnum. Ef við gætum fengið einn til tvo úr Reykjavíkurakademíunni væri útrásarafturgangan fullkomnuð.

Máttur útrásarinnar fólst ekki síst í að hann smó inn í meðvitund sviðsfólks, hvort heldur á Bessastöðum, leikhúsum eða uppistandi. Útrásin var viagra andans; slappir urðu stinnir.

Brilljansinn er almenningur er alveg til í að meðtaka ný töfrabrögð. Stjórnmálaflokkarnir eru í afneitun og hvers vegna ekki að stökkva á brandaravagninn. Með orðum Dylan sem Hendrix gerði ódauðleg

No reason to get excited
The thief he kindly spoke
There are many here among us
Who feel that life is but a joke but uh
But you and I weve been through that
And this is not our fate
So let us not talk falsely now
The hours getting late

Besti flokkurinn kynnir lista sinn

Í eigin lögsögu - en hve lengi?

Karfaveiðin fer vel af stað og útgerðin sækir þann rauða til að skila þjóðarbúinu gjaldeyri. Í Viðskiptablaðinu/Fiskifréttum segir

Auk íslensku skipanna eru um tuttugu erlend skip á karfamiðum að veiða úr torfu sem heldur sig á og í námunda við 200 mílna lögsögumörkin. Flekkurinn teygir sig inn fyrir línuna þannig að Íslendingarnir geta athafnað sig einir og ótruflaðir inni í eigin lögsögu sem auðvitað er óskastaða, að sögn Kristins.

Óskastaðan sem  Kristinn Gestsson skipstjóri á Þerney RE segir að við höfum er ekki sjálfsögð. Pólitískt verkefni Samfylkingarinnar er að færa lögsögu yfir landhelginni til Evrópusambandsins.

Sést í kviku Samfylkingar

Launauppbót seðlabankastjóra upp á 400 þús. opinberar hræsni Samfylkingarforystunnar. Kemur tvennt til. Fjárhæðina er auðvelt að skilja. Framhaldsskólakennarier til dæmis  með um 340 þús. kr. í mánaðarlaun, eða all nokkru lægri en launauppbót seðlabankastjóra. Í annan stað þykist samfylkingarfólk aðhyllast jöfnuð en aðeins í orði kveðnu.

Styrkir Steinunnar Valdísar, gagnaver Björgólfs Thors og Villa Þorst., skjaldborgin um Baugsfjölskylduna og loks launauppbót seðlabankastjóra, sem var handvalinn af forsætisráðherrar, eru allt dæmi um forréttindahugsun.

Á tíu ára sögu Samfylkingarinnar er fjarska lítið að segja af jöfnuði.

Formaður bankaráðs krafinn svara

Baugsdekur Jóhönnu Sig. staðfest

Forsætisráðherra tekur fagnandi fréttum af handtöku forstjóra Kaupþings. Í viðtali við Pressuna er haft eftir Jóhönnu Sigurðardóttur

Það er afar mikilvægt fyrir það uppgjör sem nú fer fram að sannleikurinn komi í ljós um það sem raunverulega gerðist í bönkunum í aðdraganda hrunsins og að þeir sem þar báru ábyrgð axli hana. 

Á sama tíma og forsætisráðherra vill að gerendur axli ábyrgð veitir banki á forræði ríkisins, Arion,  Baugsfjölskyldunni heimild  til að stýra fákeppnisfyrirtækinu Högum. Annar banki sem beinlínis er í eigu ríkisins, Landsbankinn, leyfir Baugsfjölskyldunni að stýra gjaldþrota fjölmiðlaveldi, 365-miðlum.

Er ekki tímabært að þú axlir ábyrgð, Jóhanna Sigurðardóttir?

Drengirnir ósnertanlegu

Handtaka Hreiðars Más Kaupþingsstjóra dældar hugmyndina um ósnertanlegu drengina sem voru snjallir í viðskiptum en kannski eilítið óheppnir. Almenningur vissi fyrir löngu hvað klukkan sló; útrásarauðmennirnir eru illa gerðir einstaklingar, lygnir, þjófóttir og hégómlegir.

Á hinn bóginn grefur það undan tiltrú almennings á ríkisvaldinu að einn armur þess, ríkisstjórnin, stundir viðskipti við fugla eins og Björgólf Thor og Jón Ásgeir eins og ekkert hafi í skorist. Með því að umgangast útrásarauðmenn eins og heiðvirða einstaklinga veitir ríkisstjórnin þeim aflát.  Annar armur ríkisvaldsins, ákæruvaldið, virtist fara ofurhægt í sakirnar - þangað til í gær. Og almenningi var létt.

Drengirnir ósnertanlegu ætluðu að ljúga því að okkur að þeir hafi aðeins stundað viðskipti en hvorki rænt banka innan frá  né sólundað lífeyrissjóðum í þágu fjármálafíflsku. Þangað til í gær gekk drengjunum ágætlega að spinna lygavefinn enda eiga þeir marga hjálparkokka.

 

Einn í gæsluvarðhaldi, annar á framfæri Samfó

Handtaka Hreiðars Más Sigurðssonar fyrrverandi forstjóra Kaupþings leiðir hugann að öðrum helstu gerendum gjaldþrota bankanna. Björgólfur Thor átti ásamt föður sínum Landsbankann og Straum.

Þökk sé Samfylkingunni er Björgólfur Thor í ágætum málum og um það bil að fá lög samþykkt á alþingi um skattaafslátt fyrir gagnaver sem hann hyggst reisa á Miðnesheiði með peningamanni úr röðum Samfylkingarinnar.

Siðlausa ríkisstjórn Jóhönnu Sig. er þeirrar skoðunar að saman sé hvaðan gott kemur - og útrásarpeningar jafngóðir og hverjir aðrir samkvæmt nýrri skilgreiningu íslenskra vinstrimanna á siðferði.

Hreiðar Már í skýrslutöku

Sigurjón M. Jón Ásgeir og eingreiðslan

Sigurjón M. Egilsson var ráðinn á Blaðið sumarið 2006 sem þá var í helmingseigu Árvakurs, útgáfufélags Morgunblaðsins. Rökin fyrir ráðningu Sigurjóns voru m.a. þau að hann hefði gert uppreisn gegn Gunnari Smára bróður sínum sem var fjölmiðlastjóri Baugs.

Baugsmálin voru fyrir dómstólum þessi misserin. Í nóvember 2006 birti Blaðið svæsnar árásir á Arnar Jensson lögreglumann vegna mála sem voru 10-20 ára gömul. Arnar hafði komið að rannsókn Baugsmála. Arnar skrifaði grein í Morgunblaðið öldungis forviða 

ég verð að játa að það hvarflaði að mér hvort við værum virkilega að upplifa aðferðir Berlusconis á Ítalíu eða skipulagðra glæpahópa sem starfa í skjóli auðs.

Sigurjón M. skákaði í því skjóli að starfa á Blaðinu, sem ekki var Baugsmiðill heldur tilheyrði Morgunblaðsútgáfunni. Tvær grímur runnu á þá sem trúðu að ærlegur þráður væri í blaðamannsæru Sigurjóns M. þegar hann réð sig til starfa hjá Baugsútgáfunni áramótin 2006/2007.

Samkvæmt nýjum upplýsingum frá gamla vinnuveitanda Sigurjóns M. þáði hann eingreiðslu frá Jóni Ásgeiri Baugsstjóra haustið 2006.

Vitanlega var eingreiðslan ekki mútufé til að Sigurjón M. tætti æruna af vitni i Baugsmálinu. Sigurjón M. og hans slekt eru heiðarlegir fagmenn með orðspor í samræmi.

Sigurjón M. Jón Ásgeir og eingreiðslan

Sigurjón M. Egilsson var ráðinn á Blaðið sumarið 2006 sem þá var í helmingseigu Árvakurs, útgáfufélags Morgunblaðsins. Rökin fyrir ráðningu Sigurjóns voru m.a. þau að hann hefði gert uppreisn gegn Gunnari Smára bróður sínum sem var fjölmiðlastjóri Baugs.

Baugsmálin voru fyrir dómstólum þessi misserin. Í nóvember 2006 birti Blaðið svæsnar árásir á Arnar Jensson lögreglumann vegna mála sem voru 10-20 ára gömul. Arnar hafði komið að rannsókn Baugsmála. Arnar skrifaði grein í Morgunblaðið öldungis forviða 

ég verð að játa að það hvarflaði að mér hvort við værum virkilega að upplifa aðferðir Berlusconis á Ítalíu eða skipulagðra glæpahópa sem starfa í skjóli auðs.

Sigurjón M. skákaði í því skjóli að starfa á Blaðinu, sem ekki var Baugsmiðill heldur tilheyrði Morgunblaðsútgáfunni. Tvær grímur runnu á þá sem trúðu að ærlegur þráður væri í blaðamannsæru Sigurjóns M. þegar hann réð sig til starfa hjá Baugsútgáfunni áramótin 2006/2007.

Samkvæmt nýjum upplýsingum frá gamla vinnuveitanda Sigurjóns M. þáði hann eingreiðslu frá Jóni Ásgeiri Baugsstjóra haustið 2006.

Vitanlega var eingreiðslan ekki mútufé til að Sigurjón M. tætti æruna af vitni i Baugsmálinu. Sigurjón M. og hans slekt eru heiðarlegir fagmenn hvers og orðspor í samræmi.