ASÍ-elíta í þágu útrásar

Alþýðusamband Ísland var í nánu samkrulli við útrásarauðmenn í gegnum lífeyrissjóðina þar sem ASÍ og fulltrúar Samtaka atvinnulífsins véla með sparnað launafólks. Milljarðar ofan á milljarða flutu inn í ruglfyrirtæki auðmanna. Þegar sukkið er afhjúpað situr ASÍ-elítan keik í stólum sínum og hraunar yfir lífeyrissjóð opinberra starfsmann fyrir að greiða félögum sínum lífeyri án skerðinga.

ASÍ-elítan er löngu komin úr tengslum við skjólstæðinga sína. Einangruð tilvera skjóli atvinnurekenda og fyrsta farrýmisheimur Evrópusambandins mengar hugarfarið og fær ASÍ til að vinna gegn þjóðarhagsmunum í þágu útvaldra.

ASÍ situr kjurr um hríð en við næstu atlögu er hætt við að feysknar stoðir skrifstofuveldisins brotni.

Útrásarlík í lest S-flokka

Hvorki Sjálfstæðisflokkur né Samfylking hafa með trúverðugum hætti hreinsað út forystulið sem er nátengt útrásaröfgum. Bæði Steinunn Valdís og Guðlaugur Þór sitja í flokksskjóli á þingi. Stjórnmálasannfæring þeirra var margseld fjármálastofnunum og hvorugt er trúverðugur talsmaður almannahagsmuna.

Í stað þess að standa að uppgjöri reyna flokkarnir að taka samtryggingarsnúning á trúnaðarbrestinn sem staðfestur er á milli stjórnmálaflokka og þjóðarinnar. Hugmyndir um samstjórn allra staðfestir að flokkarnir eiga ekkert erindi við almenning. Hvers vegna ekki að sameina alla stjórnmálaflokka í einn?

Grínframboð virka alvörugefin í samanburði við tragíkómedíu gömlu flokkanna.

Besti flokkurinn fengi fjóra kjörna