ESB tryggir fjármagn betur en fólk

Fjármagnið flæðir öruggt og óhindrað um landamæri Evrópusambandsins, einkum á það við um þau sextán ESB ríki sem nota evruna. Hugmyndin með evrunni var að hraða pólitískum samruna Evrópusambandsins. Einn vinnumarkaður átti til dæmis að koma í kjölfar sameiginlegs gjaldmiðils.

Í orði kveðnu er einn vinnumarkaður í ESB. Á hinn bóginn er hreyfanleiki vinnuafls lítill, samanborið við vinnumarkaðinn í Bandaríkjunum. Fólki finnst því eiga heima í þjóðlöndum sínum og er kjurt þó illa ári.

Grikkir standa einir í stríðinu við skuldavanda sinn einmitt vegna þess að samruninn sem Brussel keyrir áfram hefur ekki skilað sér í samstöðu þeirra þjóða sem mynda ESB. Þjóðverjar og Frakkar hafa engan áhuga á að halda uppi Grikkjum, Spánverjum og Portúgölum.

Fjármagnið flýtur frjálst á milli evrulandanna en hvorki fólk né pólitísk samstaða. Elítan í Evrópu bjó til kerfi sem er almenningi í álfunni framandi. 

Fjármagnsflótti frá Grikklandi

Áhlaup á gríska banka

Auðugir Grikkir taka fé úr þarlendum bönkum og ýmist fara með peningana í útibú alþjóðlegra banka í Grikklandi eða koma þeim fyrir erlendis. Evrunni er ekki óhætt í grískum bönkum þrátt fyrir að vera gjaldmiðill sextán Evrópusambandsríkja.

Samkvæmt frétt Telegraph mun útflæði peninga gera endurreisn grísks efnahagslífs erfiðari.

Skaðinn sem vantraust á grískum bönkum mun valda bæði til skemmri tíma og lengri er ómældur. Spár um gjaldþrot Grikklands fá æ meiri trúverðugleika.

Erfiðara að fórna utanþingsráðherrum

Utanþingsráðherrarnir Ragna og Gylfi mælast hæst á ánægjuvog Gallup. Steingrímur J. gaf það út fyrir nokkrum dögum að Rögnu og Gylfa yrði skipt út á kjörtímabilinu. Eftir þessa niðurstöðu yrðu það pólitísk mistök að fórna vinsælustu ráðherrum ríkisstjórnarinnar til að freista þess að auka ánægju almennings með ríkisstjórnina.

Almenningur telur ekki að Jóhanna Sigurðardóttir geri sig sem forsætisráðherra. Hún hefur ekki meðbyr lengur enda axarsköftin orðin býsna mörg á skömmum verkstjóraferli.

Skilaboðin sem kjósendur senda stjórnarflokkunum eru þau að pólitíkusum er ekki treystandi. Ef fólk gæti valdið myndi það þiggja fleiri utanþingsráðherra.

Flestir ánægðir með störf Rögnu

Þýskar áhyggjur af verðbólgu

Þjóðir temja sér viðhorf og vinnubrögð í efnahagsmálum sem draga dám af sjálfsmynd þeirra. Íslendingar hafa í gegnum tíðina ekki haft stórar áhyggjur af verðbólgu. Fyrir daga þjóðarsáttarinnar 1991 var verðbólga rædd í tugum prósenta og hafði verið þannig um langa hríð.

Verðbólga er um 8 prósent hér á landi og með stýrivöxtum í nágrenni verðbólgutölu er ekki hægt að fá vexti á innistæðureikningum banka sem verja sparifé fyrir rýrnun.

Þjóðverjar búa að ólíkri sögu í efnahagsmálum við á Fróni. Verðbólga var undanfari hruni Weimar lýðveldisins á millistríðsárunum sem leiddi til uppgangs nasista og árásarstríðs.

Hér fjallar þýska vikuritið Spiegel um verðbólgu á evrusvæðinu. Alvarlegur tónn er í umfjöllun vikuritsins enda vá fyrir dyrum þegar ársverðbólga mælist 1,5 prósent - já, eitt komma fimm prósent - en áætlanir gerðu ráð fyrir 1,2 prósentum.

Þriðjungur úr prósentustigi verðbólgu eru tíðindi í þýskri efnahagsumræðu. Hér á landi myndu fáir lyfta brúnum þótt verðbólga væri prósentubrotinu meiri eða minni.

Glæpagengi á framfæri bankanna

Græðgisvæðing bankanna á útrásarárunum var taumlaus. Stöð 2 sagði frá því í kvöldfréttum að ,,veðrými" Kaupþings banka sáluga hefði verðið notað til að auka peningaflæði til stjórnenda bankans. RÚV sagði frá tilburðum Jóns Ásgeirs Baugsstjóra, eiginkonu og föður að sölsa til sín eigum sem urðu til á útrásarárunum.

Endurreistir bankar leika lykilhlutverk í atvinnulífinu. Hvorki liggur fyrir hverjir eiga þessa banka né hvert erindi þeirra er.

Ef bankarnir eru í slagtogi við glæpagengi útrásarauðmanna er ástæða til að spyrja hvort venjulegt fólk eigi nokkuð að skipta við þá.

Valdabarátta í Sjálfstæðisflokknum

Hrunverjadeild Sjálfstæðisflokksins er kominn í baráttuham vegna fyrirsjáanlegra prófkjara í haust eða vetur þar sem ríkisstjórn Jóhönnu Sig. er komin að fótum fram og situr ekki lengi enn. Hrunverjar Sjálfstæðisflokksins eru komnir í bandalag með Jóni Ásgeiri Baugsstjóra sem gerði Ólaf Þ. Stephensen nýverið að ritstjóra Fréttablaðsins.

Fyrir á fleti útgáfu Baugsfeðga er forstjóri 365-miðla, Ari Edwald,  sem gekk Jóni Ásgeiri á hönd á velmektarárum Baugs. Sveinn Andri Sveinsson lögmaður er í hóp með þeim félögum. AMX vefurinn tekur samkrull hrunverjanna saman með þessu orðum

Sveinn Andri er góður vinur Ólafs Stephensen ritstjóra, Guðlaugs Þórs Þórðarsonar alþingismanns, Ara Edwald, framkvæmdastjóra 365-miðla, og Þórs Sigfússonar, fyrrverandi forstjóra Sjóvá. Hafa þeir í mörg ár haft þann sið að hittast í hádeginu tvisvar eða þrisvar í mánuði (nú hin síðustu ár auðvitað í veitingasal Hótel 101) til skrafs og ráðagerða, og einnig hafa þeir fylgst að í prófkjörum og alls konar valdabaráttu.

Hópurinn taldi að sér vegið þegar Agnes Bragadóttir blaðamaður á Morgunblaðinu rifjaði upp lygar Þórs Sigfússon forstjóra Sjóvá. Sveinn Andri var gerður út af örkinn til að spillingarjafna Agnesi.

Í dag herðir Sveinn Andri róðurinn og krefst þess að Morgunblaðið reki Agnesi. Hrunverjadeild Sjálfstæðisflokksins ætlar að gera sig gildandi með því að kaffæra einn þekktasta blaðamann Morgunblaðsins. Aukabónus er að Fréttablaðið græðir á veikara Morgunblaði.

Nái hrunverjar undirtökunum í Sjálfstæðisflokknum mun tvennt gerast. Í fyrsta lagi verður umræðu um hrunið drepið á dreif og spillingarjöfnun notuð til að kæfa gagnrýni. Í öðru lagi mun Sjálfstæðisflokkurinn taka upp harða Evrópustefnu og knýja á um að Ísland verði aðildarríki ESB.

Sveinn Andri, Þór Sigfússon, Ólafur Stephensen auk Jóns Ásgeirs hafa allir gefið sig upp sem aðildarsinnar. Það er líka skiljanlegt í ljósi þess að Brussel er umburðarlynd gagnvart spillingu.

 

 

Írar ná tökum á fjármálum sínum

Írar stóðu frammi fyrir álíka vanda gangvart opinberum skuldum og rekstrarhalla og Grikkir. Bæði löndin eru í evrusamstarfi Evrópusambandsins. Fréttir af Írum herma að með niðurskurði s.s. kauplækkun opinberra starfsmanna, lokun skóla og hagræðingu í opinberum rekstri hafi Írum tekist að rétta af opinberan rekstur.

Evrópusambandið heldur Írum fram sem fyrirmynd fyrir Grikki og aðrar Suður-Evrópuþjóðir sem hafa eytt um efni fram.

Hér er samantekt á þróuninni á Írlandi síðustu mánuði.

Grikkir í greiðsluþrot eða yfirstjórn ESB

Grikkir eiga með skuldavanda sínum eiginlega aðeins tvo kosti. Í fyrsta lagi að lýsa yfir greiðsluþroti og fá með atbeina Alþjóðagjaldeyrissjóðsins samninga við lánadrottna. Í öðru lagi að evrusvæðið með sínum sextán ríkum myndi kjarnasamstarf í Evrópu undir þýsku forræði.

Mestar líkur eru á að Grikkir fari leið Alþjóða gjaldeyrissjóðsins og þar með er evrusvæðið dæmt úr leik. Trúverðugleiki samstarfsins er farinn ef ríki sem lendir í vandræðum er látið sigla sinn sjó.

Hér er athyglisverð greining á grísku stöðunni úr smiðju Brósa á Telegraph.

Einhliða ákvörðun hnekkt

Bretar og Hollendingar komust upp með að setja Íslendingum einhliða skilmála. Auðsveip ríkisstjórn Jóhönnu lét þjóðarhagsmuni lönd og leið. Engar fortölur dugðu á þá ætlun stjórnarinnar að lögfesta ónýta samninga. Steingrímur J. og Jóhanna töldu sig komast upp með að kenna öðrum um Icesave-klúðrið.

Vegna baráttu stjórnarandstöðunnar, hópa eins og InDefence og að lokum synjun forseta á staðfestingu laganna tókst að brjóta á bak aftur aðför að fjárhagslegu forræði þjóðarinnar.

Það er ekki vegna ríkisstjórnar Jóhönnu Sigurðardóttir heldur þrátt fyrir hana sem við sjáum fram á til muna hagfelldari niðurstöðu í Icesave-málinu.

Falla frá einhliða skilmálum

Samfylkingin grætur makrílhagsmuni ESB

Sjávarútvegsráðherra Íslands gefur út reglugerð um heimildir til íslenskra skipa að veiða makríl. Veiðarnar skapa þjóðarbúinu verðmæti í milljörðum króna. Ætla mætti að þeir sem bera hagsmuni þjóðarinnar fyrir brjósti myndu fagna búbótinni.

Samfylkingin og talsmenn hennar finna reglugerðinni það til foráttu að íslenskum skipum er úthlutað veiðiheimildum. Draumastaða Samfylkingarinnar er að makríllinn og aðrir nytjastofnar í landgrunni Íslands fari til úthlutunar hjá framkvæmdastjórn Evrópusambandsins.

Áður hefur komið fram að fyrningarleiðin er forsenda fyrir inngöngu Íslands í Evrópusambandið. Samfylkingin er umboðsaðili ESB á Íslandi og verður að koma fram við hana sem slíka.