Vilhjálmur Bjarna snuprar Pálma í Fons

Vilhjálmur Bjarnason talsmaður fjárfesta og liðsmaður í Útvarsliði Garðbæinga í spurningakeppni í Sjónvarpinu neitaði að taka við sigurverðlaununum sem voru ferðaávísun frá Iceland Express.

Pálmi í Fons er aðaleigandi Iceland Express en hann og Jón Ásgeir Baugsstjóri eru í aðalhlutverki innherjaæfinga í Glitnisbanka sem fjallað hefur verið um síðustu daga.

Vilhjálmur Bjarnason sýndi fordæmi þegar hann neitaði að taka við verðlaunum frá Iceland Express.

Guðmóðir ESB-umsóknarinnar vill hætta við

Ingibjörg Sólrún Gísladóttir fyrrverandi utanríkisráðherra segir í viðtali við þýskan blaðamann að umsókn um aðild Íslands að Evrópusambandinu sé tímasóun. Ingibjörg Sólrún, miklu frekar en Jóhanna Sigurðardóttir, lagði grunninn að Evrópuáherslum Samfylkingarinnar.

Þegar Ingibjörg Sólrún lýsir yfir uppgjöf aðildarsinna er málatilbúnaðurinn dauður. Össur Skarphéðinsson utanríkisráðherra veit það ósköp vel og því neitaði hann Sjónvarpinu um viðtal í dag þegar leitað var eftir viðbrögðum hans. Össur neitar nær aldrei fjölmiðlaviðtali.

Þýski blaðamaðurinn sem tók viðtalið við Ingibjörgu Sólrúnu hefur orðið var við verulegan áhuga á efni þess og snaraði yfir á ensku helstu efnisþáttunum sem lúta að ESB-umsókninni.

Lykillinn að siðblindu Jón Ásgeirs og Pálma

Jón Ásgeir Baugsstjóri og Pálmi í Fons segjast hvorugir hafa hagnast persónulega á æfingum með Glitnisbanka. Tölvupóstar sem fjölmiðlar hafa birt síðustu daga benda eindregið til þess að þeir félagar hafi rænt bankann innan frá.

Til að skilja hvernig menn eins og Jón Ásgeir og Pálmi geta lifað með sjálfum sér og í þokkabót staðið keikir á götum og torgum sakleysið uppmálað verður að horfa til óendanlegrar getu þeirra beggja til sjálfsblekkingar.

Fyrir hrun voru Jón Ásgeir og hlutafélögin hans einn og sami aðilinn. Eins kom fram í Baugsmálum sáu fyrirtæki Jóns Ásgeirs um að borga fyrir hann dagleg neyslu, frá pylsum yfir í síma og úttektir í tískuverslunum. Eftir hrun er Jón Ásgeir sjálfstæður lögaðili með hreina kennitölu en fyrirtækin eru gjaldþrota lögaðilar sem koma prívatmanninum Jóni Ásgeiri ekkert við.

Pálmi í Fons undirstrikar þennan mun á sjálfum sér og fyrirtækjum sem hann átti í stefnu á hendur fréttamanni RÚV.

Í stefnunni segir að Pálmi „þarf ekki að sæta því að vera samsamaður fyrirtæki, sem hann átti hlutafé í og var í forsvari fyrir".

Eins og Viðskiptablaðið greinir frá var annað hljóð í strokk Pálma þegar útrásin stóð sem hæst.

 

Pólitísk ábyrgð á Jóni Ásgeiri

Fjölmiðlar í gær og dag birta tölvupósta milli Jóns Ágeirs Baugsstjóra og helsta eigenda Glitnisbanka og stjórnenda bankans. Tölvupóstarnir veita innsýn í það hvernig banki er rændur innan frá.

Jón Ásgeir komst upp með að ræna banka innan frá vegna þess að hann hafði sterkt pólitískt bakland í Samfylkingunni. Samfylkingin, með þáverandi formann Össur Skarphéðinsson í fararbroddi, tryggði að fjölmiðlalögin, sem áttu að koma böndum á samþjöppun fjölmiðlavalds undir merkjum Baugs, féllu niður dauð sumarið 2004.

Núverandi þingmenn Samfylkingar, Róbert Marshall og Sigmundur hikk Ernir Rúnarsson, voru á mála hjá Baugi. Björgvin Sigurðsson fyrrum viðskiptaráðherra Samfylkingar var sérstakur vikadrengur Jóns Ásgeirs og var sem slíkur vakinn nóttina sem Seðlabankinn ætlaði að yfirtaka Glitni sem var kominn í þrot eftir að krumlur Jóns Ásgeirs höfðu skrapað botninn.

Samfylkingin ber pólitíska ábyrgð á Jóni Ásgeiri.

Prinsippmaðurinn Jón Ásgeir

Í tölvupósti sem Jón Ásgeir Baugsstjóri og helsti eigandi Glitnisbanka sendi Lárusi Welding bankastjóra nokkrum mánuðum fyrir gjaldþrot bankans segist hann af prinsippástæðum ekki ábyrgjast nein lán sem hann þó sjálfur tekur.

Jón Ásgeir Jóhannesson til Lárusar Welding 11. maí 2008: "Klára Goldsmith af þessum eina milljarði sem ég átti að fá greitt þarf 250 að fara til að borga yfirdrátt hjá GLB [Glitnis] prinsip mál að vera ekki með persónulegar skuldir í mér. Rest get ég í raun geymt hjá GLB."

Jón Ásgeir kemst upp með að ráðskast með bankastjóra Glitnis, þverbrjóta lög og reglur um ákvarðanir bankastjórnar og fótum troða hagsmuni annarra hluthafa bankans.

Prinsippið sem Jón Ásgeir hefur er að hann sé hafinn yfir lögin og réttarríkið.

 

 

 

 

Innviðir græðginnar

Tölvupóstar Jóns Ásgeirs til starfsmanna Glitnis kristalla útrásarsöguna. Litli einstæðingurinn af Nesinu með mikilmennskubrjálæðið hótar að gerast starfandi stjórnarformaður bankans ef undirmenn forstjórans fara ekki að kröfum Jóns Ásgeirs.

Í stefnunni eru birtir tölvupóstar frá Jóni Ásgeiri til Lárusar bankastjóra. Fyrirsögnin á einum pósti er „Þetta eru málin sem ég er að bögga ykkur með, aðallega í tekjuöflun fyrir bankann set þetta skýrt upp the bonus way svo við getum með einföldum hætti klárað málin".
Í skeytinu segir: „Þetta eru málin nenni ekki að bögga ykkur á hverjum degi með þessu enda ætlast ég til að CEO þessara félaga vinni sín mál. Ef við komum þessum málum frá þá er borðið mitt hreint. Annars er kanski best að ég verði starfandi stjórnarformaður Glitnisbanka". Þessa síðustu setningu mætti túlka sem vissa hótun.

Þegar saga útrásarinnar verður skrifuð af yfirvegun er spurning hvernig það verður skýrt að drýldinn gaur eins og Jón Ásgeir náði að beygja undir sig fólk sem virðist heilt á geðsmunum. Líkleg skýring er að Jón Ásgeir sé sýkópatískur lygari. Hversdagslegt fólk gerir ráð fyrir að meðborgarar sínir hafi almennar siðareglur í heiðri um sannsögli og heiðarleika.  Týpur eins og Jón Ásgeir þrífast vegna þess að það er til heiðarlegt fólk. 

Í þessu ljósi er fyrirgreiðsla sem endurreistir bankar veita Jóni Ásgeiri tilræði við þjóðina. Hvorki meira né minna.

 

Saksótt fyrir útrásarglæpi

Hvítflibbaglæpir útrásarauðmanna bitnuðu á saklausu fólki sem ýmist tapaði beint á ruglkeyrslunni í gegnum lífeyrissjóði sína eða óbeint með því að bankaauðmenn gerðu samsæri gegn krónunni. Eftir hrun var siðleysi útrásarmanna staðfest þegar enginn þeirra gekkst við glæpum sínum.

Á útrásarmönnum er að skilja að þeir hafi verið fórnarlömb lélegs eftirlits og ódýrra lána. Í raun hafi þeir aðeins ,,gert það sem allir hinir voru að gera." Baugsmiðlar gera út á þessa spillingarjöfnun siðleysingjanna.

Skilanefnd Glitnis gefur tóninn með skaðabótarmáli gagnvart auðmönnum og meðhlaupurum í Glitni. Aðrar skilanefndir hljóta að koma í kjölfarið.

Skaðabótamál gegn Glitnis-mönnum

Undirferli aðildarsinna

Aðildarsinnar í Samfylkingunni og Sjálfstæðisflokknum eiga það sameiginlegt að koma ekki hreint fram. Laumupólitík þeirra er að bíða eftir hentugu tækifæri til að setja ESB-aðild á dagskrá þegar þjóðin er andvaralaus og upptekin við annað, eins og til dæmis að takast á við hrunið.

Samfylkingin hefur frá upphafi tíðkað þessa stjórnlist. Forysta Samfylkingarinnar kom ekki hreint fram við flokksmenn sína þegar Evrópumál voru á dagskrá flokksins. Andstæðingum aðildarumsóknar var skipulega haldið utan við umræðu innan flokksins og málflutningur einhliða eftir því. Flokkurinn samþykkti að efna til póstkosningar um áhuga flokksmanna að sækja um aðild.

Í stað þess að spyrja beint hvort Samfylkingin ætti að beita sér fyrir því að Íslendingar sæktu um aðild að Evrópusambandinu lagði forystan eftirfarandi spurningu fyrir flokksmenn:

Á það að vera stefna Samfylkingarinnar að Íslendingar skilgreini samningsmarkmið sín, fari fram á viðræður um aðild að Evrópusambandinu og að hugsanlegur samningur verði síðan lagður fyrir þjóðina til samþykktar eða synjunar?

 Þessi undarlega orðaða spurning var lögð fyrir félagsmenn í póstkosningum haustið 2002. Tillögum um ótvíræðari spurningu um hvort Íslandi ætti að sækja um ESB-aðild var hafnað. Um þriðjungur flokksmanna hafði fyrir því að svara loðmulluspurningunni og meirihluti þeirra sagði já.

Sami hátturinn er hjá fámennum hópi sjálfstæðismanna sem eru aðildarsinnar. Þegar kjósa átti um hvort Ísland ætti að sækja um aðild að ESB eða ekki á landsfundi komu aðildarsinnar grátandi í pontu og báðust undan kosningu. Illu heilli var þeim gefin grið.

Kafbátahernaðurinn sem aðildarsinnar stunda í skjóli aðildarsinnaðs varaformanns Sjálfstæðisflokksins og linku formannsins dregur úr tiltrú fólks á móðurflokki íslenskra stjórnmála.

 

Spillingarjöfnun Baugsmiðla

Jón Ásgeir Baugsstjóri og fylgifé segjast hafa fengið milljarð inn í útgáfufélagið 365-miðla sem heldur utan um útgáfu fjölskyldunnar sem kennd er við Baug. Þessi milljarður er annað tveggja ekki til eða Tortólupeningur Jóns Ásgeirs sjálfs. Landsbankinn sem í reynd á 365-miðla gerði kröfu um að Baugsliðið kæmi með milljarð í reksturinn. Jón Ásgeir brást við eins og honum er tamt, að blekkja.

Hvað gera Baugsmiðlar í þessari stöðu? Jú, þeir spillingarjafna. Meðhlaupararnir með Óaf Þ. Stephensen ritstjóra í broddi fylkingar búa til frétt um að eignarhald á öllum fjölmiðlum sé á huldu.

Spillingarjöfnun er aðferð til að fela lygar. 

Ný ríkisstjórn er forsenda Icesave-samninga

Ríkisstjórn Jóhönnu Sig. getur ekki í þriðja sinn beðið um samninga við Breta og Hollendinga og ætlast til að vera tekin alvarlega. Ísland þarf pólitíska fórn til að fá gömlu nýlenduveldin að samningaborðinu. Alþjóðlega viðurkennd fórn er stjórnarkreppa.

Eini maðurinn sem talar skýrt og skorinort um nauðsyn þess að ríkisstjórnin fari frá er Sigmundur Davíð, formaður Framsóknarflokksins.

Að frátaldri elsku á ráðherrastólum er það skortur á valkostum sem heldur lífi í stjórninni. Sigmundur Davíð og Bjarni Ben. eiga að sameinast um að bjóða Vinstri grænum stuðning til starfsstjórnar undir forsæti Ögmundar Jónassonar. Steingrímur J. verður að víkja vegna Icesave.

Engir Icesave-fundir ráðgerðir