ASÍ hlýtur að leiðrétta þessi mistök

ASÍ setur slæmt fordæmi með því að setja starfsmanni stólinn fyrir dyrnar vegna pólitískrar þátttöku. Málið er grafalvarlegt vegna þess að ASÍ á að verja réttindi launafólks en grefur núna undan þeim. Það heitir almenn pólitísk þátttaka að taka sæti á framboðslista. Ef viðkomandi nær kjöri á Alþingi lítur málið öðruvísi út. Þingmennska er fullt starf og af sjálfu leiðir að ekki er hægt að vera í fullu starfi á tveim vinnustöðum.

ASÍ hlýtur að endurskoða afstöðu sína í málinu.

Framsóknarflokkurinn gagnrýnir ASÍ

Bretar og Bandaríkjamenn læra af Íslandi

Nýjasta bjargráð ríkisstjórnar Obama gagnvart kreppunni fær falleinkunn hjá mönnum eins og Paul Krugman og Josep Stigliz. Breski seðlabankastjórinn segir ríkisstjórn Gordon Brown að hún geti ekki prentað meiri peninga til að kaupa sig úr vandanum.

Bandaríkjamenn og Bretar munu læra af Íslendingum: Ríkið verður að yfirtaka ónýta banka, stroka út hlutafé þeirra og endurfjármagna. Geir H. Haarde er um það bil að fá uppreisn æru.

Sovéskir atvinnurekendur

Talsmaður atvinnurekenda fer á límingunni vegna þess að sum fyrirtæki greiða starfsmönnum sínum umsamdar launahækkanir. Vilhjálmur er eins og sovéskur kommisar sem vill berja atvinnurekendur til hlýðni við hinn eina sanna málstað frestaðra launahækkana. Frestun launahækkana er gerð í skjóli hrunsins sem var í boði fjármáladeildar atvinnurekenda. Hvað ætli stjórnmáladeild atvinnurekenda, Sjálfstæðisflokkurinn, segi um málið?

Samningar hanga á bláþræði

Vaxandi lýðræðishalli í ESB

Vaclav Klaus forseti Tékklands segir í viðtali við Sunday Times að um 75 prósent af löggjöf aðildarríkja Evrópusambandsins komi núna frá embættismönnum í Brussel sem hafi ekkert lýðræðislegt umboð. Lissabonsáttmálinn, sem væntanlega verður samþykktur þegar Írar verða þvingaðir til að fallast á sáttmálan í þjóðaratkvæðagreiðslu í seinna í ár, eykur valdsvið embættismanna í Brussel á kostnað þjóðríkja. Klaus telur að vaxandi lýðræðishalli Evrópusambandsins veiki stöðu þjóðríkja og gefur lítið fyrir evrópska samfélagsvitund - í fyrirsjáanlegri framtíð verði það þjóðríkið sem einstaklingar finni til samkenndar með en ekki stórríki Evrópu.

Sjá viðtal Sunday Times við Klaus.

Siðblind stjórn Spron

Stjórn Spron og forstjóri, Guðmundur Hauksson, keyrðu sparisjóðinn í gjaldþrot með græðgisblinduðum loftkastalarekstri. Í stað þess að biðjast afsökunar á framferði sínu er stjórnin með derring og kennir öðrum um hvernig fór.

 

Harma hvernig yfirtaka SPRON var kynnt

Fatti Kristján stöðuna á hann sjens

Grunngildi Sjálfstæðisflokksins um ábyrgð einstaklingsins, ráðdeild og fyrirhyggju hafa verið fótum troðin af siðblindri frjálshyggju. Til að bæta gráu ofaná svart ætlar mannskemmandi auðhyggjudeild flokksins að keyra Ísland lóðbeint til Brussel. Ef Kristján Þór Júlíusson fer fram gegn erfðaprinsi auðmanna með það á stefnuskrá sinni að gera upp við frjálshyggjuna og hafna draumórum um Evrópusambandsaðild á hann sjens og gæti jafnvel gefið Sjálfstæðisflokknum möguleika í apríl. Á blaðamannafundinum í dag verður Kristján að sýna að hann er læs á stöðuna.

Kristján Þór tilkynnir um framboðsáform

Þér tókst það, Guðmundur Hauksson

Guðmundi Haukssyni og forkólfum Spron tókst að keyra Sparisjóð Reykjavíkur í þrot. Einbeittur vilji Þrotamumma og félaga náði fram að ganga þrátt fyrir að lög voru sett til að hamla gegn græðisvæðingunni og viðvörunarljós blikkuðu í mælaborðinu. Þrotamummi læsti klónum saman við Existubræður og Kaupþingssnillinga og þá var ekki að sökum að spyrja.

Ekki er að efa að hugur Existubræðra og Kaupþingsnonnana sé með starfsfólki Spron.

SPRON til Kaupþings

Sjálftökuflokkurinn

Í Sjálfstæðisflokknum er nokkrir hópar og sjálftökuflokkurinn þeirra stærstur. Sá flokkur lagði grunninn að útrásarfirringunni með því að selja ríkiseigur á tombóluprís til vildarvina. Vilhjálmur Egilsson er launaður starfsmaður sjálftökuliðsins og það að hann skuli leiða svokallaða endurreisnarnefnd sýnir að  Sjálfstæðisflokkurinn hyggst ekkert læra af mistökum síðustu ára.

Á meðan sjálftökuhópurinn ræður ríkjum í móðurflokki íslenskra stjórnmála er engin von til að flokkurinn komist til fyrri áhrifa. 

Fólkið brást, ekki stefnan

Spron og Byr í gjaldþrot

Sparisjóðir voru á sínum tíma stofnaðir til að þjóna almenningi og gerðu það skammlaust lengi vel. Þegar græðgisvæðingin skall á vildu stjórnendur og stofnfjáreigendur komast yfir eigið fé sparisjóðanna með vafasömum hætti. Alþingi reyndi að stemma stigu við yfirganginum og samþykkti frumvarp í febrúar 2004 með 43 atkvæðum gegn einu sem átti að vernda almannahagsmuni.

Græðgisliðið linnti samt ekki látunum fyrr en það tókst að févæða sparisjóðina til fulls og þá tóku snillingarnir við að véla með peninga sem þeir áttu ekki. Alþjóð veit afleiðingarnar, Guðmundur Hauksson og félagar keyrðu sjóðina í þrot.

Spron og Byr koma núna með betlistaf í hendi til ríkivaldsins og vilja endurfjármögnun með almannafé. Ríkisstjórnin á að segja nei - stóru sparisjóðirnir Spron og Byr gegna engu hlutverki lengur fyrir almenning og það á ekki að láta þá fá krónu með gati.

 

 

 

Ódæmdir glæpamenn og atvinnulífið

Talsmaður Samtaka atvinnulífsins stekkur upp á nef sér þegar forsætisráðherra segir siðleysi að fyrirtæki komi sér undan að greiða starfsfólki umsamin laun en borgar eigendum sínum á sama tíma arð. Til skamms tíma réðu ríkjum hjá Samtökum atvinnulífsins fjármálafurstar sem komu þjóðinni á vonarvöl með svikum og prettum.

Talsmaður atvinnulífsins verður að virða forsætisráðherra og þjóðinni allri það til vorkunnar að á meðan ódæmdir glæpamenn valsa um götur og torg er þolinmæðin lítil gagnvart atvinnulífinu almennt. 

Samtök atvinnulífsins skulda þjóðinni greinargerð fyrir sínum þætti í hruninu. Á meðan engin merki iðrunar og sjálfsgagnrýni sjást hjá samtökum atvinnurekenda verða þau í skammarkróknum. Og þeir atvinnurekendur sem víkja tommu frá þröngum vegi dyggðarinnar kalla yfir sig fordæmingu.

Atvinnurekendur reiðir Jóhönnu