Björgvin G. lýsir sjálfan sig fávita

Björgvin G. Sigurðsson fyrrum viðskiptaráðherra segir í hrunbók sinni að honum sem ráðherra hafi verið ókunnugt um stofnun Icesave-reikninga Landsbankans í Hollandi sem hafa bakað þjóðinni skaðabótakröfur sem hlaupa á tugum milljarða króna. Stöð 2 rakti í kvöld fjölmiðlafréttir sem voru af stofnun Icesave-reikninga í Hollandi vorið 2008.

Fréttastofa Stöðvar 2 bar þessar fréttir undir Björgvin G. Sigurðsson. Svarið sem hann gaf var að þar sem ekki hafi borist formleg tilkynning til stjórnarráðsins um að Landsbankinn hafi stofnað Icesave-reikninga í Hollandi þá vissi hvorki hann né aðrir ráðherrar um tilvist reikninganna.

Sem sagt: Allir fjölmiðlar vissu um reikninga Landsbankans í Hollandi og allur almenningur vissi líka um þá. Björgvin G. Sigurðsson þáverandi viðskiptaráðherra vissi hins vegar ekki um reikningana vegna þess að ráðuneyti hans hafði ekki borist tilkynning um þá.

Hvers vegna ætti þjóðin að halda Björgvini G. uppi á þingfararkaupi þegar hann ætti að vera á örorkubótum?

Steingrimur J. pantaði stalínískt lófaklapp

Í lok upphafsræðu sinnar á landsfundinum krafðist Steingrímur J. formaður stalínískrar hyllingar viðstaddra sem hann og fékk með lófataki. Hugur fylgdi ekki máli enda sjái allir í gegnum kjánalegu taugaveiklun formannsins. En þar sem enginn ætlaði að skora Þistilfjarðarpilt á hólm lét fólk sér líka að sýna hjarðhegðun.

Valdaákefð Steingríms J. og forystunnar er að verða pínleg fyrir sígilda ísenska vinstrimenn sem hvorttveggja er annt um fullveldið og hafa andstyggð á hernaðarbrölti. Fullveldinu er ógnað með umsókninni um Evrópusambandsaðild og utanríkisráðherra landsins endurnatóvæðist og temur sér tungutak krata kaldastríðsins.

Steingrímur J. gæti staðið uppi með völdin óskert en kostnaðurinn yrði fyrirlitning fyrrum samherja.

Líkjast kommúnistaflokkunum

12,5 prósent fullveldi Írlands

Fyrirtækjaskattur er hvað lægstur á Írlandi af Evrópusambandslöndum, 12,5 prósent. Írum tókst með lágum sköttum að fá alþjóðleg stórfyrirtæki til landsins. Kröfur standa upp á Íra, af hálfu Evrópusambandsríkja, að hækka fyrirtækjaskattinn. Svo gæti farið að Evrópusambandið skilyrti fjárhagslegan stuðning við Íra að þeir hækkuðu skattinn.

Bandarísk stórfyrirtæki eins og Hewlett-Packard, Microsoft, Intel, Merril Lynch og Google skrifuðu írskum stjórnvöldum bréf þar sem varað er við því að fyrirtækjaskattur verði hækkaður. 

Í Telegraph er haft eftir forseta Frakklands að hann búist við því að Írar ,,noti fullveldi sitt" til að hækka fyrirtækjaskatta til samræmis við Evrópusambandsríki.

Írar eiga fárra kosta völ enda í spennitreyju Evrópusambandsins.

Grunaður glæpamaður bankastjóri

Þorvaldur Lúðvík Sigurjónsson forstjóri Sögu banka er með réttarstöðu sakbornings í rannsókn sérstaks saksóknara á ólögmætum blekkingum til að halda uppi hlutabréfaverði í Glitni. Verði hægt að sanna sekt Þorvalds Lúðvíks er staðfest að hann sé innsti koppur í búri spillingarliðsins sem hratt efnahagskerfinu fram af bjargbrúninni haustið 2008.

Stjórn Sögu er haldin meðvirkni af háu stig og samþykkir einróma að halda grunuðum glæpamanni við stjórnvöl bankans. Jafnframt fer stjórnin fram á það að sérstakur saksóknari flýti rannsókninni á Þorvaldi Lúðvík.

Undirmálin í skilaboðum stjórnarinnar eru þessi: við viljum sýknu í máli Þorvaldar Lúðvíks. Hrokinn í dómgreindarlausa sukkliðinu sem stýrir íslenskum fjármálastofnunum breyttist ekkert við hrun.

Verður áfram forstjóri Sögu

ESB-umsóknin komin á gjörgæslu

Vinstri grænir heykjast á því að samþykkja það sem yfirgnæfandi meirihluti flokksmanna vill, að draga umsóknina tilbaka um aðild að Evrópusambandinu, vegna þess að þar með yrðu stjórnarslit. Ályktun sem samþykkt var á flokksráðsfundi í dag staðhæfir að hagsmunum Íslands sé betur borgið utan Evrópusambandsins og hvetur trúnaðarmenn flokksins að halda fram þeirri stefnu. Ennfremur

Til þess að umræðan verði í reynd sanngjörn og lýðræðisleg þarf að nást sátt um skýrar leikreglur sem tryggja jafna stöðu allra sjónarmiða og nái meðal annars utan um kostnað og fjármögnun áróðursstarfsemi. Þar til þjóðin hefur tekið sína ákvörðun þarf að tryggja að ekki verði gerðar neinar breytingar á stjórnsýslunni eða íslenskum lögum í þeim eina tilgangi að laga íslenskt stjórnkerfi fyrirfram að reglum Evrópusambandsins. Ekki verði heldur tekið við styrkjum sem beinlínis eiga að undirbúa aðild. Flokksráðið hvetur til þess að svo fljótt sem unnt er verði í viðræðuferlinu látið reyna á meginhagsmuni Íslands eins og þeim er lýst í samþykkt Alþingis.

Engin aðlögun, sem sagt, engir styrkir og hömlur á áróður sem fjármagnaður er frá Brussel. Utanríkisráðuneyti Össurar og Samfylkingar getur ekki haldið áfram viðræðum við Evrópusambandið á þeim forsendum sem boðið er upp á í Brussel, þ.e. aðlögun.

Hótun um stjórnarslit heldur lífi í umsókninni en hún er engu að síður komin á gjörgæslu.

Atkvæði um ríkisstjórn hjá Vinstri grænum

Forysta Vinstri grænna þurfti að fá sérstaka stuðningsyfirlýsingu til að halda áfram ríkisstjórnarsamstarfi. Flokkurinn er í fyrsta sinn í sögu sinni í ríkisstjórn, kjörtímabilið er ekki hálfnað, og forystan þarf að biðja um blessun flokksmanna að halda áfram.

Hvorki almennir flokksmenn né kjósendur Vinstri grænna eru ánægðir með þátttöku flokksins í feigðarför Össurar til Brussel. 

Á fundinum fékk forysta flokksins takmarkað umboð til að sitja áfram í umsóknarríkisstjórninni. Hvorki stendur til að taka þátt í aðlöguninni né að þiggja styrki frá Evrópusambandinu.

Það verður fylgst með því hvernig ráðherrar flokksins fara með samþykktir flokksráðsins.

„Ótvíræður stuðningur“

Valdastjórnmál sigra hugsjónir

Flokksráð Vinstri grænna staðfestir að hagsmunum Íslands sé betur borgið utan Evrópusambandsins. Flokksráðið hafnar aðlögunarferli Íslands að Evrópusambandinu. Á hinn bóginn heykist flokkráðið á því að krefjast þess að aðildarviðræður verið stöðvaðar.

Borgarastyrjöldin um fullveldið heldur áfram.

ESB tillaga felld

Þorsteinn hótar að kljúfa Sjálfstæðisflokkinn

Þorsteinn Pálsson fyrrverandi formaður Sjálfstæðisflokksins hótar að kljúfa flokkinn ef ekki verður breyting á afstöðu sjálfstæðismanna til aðildar Íslands að Evrópusambandinu. Þorsteinn gekk í þjónustu Össurar Skarphéðinssonar utanríkisráðherra og situr í samninganefnd Íslands eftir að hafa starfað í þágu Jóns Ásgeirs Jóhannessonar sem ritstjóri Fréttablaðsins.

Þorsteinn hefur fastan dálk á leiðaraopnu Fréttablaðsins og skrifar í dag um stöðu aðildarumsóknarinnar. Þorsteinn vill að Sjálfstæðisflokkurinn leggi Samfylkingunni lið við að koma Ísalandi í Evrópusambandið. Ef ekki sé líklegt að aðildarsinnar úr röðum sjálfstæðismanna muni bjóða fram sérlista við næstu kosningar.

Hér hefur um skeið verið tómarúm á hægri vængnum að þessu leyti. Líklegt er að það tómarúm muni fyllast fyrir næstu kosningar. Þar liggur sóknarfæri fyrir Sjálfstæðisflokkinn, standi vilji til að nýta það.

Þorsteinn hélt fund í Valhöll í síðustu viku til að ræða umsóknina. Benti hann m.a. á þau rök fyrir inngöngu í Evrópusambandið að tollafgreiðslukerfi ESB væri eftirsóknarvert.

Greiðsluvilji er græðgishugtak

Fólk flest er hvorki kjánaprik né siðleysingjar. Á toppi útrásarinnar voru siðleysingjar en á botninum kjánaprik. Siðleysingjarnir trúðu að endalaust mætti blekkja aðra til að setja peninga í loftkastala. Kjánaprikin voru sannfærð um að siðleysingjarnir væru sigrandi fullhugar framtíðarinnar og gerðu yfirgengilega vitlausar fjármálaráðstafanir í trausti þess að siðleysingjarnir yrðu til frambúðar menn ársins.

Hrunið afhjúpaði hvorttveggja siðleysingja og kjánaprikin.

Sameiginlegt skipbrot býr til nýveröld blekkingar: Jón Ásgeir og Hannes Smára hafa ekki mikinn greiðsluvilja. Kjánaprikin ekki heldur.

 

Baráttan um svartsýnina

Hagsmunasamtök heimilanna vilja allsherjarlækkun á skuldum einstaklinga /heimila upp á 15 til 20 prósent. Slík aðgerð fæli í sér ríkisvæðingu heimilanna. Fjármunir sem færu í niðurgreiðsluna kæmu frá skattgreiðendum. Aðeins lítill hluti þeirra sem fengi niðurgreiðslu þyrfti á henni að halda.

Til að réttlæta málflutning sinn mála Hagsmunasamtökin stöðuna eins svarta og mögulegt er. Kannanir Seðlabanka og Hagstofu sýna hlutfall heimila í vanskilum á bilinu 10 - 20 prósent. 

Óráð er að grípa til alsherjaaðgerða til að laga stöðu fimmtungs heimila landsins.