Pálmi og Jón Ásgeir kom upp um sig

Auðmennirnir Pálmi í Fons og Jón Ásgeir Jóhannesson kenndur við Baug áttu saman 365-miðla fyrir hrun, en eftir hrun er eiginkona Jóns Ásgeirs skrifuð fyrir fjölmiðlaveldinu - þótt Landsbankinn eigi í reynd batteríið. Hvorki Pálmi né Jón Ásgeir hafa nokkru sinni sýnt dagskrárgerð eða ritstjórnarefni fjölmiðla áhuga.

Hugur tvímenningana stendur til þess að ákveða hvað birtist í fjölmiðlum en þó einkum hvað birtist ekki. Báðir hafa þeir á sama sólarhringnum rokið upp til handa og fóta vegna frétta um snúninga og fléttur í kringum Iceland-verslunarkeðjuna.

Pálmi í Fons var einn af skuggalegu samsærismönnunum í Öskjuhlíð á sínum tíma þegar innflytjendur grænmetis skiptu með sér markaðnum. Jón Ásgeir er dæmdur maður. Báðir hafa þeir margt að fela og hvorugur ætti að eiga fjölmiðla.

Best heppnuðu kaup á breskum markaði

Samfó býður Steingrím J. velkominn

Aðildarsinnar í Samfylkingunni halda ekki vatni yfir sinnaskiptum Steingríms J. um helgina þar sem hann sagðist hlynntur því að halda áfram ferlinu sem hófst með umsókninni. Gísli Baldvinsson heldur úti samfylkingarbloggi í kjördæmi formanns Vg. Í athugasemdakerfi Gísla skrifar Úlfar Hauksson fyrrum formaður Evrópusamtakanna

Það er í raun ekki hægt að lesa annað í tilsvörum Steingríms en að hann sé búinn að skipta um skoðun í ESB málinu. Hann er a.m.k. ekki á sömu skoðun og hann var; að ESB aðild komi ekki til greina.

Úlfar vekur athygli á því sem alkunna er: Það er ekki hægt að sækja um aðild að Evrópusambandinu nema vera fylgjandi inngöngu. Steingrímur J. vissi þetta 2005 en valdagræðgin blindaði honum sýn fjórum árum síðar.

Úlfar þykist vita hvar Steingrímur J. á heima

Ég efast þó um að Steingrímur hafi kjark til að viðurkenna skoðanaskipti sín opinberlega. Hann þyrfti þá að skipta um flokk í leiðinni. Reyndar er það svo að maður skilur ekki hvernig skynsemisarmur VG þolir við í þessari hjörð. Steingrímur, Árni Þór, Katrín, Björn Valur ofl eiga að sjálfsögðu að skipta yfir í Samfylkingu jafnaðarmanna. Mun betri íverustaður en vinstri sósíalistabælið.

Dómgreindin brást Steingrími herfilega þegar hann samdi við Össur um myndun Jóhönnustjórnar og aðildarumsókn. Maður sem einu sinni sýnir sig kexruglaðan er tæplega traustsins verður.

Ríkisstjórnin elur á sundrungu

Ríkisstjórn Jóhönnu Sig. elur á sundrungu meðal þjóðarinnar. Sama hvert litið er þá velur ríkisstjórnin ófrið og hávaða fremur en frið og spekt. Evrópumálin, kvótaumræðan, uppgjörið við hrunkvöðla, afstaða til skuldauppgjörs og nú síðast niðurskurðurinn.

Afleiðingin er snaraukin svartsýni. Almenningur hefur gefist upp á ríkisstjórninni.

Því miður er lítið haldreipi í stjórnarandstöðunni sem er kosningafælin þar sem hún telur, Sjálfstæðisflokkurinn þó sérstaklega, að kosningar gætu riðlað  stöðu stjórnmálastéttarinnar.

Vonleysi endurspeglast í svartsýninni sem mælist í væntingavísitölu Gallup.

Íslendingar verulega svartsýnir

6,4% atvinnuleysi hér en 10% í ESB

Í Evrópusambandinu öllu eru 9,6 prósent atvinnuleysi og í þeim löndum sem hafa evru er atvinnuleysið 10 prósent. Á Íslandi er atvinnuleysið 6,4 prósent og þykir mikið en það sem samt sem áður verulega undir langtímameðaltali í Evrópusambandinu.

Þau ríki sem urðu hvað harðast úti i kreppunni ásamt Íslandi eru Grikkland þar sem atvinnuleysið er 12,2 prósent; Írland með atvinnuleysi upp á 13,9 prósent og Lettland býr við 19,5 prósent atvinnuleysi.

Hér eru upplýsingar um atvinnuleysi í Evrópusambandinu.

6,4% atvinnuleysi í haust

Afbrigðilega umsóknin og reglur ESB

Æ betur kemur í ljós hversu illa undirbúin umsóknin er um aðild Íslands að Evrópusambandinu. Málflutningur aðildarsinna gengur helst út á það hve undanþágurnar eru glæsilegar sem í boði eru. Undanþágurnar eru ær og kýr aðildarsinna; íslenskir embættismenn eru jafnvel að streða við það í Brussel að fá undanþágu frá aðlögunarferlinu sem Evrópusambandið notar til að taka inn ný ríki.

Ríkisstjórnarflokkarnir bera ábyrgð á umsókninni en aðeins annar þeirra vill í Evrópusambandið. Úti í þjóðfélaginu eru engir að berjast fyrir inngöngu. Samtök iðnaðarins hafa lagt árar í bát og engin kom ályktunin frá þingi ASÍ til stuðnings Brusselleiðangri.

Af hálfu Evrópusambandsins er ekki litið á aðildarumsókn með hálfkæringi. Í Brussel er tekið á móti  umsókn af alvöru og festu og gert ráð fyrir að umsóknarþjóð hafi unnið heimavinnuna sína og samstaða sé um að æskja inngöngu. Evrópusambandið telur þjóðaratkvæðagreiðslu aðeins formsatriði sem afgreitt er í lok aðlögunarferlis.

Á vef utanríkisráðuneytisins er aðlögunarferlið útskýrt myndrænt. Össuri og embættismönnunum tekst að komast hjá því að nota aðlögun. Eftirfarandi setning kemur upp um strákinn Tuma: ,,Ísland lýkur við gerð lista yfir innleiðingu löggjafar ESB." Listinn mun geyma aðlögunarkröfu ESB -  en það eru 90 þúsund blaðsíður af lögum og reglum, mínus það sem við höfum tekið upp í gegnum samninginn um Evrópska efnahagssvæðið.

Í skjali ráðuneytisins kemur fram að áður en Íslendingar fá tækifæri til að greiða atkvæði um aðildarsamning hefur eftirfarandi gerst:

a) Ísland hefur aðlagað stjórnsýsluna lögum og reglum ESB

b) Leiðtogaráð ESB hefur samþykkt samninginn og Evrópuþingið sömuleiðis

c) Aðildarsamningur hefur verið undirritaður af öllum aðildarríkjum ESB og Íslandi

Augljóst er af ferlinu að þjóðaratkvæðið er hugsað sem hátíðleg athöfn þar sem þjóðin staðfestir gjörðir stjórnvalda enda hafa stjórnvöld unnið í samræmi við yfirlýstan vilja þings og þjóðar. Eins og alþjóð veit er því ekki að heilsa á Íslandi. Ríkisstjórn er ekki með umboð þjóðarinnar til að fara í aðlögunarferli að Evrópusambandinu. Því fyrr sem umsóknin er dregin tilbaka því betra.

 

 

Snúningar Jóns Ásgeirs og Landsbankinn

Dæmin um ömurlegt viðskiptasiðferði Jóns Ásgeirs Jóhannessonar og viðskiptafélaga hans hrúgast upp. Svik og blekkingar eru vægustu orðin sem hægt er að hafa um það hvernig íslensku bankarnir voru tæmdir til að fjármagna rúllettukapítalismann.

Þrátt fyrir að upplýsingarnar um frammistöðu Jóns Ásgeirs gefi ekki beinlínis tilefni til að treysta honum heldur Landsbankinn áfram að styðja við eignarhald Jóns Ásgeirs á fjölmiðlasamsteypunni 365-miðlar.

Er ekki kominn tími til að setja Jón Ásgeir í skammakrók íslenskra fjármálastofnana?

Viðskipti með Iceland rannsökuð

Heimssýn kennir heimskum að lesa

Íslenskir aðildarsinnar eru margir hverjir einfaldar sálir. Í málfluningi þeirra heyrist oft það sjónarmið að  gangi Ísland ekki aðlögunina að Evrópusambandinu til enda og geri aðildarsamning í lokin sé útséð með að fólk fái nokkru sinni að vita ,,hvað er í boði." Málssvari klíkunnar í kringum Steingrím J., Björg Eve Erlendsdóttir, skrifar í Smuguna

Heimssýn leyfir ekki að þjóðin kynni sér Evrópusambandið. Enda er það óþarfi, því sannleikur Heimssýnar liggur fyrir og efist menn um hann er stutt í landráðastimpilinn.

Málflutningur Bjargar Evu gengur út á að án samnings um aðild viti Íslendingar ekki hvað Evrópusambandið er fyrir nokkuð. Úti í hinum stóra heimi telja leikir sem lærðir sig geta haft upplýsta afstöðu til þess hvað Evrópusambandið er án þess að hafa hugboð um íslenskan aðildarsamning.

Erlendis fylgjast menn með fréttum, lesa greinar og bækur um Evrópusambandið og mynda sér skoðun. Ekki frítt við að einhverjir félagar í Heimssýn hafi stundað slíkt.

Heimsku íslensku aðildarsinnarnir kunna ekki að lesa heldur bíða þeir eftir aðildarsamningi til að mynda sér afstöðu til Evrópusambandsins. Líklega gera þeir ráð fyrir að Össur Skarphéðinsson segi þeim undan og ofan af aðildarsamningi, færi svo illa að hann yrði gerður.

Til að bæta Björgu Evu og öðrum af hennar andlega slekti hyggst Heimssýn bjóða lestrarnámskeið. Skráning er á [e-mail] 

Össur fer pólitískum hamförum

Össur hlýtur að hafa einhverja embættismenn í utanríkisráðuneytinu í skotlínu vegna þess að þeir höfðu samskipti við breska og bandaríska starfsbræður sína í aðdraganda Íraksstríðsins fyrir sjö árum. Véfréttarstíll Össurar í morgunútvarpi Rásar 2 verður ekki skilinn á annan veg þann að væntanleg séu stórtíðindi.

Þjóðin bíður með öndina í hálsinum yfir næsta þrekvirki Össurar utanríkisráðherra sem hefur fundið í ráðuneyti sínu gögn sem sýna starfsmenn ráðuneytisins ræða við starfsbræður sína í Bretlandi og Bandaríkjunum.

Þegar Össur hefur hreinsað úr ráðuneytisfjósinu hlýtur að vera stutt í næsta stórpólitíska útspilið. Hver veit, kannski hafa íslenskir embættismenn rætt við rússneska diplómata.

Haldið ykkur fast, bíðið spennt því Össur er rétt að byrja.

Lögðu áherslu á að Ísland styddi hernað

Kvenleg gildi í pólitík

Kynjuð pólitík er stundum höfð í frammi í stað sígildrar jafnréttisbaráttu kynjanna. Kynjuð pólitík gerir ráð fyrir því að eðliseinkenni kynjanna komi fram í einstaklingum sem leggja fyrir sig stjórnmál. Samkvæmt skilgreiningu ber kona í sér kvengildi en karlar karllæg gildi.

Þeir sem halda fram kynjuðum stjórnarmiðum í pólitík þurf að svara því hvað er kvenlegu gildi einkenna stjórnmálamenn eins og Jóhönnu Sigurðardóttur, Margréti Thatcher og Goldu Meir.

Skrifað í tilefni dagsins.

Bein svik

Aðild að Evrópusambandinu er ekki jaðarmál sem hægt er að versla með í pólitískum hrossakaupum. Aðildarsinnar og andstæðingar aðildar sammála að spurningin um aðild er höfuðmál stjórnmálanna. Af því leiðir að almenningur á þann skýlausan rétt að stjórnmálaflokkar geri grein fyrir afstöðu sinni til aðildar að Evrópusambandinu í aðdraganda kosninga.

Við kosningarnar vorið 2009 lagði Samfylkingin einn flokka áherslu á aðild að Evrópusambandinu. Flokkurinn hafði í kosningunum 1999, 2003 og aftur 2007 verið með sömu áherslu en alltaf slegið ESB-málin af þar sem augljóst var að ekki væri meirihluti, hvorki á þingi né með þjóðinni, fyrir aðild að Evrópusambandinu.

Samfylkingin fékk 29 prósent atkvæða vorið 2009. Innan við þriðjungur þjóðarinnar kaus sér þann flokk sem vildi án fyrirvara sækja um aðild að Evrópusambandinu. Samkvæmt hefðum og venjum stjórnmála ætti krafa Samfylkingarinnar um ESB-aðild að falla dauð niður - flokkurinn fékk ekki nægt fylgi.

Þau pólitísku hryðjuverk voru unnin vorið 2009 að Samfylkingin neitaði að mynda ríkisstjórn með Vinstrihreyfingunni grænu framboði nema forysta Vg gengi á bak orða sinna og sviki kjósendur sína og stefnuskrá. Krafa Samfylkingarinnar um að forysta Vg samþykkti að umsókn um aðild yrði send til Brussel var pólitísk fjárkúgun.

Forysta Vg lyppaðist niður. Kemst hún aftur á lappir?

Fleiri taka undir áskorun á VG