Bankastjóri, útvarpsstjóri og áhyggjur ráðherra

Telegraph segir að Alison Rose, bankastjóri breska bankans NatWest, hafi orðið að segja af sér eftir að skrifastofa forsætisráðherra Bretlands hafi lýst ,,verulegum áhyggjum" yfir því að Rose ætlaði að sitja áfram.

Breska ríkið á um 40 prósent í NatWest. Bankastjórinn lak röngum upplýsingum um einkafjármál Nigel Farage til fréttamanns BBC til að þjóna pólitískum rétttrúnaði.

Rose bankastjóri er fulltrúi elítu sem í nafni dygða tekur lögin í sínar hendur, ákveður hver sé verðugur og hver ekki. Woke hugmyndafræði á sterum.

Íslenska ríkið á RÚV 100 prósent. Ríkisfjölmiðillinn á aðild að misnotkun á andlega veikri eiginkonu Páls skipstjóra Steingrímssonar sem byrlaði Páli, stal síma hans og afhenti RÚV til afritunar.

Eftir að lögreglurannsókn hófst sumarið 2021 hafa þrír fréttamenn á RÚV hætt störfum. Rakel Þorbergsdóttir fréttastjóri, Helgi Seljan fréttamaður og Þóra Arnórsdóttir ritstjóri Kveiks. Vitað er að Þóra er sakborningur í lögreglurannsókninni. Starfslok allra þriggja má rekja til þróunar lögreglurannsóknar, sem jafnt og þétt hefur undið fram og varpað skýrari ljósi á rás atburða. RÚV fær aðra fjölmiðla í bandalag með sér að segja sem fæstar fréttir, - jafnvel þótt vitað sé að lögregluskýrslur séu á borðum ritstjórna.

Lögregluskýrslurnar eru í umferð þar sem sex sakborningar og tveir brotaþolar fá aðgang að þeim. Þeir sem fylgjast með umræðunni vita hvað snýr upp og hvað niður í málavöxtu. Stutta sagan er að Namibíuherför RÚV, Stundarinnar og Kjarnans, RSK-miðlar, endaði með misþyrmingu á andlega veikri þáverandi eiginkonu Páls skipstjóra, sem að undirlagi fjölmiðlanna þriggja byrlaði eiginmanni sínum til að stela af honum snjallsíma og fá í hendur blaðamanna til afritunar. Gögnin úr símanum notuðu fjölmiðlarnir í herferð sem gekk út á að Samherji ræki skæruliðadeild er skipstjórinn veitti forstöðu.

Stefán Eiríksson útvarpsstjóri hefur enga grein gert fyrir aðkomu RÚV að sakamálinu. Útvarpsstjóri er eins og bankastjórinn Rose, fulltrúi elítu sem tekur lögin í sínar hendur. Munurinn á Íslandi og Bretlandi er sá að fjölmiðlar og æðstu ráðamenn í landi Engilsaxa sögðu hingað og ekki lengra við siðaleysi og lögbrotum réttlætisriddarana.

Skyldi forsætisráðherra Íslands, Katrín Jakobsdóttir, eða Lilja Alfreðsdóttir menningarráðherra, lýsa áhyggjum yfir stöðu ríkisfjölmiðilsins og jafnvel ,,verulegum áhyggjum" af stöðu mála? Eða er siðleysi og lögbrot ríkisfjölmiðilsins stundað með blessun og velvilja æðstu ráðamanna?

 

 

 

Bankastjórinn segir af sér vegna máls Farage

Ellilífeyrir sem borgaralaun, sanngirni og siðleysi

,,Mér er refsað fyr­ir að hafa lagt til hliðar sparnað til elli­ár­anna og skatt­ur­inn minn, sem fór til TR, sit­ur því eft­ir enn stærri í vasa TR.
Þetta er auðvitað al­veg risa­s­vindl, sama hvort það er byggt á ein­hverj­um lög­um eða reglu­gerðum. Al­veg sama þótt þetta hafi verið látið viðgang­ast í mjög lang­an tíma. En þjóf­ur er og verður alltaf þjóf­ur, sama hvað hann kall­ar sig."

Ofanritað er niðurlag greinar Árna Tómasar Ragnarssonar læknis í Morgunblaðinu sem hefur farið víða og þykir hitta naglann á höfuðið. TR stendur fyrir Tryggingastofnun.

Í landinu eru tvö kerfi sem eiga að sjá til þess að fólk eigi í sig og á þegar starfsdegi lýkur. Þriðji þátturinn í framfærslunni er auðvitað einstaklingurinn sjálfur. Góðu heilli hefur aldrei verið fjöldaatvinnuleysi á Íslandi. Allir núlifandi Íslendingar með starfsævina að baki eiga að hafa borð fyrir báru, eftirtekjur af um 40 ára vinnu. Nema, auðvitað, þeir sem ekki kunna fótum sínum forráð og sólunda öllu sem þeir koma nálægt, hvort heldur fjölskyldulífi eða fjármálum. Þeir eru um fimmtungur þjóðarinnar, flestir vinstrimenn.

En það eru framfærslukerfin tvö sem þarf að ræða, fimmtungshálfvitarnir eru, voru og verða alltaf. Í fyrsta lagi er opinber framfærsla, ellilífeyrir, frá Tryggingastofnun sem fjármögnuð er af skattfé, ríkissjóði. Í öðru lagi lífeyrissjóðir sem taka af launþegum hlutfall tekna yfir starfsævina og ávaxta. (Látum liggja á milli hluta samtryggingu lífeyrissjóða og séreign).

Ríkið, Tryggingastofnun og forverar, fjármagnaði upphaflega ellilífeyrir þegar fáir eða engir lífeyrissjóðir voru starfandi. Lífeyrir var ölmusa, fátækrahjálp. Í gamla bændasamfélaginu annaðist fjölskyldan gamalmennin. Smátt og smátt var farið að líta á lífeyrir TR sem borgaralaun. Allir sem ná ákveðnum aldri og ljúka störfum eiga rétt á borgaralaunum/ellilífeyri frá TR/ríkinu.

Um eða upp úr 1970 tók núverandi lífeyrissjóðakerfi á sig mynd. Það þýðir að nær allir núlifandi eftirlaunaþegar sem átt hafa eðlilega starfsævi, ekki glímt við vanheilsu, unnið sem launþegar en ekki í neðanjarðarhagkerfinu (svört vinna) og ekki unnið launalaust sem húsmæður/húsfeður, eiga að hafa tryggt sér lífeyri til að lifa af - með reglulegum greiðslum í lífeyrissjóð yfir starfsævina.

Ef ellilífeyrir frá TR er borgaralaun eiga allir, ríkir sem fátækir, að fá sömu greiðslu óháð tekjum frá lífeyrissjóðum.

Á hinn bóginn. Ef lífeyrir frá TR er tekjujöfnun/félagslegt úrræði, kölluð fátækrahjálp fyrr á tíð, er augljóst að þeir sem eru þokkalega haldnir með tekjum úr lífeyrissjóðum eigi ekki að fá framlag frá TR en fátæklingar því meira.

Hvar liggur sanngirnin? Hvar byrjar siðleysið?

Ef greiðslur frá TR eru borgaralaun er algjörlega siðlaust að mismuna fólki, að þeir efnameiri fái lítið sem ekkert en hinir efnaminni fullgilda framfærslu. Sanngjarnt er að allir fái jafnt.  

Ef greiðsla frá TR er fátækrahjálp er fullkomlega siðlaust að þeir efnameiri fái ölmusu sem betur er komin hjá þurfalingum.

Við þurfum sem þjóð að gera upp hug okkar til opinberrar framfærslu og smíða kerfi sem annað tveggja viðurkennir ábyrgð einstaklingsins á lífi sínu eða lítur á borgarana sem þurfalinga frá 67 ára aldri en árin frá barnæsku sem skattgreiðendur.

Eða, sem við tíðkum daginn út og inn, að væla hátt og snjallt um eigin ömurleika þegar við í raun lifum eins og blóm í eggi. Enginn er búmaður sem ekki kann að berja sér.

Fimmtungshálfvitarnir eru hluti mannlífsins. Þjófnaðurinn, sem Árni Tómas læknir gerir að umtalsefni, er vegna fimmtungsins. Huggun harmi gegn er að litbrigði veraldarvolksins yrðu færri án óreiðufólksins. Mótsögn siðaðs samfélags er að heilbrigðum er refsað vegna óheilbrigðra. Orðið heilbrigði er hér notað í sígildri merkingu; heilbrigð sál í hraustum líkama.  

 

BBC biður Farage afsökunar, RÚV ekki Pál skipstjóra

Fréttamaður BBC og fréttastofa breska ríkisfjölmiðilsins biðja Nigel Farage afsökunar á frétt um að bankareikningi Farage hafi verið lokað vegna fjárþurrðar. Afsökin kom eftir þrýsting breska fjölmiðla.

BBC birti ranga og meiðandi frétt um Farage um að hann væri of blankur til að halda opnum bankareikningi. Í raun var um að ræða bankinn var ósammála pólitískum skoðunum Farage, en hann er hægrimaður.

RÚV á aðild að misnotkun á andlega veikri konu, þáverandi eiginkonu Páls skipstjóra Steingrímssonar. Með vitund og vilja RÚV byrlaði konan eiginmanninum, stal síma hans og færði fréttamönnum RÚV til afritunar.

Gögn úr síma Páls skipstjóra notaði RÚV, í samstarfi við Stundina og Kjarnann, til að skálda upp fréttir að Samherji hefði á sínum snærum skæruliðadeild sem skipstjórinn veitti forstöðu. Allt haugalygi. Gögnin úr síma Páls sýna fyrst og fremst að honum og þeim sem hann spjallaði við ofbauð hamfarafréttamennska RÚV og samstarfsmiðla gegn Samherja í Namibíumálinu svokallaða. Þar var haldið fram að útgerðin stæði fyrir stórfelldum glæpum í Namibíu, mútugjöfum og fjársvikum. Rannsókn héraðssaksóknara og skattayfirvalda hér á landi og lögreglurannsókn í Namibíu hefur ekki leitt neitt misjafnt í ljós af hálfu Samherja.  

Sumir myndu segja að brýnna væri að RÚV bæði Pál skipstjóra afsökunar en BBC Farage. Munurinn er sá að á Íslandi eru fjölmiðlar meðvirkir, láta gott heita að blaðamenn misnoti andlega veika og geri atlögu að lífi og heilsu almennra borgara. Til að bíta höfuðið af skömminni er verðlaunum Blaðamannafélags Íslands hlaðið á afbrotamennina.

Wagner-liðar sýna Póllandi áhuga

Eftir meinta valdaránstilraun í Rússlandi söðlaði málaliðaherinn kenndur við þýska tónskáldið Wagner um og hélt til Hvíta-Rússlands, - með blessun rússneskra yfirvalda. Nú segir forseti Hvíta-Rússlands, Lúkasjenkó, að hann eigi erfitt með að halda aftur af áhuga Wagner-liða á Póllandi.

Pólland er Nató-ríki. Þriðja heimsstyrjöld brytist út ef rússneskur málaliðaher herjaði á Pólland. Lúkasjenkó talar í hálfkæringi um innrás í Pólland. Gamanið er grátt enda liður í sálfræðihernaði stjórnvalda í Varsjá annars vegar og hins vegar Pútín forseta í Kreml. 

Löngu er vitað um áhuga Pólverja á vesturhluta Úkraínu, sem fyrrum var pólskt land. Í lok seinna stríðs, eftir sigur á Þjóðverjum, færði Stalín leiðtogi Sovétríkjanna pólsku landamærin í vestur, á kostnað Þýskalands, og hirti í staðinn Austur-Pólland undir Sovétríkin/Úkraínu.

Pútin minnti um daginn Pólverja á tilfærslur Stalíns. Þeim pólsku var ekki skemmt.

Vestur-Úkraína er til umræðu þar sem Austur-Úkraína fellur Rússum í skaut innan tíðar. Gagnsókn úkraínska hersins í Saparosjía gerir sig ekki, landvinningar eru litlir en mannfall mikið. Í Donbass er það rússneski herinn sem sækir fram. Þeir sem gerst þekkja til segja rússneskan sigur í kortunum, jafnvel þeir sem hlynntastir eru málstað Úkraínu.

Jake Sullivan er sá maður í bandaríska stjórnkerfinu sem hvað mest lætur til sín taka í Úkraínustríðinu. Hann viðurkennir að sókn úkraínska hersins gangi fremur hægt en minnir á að meginher stjórnarinnar í Kænugarði sé enn ekki kominn að víglínunni. Sókn Úkraínu hófst 4. júní. Ef meginherinn er enn í hvíldarstöðu tæpum tveim mánuðum síðar, þegar hvorki gengur né rekur á vígvellinum, er herfræðin sérstök, svo ekki sé meira sagt. Sókn á sannfæringar skilar litlu. 

Aukin spenna milli Póllands annars vegar og hins vegar Hvíta-Rússlands og Rússlands gefur sterklega til kynna að Austur-Úkraína sé vestrinu búið spil. Afgangurinn af landinu, Vestur-Úkraína, sé komin á matseðilinn. Umræða um áhuga Wagner á Póllandi er í raun spursmál um hvað verði um afganginn af Úkraínu eftir rússneskan sigur í austri.

Pólland dansar línudans, vill vesturhéruð Úkraínu en án þess að hleypa af stað þriðju heimsstyrjöldinni. Lúkasjenkó og Pútín taka þátt í leiknum og vekja athygli á að Varsjá sé aðeins í 100 kílómetra fjarlægð frá landamærunum. Stalín var þaulæfður að draga landamæri með herfræði í huga. 

 

 

Eiturgræn pólitík

Íhaldsflokkurinn breski gekk í björg hamfarahlýnunar undir forystu fráfarandi formanns, Boris Johnson. Dísil- og bensínbílar skyldu bannaðir frá og með 2030, eftir sjö ár. Íþyngjandi regluverk var sett á húsnæði, bæði nýtt og gamalt, til að hamla gróðurhúsaáhrifum.

Kjósendur kaupa ekki lengur hugmyndafræðina um manngerða hamfarahlýnun og refsa Íhaldsflokknum í aukakosningum. Daginn eftir stórtap stíga ráðherrar fram og segja trúlega höfum við gengið of langt í hamfaratrúnni.

Léleg hugmyndafræði leiðir í ógöngur. Hamfarahlýnun vegna manngerðs koltvísýrings er ruglfræði. Litla eldgosið á Reykjanesi framleiðir daglega jafn mikinn koltvísýring og allt íslenska hagkerfið. Hagkerfið losar um 17 þús. tonn daglega af koltvísýringi en eldgosið allt að 15 þús. tonn daglega. Óvirkar eldstöðvar, t.d. Katla, losa um 12 til 24 þús. tonn daglega. Töluvert meira en allt hagkerfið hér á landi.

Náttúruleg losun koltvísýrings er ekki á dagskrá hugmyndafræði hamfarahlýnunar, aðeins manngerð. Ástæðan er einföld. Ekki er hægt að skattleggja náttúruna og hún lýtur ekki regluverki hins opinbera. Hagkerfið er á hinn bóginn að stórum hluta undir náð og miskunn stjórnvalda.

Stjórnmálmenn, bæði til hægri og vinstri, tóku hugmyndafræði hamfarahlýnunar tveim höndum. Það auðveldar atkvæðaveiðar að þykjast bjarga heiminum samtímis sem yfirvofandi hætta réttlætir að ríkið sé ofan í hvers manns koppi. En það kemur að skuldadögum. Hádegisverðurinn er aldrei ókeypis, loftslagsmáltíðin verður æ dýrkeyptari.

Íhaldsflokkurinn fór illa út úr aukakosningum

Fjölmiðlar þjarma að BBC, ekki RÚV

Breska ríkisútvarpið BBC sagði ranglega í frétt að bankareikningi stjórnmálamannsins Nigel Farage hefði verið lokað af viðskiptalegum ástæðum, Farage væri í fjárhagskröggum. Ástæðan reyndist vera pólitísk. Bankinn lokaði reikningi Farage vegna stjórnmálaskoðana.

Breskir fjölmiðlar herja á BBC að gera grein fyrir óverjandi fréttaflutningi. BBC hefur birt leiðréttingu á rangri frétt. En það þykir ekki nóg. Fréttamaður BBC á að biðjast afsökunar og útskýra hvers vegna röng frétt var birt, skrifar Telegraph.

RÚV sætir ekki sama aðhaldi frá íslenskum fjölmiðlum og BBC frá breskum. Fréttamenn misnotuðu andlega veika konu Páls skipstjóra Steingrímssonar til að byrla og stela síma hans, sem varð uppistaða í raðfréttum RSK-miðla (RÚV, Stundarinnar og Kjarnans).

Þrír þjóðþekktir fréttamenn, Rakel Þorbergsdóttir fréttastjóri, Helgi Seljan fréttamaður og Þóra Arnórsdóttir ritstjóri Kveiks hafa hrökklast frá RÚV eftir að lögreglurannsókn hófst á byrlunar- og símastuldsmálinu um mitt ár 2021. Ekki herja íslenskir fjölmiðlar á RÚV og krefjast upplýsinga um aðild fréttamanna ríkisfjölmiðilsins að alvarlegum afbrotum.

Annað dæmi um silkihanska fjölmiðla þegar RÚV er annars vegar er Sigríður Dögg Auðunsdóttir fréttamaður RÚV og formaður Blaðamannafélags Íslands. 

Samkvæmt Fréttinni er Sigríður Dögg þekkti blaðamaðurinn sem viðurkenndi skattalagabrot upp á tugi milljóna króna fyrir tveim árum en fékk að fela brotið sjónum almennings.

Formaður Blaðamannafélags Íslands taldi ekki fram tekjur af íbúðum sem hann leigði ferðamönnum í skammtímaleiga í gegnum Airbnb. Sigríður Dögg endurgreiddi vangoldinn skatt með 25 prósent álagi í gegnum einkahlutafélag sitt. Fyrir tveim árum skilaði einkahlutafélagið sjö milljón króna hagnaði, samkvæmt Fyrirtækjaskrá. Árin þar á undan var engum ársreikningum skilað.

Formaður stéttafélags blaðamanna fékk sérmeðferð hjá skattayfirvöldum. Aðrir í sömu sporum fengu á sig opinbera málssókn frá saksóknara. Sigríði Dögg var leyft að gera upp vantaldar leigutekjur í gegnum einkahlutafélag, gagngert til að blettur félli ekki á starfsheiður formanns Blaðamannafélags Íslands og fréttastofu RÚV.

Fjölmiðlar, Fréttin undanskilin, sjá í gegnum fingur sér. Ef Sigríður Dögg væri fréttamaður BBC og formaður breskra blaðamannasamtaka kæmist hún ekki upp með að þegja málið af sér. Þögn Sigríðar Daggar og ríkisfjölmiðilsins er sjálfstæð frétt - en ósögð. 

Kaupir Svandís niðurstöðu um Brim?

Svandís ráðherra matvæla gerir samning við Samkeppniseftirlitið um rannsókn á útgerðinni Brim. Í verksamningi er kveðið á um að ráðuneyti Svandísar fylgist með framvindu rannsóknar og hafi heimild til að stöðva greiðslur til Samkeppniseftirlitsins ef ráðuneytið fær ekki þá niðurstöðu sem að er stefnt.

Ofanritað er endursögn á orðum Guðmundar Kristjánssonar forstjóra Brims, sbr. viðtengda frétt.

Allir og amma þeirra vita að Svandís Svavarsdóttir ráðherra Vinstri grænna stundar pólitík sem gefur sér að sjávarútvegurinn sé gerspilltur. Ef frásögn forstjóra Brims er rétt misbeitir Svandís ráðherravaldi í pólitískum tilgangi, kaupir rannsókn til að staðfesta pólitíska fordóma.

Forstjóri Samkeppniseftirlitsins þvertekur fyrir að hann stundi rannsóknir til að þjóna pólitískum markmiðum Svandísar ráðherra. Haft er eftir Páli Gunn­ari Páls­syni forstjóra Samkeppniseftirlitsins:

Rann­sókn­inni mun ljúka með skýrslu sem mun birt­ast op­in­ber­lega. Ráðherra mun fá hana á sama tíma og al­menn­ing­ur. Ráðherra hef­ur ekki, eins og Guðmund­ur virðist halda, mögu­leika á því að stöðva greiðslur ef hann er ekki sátt­ur við niður­stöður Sam­keppnis­eft­ir­lits­ins. Ráðherra mun ein­fald­lega ekki sjá niður­stöður fyrr en at­hug­un er lokið. Það er mik­il­vægt að hafa í huga að í 8. grein sam­keppn­islaga er Sam­keppnis­eft­ir­lit­inu ætlað að skrifa skýrsl­ur af þessu tagi. Það er eng­inn póli­tísk­ur vink­ill á því.

Páll Gunnar viðurkennir að samningur sé á milli Samkeppniseftirlitsins og ráðuneytis Svandísar. Einfaldast er að leggja samninginn fram opinberlega. Þá geta óvilhallir myndað sér skoðun á því hvort hér sé á ferðinni eðlileg athugun á mikilvægri atvinnugrein eða vinstri græn pólitík klædd í málefnalegan búning stjórnsýslu.

Svör Páls Gunnars sögð aumkunarverð

Skoðanakúgun, BBC og RÚV

Viðskiptaritstjóri breska ríkisútvarpsins, BBC, sat við hlið yfirmanns Coutts banka í kvöldverðaboði daginn áður en viðskiptaritstjórinn skrifaði fréttatíst um bankinn hefði lokað reikningum Nigel Farage. Forsætisráðherra Bretlands gagnrýnir samstarf viðskiptabanka og ríkisútvarpsins að knésetja mann með ,,rangar" skoðanir.

Í viðtengdri frétt er haft eftir Farage

þetta mál snýst ekki bara um mig. Þú gæt­ir verið næst­ur...ef ekki er brugðist við þá för­um við hægt og ró­lega inn í fé­lags­legt skipu­lag líkt og rík­ir í Kína, þar sem bara þeir sem hafa „rétt­ar“ skoðanir geta tekið full­an þátt í sam­fé­lag­inu.

Ríkisútvarp er nærtækur samstarfsaðili valdhafa sem telja sig hafa réttar skoðanir. RÚV er til dæmis í samstarfi við starfshóp vinstrimanna í stjórnarráðinu um ,,réttar skoðanir" á málefnum flóttafólks. 

RÚV á að vera fjölmiðill sem endurspeglar þjóðfélagslega umræðu hér á landi. En RÚV birtir ekki sjónarmið sem t.d. Heiðar Guðjóns­son, fjár­fest­ir og fyrr­ver­andi for­stjóri talar fyrir:

Rík­is­stjórn­in er hálf­gert rekald og það er al­ger­lega stefnu­laust. Þannig að stór mál sem skipta okk­ur máli, eins og ís­lensk tunga og menn­ing og hvernig þetta fjöl­menn­ing­ar­sam­fé­lag mun hafa áhrif á okk­ar sam­fé­lag og breyta því var­an­lega og hugs­an­lega óaft­ur­kræft. Hvaða skoðun höf­um við á því?

Margir hafa tekið í sama streng og Heiðar síðustu vikur og mánuði, að verið sé að skipta um þjóð í landinu og það sé fyrst og fremst höfundarverk vinstrimanna.

En RÚV þaggar umræðuna, lætur eins og hún sé ekki til. Skýringuna er að finna í fundargerð stjórnar RÚV. Þar segir útvarpsstjóri, Stefán Einríkisson:

Fulltrúar RÚV áttu fund með starfshópi stjórnvalda um málefni innflytjenda og flóttafólks, en nú er unnið að heildarstefnumótun stjórnvalda á því sviði.

Vinstrimenn í stjórnarráðinu þykjast hafa rétta skoðun á þeirri þróun að Íslendingar tapa jafnt og þétt tungumáli sínu og menningu. Samstarfsaðili vinstrimanna er auðvitað ríkisfjölmiðillinn, RÚV, sem skipulega kemur í veg fyrir að sjónarmið Heiðars Guðjónssonar og margra fleiri komist á framfæri. RÚV er framkvæmdavald pólitíska rétttrúnaðarins í opinberri umræðu. Fundargerðin staðfestir það svart á hvítu.

Valdaöfl réttra skoðana nota ríkisútvarp til að framfylgja skoðanakúgun. Gildir bæði í Bretlandi og á Íslandi. 

 

  

Uppsögn bankaviðskipta af pólitískum ástæðum

Biden semur við Pútín - íslensk aðild?

Biden Bandaríkjaforseti er tilbúinn að semja við Pútín forseta Rússlands. Ástæðan er tvíþætt. Í fyrsta lagi getur Úkraína ekki sigrað Rússland á vígvellinum, - og mun tapa ef stríðið dregst á langinn. Í öðru lagi vaxandi áhyggjur af Kína. Á meðan vestrið grefur sér holu í Garðaríki styrkist Kína jafnt og þétt.

Ofanritað er ekki tilfallandi greining. Höfundurinn er Edward Luttwak. Ferlisskrá hans í bandarískum utanríkis- og öryggismálum nær aftur til kalda stríðsins á sjöunda og áttunda áratug síðustu aldar. Luttwak var innmúraður kaldastríðshaukur en læs á hernaðarlegan og pólitískan veruleika.

Neðanmáls er þess að geta að í viðtalinu segir Luttwak (11:34) að þjóðaratkvæðagreiðslu um hvoru megin landmæranna Donbass-héruðin skuli liggja verði ekki stýrt af íslenskum, já íslenskum, stjórnarindreka í hlutastarfi. Luttwak segir þetta í framhjáhlaupi. Mögulega vísar Luttwak í sögusagnir um að íslenskur stjórnmálamaður sé í umræðunni um hlutverk í væntum friðarsamningum.

Hver gæti það verið? Katrín forsætis? Ólafur Ragnar?

Byrlun og niðurgangur Hallgríms Helgasonar

Hallgrímur Helgason rithöfundur sagðist á opinni síðu á Facebook vera tilbúinn að byrla Páli skipstjóra ,,aftur". Páli var byrlað að undirlagi RSK-miðla 3. maí fyrir tveim árum. Málið er í lögreglurannsókn.

Ummælin lét Hallgrímur falla fimmtudaginn síðast liðinn. Þau fóru á flug og kölluðu á skýringar rithöfundarins. Hann lét ekki ná i sig. Mannlíf og Fréttin sögðu fréttir en ekkert bólaði á viðbrögðum byrlunarskáldsins.

Eftir að hafa ráðfært sig við almannatengla ákvað Hallgrímur krók á móti bragði. Hann bjó til frétt um sjálfan sig.

Verkefnið sem rithöfundurinn setti sér var að rita sjálfsævisögulega frétt er ryddi öðrum óþægilegri af fréttasíðum fjölmiðla. Þekkt trix almannatengla. Um nóttina sat glottið við skriftir.

Á föstudag, þegar orð Hallgríms um að byrla Páli, frá kvöldinu áður, fengu útbreiðslu og vöktu athygli fjölmiðla, var rithöfundurinn tilbúinn með frásögn er vekti samúð og dræpi umræðu um innræti á dreif. Sjálfsafhjúpunin birtist á samfélagsmiðli: ég er með niðurgang.

Á fimmtudagskvöld er Hallgrímur norður í landi með bilaðan bíl og langar að byrla Páli skipstjóra. Daginn eftir glímir rithöfundurinn við pípandi niðurgang. Hann ók sem sagt norður með iðrakveisu.

Hvaða verkstæði var tilbúið að taka við bílnum eftir sex til sjö klukkustunda ökuferð Samfylkingarskálds með skitu?