Aleppo, Varsjá, Stalíngrad og Dresden

Samlíking mannréttindastjóra Sameinuðu þjóðanna á ástandinu í Aleppo í Sýrlandi við þýskt umsátur um Varsjá og Stalíngrad í seinni heimsstyrjöld og loftárásir bandamanna á þýsku borgina Dresden í sömu styrjöld eru réttmætar - séð frá sjónarhóli almennra borgara.

Almennir borgarar eru fórnarlömb stríðsátaka sem brjótast út þegar alþjóðakerfi hrynja. Í seinna stríði hrundi friðurinn sem kenndur er við Versali og komst á eftir uppgjöf Þjóðvera í fyrra heimsstríði.

Aþjóðakerfið sem núna hrynur má kenna við Berlínarfriðinn við lok kalda stríðsins 1989 - 1991. Sameinað Þýskaland bjó til ástand í Evrópu sem Bandaríkin og ESB, með Nató sem verkfæri, nýttu sér til að þrengja að öryggishagsmunum Rússa. Það ferli fékk endastöð í Úkraínu, sem skiptist núna í áhrifasvæði Nató annars vegar og hins var Rússa.

Átökin í Sýrlandi eru staðgenglastríð Bandaríkjamanna og Rússa líkt og Víetnamstríðið var á milli Bandaríkjanna og Sovétríkjanna/Kína á sínum tíma.

Stríðið í Sýrlandi er skoðað í samhengi við Úkraínudeiluna, eins og lesa má um í fréttaskýringu BBC. Almennir borgarar líða fyrir en fá sjaldnast réttlætinu fullnægt. Enginn svaraði til saka fyrir Varsjá, Stalíngrad og Dreseden. Þegar stríðinu lauk urðu sigurvegararnir óðara svarnir óvinir og undirbjuggu næsta stríð. Þessi iðja er kölluð stórveldapólitík.

 

Vill afnema synjunavaldið í máli Aleppo

Birgitta auglýsir stjórnleysi

Birgitta Jónsdóttir, sem ýmist starfar sem þingmaður Pírata á alþingi eða foringi aðgerðasinna á Austurvelli, kallar það stjórnleysi þegar alþingi starfar ekki samkvæmt hennar dagskrá.

Birgitta er aðalhöfundur að þeirri hugmynd að næsta þing starfi í fáeina mánuði og noti tímann til að kollsteypa stjórnarskránni og efna til þjóðaratkvæðagreiðslu um ESB-umsókn Samfylkingar sem dó drottni sínum áramóti 2012/2013.

En auðvitað yrði það ekki stjórnleysi heldur eins og hver annar dagur á Austurvelli.

„Þetta er bara stjórnleysi“

Óþarfi að gera þinghlé fyrir kosningar

Kosningabaráttan er háð í fjölmiðlum og innan veggja alþingis. Alger óþarfi er að gera hlé á störfum þingsins þótt kosningar standi fyrir dyrum.

Þinghlé fyrir kosningar er arfur frá þeim tíma þegar þingmenn fóru með skipum að hitta kjósendur og standa fyrir fundum heima í héraði.

Ekkert mælir geng því að fundir alþingis standi fram að vikunni fyrir kosningar. Þinghlé í viku er meira en nóg til að þingmenn viðri sig við kjósendur.

Funda um framhald þingstarfa

Vilmundur, Sigmundur og skítapakkið

Á síðustu öld var stjórnmálamaður sem hét Vilmundur Gylfason. Hann gerði lítinn flokk, Alþýðuflokkin, stóran í krafti hugmynda. Þegar flokkseigendur töldu Vilmund hafa þjónað sínu hlutverki komu þeir og sögðu ,,nú getum við" og boluðu Vilmundi frá. Vilmundur notaði þriðja nafnorðið í fyrirsögninni hér að ofan um þetta lið.

Sigmundur Davíð gerði Framsóknarflokkinn stóran í krafti hugmynda. Um helgina tóku flokkseigendur sig til og felldu hann úr formannssæti með skítlegum aðferðum.

Sennilega gerir Sigmundur Davíð rétt í að halda áfram, um sinn, starfi innan Framsóknarflokksins og leiða listann í Norðausturkjördæmi.

Kjörþokki skítapakksins er ekki mikill. Eftir kosningar blasa við nýir möguleikar.

 

Sigmundur áfram oddviti

Rekstur fjölmiðla er minnsta málið

Fjölmiðlar sem heild eru ekki í neinum rekstrarvanda. Einstakir miðlar, t.d. 365-miðlar, RÚV og einhverjir netmiðlar eru í vanda vegna mistaka í rekstri. En fjölmiðlun í heild sinni lifir góðu lífi.

Almenningur getur valið um þúsundir miðla, innlendra og erlendra, til að afla sér frétta og afþreyingar.

Aftur er ýmislegt að faglegri stjórnun ýmissa miðla. 365-miðlar eru undir hæl auðmanns sem notaði dagskrárvald fjölmiðasamsteypunnar til að kæfa gagnrýni á viðskipti sín og félaga sinna. RÚV stundar aðgerðafréttamennsku og tekur skipulega hlutdræga afstöðu í fréttaflutningi sínum, til dæmis í ESB-umræðunni. Í vor hannaði RÚV fréttir gagngert til að valda stjórnarkreppu og afsögn forsætisráðherra.

Menntamálaráðherra byrjar á öfugum enda þegar hann skipar nefnd til að ræða stöðu fjölmiðla. Hann ætti að byrja á nefnd sem fjallaði um tilgang fjölmiðla og faglegan rekstur þeirra. Best væri þó að hann léti alfarið vera að skipta sér af fjölmiðlun. Hún þrífst ágætlega án afskipta ráðherra. Nema að hann mætti alveg leggja RÚV niður.

Úttekt verði gerð á stöðu fjölmiðla

Birgitta skilur ekki Brexit, heldur ekki ESB

ESB-sinninn Birgitta Jónsdóttir kafteinn Pírata skilur ekki hvað úrsögn Breta úr Evrópusambandinu þýðir og heldur ekki hvernig ESB starfar.

Stækkunarstjóri ESB segir að engin ný ríki verði tekin inn í Evrópusambandið fyrr en eftir 2020. Kjörtímabilinu sem hefst í lok október stendur til haustsins 2020. Það þýðir að næsta kjörtímabil er tilgangslaust að ræða við ESB um aðild - bara út af þessu eina atriði.

En það er meira sem hangir á spýtunni.

Bretland ætlar ekki inn í EES-samninginn sem Ísland á aðild að. Þar með eru allar líkur á að EES-samstarfið líði undir lok.

Svo er það þetta lítilræði: íslenska þjóðin hefur í sjö ár samfleytt hafnað ESB-aðild.

Í stað þess að ræða aðild að ESB ætti Birgitta að ræða hvað gerist eftir EES. En hún mun aldrei skilja það. Birgittu skortir spektina.

Ráðherra ber að svara þingmönnum

Ný framsókn Sigmundar Davíðs

Framhaldslíf Sigmundar Davíðs í stjórnmálum getur ekki verið í þingflokki auðmýktar Sigurðar Inga. Tveir aðrir möguleikar teikna sig upp, annar langsóttur en hinn nærtækur.

Sá langsótti er að efna til nýs framboðs. Ekki eru nema um tíu dagar þangað til að framboðslistum skal skilað til kjörstjórnar og slíkt varla gerlegt á jafn skömmum tíma. 

Nærtæki möguleikinn er að Sigmundur Davíð stofni sjálfstæðan þingflokk eftir kosningar og í framhaldi stjórnmálahreyfingu. Þingflokkur þarf þrjá þingmenn og vel hugsanlegt að slíku megi koma í kring.

 

„Þekkjum ekki taparann Sigmund Davíð“

Brexit drepur EES-samninginn

Bretar ætla ekki inn í EES-samninginn um leið og þeir fara út úr Evrópusambandinu. Theresa May forsætisráðherra Breta kynnti í ræðu í gær að formlegt útgönguferli Bretlands hæfist ekki seinna en í lok mars á næsta ári. Hún sagði að Bretar myndu taka innflytjandamál alfarið í sínar hendur og það er ósamrýmanlegt EES-samningnum.

Í Noregi er grannt fylgst með úrsögn Breta. Norðmenn halda uppi EES-samningnum, en Ísland og Lichtenstein fylgja með. Aftenposten í Noregi segir Breta ekki ætla að fylgja norska fyrirkomulaginu (les EES-samningnum). Það þýðir að fjöldahreyfingin Nei til EU í Noregi mun leggja höfuðáherslu á uppsögn EES-samningsins.

EES-samningurinn var á sínum tíma gerður fyrir Norðurlönd sem millileikur áður en þau færu inn í Evrópusambandið. Svíar og Finnar fóru inn en Norðmenn og Ísland ekki. Þegar fyrir liggur að Bretar munu ekki ganga inn í EES-samstarfið er útséð með þetta fyrirkomulag. Bretar og Evrópusambandið munu á næstu tveim árum koma sér saman um hvernig samskiptum þeirra á milli skuli háttað til framtíðar. Það felur í sér að EES-samstarfið verður hornreka þar sem Noregur og Ísland munu jafnframt semja við Bretland um viðskipti og aðra samvinnu.

Þegar fótunum er kippt undan EES-samstarfinu er tímabært að íslensk stjórnvöld í samvinnu við norsk leggi drög að nýju samstarfsfyrirkomulagi gagnvart Evrópusambandinu.

Háborg stjórnmálanna hrynur í auðmýkt

Framsóknarflokkurinn undir formennsku Sigmundar Davíðs var háborg stjórnmálanna við síðustu kosningar - og leiddi ríkisstjórnina allt kjörtímabilið. Í dag ákváðu framsóknarmenn að skipta um formann og kusu Sigurð Inga.

Sigurður Ingi seldi sig sem mann auðmýktar en ekki hugmynda. Stjórnmálamenn reyna stundum að væla til sín atkvæði með tárvotum augum á réttum augnablikum. Nýmæli er að reka kosningabaráttu á forsendum auðmýktar. Innan Framsóknarflokksins er grunnt á trúarþelinu. Þar koma menn í pontu og stæra sig af því að prestur sitji í málefnanefnd um kirkjumál.

Sigurður Ingi gat þess í sigurræðu sinni að hann hefði fylgst álengdar með málaefnavinnu flokksmanna og fannst þar margt sniðugt. Sigurður Ingi veit nógu mikið um stjórnmál til að hafa á hreinu að formaðurinn er flokkurinn holdi klæddur en málefnin neðanmálsgrein.

Fyrsta verk nýkjörins formanns var að biðja flokksmenn að haldast í hendur. Sértrúarsöfnuðir bera sig að með þessum hætti til hópeflis. Framsóknarflokkurinn þarf vissulega hópefli til að trúa að stjórnmál snúist ekki lengur um hugmyndir heldur auðmýkt.

„Fullur þakklætis og auðmýktar“

Sigurður Ingi og friðurinn

Í framboðsræðu sinni til formanns spurði Sigurður Ingi hvers vegna taka ætti ófrið fram yfir friðinn.

Sigurður Ingi fær það verkefni að leiða Framsóknarflokkinn til friðar.

Spurningin er hvort friðurinn verði líkur þeim sem ríkir í dauðs manns gröf eða lifandi stjórnmálaflokki.

Sigurður Ingi kjörinn formaður