Vinstristjórnin á bakvið rimla - RÚV í beinni á þröskuldinum

Ljósmyndin á mbl.is sýnir fyrsta fund RÚV-stjórnar vinstrimanna á bakvið rimla. Keppinautarnir um embætti forsætisráðherra, Birgitta og Katrín, eru báðir með hönd undir höku líkt og þeim leiðist í upphafi fundar. Líkamstjáningin segir ekki að þetta sé ríkisstjórnin sem ætlar að endurræsa Ísland.

Fréttamaður RÚV ákvað að mæta seint, eftir að fundurinn væri hafinn. Það stóð aldrei til hafa í frammi ágengar spurningar um virðingu vinstrimanna fyrir lýðræðinu - að mynda stjórn fyrir kosningar.

Í hádegisfréttum RÚV var fréttamaður RÚV í beinni útsendingu fyrir utan fundarherbergið, svona til að það liti út fyrir að Efstaleiti stæði vaktina. Eftir fundinn mun fréttamaður RÚV setja saman frétt sem þjónar hagsmunum vinstriflokkanna og gera lítið úr virðingarleysinu sem lýðræðinu er sýnt með ríkisstjórnarmyndun fyrir kosningar.

„Ekki að fara að mynda stjórn núna“

RÚV-stjórnin: fyrsti fundur í dag - bein útsending?

Fyrsti ríkisstjórnarfundur RÚV-flokkanna er á Lækjarbrekku í dag. Þar ætla Píratar, Vinstri grænir, Samfylking og Björt framtíð að leggja grunn að valdatöku sex dögum fyrir kosningar.

Enn hefur RÚV ekki tilkynnt hvort bein útsending verður af fundinum. Fyrri fundir RÚV-flokkanna, sem gjarnan hafa verið haldnir á Austurvelli, eru iðulega i beinni útsendingu og það yrði stílbrot ef ekki yrði það sama upp á teningnum á fyrsta ríkisstjórnarfundinum.

Á fundinum í Lækjarbrekku er málefnasamningur RÚV-flokkanna ræddur og helsta skipting ráðuneyta. Það er í þágu almennings að upplýsa ítarlega um ríkisstjórnarsamstarfið.

Hvert er forsætisráðherraefni RÚV-stjórnarinnar? Birgitta eða Katrín? Verður Smári McCarty innanríkisráðherra? Hver verður yfirsálfræðingur ríkisstjórnarinnar nýju?

RÚV getur ekki verið þekkt fyrir að láta það liggja í láginni hvað fer fram á fyrsta fundi RÚV-stjórnarinnar.

 

Flókin stjórnarmyndun framundan?

Benedikt vonast eftir vinstri stjórn - með Viðreisn

Benedikt Jóhannesson formaður Viðreisnar og skuggaritstjóri Hringbrautar vonast til að vinstristjórn verði mynduð á Íslandi. Benedikt herjar á Sjálfstæðisflokkinn og gengur langt í að gera frænda sinn, Bjarna Ben., tortryggilegan.

Nýjasta framlag skuggaritstjórans tekur af öll tvímæli um hvert Viðreisn stefnir. Í ítarlegum pistli á Hringbraut eru aðaláhyggjur ritstjórans að Vinstri grænir muni svíkja það loforð sem þeir hafa gefið um að mynda vinstristjórn með Pírötum.

Benedikt og Viðreisn veðja á að annað hvort Björt framtíð eða Samfylking falli af þingi svo að Viðreisn geti hlaupið í skarðið og tekið þátt í vinstristjórn með Pírötum og Vinstri grænum.

Birgitta forsætisráðherra treystir ekki þjóðinni

Leiðtogi Pírata ætlar sér embætti forsætisráðherra viku áður en þjóðin fær að kjósa hvort hún vilji Birgittu Jónsdóttur sem forsætisráðherra eða ekki. Vinstri-píratíska ríkisstjórnarbandalagið er gagngert sett upp til að taka völdin áður en kosningarnar fara fram.

Ef Píratar og smáflokkar vinstrimanna treystu þjóðinni myndu þeir annað tveggja hafa boðið fram sameiginlegan lista eða beðið fram yfir kosningar að mynda ríkisstjórn. Aðferðin sem þeir nota gengur gegn lýðræðislegum hefðum og venjum hér á landi.

Píratar og vinstriflokkarnir hafa á síðustu árum þróað aðferð til að ná undirtökum í samfélaginu með snöggu áhlaupi þar sem skotmark er valið í tengslum við upphlaup í fjölmiðlum og á samfélagsmiðlum.

Píratar og vinstriflokkarnir eru með sjórnarráð Íslands sem skotmark að þessu sinni. Þeir bjuggu til pólitíska óreiðu, bæði með fjölda framboða og áróðri um ónýta Ísland. Þeir ætla núna, viku fyrir kosningar, að bjóða fram valkost til að ,,bjarga" þjóðinni frá upplausn sem Píratar og vinstriflokkar sjálfir bera ábyrgð á.

Með aðstoð fjölmiðla, RÚV er þar í fararbroddi, er dregin upp sú mynd að hér sé allt í volæði sem aðeins Píratar og vinstriflokkarnir geta bætt úr. Samfélagsmiðlar endurvarpa RÚV-áróðrinum og magna þannig upp hugarástand taugaveiklunar og móðursýki.

Landinu verður ekki stjórnað með vinstri-píratískum áhlaupum. Ef herbragðið heppnast í þetta sinn, og Píratar og vinstriflokkarnir fá meirihluta á alþingi næsta laugardag, mun fjögurra eða fimm flokka ríkisstjórn taka völdin. Stjórnlistin sem kom þeim til valda verður þá opinber stefna ríkisstjórnarinnar: óreiða og ónýta Ísland.

Það er aðeins ein leið til að koma í veg fyrir valdatöku Pírata, Samfylkingar, Vinstri grænna, Bjartrar framtíðar og Viðreisnar. Hún er að kjósa ekki þessa flokka á laugardaginn kemur.

Það eru enn sjö dagar til kosninga.

„Treystum þjóðinni“

Vinstri-Reykjavík gegn Íslandi

Vinstristjórnin, sem mynduð verður undir forystu Pírata viku fyrir kosningar, er reykvísk í pólitík og ESB-ísk í hugsun. Líkt og sáluga Jóhönnustjórnin mun hún etja höfuðborginni gegn landsbyggðinni.

Flugvöllurinn fer úr Vatnsmýrinni til að rýma fyrir framlengingu miðborgarinnar, sem er uppeldisstöð vinstrimanna. Náttúran í mýrlendinu við Norræna húsið víkur fyrir malbiki og byggð sem greiðir fyrir útkalli vinstriflokkanna á vettvang við Austurvöll að gera hróp að alþingi þegar það lýtur ekki vilja vinstri-píratsins.

Vinstristjórnin fjármagnar gæluverkefni sín með uppboði á aflaheimildum, sem leggur í rúst atvinnulíf á landsbyggðinni.

Stjórnarskrá lýðveldisins verður fótum troðin til að auðvelda aðgerðasinnum beina aðkomu að stjórnsýslunni annars vegar og hins vegar að brjóta niður vörnina gegn aðild að Evrópusambandinu. Vinstrimenn ætla að setja ákvæði í stjórnarskrána sem gerir bloggher þeirra kleift að munstra tíu prósent kjósenda að taka ákvarðanir fyrir 90 prósent þjóðarinnar.

Það eru sjö dagar til kosninga. Þær ráða úrslitum um hvort landið verði vinstri-píratísk hrollvekja eða lýðveldi allra Íslendinga.

Ræða mögulega vinstri stjórn

Uppboð á lífskjörum og atvinnu á landsbyggðinni

Vinstriflokkarnir, sem nú eru í stjórnarmyndunarviðræðum, sameinast um kröfuna að aflaheimildir á Íslandsmiðum fari á uppboð. Lífskjör á landsbyggðinni og atvinnu þar væri teflt í tvísýnu með slíku ráðslagi.

Einar S. Hálfdánarson hrl. og lögg. endurskoðandi vann upplýsingar úr skýrslu Hagstofunnar, „Hagur veiða og vinnslu 2014".  Þegar allur kostnaður annar en skattar til ríkisins hefur verið dreginn frá tekjum stóðu eftir um 51,5 milljarðar króna árið 2014. Af þeim renna rúmir 28 milljarðar til ríkisins í formi skatta og rúmir 23 milljarðar til eigendanna. Þetta samsvarar 13% ávöxtun eigin fjár sem telst ekki mikið í áhætturekstri.

Ríkisstjórn vinstriflokkanna mun ekki sækja þessa 23 milljarða til útgerðar og vinnslu án þess að leggja í rúst mörg fyrirtæki á landsbyggðinni. Aðeins stórfyrirtæki væru með burði til að kaupa kvótann.

Það er vika til kosninga.

Uppboðsleiðin veldur áhyggjum

Svandís bítur agn Benedikts - lýðræðið aukaatriði

Svandís Svavarsdóttir þingflokksformaður Vinstri grænna bítur á agn Benedikts Jóhannessonar formanns Viðreisnar sem í gær slakaði út samsærisbeitu um að Sjálfstæðisflokkurinn og Vinstri grænir stefndu að ríkisstjórn.

Benedikt smurði þykkt á beituna með ásökunum um spillingu frænda síns, Bjarna Ben., og óvandaða stjórnsýslu Steingríms J. í vinstristjórninni sálugu. Svandísi er nokkur vorkunn að gína við agninu - ráðherraferill Steingríms J. er viðkvæmt mál. 

Með afstöðu sinni stóreykur Svandís líkurnar á vinstristjórn undir forsæti Pírata, þar sem Vinstri grænir og Viðreisn fá fagráðuneyti. Og sálfræðistéttin kætist.

Betur færi að Svandís styddi lýðræðið og leyfði kjósendum að segja sitt álit áður en hún myndaði - eða afmyndaði - ríkisstjórn. En kannski er lýðræðið aukaatriði hjá öllum vinstrimönnum.

Valkostirnir hafa kristallast

Vinstristjórn mynduð viku fyrir kosningar

Píratar eru með öll ráð vinstriflokkanna í hendi sér þar sem þeir mælast stærstir og gera kröfu um að fá stjórnarmyndurnarumboð frá forseta Íslands. Píratar ætla ekki að bíða eftir niðurstöðu kosninga heldur mynda meirihluta á alþingi áður en þjóðin fær að segja sitt álit.

Smáflokkarnir Samfylking, Björt framtíð og Viðreisn munu gera hosur sínar grænar fyrir Pírötum og leggja drög að nýrri ríkisstjórn um helgina. Vinstri grænu hosurnar, sem eru með álíka fylgi og Píratar, gætu gert tilkall til að vera meðforystusauðir Pírata.

Valdataka vinstrimanna viku fyrir kosningar lýsir virðingu þeirra fyrir lýðræðinu.

Funda um helgina um samstarf

Össur: Samfylking í faðm Pírata, Birgitta svarar

Össur Skarphéðinsson, leiðangursstjóri vinstrimanna til Brussel, sér helsta bjargræði Samfylkingar að líma sig fasta við Pírata. Í framlagi á Eyjunni boðar Össur framhaldslíf Samfylkingar í bandalagi við Pírata.

Birgitta Jónsdóttir svaraði ákalli Össurar í umræðuþætti á RÚV, auðvitað, þar sem hún sagði að plan A Pírata væri að gera Ísland að ESB-rík.

Bandalag Pírata og Samfylkingar er með yfir 25 prósent fylgi, samkvæmt síðustu mælingu.

Áfram sveiflast fylgið

RÚV-Pírata Ísland, sálfræðingar gleðjast

Fjölmiðlapólitískt bandalag RÚV og Pírata stækkar þriggja manna þingflokk, sem þarf sálfræðing til að tala saman, upp í 15 þingmenn. Í kjölfar stórsigurs RÚV-Pírata fá að minnsta kosti fimm sálfræðingar vinnu á alþingi - auk allra þeirra sem komast i uppgrip út í þjóðfélaginu við að laga taugahrúgur sem verða til undir oki RÚV-Pírata.

Síðustu viku fór RÚV hamförum við að lýsa Íslandi sem óalandi og óferjandi spillingarbæli er Píratar einir gætu lagfært. RÚV færði kosningabaráttuna til ársins 2009 þegar þjóðin var á barmi taugaáfalls. Til að fá útlenskan stimpil á ónýta Ísland var Eva Joly flutt inn til lands af Pírötum og fékk hún drottningarviðtal á RÚV - auðvitað.

RÚV gerði stórt númer úr blaðamannafundi Pírata, þar sem þeir mynduðu ríkisstjórn fyrir kosningar, en lét þess ógetið að enginn, nema Samfylking, auðvitað, vildi starfa með þeim. Myndin sem RÚV dró upp var að Píratar væru þegar komnir í stjórnarráðið.

RÚV-Pírata Ísland verður tragikómískur brandari sem í samanburði gerir Jón Gnarr og Besta flokkinn að stjórnspekingum.

 

Píratar mælast stærstir