Trump, Úkraína og endalok ESB-Evrópu

Trump og Pútín hittast í Alaska, sem einu sinni var rússnesk. Bandaríkin keyptu landið af Rússakeisara 1867. Land skiptir oftar um hendur í stríði en friði. Fundurinn í Alaska er um Úkraínustríðið. Tilgangurinn er að koma á friði.

Selenskí Úkraínuforseti fær ekki að koma á fundinn, eins og staðan er núna. Hvernig geta Pútín og Trump samið um frið í Úkraínu án aðildar Úkraínu? Stutta svarið er það sé ekki hægt. Úkraínumenn berjast á vígvellinum og taka við fyrirskipun frá Kænugarði, ekki Washington.

Lengra svarið er já, Trump hefur í hendi sér að ljúka stríðinu. Án vopnastuðnings Bandaríkjanna er Úkraínuher nánast bjargarlaus, úkraínska ríkið er varla gjaldfært án dollara að vestan. Trump og Pútín gætu komist að samkomulagi og Bandaríkjaforseti þvingað fram niðurstöðu í andstöðu við stjórnina í Kænugarði.

Óstaðfestar fréttir herma að Rússar fái að halda landsvæði sem þeir hafa lagt undir sig gangi fram áætlun Trump og Pútín.

Trump hefur svikið Úkraínu og gert heiminn hættulegri, skrifar Daníel Hannan í Telegraph og bætir við að vesturlönd munu súpa seyðið af svikum Trump næstu áratugi. Hannan túlkar ráðandi sjónarmið í Evrópu gagnvart Trump og hvernig hann höndlar Úkraínustríðið. Forveri Trump, Biden, var á bandi Evrópumanna.

Heimssýn Trump er stórveldahagsmunir. Hann sér Bandaríkin sem fremsta stórveldið, vitanlega, en síðan Kína og Rússland. Hannan nefnir tvö dæmi, ásælin Trump í Grænland og hugmyndina um að innlima Kanada í Bandaríkin, er lýsi ráðandi viðhorfum í Washington.

Til að Trump geti lagt línurnar í heimsmálum, með Kína og Rússlandi, þarf að klára Úkraínustríðið. Í þeim skilningi er Úkraínustríðið síðasta andvarp bandalagsins þvert á Atlantshaf, milli Bandaríkjanna og Vestur-Evrópu, sem varð til eftir seinna stríð. Á þeim tima fæðist fyrirbærið ESB-Evrópa, félagsskapur gamalla nýlenduvelda sem lifa á fornri frægð. Ljósmóðir fyrirbærisins er bandarískt hervald.

Trump lítur ekki á ESB-Evrópu sem stórveldi heldur héraðsríki vestast á Evrasíu-landflæminu. Austar í sama heimshluta eru stórveldin sem skipta máli, Rússland og Kína. 

Gangi það fram, sem nú er á teikniborðinu, að Trump og Pútín ákveði örlög Úkraínu þrátt fyrir andstöðu ESB-Evrópu yrði það staðfesting á orðnum hlut. ESB-Evrópa er aðeins áheyrnarfulltrúi þegar stórveldin setjast niður og ákveða skipan heimsins.

Skringilegt er að sumir vilji að Ísland hoppi upp í fangið á ESB-hornkerlingunni. Hagsmunir Íslands eru að eiga bein samskipti við ríki sem skipta máli á alþjóðavísu, einkum þeirra er gera sig gildandi á Norður-Atlantshafi. Bandaríkin eru þar stórveldið, Bretland hjáleigan en ESB-Evrópa hreppsómaginn. 

Evrópuleiðtogar hvetja til aukins „þrýstings“ á Rússland

Helgi á RÚV og Heimildin auglýsa byrlunarmálið

RSK-miðlar, sem eru RÚV, Stundin og Kjarninn bjuggu til tvö af stærri sakamálum síðustu ára, Namibíumálið annars vegar og hins vegar byrlunar- og símamálið. Í fyrra málinu voru blaðamenn ásakendur en í því seinna sakborningar.

Namibíumálið hófst nóvember 2019 með alræmdum Kveiksþætti Helga Seljan og Aðalsteins Kjartanssonar á RÚV. Leiddur var fram Jóhannes Stefánsson, kallaður uppljóstrari, sem sagði tröllasögur af mútugjöfum Samherja í Namibíu um miðjan annan áratug aldarinnar. Sakamálarannsókn hófst á Íslandi og Namibíu sem sex árum síðar hefur engu skilað.

Fyrir tæpu ári greindi tilfallandi frá stöðunni:

Jóhannes var rekinn frá fyrirtækinu 2016 vegna óreglu. Þremur árum síðar hóf hann samvinnu RSK-miðla um að ásaka Samherja, og í leiðinni sjálfan sig, um mútugjafir þar syðra til að fá veiðirétt i landhelgi Namibíu. Engar sannanir hefur uppljóstrarinn lagt fram, aðeins ásakanir.

RSK-miðlar með ríkisfjölmiðilinn í fararbroddi fela skipulega orðsporið sem fer af Jóhannesi sem ógæfumanni. Nýverið sagði namibískt dagblað að Jóhannes væri eiturlyfjafíkill og ómarktækur eftir því. Tölvupóstur sem Jóhannes skrifaði í október 2014 til vinar síns staðfestir að hann átti bæði í vandræðum með drykkju og efni í nös. Tölvupósturinn hefur ekki birst áður, jafnvel þó blaðamenn RÚV og Heimildarinnar hafi haft hann undir höndum. RSK-miðlar stinga undir stól upplýsingum sem falla ekki að myndinni sem þeir draga upp, að Jóhannes sé trúverðug heimild. Tölvupósturinn er svohljóðandi í heild:

08.10.2014 kl. 09:17, JS: Sælir, hvernig gengur. Búið að vera jákvætt hérna og ljóst að maður þarf að passa sig og vera edrú. Traustið er mikið hérna og menn vilja byggja enn frekari upp í Namibíu. Ingvar talaði við mig um málið í Cape Town og ég sagði honum að ég hafi tekið nokkrar stikkprufur en væri hættur. Væru bara töfftímar sem að maður væri að ganga í gegnum. Hann skildi það vel og ekkert mál.

Jóhannes þarf að passa sig að vera edrú en leyfði sér að taka ,,nokkrar stikkprufur". Slíkar prufur eru duft en ekki drykkur. Samt væri Jóhannes ,,hættur". Hann hætti vitanlega ekki og hélt áfram líferni sem fer ekki saman við heilbrigða dómgreind. DV sagði frá stjórnlausri kókaínneyslu og öðru miður fallegu í aðdraganda þess að Jóhannes keyrði sjálfan sig og Samherja í þrot í Namibíu.

Tilfallandi fékk upplýsingar frá lögmanni sem hlustaði á yfirheyrslu íslensku lögreglumannanna sem heimsóttu Jóhannes í London. Lögmaðurinn sagði Jóhannes í því ásigkomulagi að hann gat ekki farið rétt með eigin kennitölu. Lögreglumenn urðu að leiðrétta kennitöluna sem uppljóstrarinn margfrægi gaf upp, ekki einu sinni heldur tvisvar.

Byrlunar- og símamálið hófst tveim árum eftir Namibíumálið eða vorið 2021. Með vitneskju og e.t.v. í samráði við blaðamenn RSk-miðla var Páli skipstjóra Steingrímssyni byrlað, síma hans var stolið og tækið afritað á RÚV. Ein frétt, um ímyndaða skæruliðadeild Samherja, var samin á RÚV og send til birtingar á Stundina og Kjarnann. Fréttin birtist samtímis að morgni 21. maí 2021. Fyrir utan lögbrotin og siðleysið við öflun og vinnslu fréttarinnar lugu blaðamenn og fjölmiðlar þeirra blákalt að lesendum, sögðu að tveir fjölmiðlar, Stundin og Kjarninn, hefðu af sjálfsdáðum unnið frétt sem í reynd var samin á RÚV og stýrt þaðan. Það þurfti að fela glæpinn.

Á alla mælikvarða fréttamennsku er byrlunar- og símamálið stærri frétt en Namibíumálið. RSK-miðlar, sem nú mætti kalla RH-miðla, þar sem Stundin og Kjarninn sameinuðust undir heitinu Heimildin, vilja á hinn bóginn ekki neinar fréttir um byrlunar- og símamálið en eru áfram um að Namibíumálið sé til umræðu.

Í gær og fyrradag var samstarf á milli RÚV og Heimildarinnar að ýta úr vör endurtekinni fréttaumfjöllun um Namibíumálið. Í fyrradag flutti Helgi Seljan á RÚV tíu mínútna eintal um Namibíumálið, sem hann kallar auðvitað Samherjamálið, og stöðu þess í Namibíu. Enginn aðili frá Samherja er þar á ákærubekk. Jóhannes uppljóstrari Stefánsson hefur ekki mætt til Namibíu að gefa yfirvöldum þar skýrslu um athafnir sínar þegar hann stjórnaði dótturfélagi Samherja þar syðra um miðjan síðasta áratug. Dómsmálið í Namibíu er alfarið innanlandsmál.

Í eintali Helga er farið um víðan völl í dómsmálinu og lítt hirt um staðreyndir. Hann segir Namibíu álíka fjölmenna og Ísland - en Namibíumenn telja 3 milljónir manna. Þá hefur hann áhyggjur af sinaskeiðabólgu hraðritara við dómstóla í Afríkuríkinu. Helgi veður úr einu í annað og er ekki með neina frétt eða frásögn í höndunum. Tilgangurinn er sá einn að koma á framfæri að Namibíumálið, Samherjamálið í hugarheimi Helga, sé enn lifandi á suðurhveli jarðar.

Með eintalinu í fyrradag hitaði Helgi upp fyrir Heimildina sem kom út í gær. Þar er frétt sérstaklega hönnuð til að sverta Örnu McClure sem var lögfræðingur Samherja. Arna kom lítið sem ekkert að málum útgerðarinnar í Namibíu fyrr en eftir að Jóhannes uppljóstrari hafði keyrt reksturinn í þrot. Arna hefur barist fyrir því fyrir dómstólum að fá aflétt stöðu sinni sem grunuð í sakamálarannsókn hér á landi. Í frétt Heimildarinnar í gær er hún sett nr. 2 á lista yfir grunaða, á eftir forstjóranum (nú fyrrum) Þorsteini Má. Meiðandi, og vísvitandi rangar, fullyrðingar eru í Heimildinni um Örnu, t.d. þessi:

Fram hefur komið að Arna fundaði með mútuþegunum í Samherjamálinu, þeim James Hatuikulipi, Tamson „Fitty“ Hatuikulipi og Sacky Shangala, sem allir tengjast stjórnmálaflokknum SWAPO.

Meintur fundur var kvöldverður á veitingastað sem Arna lét til leiðast að sitja fyrir beiðni Jóhannesar uppljóstrara sem bauð Namibíumönnum til landsins. Í gögnum málsins kemur fram að Jóhannes vildi sýna gestum sínum íslenskar ljóskur - Arna er ljóshærð. Í dómsmálinu, sem rekið er í Namibíu, er enginn ákærður fyrir að þiggja mútur frá Samherja. Textinn í Heimildinni, ,,mútuþegar í Samherjamálinu", afvegaleiðir og jaðrar við að vera bein lygi.

Eins og gefur að skilja fjalla hvorki Helgi Seljan né Heimildin um byrlunar- og símamálið. Þar er þó Helgi frumheimild. Hann sat fund með byrlara Páls skipstjóra daginn eftir að skipstjórinn var lagður inn á gjörgæslu.

Lesendur Heimildarinnar, þeir fáu sem eftir eru, og hlustendur RÚV hljóta að velta fyrir sér fréttamati þessara fjölmiðla og þeirri starfsaðferð að fela risastóran bjálka í augum blaðamanna með Namibíuflís. Þegar RSK-miðlar fjalla um Namibíumálið auglýsa þeir flóttann frá byrlunar- og símamálinu. Grunaðir taka sér ákæruvald til að kaupa sér gálgafrest.  

ESB vill ekki frið í Úkraínu

Ákall Selenskí Úkraínuforseta um að fulltrúar ESB verði viðstaddir á mögulegum fundi hans, Trump og Pútín setur tvo mikilvæga fyrirvara - hvorugur eykur líkur á friði.

Í fyrsta lagi er það Trump. Bandaríkjaforseti vill einn taka heiðurinn af friði í Úkraínu, það er vís vegur að friðarverðlaunum Nóbels. Fái ESB - eða Bretland - sæti á fundi sem yrði afgerandi fyrir vopnahlé í meira en þriggja ára stríði yrði Trump að deila heiðrinum með ESB/Bretlandi. Metnaður Bandaríkjaforseta er að sitja einn að titlinum friðarhöfðingi.

Í öðru lagi vilja ESB og Bretland ekki frið í Úkraínu. Valdastétt Evrópu þarf að halda stríðinu gangandi til að sannfæra almenning um nauðsyn vígvæðingar. Rússland verður ógn um langa framtíð, er sannfæring ráðandi afla í Evrópu. Stórfelld hernaðaruppbygging er efst á dagskrá til að halda í við hernaðarmátt Rússa. Bandaríkin draga úr viðbúnaði sínum í Evrópu sem gerir hervæðingu ESB enn mikilvægari. Ótímabær friður í Úkraínustríðinu þjónar ekki hagsmunum hernaðarsinna í Brussel. Erfiðara verður að sannfæra almenning að draga úr velferð í þágu vopnaframleiðslu og stærri herja.

Síðustu daga á er á bakvið tjöldin reynt að undirbúa toppfund með Trump og Pútín og jafnvel Selenskí. Telegraph segir að drög að vopnahléi liggi á borðinu. Afstaða Rússa hefur verið að semja beint við Bandaríkin um frið. Pútín og félagar líta svo á að Bandaríkin séu sá bakhjarl Úkraínu sem skiptir máli. Aðrir, Selenskí, ESB og Bretland séu aukaleikarar.

Alexander Mercouris fylgist vel með framvindu mála. Hann telur ólíklegt að Pútín samþykki fund með Selenskí á þessu stigi máls - þótt sá rússneski hafi játað fundi með Trump. Í morgun eru fréttir um að Selenskí verði ekki viðstaddur þegar Trump og Pútín hittast á næstu dögum.

Tekst að koma á vopnahléi næstu daga? Vonandi en vafasamt er að veðja á það. Á hitt er þó að líta að ráðamenn búa að upplýsingum um stöðu mála á vígvellinum sem ekki liggja almenningi á lausu. Vitað er að Úkraína fer halloka en hvort staða Úkraínuhers sé orðin hættulega bágborin er opin spurning.

Selenskí: Evrópa verður að taka þátt

Trump-taktar ESB gegn Íslandi

Evrópusambandið böðlast á Íslandi á sama hátt og Trump hótaði Evrópusambandinu afarkostum. Íslendingar töldu sig eiga vörn í EES-samningnum en hann reyndist ekki pappírsins virði.

Trump lagði 30 prósent tolla á ESB með þeim rökum að í áratugi hefði ESB misnotað stöðu sína, flutt evrópskar vörur til Bandaríkjanna á litlum sem engum tollum en lagt tolla á bandarískan innflutning til Evrópu. Áður en Trump-tollarnir komust í framkvæmd, og hefðu í reynd nær stöðvað evrópskan innflutning til Bandaríkjanna, var gerður viðskiptasamningur milli aðila. Samningurinn er niðurlægjandi fyrir ESB og sigur fyrir Trump.

Einn liður í samningi ESB og Bandaríkjanna er evrópsk fjárfesting í Bandaríkjunum upp á 600 milljarða dollara. Die Welt hefur eftir Trump að hann líti á 600 milljarðana sem skaðabætur fyrir markaðsmisnotkun ESB gagnvart Bandaríkjunum í áratugi. Almennt verða 15 prósent tollar innheimtir af ESB-vörum í Bandaríkjunum þar sem áður voru engir tollar eða lágir, 2-3 prósent.

Í Telegraph segir að viðskiptasamningurinn sé fullkominn uppgjöf. Draumurinn um Stór-Evrópu sé úti. Frá falli Berlínarmúrsins og ákvörðunar um sameiginlegan gjaldmiðil, evru, er Stór-Evrópa markmiðið. Það er ekki aðeins gagnvart Bandaríkjunum sem ESB fer halloka heldur einnig Rússlandi og Kína.

Undir þessum kringumstæðum hnyklar ESB vöðvana gagnvart Íslandi, hótar verndartollum á járnblendi sem flutt á á evrópskan markað. Samkvæmt EES-samningunum eru verndartollar bannaðir nema í neyðartilvikum. Engin neyð er í Evrópu vegna einnar verksmiðju á Íslandi. Annað hangir á spýtunni.

Líkt og Trump notar ESB verndartolla til að koma á framfæri pólitískum skilaboðum. Við ætlum okkur Ísland, segir hnignandi stórveldið. Munu Íslendingar láta kúga sig til að framselja fullveldi og forræði íslenskra mála til Brussel?

 

Óvarlegt að segja til um hvort ESB setji á tolla

Byrlunar- og símamálið gengur af Heimildinni dauðri

Uppsagnir eru á Heimildinni, útgáfan er við það að deyja drottni sínum. Byrlunar- og símamálið í senn bjó til Heimildina og gengur af henni dauðri - og í leiðinni starfsferli verðlaunuðustu blaðamanna Íslandssögunnar.

Heimildin er stofnuð í byrjun árs 2023 með samruna Stundarinnar og Kjarnans. Tilefni samrunans var byrlunar- og símamálið, byrlun Páls skipstjóra Steingrímssonar, þjófnaður á síma hans og afritun. Í febrúar 2022 fengu þrír blaðamenn Stundarinnar og Kjarnans stöðu sakborninga í lögreglurannsókn. Rúmu ári áður, 21. maí 2021, birtu blaðamennirnir, undir eigin nafni, sömu fréttina, um skæruliðadeild Samherja. Fréttin var hvorki skrifuð á Stundinni né Kjarnanum heldur á RÚV - líklegasti höfundurinn er Helgi Seljan. Fjórði fréttamaðurinn sem fékk stöðu sakbornings í febrúar 2022 var þó ekki Helgi heldur yfirmaður hans, Þóra Arnórsdóttir ritstjóri kveiks á RÚV.

Í nokkur ár höfðu RSK-miðlar, RÚV, Stundin og Kjarninn, leikið þann leik að þykjast sjálfstæðir fjölmiðlar en voru á bakvið tjöldin fjölmiðlabandalag. Áhrifamáttur hvers fjölmiðils, einkum Stundarinnar og Kjarnans, varð meiri þegar RÚV endurbirti. Skæruliðafréttin 21. maí 2021 er skýrt dæmi. Jaðarmiðlarnir frumbirtu en RÚV kom i kjölfarið, rak hljóðnema upp í ráðherra, þingmenn og álitsgjafa og krafði svara um frétt sem upphaflega var samin á RÚV. Tilgangurinn var að láta reiðibylgju rísa í samfélaginu.

Aðalsteinn Kjartansson leppaði skæruliðafréttina á Stundinni og það sama gerðu Þórður Snær Júlíusson og Arnar Þór Ingólfsson á Kjarnanum. Í byrlunar- og símamálinu var RÚV aðgerðamiðstöðin. Andlega veik eiginkona Páls skipstjóra afhenti Þóru síma skipstjórans 4. maí 2021 á meðan skipstjórinn lá meðvitundarlaus vegna byrlunar á Landspítalanum í Fossvogi, steinsnar frá höfuðstöðvum RÚV á Efstaleiti.

Í febrúar 2022 verður sem sagt heyrinkunnur rökstuddur grunur um að blaðamenn þriggja fjölmiðla eigi aðild að byrlun- og símastuldi. RÚV hafði sitt á þurru, fær árlega yfir 6 milljarða króna úr ríkiskassanum. Stundin og Kjarninn komust aftur fljótt á vonarvöl og sáu þann kost vænstan að sameinast undir merkjum Heimildarinnar. Viðskiptablaðið upplýsir að samanlagt tap Stundarinnar og Kjarnans síðasta rekstarárið hafi verið yfir 50 milljónir króna. Með frétt Viðskiptablaðsins fylgir mynd af ritstjórninni. Tæplega helmingur ritstjórnar, fimm af tólf, eiga aðkomu að byrlunar- og símamálinu.

Heimildin hafði til að byrja með um 17 til 20 þúsund lesendur, samkvæmt Gallup. Síðustu mánuði hefur útgáfan tapað helmingi lesenda sinna.

Fjölmiðlar lifa á trúverðugleika. Heimildin hefur aldrei gert grein fyrir aðkomu blaðamanna sinna að byrlunar- og símamálinu. Tiltrú á fjölmiðilinn er botnfrosin. Ríkisstyrkur upp á 60 milljónir króna á ári er ekki nóg til að halda Heimildinni á floti.

Byrlunar- og símamálið er myllusteinn um háls fjölmiðla og blaðamanna sem hlut eiga að máli. Á Heimildinni er aðeins einn eftir, Aðalsteinn Kjartansson. Ingi Freyr Vilhjálmsson, sem varð sakborningur á eftir Aðalsteini, er kominn á RÚV. Sama gildir um Helga Seljan, sem ekki fékk stöðu sakbornings. Fréttamál Helga á RÚV ná ekki flugi enda faglegt orðspor hans rjúkandi rúst. Þeir Þórður Snær og Arnar Þór eru starfsmenn þingflokks Samfylkingar. Þóra Arnórsdóttir fékk stöðu hjá Landsvirkjun eftir að henni var óvært á RÚV.

Vorið 2021 var annar bragur RSK-miðlum. Yfirþyrmandi dagskrárvald þeirra gaf tóninn í fréttaflutningi hér á landi um árabil. Dagskrárvaldið byggði á svindli og undirferli. Þrjár ritstjórnir, sem út á við voru sjálfstæðar, störfuðu í reynd sem ein ritstjórn. Markmiðið var að móta fréttaumræðuna.

Það dregur dilk á eftir sér að byrla og stela til að afla frétta - sem í ofanálag eru að mestu leyti staðlausir stafir. Byrlunar- og símamálið er enn óuppgert en mun fylgja hlutaðeigandi um aldur og ævi.  

 

 

ESB hnignar, Ísland efli tengsl við Bandaríkin

Bandaríkin niðurlægðu Evrópusambandið í tollastríðinu. Rússland er á góðri leið að gera það sama í Úkraínustríðinu. Hagkerfi ESB byggði á opnum bandarískum markaði annars vegar og hins vegar ódýrri orku frá Rússlandi. Hvorugt er lengur í boði.

Evrópusambandið stendur frammi fyrir hnignun. Alþjóðakerfið sem gerði stofnun Evrópusambandsins mögulega stokkast upp. Í kalda stríðinu frá lokum seinna stríðs og falli Berlínarmúrsins gat Vestur-Evrópa selt sig Bandaríkjunum sem útvörður borgaralegs vestræns lýðræðis í austri. Eftir fall Sovétríkjanna og heims kommúnismans er ekkert sem kallar á að Bandaríkin, í gegnum Nató, sjái um varnir Vestur-Evrópu.

Dvínandi stuðningur Bandaríkjanna við Selenskí-stjórnina í Kænugarði sýnir að Washington telur ófriðinn í Úkraínu innansveitarkróníku Evrópu. Allar líkur standa til að Úkraínustríðinu ljúki á rússneskum forsendum. Sterkara Rússland og veikara Evrópusamband kallar á nýtt valdajafnvægi í heimsálfunni. Áratugi fremur en ár tekur að finna jafnvægi milli stórvelda. Ein 35 ár eru síðan Sovétríkin féllu. Rússland var talið jaðarríki framan af. Evrópusambandið, með Bandaríkin sem bakhjarl, taldi sig geta sagt hvernig Rússar ættu að sitja og standa. Það er liðin tíð.

Ekki undir nokkrum kringumstæðum ætti Ísland að ljá máls á aðild að hnignandi Evrópusambandi. Ísland yrði peð í ESB með engin áhrif. Hagsmunir Ísland sem eyþjóðar á Norður-Atlantshafi eru gangólíkir hagsmunum þjóða á Evrasíu-landflæminu. Framsal á fullveldi íslensku þjóðarinn og forræði eigin mála til Frakka, Þjóðverja og Ítala er fáránleg pólitík. Evrópusambandið er ekki í neinum færum að gera sig gildandi hernaðarlega á Norður-Atlantshafi. Evrópusambandið er ekki haldreipi í öryggis- og varnarmálum heldur þvert á móti ógn. Ísland sem jaðarríki ESB yrði skotmark óvinveittra afla sem vildu láta reyna á þolrif sambandsins.  

Frá seinna stríði, þegar bandarískur her leysti af hólmi hernámslið Breta hér á landi, á Ísland í samstarfi Bandaríkin um öryggis- og varnarmál. Í gildi er varnarsamningur þjóðanna frá 1951. Á þeim hornsteini er nærtækt að byggja víðtækari samvinnu á viðsjárverðum tímum.

 

Bandaríkin í vexti en Evrópa í vanda

Trump, Pútín og alræði möppudýranna

Einn af talsmönnum ESB-sinna á Íslandi, pólskættaður Pawel Bartoszek, segir í Economist að

 þeir sem séu hvað lík­leg­ast­ir til að sann­færa Íslend­inga um að ganga í Evr­ópu­sam­bandið séu „Vla­dimír Pútín og, að mörgu leyti, Don­ald Trump.“

Pawel endurómar Brussel-línuna, að helstu óvinir Evrópusambandsins séu forsetar Bandaríkjanna og Rússlands.

Trump og Pútín eru minkarnir í ESB-hænsnabúinu. Ráðandi kennisetning Brussel-hænsnakofans er alþjóðleg samrunaþróun með Evrópusambandið sem fyrirmynd. Tæknikratar stjórni heiminum, skammti almenningi lifibrauð, lífshætti og lífskjör eins og skít úr hnefa. Nafnlausir embættismenn án lýðræðislegs umboðs skrifa lög og reglugerðir fyrir almúgann að lifa eftir. Fyrsta boðorð nafnlausa skrifræðisins er að brjóta á bak aftur almannavilja. Þegar Frakkar, seint á 18. öld, hristu af sér hlekki einveldis var það gert í nafni almannavilja er lagði grunn að vestrænum mannréttindum. Brussel-hænsnakofinn starfar samkvæmt gamalli forskrift: vér einir vitum. 

Hvorki Trump né Pútín krjúpa fyrir smásmygli alræðis-möppudýranna. Báðir aðhyllast þeir þjóðhyggju, að skásta samfélagsskipulagið sé þjóðríkið. Yfirþjóðlegt vald hatast við þjóðhyggju. 

Íslendingar standa utan hænsnakofans í Brussel. Pawel og þjóðníðingarnir (les: Samfylking og Viðreisn) vilja okkur þangað inn.

Um Trump og Pútín er að segja að annar er 79 ára gamall og hinn 72 ára. Hvorugur þeirra, þrátt fyrir ráðsettan aldur, er upphafsmaður þjóðríkisins. Íslendingar þekkja 800 ára gamlar frásagnir um þjóðveldi sem var frá landnámi og fram á Sturlungaöld, gullöldin í íslenskri sögu.  

Söguleg tilviljun, kannski gráglettni örlaganna, er að gamalmenni vestan hafs og í Bjarmalandi knésettu alræði möppudýranna á meginlandi Evrópu. Íslensk saga, haldi hún áfram að vera sögð, mun ekki fara mjúkum höndum um Pawel og þjóðníðingana.  

 

Styður stofnun íslenskrar leyniþjónustu

Sveltur gyðingur og feitir íslenskir þjónar Hamas

Hamas hryðjuverkasamtökin stjórna matvæladreifingu í Gasa. Þeim hugkvæmdist að framkalla matarskort til að kenna Ísraelsher um hungurneyð. Íslenskir vinstrimenn vel í holdum gerðu eins og til var ætlast, efndu til mótmæla undir formerkjum þjóðarmorðs Ísraela á Palestínuaröbum.

En svo skýtur Hamas sig í fótinn. Samtökin birta mynd af sveltum gyðing neðanjarðar í Gasa að taka sína eigin gröf. Gyðingurinn Evyatar David er gísl Hamas frá 7. október 2003 þegar hryðjuverkasamtökin efndu til fjöldamorða í Ísrael, drápu yfir þúsund konur, börn, karla og gamalmenni og tóku 300 gísla - Evyatar David þar á meðal. Íslenskir vinstrimenn sögðu fjöldamorðin þjóðþrifnað, gengu þar í fótspor austurríkismanns með frímerkjaskegg fyrir miðja síðustu öld.

Helstu fjölmiðlar Hamas á Íslandi, Vísir og RÚV, birta myndina af Evyatar David taka sína eigin gröf og segja hann ,,beinaberan." Feitir Hamas-þjónar íslenskir láta ekki að sér hæða. 

 

Létu gísl grafa eigin gröf á upptöku

Þórður Snær er óviti nr. 1

,,Óvinur nr. 1" er í fyrirsögn leiðara Þórðar Snæs Júlíussonar í Fréttablaðinu 11. mars 2013. Morgunblaðið birti leiðarann síðast liðinn fimmtudag í tilefni af tíu ára afmæli afnáms haftanna sem ríkisstjórn Sigmundar Davíðs stóð fyrir.

Í leiðara Þórðar Snæs í Fréttablaðinu fyrir tólf árum er Sigmundur Davíð sagður óvinur þjóðarinnar númer eitt. Leiðarinn er skrifaður hálfum öðrum mánuði fyrir þingkosningar. Sigmundur Davíð, þá formaður Framsóknarflokksins, kynnti áætlun um að afnema fjármagnshöftin með skattlagningu á þrotabú föllu bankanna. Samkvæmt Þórði Snæ var Sigmundur Davíð þar með orðinn óvinur þjóðarinnar. Þórður Snær skrifaði:

Þess­ar hug­mynd­ir Sig­mund­ar eru því miður með öllu óraun­hæf­ar. Hér er verið að boða klára þjóðnýt­ingu er­lendra eigna kröfu­hafa [...]

[Sigmundur Davíð hefur] ekki eytt mikl­um tíma í raun­veru­leik­an­um. Sama hversu vel það hljóm­ar í eyr­um skuldugra heim­ila að hlusta á lof­orð hans þá er orðið tíma­bært að all­ir sjái að keis­ar­inn er ekki í nein­um föt­um. Þegar raun­veru­leik­an­um er stungið í sam­band og gereyðing­ar­mátt­ur kosn­inga­víxla Fram­sókn­ar­flokks­ins er met­inn þá er al­gjör­lega ljóst að þeir munu hafa fleiri nei­kvæðar af­leiðing­ar en já­kvæðar.

Þrátt fyrir andóf Þórðar Snæs og vinstrimanna veitt þjóðin Sigmundi Davíð brautargengi í kosningunum vorið 2013. Sigmundur Davíð varð forsætisráðherra. Hann efndi kosningaloforðið, beitti fullveldinu og setti lög um framlag þrotabúa bankanna til efnahagslags stöðugleika á Íslandi. Sigmundur Davíð afnam höftin, gerði upp efnahagslegan þátt hrunsins. Maðurinn sem Þórður Snær sagði ekki tengdan ,,raunveruleikanum". 

Tólf ára leiðari Þórðar Snæs fær dreifingu á samfélagsmiðlum undir fyrirsögninni Óviti nr. 1. Raunveruleikatengsl Þórðar Snæs eru sérkennileg, svo ekki sé dýpra í árinni tekið. Fyrir síðustu kosningar var hann afhjúpaður sem netníðingur er tók einkum fyrir konur í ábyrgðastöðum undir dulefninu þýska stálið. Hann á einnig aðild, beina eða óbeina, að byrlunar- og símamálinu þar sem blaðamenn áttu samstarf við andlega veika konu um að byrla Páli skipstjóra Steingrímssyni og stela síma hans.

Í dag er Þórður Snær framkvæmdastjóri þingflokks Samfylkingar, skrifar skoðanapistla og plottar með Helga vini sínum Seljan á RÚV að ljúga í fréttum. Óvitar eiga framavon í Samfylkingunni, bæði fermingarbörn og áhugamenn um þau.

 

 

Fullveldið í ESB-fangelsi

Viðtengd frétt lýsir þrautagöngu Breta að losna úr viðjum Evrópusambandsins. Breska þjóðin samþykkti í þjóðaratkvæðagreiðslu árið 2016 að ganga úr ESB. Brusselvaldið gerði allt til að ónýta breskan þjóðarvilja og torvelda úrsögn. Á evrópskan mælikvarða er Bretland stórveldi - Ísland er örríki.

Takist sitjandi ríkisstjórn að selja fullveldi landsins í hendur ríkjasambands á meginlandi Evrópu er forræði íslenskra mála varanlega flutt úr landi. Íslendingar verða útlendingar í eigin landi - lög og ákvarðanir um stórt og smátt koma frá Brussel. 

Við vitum afleiðingarnar. Gamli sáttmáli var samþykktur á alþingi 1264 - Ísland gekk erlendu konungsvaldi á hönd. Um aldir var Ísland hjálenda og ein fátækasta þjóð Evrópu. Ekki fyrr en 1944, einum 680 árum eftir Gamla sáttmála, endurheimtu Íslendingar fullt forræði eigin mála.

Blekkingar, hálfsannleikur og lygar einkenna málflutning ESB-sinna. Helstu málpípur þeirra hugsa sér gott til glóðarinnar, þægilega innivinnu í Brussel þegar Ísland er framselt útlendu valdi.

Evrópusambandið sækir að fullveldi Íslands. Til að bæta sér upp tapaða vígstöðu á alþjóðavettvangi, vegna Trump og Pútín, hyggst ESB ná undir sig þrem þjóðríkjum á Norður-Atlantshafi, Grænlandi, Íslandi og Noregi. Tilfallandi bloggaði um norðursókn ESB:

Í byrjun maí í vor flutti Ursula von der Leyen forseti framkvæmdastjórnar ESB ræðu í Aachen í Þýskalandi er hún veitti viðtöku heiðursverðlaunum kenndum við Karlamagnús keisara.

Í ræðunni boðar von der Leyen ,,sjálfstæða Evrópu" í hörðum heimi valdastjórnmála. Þá bætti hún við:

Og þegar ég segi Evrópa, á ég vitanlega við Evrópusambandið. En ég er þeirrar skoðunar að vegferðin verði farin með vinum og samstarfsaðilum. Frá vesturhluta Balkanskaga til Úkraínu og Moldavíu. Frá Grænlandi til Bretlands og víðar. Skylda okkar er að tryggja stöðugleika á meginlandinu með sýn á sameiginlega framtíð.

Í beinu framhaldi talar forseti framkvæmdastjórnar ESB um að sambandið þurfi að hrista af sér hlekki fortíðar og grípa til aðgerða hratt og örugglega. Líkt og stórveldi gera þegar hagsmunum þeirra er ógnað.

Grænland fór inn í Evrópusambandið með Danmörku snemma á áttunda áratug síðustu aldar. Heimastjórn fékk Grænland 1979 og sagði sig úr Evrópusambandinu sex árum síðar, í byrjun árs 1985.

Enginn vafi leikur á stöðutaka ESB gagnvart Grænlandi er andsvar við yfirlýsingu Bandaríkjanna um að Grænland skuli verða bandarískt. Varnar- og öryggishagsmunir Bandaríkjanna eru að Grænland lúti bandarísku forræði - en ekki dönsku. Von der Leyen skorar Bandaríkin á hólm með yfirlýsingu um að Grænland verði ESB-ríki.

Evrópsk hugveita, Heinrich Böll Stiftung, með um 300 manns í vinnu og rekstarfé frá ESB, gaf í byrjun júlí út skýrslu um norðursókn Evrópusambandsins. Skýrslan er í senn greining og stefnumótun - og fullkomlega í takti við ræðu von der Leyen.

Heiti skýrslunnar er Stækkun ESB í norður í sjónmáli? Frumkvæði á óvissutímum. Í skýrslunni er dregin upp áætlun um að fá Grænland, Ísland og Noreg inn í Evrópusambandið. Úkraínustríðið annars vegar og hins vegar forsetatíð Trump knýja á um að ESB nýti sóknarfæriá norðurslóðum, segir í skýrslunni. Landvinningar valdefli sambandið og gefi endurnýjaðan tilgang.

Ísland er talið lykilríki til að fá Grænland og Noreg inn í sambandið. Vísað er til þess að sitjandi ríkisstjórn Íslands sé áhugasöm um ESB-aðild. Lagt er til að ESB geri Íslandi tilboð í sjávarútvegsmálum ,,sem ekki er hægt að hafna." Orðalagið er beint upp úr mafíubókmenntum - þýðir að dauðasök sé að neita tilboði guðföðurins. ESB hefur ýmsar leiðir til að herja á íslenska hagsmuni, ekki síst í gegnum EES-samninginn.

Þorgerður Katrín utanríkisráðherra og ráðherrar Viðreisnar sýna einbeittan ásetning að Evrópusambandið nái markmiði sínu og innlimi Ísland. Ráðherrar Samfylkingar og Flokks fólksins hafa ekki enn sýnt á spilin. Þar ríkir þögnin ein. Viðreisnarráðherrar eiga á meðan sviðið og móta orðræðuna í þágu ESB. Hollusta og trúnaður Þorgerðar Katrínar og félaga er við Evrópusambandið, ekki lýðveldið Ísland.

 

Ekki áhlaupaverk að endurheimta fullveldið