Tilfallandi athugasemdir

Líkur eru á friði í Gasa eftir tveggja ára stríð Ísraela við Hamas-hryðjuverkasamtökin í kjölfar fjöldamorðanna 7. október 2023. Die Welt segir að Trump forseti sæki miðausturlönd heim næstu daga og verði viðstaddur tímamótin. Fáir í vestrinu fagna væntum stríðslokum. Tilfallandi skrifaði um friðaráætlun Bandaríkjaforseta:

Friðaráætlunin gerir ráð fyrir afvopnun Hamas og sakaruppgjöf til Hamas-félaga er játa friði. Gert er ráð fyrir alþjóðlegri uppbyggingu í Gasa er miði að velferð íbúanna og varanlegum friði við Ísrael.

Friðaráætlunin er í 20 liðum. Í framkvæmd verður Gasa nýlenda á forræði Bandaríkjanna til að byrja með. Í fyllingu tímans gæti heimastjórnin á vesturbakkanum fengið hlutverk á Gasa og yrði það vísir að sjálfsstjórnarríki araba er kenna sig við Palestínu. Fyrsti liður friðaráætlunarinnar tekur af öll tvímæli um forsendurnar. Þar segir að hvorki skuli þrífast á Gasa róttækni né hryðjuverkamenning er ógni grannríkjum. Innviðir til hryðjuverka s.s. neðanjarðargöng verða aflagðir. Hryggð verður í Evrópu yfir frjálsri Palestínu sem ekki er í færum að fremja þjóðarmorð á gyðingum.

Konstantin Kisin útskýrir í stuttu máli hvers vegna menn stökkva ekki hæð sína í gleði yfir líklegum stríðslokum. Kjarninn í máli Kisin er að vestrænir stuðningsmenn Hamas gráta það mjög að hryðjuverkamenn gefi frá sér það markmið að útrýma gyðingum.

Hamas hóf stríðið 7. október 2023 með fjöldamorðum á Ísraelum og gíslatöku. Í tvö ár nota hryðjuverkamenn Hamas almenning í Gasa sem mannlega skildi. Herfræði Hamas, með lygum um þjóðarmorð á Palestínumönnum, var að vestrið myndi leggjast af fullum þunga á Ísrael að hætta hernaðaraðgerðum á Gasa. Víða í Evrópu var tekið undir með Hamas, stjórnvöld í nokkrum ríkjum viðurkenndu hryðjuverkasamtökin sem fullgilda meðlimi alþjóðasamfélagsins. Sjálfstortíming Evrópu er komin á það stig að álfan tekur i faðm sér hugmyndafræði er fyrirlítur lýðræði, mannréttindi og almennt siðferði.

Þrátt fyrir stuðning frá Evrópu fór Hamas halloka í stríðinu. Ísrael lét vestrið ekki kúga sig til að hætta hernaði gegn hryðjuverkum. Trump beið átekta og þegar aðstæður voru réttar lagði hann fram friðaráætlun, sem í raun er uppgjöf Hamas.

Enn er of snemmt að segja til um hvort vatnaskil hafi orðið í deilu Íraels við arabíska nágranna sína. Sú deila er kjarni Gasa-stríðsins. Til skamms tíma var Hamas verkfæri herskárra múslímaríkja að útrýma Ísraelsríki. Kannski að Trumpfriður í Gasa marki tímamót.

Að fáir í vestrinu fagni friði í blóðugu stríði segir háskalega sögu um menningarástand vestursins. Ísrael er hatað í vestrinu hvað heitast og innilegast af vinstrimönnum. Rætur hatursins eru tvístofna. Í fyrsta lagi sjálfshatur á gyðinglegum kristnidómi, sem er undirstaða vestrænnar menningar. Í öðru lagi rótgróið gyðingahatur sömu ættar og leiddi til helfararinnar fyrir miðja síðustu öld. Eitur í beinum vinstrimenningar samtímans er velgengni Ísraelsríkis, sem er eina þjóðríkið í miðausturlöndum er státar af vestrænu lýðræði og mannréttindum.

Það eykur líkur á varanlegum friði að múslímaríkin í miðausturlöndum virðast snúa baki við fyrri stefnu um að útrýma Ísrael og hallast nú að samstarfi fremur en hernaði og hryðjuverkum. Allir friðelskandi ættu að fagna. 

	Ísrael og Hamas ná saman um friðarsamkomulag
Ábyrgðarmaður færslu Tilkynna um óviðeigandi tengingu við frétt

Ólafur Þór Hauksson héraðssaksóknari tilkynnti 2. júlí í RÚV að rannsókn Namibíumálsins væri lokið eftir tæp sex ár og mörg hundruð milljónir króna kostnað. Málið var búið til í hendur héraðssaksóknara af Helga Seljan fréttamanni Kveiks á RÚV í nóvember 2019. Nú eru þrír mánuðir síðan Ólafur Þór sagði rannsókn lokið en ekkert bólar á niðurstöðu.

Eftir að rannsókn lýkur á sakamáli er aðeins tvennt í stöðunni. Að ákæra eða fella málið niður. Héraðssaksóknari gerir hvorugt. Hann heldur Namibíumálinu i öndunarvél.

Namibíumálið snýst um ásakanir Jóhannesar Stefánssonar sem stjórnaði dótturfélagi Samherja í Afríkuríkinu um miðjan síðasta áratug. Jóhannes leiddist út í óreglu, áfengi, eiturlyf og ýmislegt verra, og var sagt upp. Atvinnulaus og illa þokkaður kom Jóhannes í hefndarhug til Íslands með tröllasögur um  mútugreiðslur til namibískra embættis- og stjórnmálamanna. RÚV og Helgi Seljan bjuggu til óformlegt fjölmiðlabandalag með Stundinni og Kjarnanum, RSK-miðla, til að segja sögu Jóhannesar á Íslandi þannig að alþjóð tryði. Fjölmiðlaatlagan heppnaðist. Vinstrimenn á alþingi gleyptu hráan heilaspuna Jóhannesar og siguðu embætti héraðssaksóknara á Samherja með 200 milljón króna fjárveitingu. Meginregla réttarríkisins um aðgreiningu löggjafa og ákæruvalds var þverbrotin. Í raun var fé sett til höfuðs einkafyrirtæki.

RSK-miðlar reyndu útflutning á ásökunum Jóhannesar. Þeir réðu danskan blaðamann, Lasse Skytt, til að skrifa Namibíumálið inn í norræna fjölmiðla. Leiðangurinn mistókst herfilega. Norska útgáfan Aftenposten beit að vísu á agnið og birti grein eftir Skytt. Þegar betur var að gáð reyndist Jóhannes einskins virði sem heimild. Norskir blaðamenn afhjúpuðu handvömm þeirra íslensku og ófagleg vinnubrögð fjölmiðla á Fróni. Tilfallandi bloggaði málið:

Jarðaför Namibíumálsins fór fram í Noregi 1. mars 2023. Þann dag birtist afsökun norska stórblaðsins Aftenposetn Innsikt. Lykilsetningin er eftirfarandi:

Aftenposten Innsikt hefur enga stoð fyrir þeirri fullyrðingu að Jóhannes Stefánsson hafi komið fram „fyrir hönd“ Samherja í mútumáli til manna í Namibíu né að samningur um eitthvað slíkt hafi verið gerður á milli Samherja og namibískra aðila. Um er að ræða ásakanir Jóhannesar Stefánssonar.

Jóhannes Stefánsson er eina heimildin um að Samherji hafi stundað mútur í Namibíu. Allt Namibíumálið byggir á einum manni sem, frómt sagt, er ekki trúverðug heimild. Í blaðamannskólum er kennt að einnar heimildar fréttir beri að varast og því meira sem fréttamálið er stærra.

Þegar heimildin er hatursfullur eiturlyfjafíkill og stórtækur vændiskaupandi, sem hringir í fólk og hótar limlestingum og lífláti, þarf ekki að kunna blaðamennsku til að átta sig á að ekki er um að ræða góðan pappír.

Afsökun Aftenpostin Innsikt 1. mars kemur í kjölfar forsíðugreinar tímaritsins í febrúar. Danskur blaðamaður, Lasse Skytt, skrifaði þar norræna útgáfu af Kveiksþætti RÚV frá 2019. Skytt fékk nýjustu uppfærsluna frá Jóhannesi. Þegar búið er að fara yfir fréttina af ritstjórn Aftenposten Innsikt er niðurstaðan afgerandi. 

,,engin stoð" er fyrir fullyrðingu Jóhannesar Stefánssonar.

Hvers vegna birti RÚV, í félagi með Kjarnanum og Stundinni (nú Heimildinni) staðlausa stafi Jóhannesar uppljóstrara? Jú, RÚV og fylgimiðlar stunda ekki blaðamennsku heldur málafylgju. RÚV ætlaði að ,,taka niður" Samherja og nota til þess ásakanir Jóhannesar.

Nú er ekki vitað hvort embætti héraðssaksóknara ráði yfir tungumálagarpi læsum á norsku en fyrir brot af þeim 200 milljónum sem embættið fékk frá alþingi hefði mátt þýða afsökunarbeiðni Aftenposten Innsikt og spara fjármuni og fyrirhöfn. En embættið var svo kirfilega samansúrrað RSK-miðlum að haldið var áfram að berja hausnum við steininn.

Í höndum héraðssaksóknara er Namibíumálið frá upphafi hryggðarmynd af samkrulli ákæruvalds, fjölmiðla og þingmanna Samfylkingar og Vinstri grænna. Í vor tók steininn úr og hryggðarmyndin varð að farsa. Níu menn eru sakborningar í Namibíumálinu. Í apríl kemst Ólafur Þór Hauksson héraðssaksóknari að embættið sé vanhæft til að rannsaka einn sakborninganna, Jón Óttar Ólafsson. Héraðssaksóknari skrifar bréf til ríkissaksóknara 22. apríl í ár og segir

verulegan vafa leika á að embætti héraðssaksóknara sé til þess bært að rannsaka málið [þ.e. ólögmæta dreifingu persónuupplýsinga] þar sem undirritaður stýrði því embætti sem gögnin eru talin stafa frá og kærði sömu aðila [Jón Óttar] fyrir brot á þagnarskyldu á sínum tíma.

Bréfið er skrifað vegna rannsóknar á öðru máli, persónuupplýsingum úr hrunmálum sem fóru í ólögmæta dreifingu. Jón Óttar var starfsmaður Ólaf Þórs saksóknara í hrunmálum, síðar hóf Jón Óttar að vinna fyrir Samherja. Ólafur Þór er vanhæfur, að eigin sögn, að rannsaka Jón Óttar frá árinu 2012, já fyrir 13 árum, þegar hann kærði Jón Óttar fyrir brot á þagnarskyldu. En samt sem áður gerði Ólafur Þór Jón Óttar að sakborningi í Namibíumálinu árið 2020.

Og hver ætli sé upphafsmaðurinn að persónuupplýsingamálinu? Nú, auðvitað fréttamaðurinn Helgi Seljan, sá hinn sami og hratt úr vör Namibíumálinu 2019. Helgi var látinn fara frá RÚV í byrjun árs 2022 vegna annars alræmds fréttamáls RSK-miðla, byrlunar- og símamálsins. Í vor fékk hann endurráðningu hjá RÚV. Á örfáum vikum tókst Helga að hleypa öllu í bál og brand á ný á Efstaleiti. En svo hvarf fréttamaðurinn með Samherjablætið sjónum manna. Ekkert hefur spurst til Helga frá miðju sumri á öldum ljósvakans. 

Kannski að Helgi dúkki upp þegar héraðssaksóknari tilkynnir niðurstöðu Namibíumálsins? Vel færi á því að ákæruvaldið og ríkisfjölmiðilinn gerðu sameiginlega grein fyrir herfilegri misnotkun á opinberu valdi. Í framhaldinu þarf að upplýsa byrlunar- og símamálið þar sem blaðamenn höguðu sér eins og ótíndir glæpamenn.

Karl sem segist kona með viðskeytinu trans á sín mannréttindi. Hann á aftur engin kvenréttindi, þau eru ætluð konum.

Mannréttindi eiga allir, hvernig sem þeir skilgreina sig, fatlaðir og ófatlaðir, þeir sem ganga heilir til skógar og einnig hinir sem glíma við andlega vanheilsu.

Kvenréttindi eru ætluð líffræðilegum konum en ekki körlum í hlutverkaleik.

Ofanritað eru sjálfssögð sannindi sem óþarfi ætti að ræða frekar. Talsmenn transhinsegin þvæla aftur umræðuna út og suður. Til dæmis Gréta Kristín Ómarsdóttir, sem segir þetta:

Þar er verið að afturkalla réttindi hinsegin fólks og kvenna og reka ríkisborgara úr landi af því þeir eru ekki hvítir og þóknast ekki þjóðarleiðtogum. Ef við förum að ganga á frelsi hinsegin fólks þá erum við á endanum að ganga á frelsi allra.

Blaðamaður Morgunblaðsins lætur ekki svo lítið að spyrja Grétu Kristínu frá hvaða löndum hinsegin ekki-hvítir eru reknir. Ekki heldur er aktívistinn spurður nánar út í hvaða frelsi er átt við. Ef karl sem þykist kona fær ekki aðgang að kvennaklefa sundlaugar er þá hætta á að líffræðilegum konum verður meinaður aðgangur?

Ekki batnar málflutningur Grétu Kristínar þegar kemur að tjáningarfrelsi. Hún segir:

Það er mikið talað um að fólki sé slaufað fyrir að hafa „rangar“ skoðanir á hinsegin málefnum og að mannréttindabarátta okkar skerði einhvern veginn tjáningarfrelsi annarra – en hver á allt þetta tjáningarfrelsi sem verið er að verja.

Tjáningarfrelsið er ekki eign, líkt og Gréta Kristín gefur í skyn, heldur réttindi allra að tjá hug sinn og sannfæringu. Illu heilli er tjáningarfrelsið ekki hærra metið í sumum vestrænum ríkjum, t.d. Íslandi og Bretlandi, en svo að ríkisvaldið sækir fólk til saka fyrir að hafa rangar skoðanir á transhugmyndafræðinni. Samtökin 78 hafa í frammi alvarlegar ásakanir um hatursorðræðu þegar fólk andmælir hugmyndafræðinni.

Í transumræðunni er iðulega skautað framhjá staðreynd sem allir vita en fæstir segja upphátt, að perrar eru yfirleitt karlar en ekki konur. Hefur einhver heyrt um konu, sem þykist karl, ryðjast inn í búningsklefa karla með túttur á bringu og sköp á milli fótanna og segja upphátt: engar áhyggjur strákar, innra með mér er ég karl? Eru dæmi um að kona í karlhlutverki heimti að keppa sem karl í íþróttum?  Hvers vegna er frekja og yfirgangur karla í kvenbúningi til vandræða en sjaldnast öfugt, að konur í hlutverki karla ybbi gogg og séu með leiðindi um að vera ekki teknar sem góðir og gildir karlar? 

Kynin er tvö og enginn skiptir um kyn. Á því sögðu má hver og einn tileinka sér hvaða sjálfsmynd sem vera skal. Fertugur karl má í huga sér vera táningsstúlka og klæða sig til samræmis. En karlinn getur ekki skráð sig til leiks í unglingadeild kvennaíþróttar. Ekki heldur arkar hann inn í búningsklefa kvenna út á það eitt að vera í huga sér kvenkyns. Á sjúkrahúsi fær karlinn ekki meðferð vegna tíðarverkja. Sá fertugi með hugmyndina að hann sé táningsstúlka fær aftur geðþjónustu er hæfir ástandi hans.

Frelsið til að vera maður sjálfur takmarkast við einstaklinginn. Sjálfsmynd einstaklings er hans einkamál. Sé sjálfsmyndin á skjön við raunsannindi er það ekki vandamál samfélagsins heldur einstaklingsins.

	Býður Snorra Mássyni á sýninguna
Ábyrgðarmaður færslu Tilkynna um óviðeigandi tengingu við frétt

Loftslagsvá réttlætir hækkun skatta. Almenningur er gerður nógu óttasleginn við vítishlýnun af mannavöldum til að láta yfir sig ganga margvíslegar skattahækkanir, neyslustýringu og tilskipanir um hvernig skuli haga lífinu . Allt til að bjarga heiminum frá ragnarökum. Illa gengur að finna raungögn sem styðja loftslagsvá og æ fleiri átta sig á að reiknilíkön eru skáldskapur en ekki vísindi. Þá þarf að finna aðra grýlu til að hræða almenning með. Í ESB-Evrópu er Rússavá þénug til að halda almenningi í helgreipum óttans.

Á evrópskum vettvangi lýsti Þórdís Kolbrún, fyrrverandi utanríkisráðherra, yfir að stuðningur við Úkraínu væri í raun Rússaskattur. Afhjúpun Þórdísar Kolbrúnar hittir hana sjálfa og félaga hennar fyrir. Stjórnmálamenn ýmist búa til vandamál, loftslagsvá, eða láta vera að leysa þau, Úkraínustríðið, gagngert til að viðhalda ótta. Sérstaklega eru kær stjórnmálamönnum vandamál sem ógna lífi og frelsi manna. Við slíkar kringumstæður leika stjórnmálamenn á alls oddi. Ábúðarmiklir telja þeir almenningi trú um að skattheimta og tilskipanir leysi stórvandræði sem ýmist eru skáldskapur frá rótum eða ýkjur.

Til skamms tíma voru það einkum pólitíkusar vinstriflokkanna sem áttu aðild að tilbúnum vandamálum með tilheyrandi ríkisíhlutunarlausnum. Er vinstrimönnum varð ágengt í svikamyllunni tóku hægrimenn við sér og stukku á ímyndaðan vandamálavagn, urðu ríkisafskiptasinnar. Líkt og dæmið af Þórdísi Kolbrúnu segir okkur.

Breski Íhaldsflokkurinn er skýrt dæmi um ógöngur sem hægrimenn rata í með ríkisafskiptum af ímynduðum vandamálum. Teresa May var formaður Íhaldsflokksins og forsætisráðherra. Árið 2019 ákvað hún að Bretland skyldi fyrir árið 2050 ná því markmiði að losa engar gróðurhúsalofttegundir út í andrúmsloftið. ,,Net zero" eða núllstefna var heitið. Stefna May og þar með íhaldsmanna frá 2019 var yfirboð á stefnu Verkamannaflokksins sem árið 2008 skuldbatt Bretland að minnka losun gróðurhúsalofttegunda, einkum koltvísýrings, um 80 prósent fyrir 2050.

Enginn veit veðurfar jarðar eftir 25 ár, árið 2050. Menn vita ekki einu sinni hvernig veðrið verður næstu jól. En í samkrulli hamfarasinna með háskólagráður og stjórnmálamanna er sú kenning tekin sem trúarsetning að án stórfelldra ríkisafskipta verði of heitt fyrir mannkyn allt eftir aldarfjórðung.

Núllstefnan í loftslagsmálum gerir ekkert fyrir lofslagsbreytingar, enda eru þær ekki af mannavöldum heldur náttúrulegar og hafa alltaf verið. Miðaldahlýskeiðið 900-1300 var ekki af mannavöldum og heldur ekki litla ísöld frá 1300 til 1900. Lengra aftur í tímanum er ísöld er lauk fyrir tæpum 12 þúsund árum - ekkert manngert þar á ferðinni.

Um 97 prósent af koltvísýringi i umferð er náttúrulegur. Loftslagsblekkingin mikla er að telja fólki trú um að þau þrjú prósent koltvísýrings sem stafa af mannlegri starfsemi breyti loftslagi jarðar varanlega og til hins verra en náttúrulegu 97 prósentin séu áhrifalaus. Reynt er að fela ávinninginn af auknum koltvísýringi í andrúmslofti sem skilar sér í auknu gróðurmagni og meiri uppskeru. Allt er gert til að halda loftslagsblekkingunni gangandi.

Núllstefnan í Bretlandi sætir æ kröftugri gagnrýni vegna kvaða sem hún leggur á breskt efnahagslíf. Sitjandi formaður Íhaldsflokksins, Kemi Badenoch, boðar fráhvarf frá núllstefnunni, hún sé of íþyngjandi. Höfundur mistaka Íhaldsflokksins, Teresa May, segir það muni hafa ,,skelfilegar afleiðingar" að hverfa frá núllstefnunni. Rétt eins og Bretland eitt og sjálft gæti breytt loftslagi jarðar.

Núllstefna í loftslagsmálum og Rússaskattur vegna Úkraínustríðsins fara í sögubækurnar sem tilraunir stjórnlyndra pólitíkusa að blekkja almenning með sviðsettum atburðum. Loftslagsvá er vísindaskáldskapur; Úkraínustríðið er vestræn leiktjöld fyrir misheppnaða útþenslu í Austur-Evrópu.

Bandaríkin undir forystu Trump segja sig frá loftslagsblekkingunni og láta Evrópu eina um Úkraínustríðið. Rússaskatturinn sem almenningur í Evrópu greiðir er notaður til að kaupa bandarísk vopn sem send eru til Úkraínu í tilgangslaust stríð. Trump, sem nýlega hækkaði tolla á ESB-Evrópu, hlær sig máttlausan yfir einfeldni gamla heimsins.

	Mikill viðbúnaður í Kaupmannahöfn
Ábyrgðarmaður færslu Tilkynna um óviðeigandi tengingu við frétt

Kristrún forsætis segir undir rós að Þorgerður Katrín utanríkis ætti að ná stjórn á sér og láta ekki eins og himinn og jörð séu að farast þótt gári í heimspólitíkinni. ,,Mikilvægt að við höldum ró okkar," segir Kristrún.

Þorgerður Katrín missteig sig illilega þegar hún fyrir rúmri viku sagði bráðnauðsynlegt að kalla saman þjóðaröryggisráðið vegna dróna yfir Kastrup-flugvelli í Danmörku. En nauðsynin var þó ekki meiri svo að það mætti bíða heimkomu hennar eftir veisluhöld í New York. Þing og þjóð spurðu forviða hvort þjóðaröryggið færi eftir hvernig stæði með kokteilboð utanríkisráðherra.

Þorgerður Katrín á að heita reyndur stjórnmálamaður en gerir hvert axarskaftið á fætur öðru. Í mars gagnrýndi hún Bandaríkin fyrir áhuga á Grænlandi og tók afstöðu með nýlenduveldi Dana. Afstaða utanríkisráðherra leiddi til þess að Ísland var sett í skammarkrókinn í samningaviðræðum um tollamál.

Utanríkisráherra böðlast áfram með þá stefnu að Ísland verði ESB-ríki án þess að hafa til þess umboð frá kjósendum. Hingað til hefur Samfylkingin látið sér það vel líka. Stefna Viðreisnar, þar sem Þorgerður Katrín er formaður, setur í uppnám varnarsamninginn við Bandaríkin frá 1951, sem hefur verið hornsteinn öryggis- og varnarmálastefnu landsins frá miðri síðustu öld. Í sumar kom forseti framkvæmdastjórnar Evrópusambandsins, Úrsúla von der Leyen, í heimsókn til Íslands og gaf tóninn um nýjar Viðreisnaráherslur í öryggis og varnarmálum Íslendinga:

Ísland fer með lykilhlutverk í viðbúnaði Nató á norðurslóðum og Norður-Atlantshafi. Ísland er sterkur og áreiðanlegur bandamaður. [...] Ég er ánægð með að viðræður eru hafnar um aðild Ísland að öryggis- og varnarsamvinnu ESB. Ég er viss um að viðræðum verði lokið innan fárra vikna eða mánaða. Þær munu skila Íslandi inn í öryggis- og varnarsamstarf Evrópusambandsins.

Bandaríkin eiga ekki aðild að öryggis og varnarsamvinnu Evrópusambandsins. Samvinnan er alfarið á forræði Evrópusambandsins og er viðbragð við minnkandi umsvifum Bandaríkjahers á meginlandi Evrópu. Með því að véla Ísland inn í öryggis- og varnarstefnu Evrópusambandsins veikist samstarfið við Bandaríkin. Með framgöngu sinni grefur Þorgerður Katrín undan varnarsáttmála Íslands og Bandaríkjanna frá 1951 eins og tifallandi útskýrði.

Kristrún forsætis er langþreytt á einleik Þorgerðar Katrínar í utanríkismálum. Menn þurfa að nálgast stóru málin án hamagangs og umfram allt edrú. 

	„Mikilvægt að við höldum ró okkar“
Ábyrgðarmaður færslu Tilkynna um óviðeigandi tengingu við frétt