Bóla í Bandaríkjunum, miðaldir í Evrópu

Í Bandaríkjunum óttast hagfræðingar eignabólur á hlutabréfum og fasteignum vegna núllvaxtastefnu seðlabankans þar í landi. Í Evrópu er andstæð þróun, þar stefnir í verðhjöðnun sem dregur jaðarhagkerfi álfunnar, þau sem slíta með evru, í vítahring atvinnuleysis, samdráttar í hagvexti og skuldaáþjánar.

Einn kunnasti hagfræðingur samtímans, Nouriel Roubini, segir verulega hættu á að hagstjórn í Bandaríkjunum mistakist og það leiði til samdráttarskeiðs er verði illvígari en tímabilið eftir hrun Lehmans-banka 2008. Eignabólurnar verði annað tveggja sprengdar og snemma, og það lami hagvöxt, eða of seint og þá gjósi upp fjármálakreppa er vinni sig inn í raunhagkerfið með tilheyrandi samdrætti.

Evrópa, á hinn bóginn, er á hraðri leið inn í tímabil verðhjöðnunar, skrifar Ambrose Evans-Pritchard, í Telegraph. Reynsla Japana á síðustu öld er að verðhjöðnun sé hálfu verri efnahagssjúkdómur en verðbólga. Samhliða verðhjöðnun skreppur efnahagslífið saman og opinberar skuldir, sem þegar eru miklar, verða hlutfallslega enn þungbærari fyrir ríkissjóði Suður-Evrópuríkja.

Af tvennu illu er bandaríska hagkerfið með betri horfur en það evrópska. Langtímaþættir eins og mannfjöldaþróun og orkuauðlindir eru jafnframt hliðhollari Bandaríkjunum en Evrópusambandinu.

Grikkland ekki lengur þróað hagkerfi

Athugasemdir

[Ómar Bjarki Kristjánsson, 1.11.2013 kl. 15:36]

,,Einn af hverjum sjö Bandaríkjamanna þarf á mataraðstoð að halda."

http://www.ruv.is/frett/skera-nidur-adstod-vid-fataeka

[Ómar Gíslason, 1.11.2013 kl. 18:17]

55% af ungu fólki í Grikklandi hafa ekki vinnu og fá aðstoð frá ríkinu, það sama er um Spánverja. Þessi lönd hafa það sameiginlegt að vera með mynd sem heitir Evran (€).

[Helga Kristjánsdóttir, 2.11.2013 kl. 01:58]

........Og okkur hugnast ekki sú mynt.

[Ómar Bjarki Kristjánsson, 2.11.2013 kl. 03:08]

Atvinnuleysi ungs fólks 2012 í þýskalandi 8.1, Holland, 9.5, Austurríki 8.7, ÍSLAND 13.6, Danmörk 14.1.