Frosti leysir snjóhengjuna - fáum betri banka í kaupbæti

Snjóhengjan sem hamlar því að við getum aflétt gjaldeyrishöftum er krónueignir erlendra kröfuhafa föllnu íslensku bankanna. Kröfuhafarnir vilja þessar eignir greiddar út í gjaldeyri og þar stendur hnífurinn í kúnni. Ríkisstjórnin vill eðlilega ekki fórna þjóðargjaldeyri í þágu hrægammanna.

Meðal stærstu eigna erlendu kröfuhafanna á Íslandi eru Íslandsbanki og Arionbanki. Bankarnir, líkt og Landsbankinn, sem er í eigu ríkisins, eru með leyfi frá Seðlabanka Íslands að framleiða peninga í formi útlána og skila eigendum sínum fínum arði. Á meðan bankarnir mala erlendum eigendum sínum gull er lítill hvati að leysa þráteflið.

Frosti Sigurjónsson, þingmaður og Icesave-bjargvættur, er óþreytandi að kynna hugmynd um betra peningahagkerfi, sem byggir á því að Seðlabankinn afturkalli leyfi bankanna að framleiða peninga með útlánum og almannavæði myntsláttuhagnaðinn - í stað þess að láta bankana njóta hans.

Með því að taka upp hugmyndir Frosta, sem eru alþjóðlegar og Englandsbanki blessaði nýlega,  yrði sett raketta í rassgatið á erlendum kröfuhöfunum sem  sæju fram á að sitja uppi með verðlausa banka og myndu ólmir vilja semja.

Peningahagkerfið, sem Frosti mælir fyrir, slær þrjár flugur í einu höggi; snjóhengjan leysist, við fáum betri banka og krónan, já íslenska krónan, verður heimsins stöðugasti gjaldmiðill.

Tækifærið er núna, Bjarni Ben. og Sigmundur Davíð. Koma svo.

 

Aflandskrónum fækkað um 240 milljarða

Fréttablaðið fyrirlítur fólk með skoðanir

Fréttablaðinu leiðist fólk með skoðanir, segir í leiðara blaðsins í dag. Sérstaklega er Fréttablaðinu í nöp við fólk sem hvorttveggja er með skoðanir og festir þær skoðanir í letur - og vogar sér síðan að senda Fréttablaðinu grein til birtingar.

Fréttablaðið er aðeins með eina skoðun - mín skoðun hans Mikka ritstjóra.

Og Mikkaskoðun er í beinni útsendingu, eða þannig.

Kennarar, unglingar og skilningsvana ráðherra

Unglingar, sem ættu að vera í skóla í dag, sitja vitanlega heima og læra upp á eigin spýtur enda vita allir komnir til vits og ára að allt nám er sjálfsnám. Nei, glætan, unglingar, nema í undantekningatilfellum, gera það sem þeim finnst skemmtilegast; hittast og spjalla, fara í tölvuleiki, sofa út og annað unglingalegt.

Svo eru aðrir unglingar sem eru í vinnu með skóla og nota verkfallið til að bæta við sig launavinnu og auka þénustuna.

Öllum íslenskum unglingum stendur til boða að ljúka stúdentsprófi á þremur árum enda bjóða allir áfangaskólar upp á þá leið og sumir bekkjaskólar einnig. Þorri íslenskra unglinga velur á hinn bóginn að nota fleiri ár til að ljúka stúdentsprófi. Þá eru ótaldir þeir sem geta ekki staðið undir námskröfum um fjögurra ára nám til stúdents og nota fimm eða sex ár.

Menntamálaráðherra lítur ekki á unglinga eins og lifandi mannverur heldur tölfræði. Samkvæmt tölum sem Illugi Gunnarsson fékk frá Samtökum atvinnulífsins, þeirri miklu miðstöð þekkingar á skólastarfi, nota íslenskir unglingar 14 ár til að taka stúdentspróf, sem er árinu lengra en hjá nágrannaþjóðum.

Illugi vill takmarka val unglinga til að ráða námshraða sínum og í leiðinni mun hann þrengja að möguleikum unglinga til að kynnast atvinnulífinu í gegnum launavinnu. 

Kennarar bera ekki ábyrgð á lífstíl unglinga (og það gerir ráðherra raunar ekki heldur). Engu að síður ætlar menntamálaráðherra að stytta þann tíma sem unglingar nota til að ná stúdentsprófi í gegnum kjarasamninga við kennara.

Verum viðbúin löngu verkfalli.

„Geri hreint fyrir sínum dyrum“

ESB-sinni óttast að vera talinn trúverðugur

Rök ESB-sinna ganga flestöll út á að Ísland sé ónýtt; sérhagsmunaklíkur ráði hér öllu, stjórnkerfið sé lamað, krónan ónýt og efnahagskerfið sömuleiðis. 

Einn aðaltalsmaður ESB-sinna, Benedikt Jóhannesson, steig fram á aðalfundi Nýherja og sagðist óttast að unga fólkið væri að missa tiltrúna á Íslandi.

Benedikt, sem ólmur vildi að óbornar kynslóðir Íslendinga tækju á sig Icesave-skuldir einkabanka, er sem sagt logandi hræddur um að vera talinn trúverðugur og að ungt fólk taki mark á níði ESB-sinna um Ísland og hrakspám um hörmungar handan við hornið.

Á Íslandi fá allir vinnu sem vilja og hagvöxtur er hér á meðan Evrópusambandið býr við fjöldaatvinnuleysi og engan hagvöxt. Á Íslandi eignast fólk fleiri börn að meðaltali en á meginlandi Evrópu; þar sem ungt fólk kýs að eiga afkvæmi sín, þar er gott að búa.

Engin hætta, Benedikt, fólk tekur ekki mark á þér og þínum líkum.

Sagan og sagnfræðingar í pólitík

Íslandssagan er þrjú tímabil. Gullöldin er frá landnámi til Gamla sáttmála um miðja 13. öld en þá hefst niðurlægingartímabil undir erlendri stjórn sem lýkur ekki fyrr en á 19. öld þegar tímabil endurreisnar hefst. Þetta er sígilda útgáfan af Íslandssögunni.

Guðni Th. Jóhannesson segir sígildu útgáfu íslenskrar sögu úrelta. ,,Sagnfræðingum samtímans finnst þetta úrelt söguskoðun, einföldun á flóknum veruleika," segir Guðni í viðtali við Morgunblaðið og gagnrýnir stjórnmálamenn fyrir þessa söguskoðun.

Guðni Th. fer með rangt mál. Nestor íslenskra sagnfræðinga, Gunnar Karlsson, notar sígildu útgáfu Íslandssögunnar sem grundvöll að tímabilaskiptingu í nýlegu höfundarverki, Íslandssaga í 1100 ár - saga jaðarsamfélags. Gunnar gerir þá óverulegu breytingu á sígildu útgáfunni að hann skiptir lokatímabilinu í tvö, þjóðríkjamyndun og umbyltinguna miklu. Gunnar vísar í sígildu tímabilaskiptinguna í annarri nýlegri bók, Íslandssaga í stuttu máli (bls. 34). 

Gunnar Karlsson ræðir í pistli á Vísindavefnum tímabilaskiptingu Íslandssögunnar og segir þær misjafnlega skýrar og fróðlegar. Sígilda útgáfa Íslandssögunnar endurspeglar best meginþætti sögu okkar. Sagnfræðingar sem neita því eru komnir á kaf í pólitík