Árni Páll ekkert lært síðan 5. okt. 2008

Í viðtali við Viðskiptablaðið 5. október 2008 sagði Árni Páll Árnason eftirfarandi

„Það hefur sýnt sig að yfirlýsing um að stefnt sé að Evrópusambandsaðild er töfralausn við fjármálalegum óstöðugleika og aðstæðum á borð við þær sem Íslendingar standa nú frammi fyrir," sagði Árni Páll Árnason, þingmaður Samfylkingarinnar, í samtali við Viðskiptablaðið í dag.

Hálfu ári eftir þessa tímamótayfirlýsingu sótti Samfylkingin um aðild að Evrópusambandinu en umsóknin strandaði þegar árið 2011 og formlega  2012/2013 þegar þáverandi ríkisstjórn Samfylkingar og VG lagði umsóknina á ís.

Formaður Samfylkingar krefst ,,alvöru greiningu á hagsmunum þjóðarinnar" vegna ESB-umsóknarinnar. Jamm, hún fór sem sagt aldrei fram áður en umsóknin var send til Brussel sumarið 2009.

Baráttan snýst um þjóðarhag

Samtök atvinnulífsins og ráðherra gegn kennurum

Samtök atvinnulífsins endurgjalda Illuga Gunnarssyni menntamálaráðherra stuðninginn við menntastefnu SA með því að útskýra með tölfræðisamanburði árabilið 1990 til 2013 að kennarar hafi það fjandi gott og ættu að sætta sig við kauphækkun upp á skít og kanil.

Tölfræðiæfingar SA  gera lítið úr samanburði sem KÍ gerði á launum kennara annars vegar og hins vegar annarra starfsmanna ríkisins. Samanburður KÍ miðast við árið 2002, 2007 og 2012. SA seilist aftur til síðustu aldar til að finna flugufót fyrir þeirri staðhæfingu að þróun launa hafi verið kennurum í hag í áratugi.

Um helgina er gerð úrslitatilraun til að ná samningum milli framhaldsskólakennara og ríkisins. Í þeim samningi er m.a. tekist á um menntastefnu Samtaka atvinnulífsins sem menntamálaráðherra tekur hrá upp, væntanlega vegna þess að Samtök atvinnulífsins búa að farsælli reynslu og þekkingu á sviði skólastarfs.

Fréttaáróður Samtaka atvinnulífsins eykur ekki líkur á samningi, heldur þvert á móti stóreykur tortryggni gagnvart SA og menntastefnu Illuga.

Það verður verulegur vandi að selja kennurum samning með fingraförum milljón króna hrunfólksins í SA. Einkum og sérílagi ef samningurinn jafnar ekki launastöðu kennara og sambærilegra stétta hjá hinum opinbera - en þar munar 17 prósent í dagvinnulaunum og tíu prósent í heildarlaunum.

Gagnrýna kröfur framhaldsskólakennara

Stéttskiptir sjúkdómar og siðlaus samanburður

Það er betra að eiga barn með krabbamein eða hjartasjúkdóm en barn með geðsjúkdóm eða þroskaskerðingu, segir móðir einhverfs drengs á unglingsaldri. Rökin eru þau að það sé ekki nógu ,,félagslega fínt" að vera með einhverft barn á Íslandi. (Í hvaða landi ætli það sé fínt?)

Krabbamein og hjartasjúkdómar eru lífshættulegir sjúkdómar, einhverfa er það ekki. Samanburður þessarar móður er algerlega siðlaus.

Lífshættulegir sjúkdómar hljóta eðli málsins samkvæmt að njóta forgangs gagnvart veikindum sem ekki eru lífshættuleg.

Einhverfa ekki nógu félagslega fín