Klofningur á RÚV: Kastljós gegn Kveik

Maríu Sigrúnu fréttamanni var úthýst af Kveik. Hún lét sér ekki vel líka að Ingólfur Bjarni Sigfússon ritstjóri Kveiks tók af dagskrá frétt um spillingu í ráðhúsi Reykjavíkur. Ingólfur Bjarni beit höfuðið af skömminni, sagði Maríu Sigrúnu snotran fréttalesara sem kynni ekki ,,rannsóknablaðamennsku", sem Kveikur státar sig af.

Frétt Maríu Sigrúnar, um lóðagjafir Dags borgarstjóra til olíufélaganna, var um síðir sýnd undir merkjum Kastljóss og þótti afhjúpandi um óboðlega stjórnsýslu Reykjavíkurborgar þar sem hagsmunir almennings voru fyrir borð bornir. Kastljósi ritstýrir Bald­vin Þór Bergs­son sem greip til varna er Dagur og vinstrimenn tóku undir með Ingólfi Bjarna, að María Sigrún héldi ekki máli faglega.

Þriðji karlamillistjórnandinn á Efstaleiti, Heiðar Örn Sigurfinnsson, fréttastjóri fréttastofu Ríkisútvarpsins, blandaði sér í málið á fyrstu stigum og dró taum Ingólfs Bjarna.

Klofningur er á milli Kastljóss, sem Baldvin Þór ritstýrir, annars vegar og hins vegar Kveiks undir stjórn Ingólfs Bjarna. Heiðar Örn styður Ingólf Bjarna, enda eiga félagarnir sameiginlegt að láta kvenkyns undirmenn trufla dómgreindina. Þeim gest ekki að konum með bein í nefinu.

Sá sem ber ábyrgð á RÚV í heild sinni er Stefán Eiríksson útvarpsstjóri. Hann segir ekki múkk. Stefán er málsaðili að stjórnsýslu Reykjavíkurborgar þegar gjafagjörningur Dags borgarstjóra var keyrður áfram, árið 2019. Stefán var borgarritari og staðgengill Dags í vinnubrögðum sem María Sigrún afhjúpaði. Miðað við háttsemi Stefáns sem borgarritara gæti hann hafa att Ingólfi Bjarna á foraðið.

Kveikur er samnefnari spillingar innan RÚV. Ritstjórinn á undan Ingólfi Bjarna var Þóra Arnórsdóttir. Þóra hvarf sviplega úr starfi viku eftir að upplýst var að hún keypti Samsung-símann sem notaður var til að afrita síma Páls skipstjóra Steingrímssonar í byrlunar- og símastuldsmálinu. Þóra keypti símann í apríl 2021, en skipstjóranum var byrlað 3. maí 2021. Þóra og RÚV vissu með fyrirvara að von væri á síma skipstjórans. Aðalsteinn Kjartansson var undirmaður Þóru á Kveik. Hann var fluttur í skyndi yfir á Stundina 30. apríl 2021, þrem dögum fyrir byrlun skipstjórans. Á Stundinni, nú Heimildinni, tók Aðalsteinn við stolnum gögnum frá RÚV, gögn sem fengin voru með byrlun. Bæði Þóra og Aðalsteinn eru sakborningar í yfirstandandi lögreglurannsókn.

Helgi Seljan var látinn fara af Kveik áramótin 2021-2022 vegna tengsla við þáverandi eiginkonu skipstjórans, sem byrlaði og stal fyrir blaðamenn. Um miðjan október 2021 mætti Helgi í beina útsendingu hjá vini sínum á RÚV, Gísla Marteini, og lýsti sig gúgú-og gaga. Spilltu skinni rannsóknablaðmannsins varð þó ekki bjargað. Frumlegt samt hjá rannsóknablaðamanninum að lýsa sig án vits og dómgreindar, tíu dögum eftir að fyrsta yfirheyrsla fór fram í byrlunar- og símastuldsmálinu. Helgi er kominn með vottorð. Enda hefur hann ekki verið kallaður í yfirheyrslu, svo vitað sé.

Byrlunar- og símastuldsmálið er framhald af öðru ljótu máli ritstjórnar Kveiks, Namibíumálinu. Fyllibytta og ógæfumaður var gerður að trúverðugri heimild um mútugjafir Samherja í Afríkuríkinu. Fimm ár eru liðin og þrátt fyrir ítarlegar rannsóknir lögregluyfirvalda í tveim ríkjum finnast engin ummerki um mútugjafir. Þóra, Aðalsteinn og Helgi voru miðlæg í Namibíumálinu. Þau þrjú hafa kostað skattgreiðendur milljarða króna og valdið heilsubresti heiðarlegs fólks sem mátti sitja undir lygaáburði ritstjórnar Kveiks. 

Stefán útvarpsstjóri skráði sjálfan sig úr leik er hann tilkynnti í nóvember á síðasta ári að hann myndi hætta er skipunartíminn rennur út á næsta ári. Vaxandi óþol er í stjórn RÚV með frammistöðu útvarpsstjóra, bæði í Namibíumálinu og byrlunar- og símastuldsmálinu. Eftir eitraða pillu á stjórnarfundi RÚV tilkynnti Stefán að hann yfirgæfi sökkvandi skip.

Klofningur á milli deilda, Kastljóss og Kveiks, myndi ekki opinberast ef Stefán væri myndugur stjórnandi. Í reynd er RÚV fagleg ruslahrúga sem lifir á fornri frægð og nauðungaráskrift. Stefán fékk tækifæri, þegar hann kom til starfa 1. mars 2020, að láta hendur standa fram úr ermum og grisja mesta illgresið á Glæpaleiti. En hann lét sér vel líka spillinguna, þekkti hana úr ráðhúsinu. Sömu týpur eru á báðum vinnustöðum, tjaldhæladrottningin frá Litla-Dal er í kvosinni og gaga-garmurinn uppi á leiti. Undirmenn Stefáns á nýja vinnustaðnum áttu aðild að alvarlegum lögbrotum, byrlun og gagnastuldi, ári eftir að Stefán tók við mannaforráðum. Ekki hvarflaði að útvarpsstjóra og fyrrum lögreglustjóra að upplýsa refsimálið. Meðvirkni er fyrsta boðorð manns án siðferðilegrar kjölfestu.

Maríumál Sigrúnar varpar ljósi á meinsemd sem lengi hefur grafið um sig á Efstaleiti. RÚV er ekki fjölmiðill í þágu almennings heldur aðgerðamiðstöð vinstrimanna sem engu eira til að koma pólitískri sannfæringu sinni á framfæri. Í tilfelli Maríu Sigrúnar snerist málið um að þagga niður óþægilega frétt. Heilindi og fagmennska eru framandi hugtök aktívistanna sem kalla sig blaðamenn.

Glæpaleiti brennur hægt en örugglega. 

Ríkisútvarpið skuldar skýringar

María Sigrún: Dagur gaf olíufélögum 7-13 milljarða

Dagur B. Eggertsson formaður borgarráðs og fyrrum borgarstjóri gaf olíufélögunum lóðir upp á 7-13 milljarða króna, segir fréttamaðurinn María Sigrún Hilmarsdóttir og vísar í gögn máli sínu til stuðnings. Gjöf sér til gjalda. Enn er ekki komið fram hvernig olíufélögin umbunuðu Degi og félögum.

María Sigrún vann frétt um gjafagjörning Dags og stóð til að fréttin yrði sýnd á Kveik. Á síðustu stundu var ákveðið að birta ekki fréttina, en hún var tilbúin um miðjan apríl. Stefán Eiríksson útvarpsstjóri var borgarritari og staðgengill Dags borgarstjóra þegar gjafagjörningurinn var undirbúinn og skipulagður. Síðar fékk Stefán stöðu útvarpsstjóra með stuðningi Dags.

Tilfallandi fjallaði um bræðralag Dags og Stefáns og sagði:

Dagur gaf Stefáni bestu meðmæli fyrir fjórum árum enda kærleikar miklir millum þeirra félaga. ,,Til hamingju Rúv og gangi þér allt að sólu, kæri Stebbi!," skrifaði Dagur. Nú endurgeldur kæri Stebbi fyrrum yfirmanni sínum greiðann með þegjandi stuðningi við millistjórnendur RÚV sem úthúða Maríu Sigrúnu er vogaði sér að afhjúpa spillingu í ráðhúsinu.

Eftir harða opinbera umræðu gaf yfirstjórn RÚV sig og setti frétt Maríu Sigrúnar á dagskrá í Kastljósi síðast liðinn mánudag. Kveiksmenn á RÚV þegja þunnu hljóði. Frétt Maríu Sigrúnar féll ekki að fordómum þeirra um hvar spillingu sé að finna í íslensku samfélagi.

Frétt Maríu Sigrúnar afhjúpar spillingu og fákunnáttu vinstrimeirihlutans í Reykjavík. Borgin stendur illa fjárhagslega og má illa við glötuðum tekjum. Það munar um 7-13 milljarða. Í fyrradag samþykkti borgarráð að hefja rannsókn á gjafagjörningi Dags borgarstjóra, sem núna gætir hagsmuna sinna sem formaður borgarráðs. Í embættinu hyggst Dagur stjórna rannsókn á eigin gjörðum. Gjafagjörningar til olíufélaga og spillt stjórnsýsla haldast í hendur.

María Sigrún fékk að heyra það frá millistjórnendum RÚV, líklega að undirlagi Stefáns útvarpsstjóra, um að hún kynni ekki fréttamennsku en væri skjáfríð. Dagur gjafmildi heggur í sama knérunn og segir fréttamanninn Staksteinahöfund í dulgervi. Aldrei þessu vant þegja femínistar þunnu hljóði er stallsystir sætir karlrembu af verstu sort.

Vinstrimenn og RÚV slá skjaldborg um spillta meirihlutann í ráðhúsinu. Þórður Snær ritstjóri Heimildarinnar, einn sakborninga í byrlunar- og símastuldsmálinu, er launaður álitsgjafi RÚV. Á þriðjudag, líkt og alla aðra þriðjudaga, var Þórður Snær mættur á Rás eitt að ræða efnahagsmál. Til umræðu var fjármál sveitarfélaga. Þórður Snær minnist ekki einu orði á gjafagjörning Dags. Þórður Snær er ,,vel að merkja er einmitt í miklu persónulegu vinfengi við ritstjórn Kveiks, í nútíð og fortíð," skrifar Sigurður Már Jónsson í umfjöllun sinni um skipulagðar tilraunir til að kæfa frétt Maríu Sigrúnar um spillta stjórnsýslu í ráðhúsinu og meðvirkni vinstrimanna.

Tilraunir til að þagga niður í Maríu Sigrúnu sýna þéttriðið valdanet vinstrimanna í stjórnsýslu og fjölmiðlum. Valdanetið er virkjað til að kaffæra þá sem voga sér að fletta ofan af spillingu og misbeitingu fárra á kostnað almannahagsmuna.

 

María Sigrún svarar Degi fullum hálsi

Dagur stigi til hliðar sem formaður borgarráðs

Borgarráð samþykkir tillögu sjálfstæðismanna að innri endurskoðun borgarinnar rannsaki gjafagjörninginn er olíufélögin fengu afhentar ókeypis lóðir andvirði tugi milljarða króna. Gjafagjörningurinn fór fram í borgarstjóratíð Dags B. Eggertssonar með tilheyrandi leynimakki.

Innri endurskoðun er hluti af stjórnsýslu Reykjavíkurborgar. Þótt Dagur sé hættur sem borgarstjóri situr hann enn í borgarstjórn og er formaður borgarráðs. Um borgarráð segir á heimasíðu Reykjavíkurborgar:

Borgarráð fer, ásamt borgarstjóra, með framkvæmda- og fjármálastjórn Reykjavíkurborgar. 

Það gefur auga leið að til að lágmarstrúverðugleiki sé á rannsókn innri endurskoðunar borgarinnar getur Dagur ekki setið áfram sem formaður borgarráðs. Dagur er yfirmaður þeirra sem rannsaka gjafagjörninginn.

Dagur hlýtur að stíga til hliðar sem formaður borgarráðs á meðan rannsókn stendur yfir á embættisverkum hans sem borgarstjóra.

 

Innri endurskoðun gerir úttekt á máli olíufélaganna

Dagur og loftslagið í ráðhúsinu og á Glæpaleiti

Bannfærð frétt Maríu Sigrúnar um gjafagjörning Reykjavíkurborgar, sem færði olíufélögum lóðir undir íbúðarbyggð fyrir tugi milljarða, var vonum seinna á dagskrá RÚV í gærkveldi.

Hápunktur fréttarinnar var þegar Dagur fyrrum borgarstjóri sagði það ,,loftslagstefnu borgarinnar" að gefa olíufélögum lóðirnar. Um er að ræða lóðir 12 bensínstöðva sem fara undir íbúðabyggð. Olíufélögin hafa stofnað fasteignafélög til að halda utan um gjafirnar frá Degi og valdavinstrinu í Reykjavík.

Frétt Maríu Sigrúnar afhjúpaði leyndarhyggjuna að baki samningum við olíufélögin, sem staðfestir að vinstriflokkarnir voru í vondri trú, eins og það heitir á lagamáli, þegar olíufélögin fengu lóðirnar gefins. Vinstrimeirihlutinn vissi að gjörningurinn var siðlaus ef ekki einnig löglaus. 

Frétt Maríu Sigrúnar var tekin af dagskrá RÚV fyrir hálfum mánuði, að kröfu yfirmanna hennar sem viku henni úr fréttateymi Kveiks. Stefán Eiríksson útvarpsstjóri var borgarritari, staðgengill borgarstjóra, þegar drögin að gjafagjörningnum tóku á sig mynd, árið 2019. Stefán var innsti koppur í spillingarbúrinu við Tjörnina og tók með sér andrúmsloftið þar upp á Glæpaleiti. Spillt stjórnsýsla þarf sinn varðhund.

Eftir þrýsting og háværa umræðu ákvað RÚV að sýna frétt Maríu Sigrúnar. Siðlaust samspil vinstrimeirihlutans í Reykjavík og vinstrimanna á Efstaleiti að halda upplýsingum frá almenningi var brotið á bak aftur í þetta sinn. 

Má búast við framhaldsfrétt á RÚV um hvað meirihlutaflokkarnir í ráðhúsinu fengu fyrir sinn snúð? Spillingin er alltaf með tvær hliðar, einn veitir og annar þiggur. Sá sem hagnast á siðlausum og ólögmætum gjörningi stjórnmálamanna skilar tilbaka umbun í einu eða öðru formi. 

Spillingin sem tröllríður húsum í ráðhúsinu við Tjörnina og á Glæpaleiti heldur áfram að vinda upp á sig. Almenningur er féflettur, afbrot eru framin en gerendur allir stikkfrí. Enginn er ábyrgur. Jú, reyndar, þetta er allt loftslaginu að kenna.

 

„Verulega brugðið að sjá þennan þátt“

Staða Maríu Sigrúnar, spjótin standa á Stefáni

Hálsmánaðar gömul frétt Maríu Sigrúnar um milljarðagjöf Reykjavíkurborgar til olíufélaganna verður sýnd á RÚV í kvöld. Vegna fréttarinnar var Maríu Sigrúnu vikið úr fréttateymi Kveiks með svívirðingum. Hún var sögð skjáfríð en ekki kunna ,,rannsóknafréttamennsku." Í reynd var frétt sem átti erindi við almenning tekin af dagskrá vegna pólitískra sjónarmiðla.

Stefán Eiríksson útvarpsstjóri var áður borgarritari og staðgengill borgarstjóra. Hann lét sér vel líka að frétt Maríu Sigrúnar var tekin af dagskrá og ekki greip hann til varnar þegar fréttakonan var lítilsvirt af karlkyns yfirmönnum. Samtök erlendra blaðamanna hafa gagnrýnt RÚV fyrir meðferðina á fréttakonunni.

Einhverjar fréttir hljóta að berast úr Efstaleiti í dag um stöðu Maríu Sigrúnar. Er hún í fréttateymi Kveiks eða ekki? Biðst RÚV afsökunar að hafa afturkallað frétt af pólitískum ástæðum? Verður María Sigrún beðin afsökunar?

Það stendur upp á Stefán útvarpsstjóra að útskýra afturköllun fréttarinnar um spillingu í Reykjavíkurborg. Uppgefin ástæða var að frétt Maríu Sigrúnar héldi ekki máli faglega. Nú þegar fréttin er komin á dagskrá er ljóst að þar var um að ræða tylliástæðu. Stefán, vegna fyrri starfa sinna hjá borginni, liggur undir grun um að vera meðsekur um að fréttin var tekin af dagskrá. Þá þarf Stefán að útskýra hvaða ráðstafanir verða gerðar vegna lítilsvirðandi ummæla sem karlkyns yfirmaður lét falla um Maríu Sigrúnu.

Stefán getur ekki látið eins og ekkert hafi í skorist. Hann er yfirmaður ríkisfjölmiðils og þarf að gera almenningi grein fyrir stórundarlegum atburðum síðustu daga á Efstaleiti.

Ef Stefán reynir að þegja málið af sér hlýtur ráðuneytið að krefja Efstaleiti svara. Stjórn RÚV, sem á að hafa eftirlit með útvarpsstjóra, hlýtur einnig að taka málið á dagskrá.

Halla Hrund og Ástþór

Halla Hrund rak eigin utanríkisstefnu sem orkumálastjóri, gerði milliríkjasamning við argentínska vinukonu sína. Önnur vinkona Höllu Hrundar var í vinnu hjá henni á Orkustofnun samtímis sem hún undirbjó forsetaframboðið.

Halla Hrund sýnir sömu framtakssemi og eilífðarforsetaframbjóðandinn Ástþór Magnússon.  Helsti munurinn er að viðskiptasnilld Ástþórs er á markaðstorginu en Halla Hrund sýslar með opinbert fé. Hér kemur kynslóðabilið til sögunnar. Kynslóðin sem Ástþór tilheyrir fékk ekki allt upp í hendurnar. Í gamla daga var opinbert fé ætlað í almannaþágu, ekki einkaflipp.

Ástþór ætlar að virkja Bessastaði í þágu heimsfriðar; Halla Hrun virkjar í Argentínu í þágu vinkonu. Talandinn er áþekkur, orðasalat án merkingar er borið fram af djúpri einlægni. Með einlæga sannfæringu eitt vopna er blokkaríbúð og einbýlishús sami hluturinn, Harvard og íslenska hálendið fá samnefnara í lopapeysunni.

Sérstakar manneskjur báðar tvær, Halla Hrund og Ástþór. Lukkuriddarar tveggja kynslóða. 

 

Ráðuneytið kannast ekki við samráð

Alþjóðasamtök gagnrýna RÚV vegna Maríu Sigrúnar

Samtökin Blaðamenn án landamæra gagnrýna RÚV fyrir hótanir og lítilsvirðingu í garð Maríu Sigrúnar Hilmarsdóttur fréttakonu sem vikið var af ritstjórn Kveiks eftir að hún gerði frétt um spillingu vinstrimeirihlutans í Reykjavik.

Gagnrýnin kemur fram í lokahluta nýrrar skýrslu Blaðamanna án landamæra, þar sem fjallað er um ógnir við líf og andlega heilsu blaðamanna. Í skýrslunni segir orðrétt:

Þótt blaðamann séu tiltölulega óhultir fyrir líkamlegu ofbeldi verða kvenkyns blaðamenn stundum fyrir hótunum með símtölum eða athugasemdum á félagsmiðlum. Vandamálið er vaxandi á síðari árum.

María Sigrún varð fyrir aðkasti yfirmanna sinna á RÚV eftir að hún gerði athugasemd við að fréttainnslag hennar um gjafagjörning borgaryfirvalda var tekið af dagskrá Kveiks. Borgaryfirvöld létu af hendi byggingarlóðir til olíufélaganna upp marga milljarða króna.

Yfirmaður Maríu Sigrúnar sagði hana snoppufríða á skjánum en hún kynni ekki ,,rannsóknarblaðamennsku". Nú þegar búið er að ákveða að sýna fréttainnslagið, sem var tilbúið fyrir tveim vikum, er ljóst að faglegir fyrirvarar voru fyrirsláttur. Pólitík en ekki fagleg sjónarmið lágu að baki.

Aðferðin við að tukta til fréttakonuna er gamalkunnug og oft kennd við feðraveldið. Allir yfirmenn fréttakonunnar eru karlkyns. Stefán Eiríksson útvarpsstjóri lagði með þögninni blessun sína yfir meðferðina á Maríu Sigrúnu. Stefán var borgarritari áður en hann fékk embætti útvarpsstjóra, - með meðmælum frá borgaryfirvöldum.

Gagnrýni Blaðamanna án landamæra féll illa í kramið hjá RÚV. Í stað þess taka gagnrýnina til sín, játa mistök og biðjast afsökunar var enn á ný beitt blekkingum og fyrirslætti.

Gripið var til þess ráðs á Efstaleiti að skrifa falsfrétt um skýrslu alþjóðlegu samtakanna. Í fréttinni á RÚV segir að hótanir beinist ,,einkum í garð kvenkyns blaðamanna á samfélagsmiðlum og víðar." En það segir ekkert um kvenkyns blaðamenn á samfélagsmiðlum í skýrslunni, heldur: ,,women journalists are occasionally subjected to threats via telephone calls or comments on social media. This problem has been growing in recent years."

Falsfrétt RÚV er gagngert skrifuð til að drepa á dreif gagnrýni sem beinist ótvírætt að ríkisfjölmiðlinum vegna meðferðarinnar sem María Sigrún sætir. Þótt fréttainnslagið verði tekið til sýningar liggur tvennt fyrir um starfshætti ríkisfjölmiðilsins.

Í fyrsta lagi að pólitík en ekki fagleg sjónarmið ráða ferðinni í ritstjórnarstefnu RÚV. Í öðru lagi að alþjóðleg samtök blaðamanna fordæma meðferð ríkisfjölmiðilsins á fréttakonum.

Starfshættir RÚV kalla á opinbera rannsókn.

Kveiksþáttur Maríu Sigrúnar sýndur

Frétt Maríu Sigrúnar: RÚV ritskoðaði, mbl.is birti

RÚV neitaði að birta frétt Maríu Sigrúnar Hilmarsdóttur um spillingu vinstrimeirihlutans í Reykjavík sem gaf olíufélögunum lóðir fyrir milljarða króna. Nú er fréttin komin á mbl.is

Maríu Sigrúnu var vikið úr fréttateymi Kveiks á RÚV eftir er hún lét sér ekki vel líka óeðlileg afskipti yfirmanna. Náin tengsl eru á milli útvarpsstjóra, Stefáns Eiríkssonar, og vinstrimeirihlutans í Reykjavík. Stefán var borgarritari áður en hann varð útvarpsstjóri.

Tilfallandi fjallaði um ritskoðað fréttainnslag Maríu Sigrúnar á sunnudag og sagði:

Innslagið fjallaði um gjafmildi vinstrimeirihlutans í Reykjavík gagnvart olíufélögunum. Um er að ræða dýrar lóðir í grónum hverfum. Bensínstöðvar eru á lóðunum en þær eiga að víkja. Borgin ætti að leysa lóðirnar til sín en gaf þær olíufélögum. Ef sjálfstæðismenn hefðu verið í meirihluta hefði RÚV fjallað grimmt um spillinguna. En vinstrimenn ráða Reykjavíkurborg og samkvæmt ritstjórnarstefnu Efstaleitis skal fréttum um spillingu í ráðhúsinu sópað undir teppið.

Nú er fréttainnslagið komið á mbl.is, sjá viðtengda frétt. Tilefnið er tillaga sjálfstæðismanna í borgarstjórn um að gjafagjörningur vinstrimeirihlutans verði rannsakaður.

Allir, sem minnsta skynbragð bera á fréttir, sjá í hendi sér að fréttainnslag Maríu Sigrúnar átti fullt erindi til almennings.

En RÚV starfar ekki í þágu almannahagsmuna.

Olíufélögin fái milljarða í afslátt frá borginni

Dagur: kæri Stebbi og tuddinn á skólalóðinni

Í viðtengdri frétt segir af lítilsvirtri fréttakonu á RÚV. María Sigrún fréttamaður fékk þá umsögn frá yfirmanni að hún væri skjáfríð en kynni ekki ,,rannsóknafréttamennsku" eins og það heitir á Efstaleiti. Hugtakið nær einnig til byrlunar og stuldar, samkvæmt viðurkenndu verklagi ríkisfjölmiðilsins. Fréttir án rannsóknar eru trúlega réttu megin við lögin. En þær má ekki segja.

María Sigrún vann frétt sem kom við kaunin á Degi fyrrum borgarstjóra og vinstrimeirihlutanum í ráðhúsinu við Tjörnina. Stefán útvarpsstjóri hefur ekki tjáð sig um meðferðina sem María Sigrún sætir. Áður en Stefán varð útvarpsstóri fyrir fjórum árum var hann staðgengill Dags borgarstjóra, bar titilinn borgarritari. 

Dagur gaf Stefáni bestu meðmæli fyrir fjórum árum enda kærleikar miklir millum þeirra félaga. ,,Til hamingju Rúv og gangi þér allt að sólu, kæri Stebbi!," skrifaði Dagur. Nú endurgeldur kæri Stebbi fyrrum yfirmanni sínum greiðann með þegjandi stuðningi við millistjórnendur RÚV sem úthúða Maríu Sigrúnu er vogaði sér að afhjúpa spillingu í ráðhúsinu.

Tilvitnunin hér að ofan er tekin úr umfjöllun Kjarnans fyrir fjórum árum. Þar segir að fulltrúar minnihlutans í Reykjavík, Vigdís Hauksdóttir og Kolbrún Baldursdóttir, guldu varhug við að Stefán yrði útvarpsstjóri. Þær stöllur höfðu staðið Stefán að undirferli, hann baktalaði kjörna fulltrúa er höfðu gert aðfinnslur við stjórnsýsluna í ráðhúsinu.

Stefán líkti kjörnum borgarfulltrúum við ,,tudda á skólalóðinni" vegna gagnrýni þeirra á embættismenn og kallaði eftir að siðanefnd tæki á málinu. Sem útvarpsstjóri lagði Stefán niður siðanefnd sem úrskurðaði ekki rétt að hans mati - með úrskurði yfir Helga Seljan.

Fjögur ár eru langur tími í lífi embættismanns. Stefán stjórnar í dag Glæpaleiti þar tveir fyrrum undirmenn hans eru sakborningar í  sakamálarannsókn lögreglu á byrlunar- og símastuldsmálinu. Sjálfur getur útvarpsstjóri átt von á að vera kallaður til skýrslutöku hjá lögreglu sem vitni í málinu.

Fyrir fjórum árum kallað útvarpsstjóri kjörna fulltrúa tudda á skólalóð fyrir gagnrýni á stjórnsýslu. Hvaða orðfæri hefur hann um undirmenn sína sem eiga aðild, beina eða óbeina, að alvarlegum afbrotum, byrlun og þjófnaði? Og hvaða orð hefur útvarpsstjóri um millistjórnendur RÚV er opinberlega lítilsvirða fréttakonu? Tuddi á skólalóð er háttvísin uppmáluð í samanburði við einstaklinga sem Stefán útvarpsstjóri heldur yfir verndarhendi.

 

Segir lítilsvirðingu gagnvart konum ekki eiga að líðast

Forsetakjör

Einstaklingar eru í framboði til forseta, ekki stjórnmálaflokkar eða félagasamtök. Að því sögðu leita frambjóðendur hófanna hjá stjórnmálaflokkum og ýmsum félagasamtökum. Í stjórnmálum er þekking að reka kosningabaráttu. Félagasamtök, einkum lífsskoðunarfélög, kunna að framkalla umræðu er gæti skilað atkvæðum.

Kvartað er undan persónulegri kosningabaráttu, þar sem ,,farið er í manninn en ekki boltann." En það er aðeins maður til að fara í - enginn málefnabolti. Embætti forseta lýðveldisins er undanþegið dægurþrasi, snýst ekki um málefni heldur virðingu.

Forsetaembættið er staða þjóðhöfðingja, ekki vettvangur til að stunda stjórnmál eða berjast fyrir sérgreindum lífsskoðunum. Best fer á að embættið sitji maður sem kann eitthvað fyrir sér í stjórnskipum landsins, er boðlegur fulltrúi þjóðarinnar á alþjóðavettvangi og búinn að hlaupa af sér hornin, er þroskaður einstaklingur hagvanur opinberu lífi.

Að öllu samanlögðu, og þrátt fyrir að vera hjartanlega ósammála pólitík viðkomandi, er tilfallandi þeirrar sannfæringar að einn forsetaframbjóðandi uppfylli best skilyrðin til forsetakjörs. Það er Katrín Jakobsdóttir. 

Fylgið á hreyfingu tvist og bast