Dómgreind Kastljóss bilar

Hraðsoðin frétt í Kastljósi í gærkvöldi sagði að Ögmundur Jónasson þingmaður hefði verið drukkinn við atkvæðagreiðslu á Alþingi. Fréttin var ályktun fréttamanns á svari Ögmundar við fyrirspurn frá Kastljósi um viðtal, en þar baðst þingmaðurinn undan viðtali vegna þess að hann hafði innbyrt áfengi. Kastljósmaðurinn sem fékk afsvar frá Ögmundi gekk úr skugga um að hann hafi greitt atkvæði eftir að hafa hafnað viðtali.

Hér hefur orðið bilun í dómgreind ritstjórnar Kastljóss. Afsvar Ögmundur á viðtalsbeiðni réttlætir ekki frétt um að hann hafi verið drukkinn á þingi. Ef þingmaður kýs að hafna viðtali af því að hann hefur fengið sér vínglas er langsótt, svo vægt sé til orða tekið, að ásaka hann um að vera drukkinn við þingstörf.

Ritstjórn Kastljóss hrapaði að ályktun sem ekki stenst. Ritstjórnin ætti að gera það eina rétta í stöðunni; að biðja Ögmund afsökunar á því að hafa hlaupið á sig.

Athugasemdir

[Sigurður Þór Guðjónsson, 19.12.2009 kl. 11:09]

Ögmundur hefur sjálfur játað að hafa verið drukkinn í þingsal. Ótrúlegt annars hvað menn líta drykkjuskap þingmanna á þingi mildum augum. 

[Hans Haraldsson (IP-tala skráð) 19.12.2009 kl. 12:06]

Lestu vísisfréttina betur, Sigurður.

"Spurður hvort það hafi legið fyrir að gengið yrði til atkvæða áður en hann fékk sér áfengi sagði Ögmundur að það geti alltaf komið upp á".

Hér fara vísismenn í kring um mikilvægt atriði í málinu (sem Kastljós lét ógetið yfirleitt), þ.e. að atkvæðagreiðslan var ekki á dagskrá.

Vissulega má halda því fram að þingmenn séu alltaf í vinnunni þegar þingfundir standa en þannig er málum einfaldlega ekki háttað í raun og það vita fjölmiðlamenn vel. A.m.k minnist ég þess ekki að hafa séð "stjórnarliðar skrópa í vinnunni" í fjölmiðlum þegar stjórnarliðar létu sig hverfa á meðan að önnur umræða um Icesave-málið stóða yfir.

[Þorsteinn H. Gunnarsson, 19.12.2009 kl. 12:17]

Það er rangt sem kemur fram hjá Sigurði Þór Guðjónsyni að Ögmundur hafi játað að hafa verið drukkinn í þingsal.

„Ég drakk vín með mat," segir Ögmundur á vísir.is

Helstu kennileiti víndrykkju fyrir utan mælingar í prómillum eru þessar:

Fann á sér, hýr, kenndur, góðglaður, fullur, drukkinn, ölvaður, blindfullur dauðadrukkinn. 

Menn eiga náttúrlega ekki að hafa vínum hönd á Alþingi frekar en á öðrum vinnustöðum.

En ef á að fara nákvæmlega ofan í þessi mál verður að fara taka þvagprufur því fólk getur náttúrlega verið í pilluáti.

Ég legg því til að það verði teknar þvagprufur við innganginn og rannsakaðar.

Það mundi auka hagvöxtinn.

[Doddi D (IP-tala skráð) 19.12.2009 kl. 13:04]

Voru fleiri þingmenn í þessum lönsj?

[þór (IP-tala skráð) 19.12.2009 kl. 15:09]

Þeir greina ekki aðalatriðin frá aukaatriðunum í kastljósinu. Kastljósið orðið að grútartíru.