Glæpur, refsing og afskrift skulda

Refsidómur í sakamáli leiðréttir ekki glæpinn. Dómurinn er afleiðing afbrotsins sem sá dæmdi þarf að bera. Ökumaður sem tekinn er fyrir of hraðan akstur er sektaður. Ef ekki væri sekt yrði hraðakstur algengari.

Viðurlög við brotum á viðurkenndri háttsemi þjóna þeim tvíþætta tilgangi að siðbæta einstaklinga með því að þeir finni fyrir afleiðingum gjörða sinna og í annan stað að fæla fólk frá því að brjóta af sér.

Gjaldþrot er viðurkennd niðurstaða á búi sem ekki stendur í skilum. Nýsamþykkt lög um greiðsluaðlögun virðast opna fyrir þann möguleika að fólk gangi frá skuldum sínum án verulegra eftirmála.

Með rökum sem Pétur Blöndal notar er þetta skynsamlegt, vegna þess að skuldirnar eru hvort eð er tapaðar.

Hagfræði á ekki við í þessari umræðu. Spurningin er um réttlæti.

Athugasemdir

[Jakob Falur Kristinsson, 26.10.2009 kl. 16:56]

Þetta er ákveðið réttlætismál að sá sem verður fyrir því að verða gjaldþrota, geti hafið nýtt líf án þess að vera hundeltur af skuldurum, það sem hann á eftir ólifað.  Skuldirnar tapast í raun við gjaldþrot og einstaklingar eiga að fá sama rétt og fyrirtæki sem verður gjaldþrota, þar afskrifast allar skuldi eftir að gjaldþrotaskiptum er lokið.  En fram að þessu hefur það ekki átt við um einstaklinga, þótt gjaldþrotaskiptum sé lokið hefur verið hægt að viðhalda skuldunum þar til viðkomandi er dáinn.

[Marinó G. Njálsson, 26.10.2009 kl. 20:02]

Við skulum varast að fagna fyrr en vitað er hvaða reglur verða í gildi.  Hér er tengill að drögum frá 12. október.  Mér sýnist ekkert vera varanlegt þarna.  Það á að gera eitthvað strax og svo skoða málin eftir 3 ár.  Í millitíðinni fær fólk framfærslueyri í samræmi við viðmið Ráðgjafastofu um fjármála heimilanna.  Af hverju á fólk sem lent hefur í svikavef fjármálafyrirtækjanna að þurfa að sætta sig við að vera skammtað úr hnefa í mörg ár vegna þess að fjármálafyrirtækin eiga að komast upp með svik sín og eignaupptöku?  Málið er nefnilega að allir eru meðhöndlaðir á sama hátt hvort sem þeir skulda 10 milljónir umfram eignir eða 10 milljarða.  Það er ekkert réttlæti í því.  Þetta er lögfesting á svikunum og eignaupptökunni.  Ekkert annað.