Sigurjón snjalli

Sigurjón M. Egilsson er álíka snjall í blaðamennsku og Gunnar Smári bróðir hans er í viðskiptum en hann leiddi Baugsfyrirtækið Dagsbrún á heljarþröm fyrr á árinu. Sigurjóni var í morgun varpað á dyr á ritstjórnarskrifstofu Blaðsins.

Blaðamennskuæra Sigurjóns hefur verið í frjálsu falli síðan hann gekk Baugi á hönd sem fréttastjóri á Fréttablaðinu árið 2002 og tók þátt í því með Gunnari Smára að gefa blaðið út í tæpt ár án þess að gefa upp eigendur.

Undanfarna mánuði hefur Sigurjón verið í samskiptum við fjársterka aðila sem hann segir tilbúna til að setja peninga í blaðaútgáfu undir hans ritstjórn. Nær öruggt er að þeir peningar séu ættaðir frá Baugi.

Til að auka inneign sína hjá Baugi hefur Sigurjón beitt Blaðinu í þágu herferðarinnar sem Baugur stendur að gegn lögregluyfirvöldum. Í haust bjó hann til „fréttir" um Arnar Jensson aðstoðaryfirlögregluþjón þar sem Arnar var sakaður um yfirsjónir í starfi fyrir tíu til tuttugu árum. Markmiðið var að draga úr trúverðugleika lögreglumannsins. Arnar starfaði að Baugsrannsókninni og verður vitni í réttarhöldunum á nýju ár.

Sigurjón stendur í þeirri trú að hann fái uppreisn æru sem blaðamaður ef Baugsmenn hafa sigur í dómsmálinu. Þess vegna hefur hann krafist þess í leiðurum í Blaðinu að málaferlunum gegn Baugi verði hætt. En sá strætisvagn er löngu farinn. Niðurstaða Baugsmálsins mun engu breyta um orðspor Sigurjóns.

Sigurjón er ekki skýrleikspiltur. Hann þrætir iðulega fyrir Baugsþjónkunina sem er orðin honum inngróin. Hér er tilvitnun í bloggið hans þar lýst er aðdraganda þess að Fréttablaðið birti ákærur í Baugsmálinu með fyrirsögnum og ritskoðun sakborninganna.

Búið var að ákæra í Baugsmálinu og allir fjölmiðlar gerðu allt sem þeir gátu til að komast yfir ákærurnar. Enginn hafði náð árangri. Ég fór í sumarfrí og hafði verið á Jótlandi í nokkra daga þegar einn af meðstjórnendum mínum á Fréttablaðinu hringir til mín og spyr mig í fyrstu hvernig standi á því hann eigi sérstakt erindi við mig.

Samstarfsmaður Sigurjóns hringir sem sagt til að segja tíðindi af Baugsmálum en byrjar á því að spyrja viðtakanda símtalsins, Sigurjón, hvers vegna hann hringi. Maður getur nánast heyrt gutlið í toppstykkinu.

Sigurjón er bangsalegur í bernsku sinni og eflaust stendur hann á því fastara en fótunum að blaðamennskan sem hann stundar sé annað og meira en þjónkun við húsbændurna í Baugi. Bloggsíða Sigurjóns heitir hvalur.

Athugasemdir

[Nýkratar, 15.12.2006 kl. 23:17]

Er þetta ekki full rætið sem þú skrifar hér um Sigurjón, Páll? Við vitum hvaða skoðanir þú hefur en það er full langt gengið að ráðast að útliti manna í þeim tilgangi að styðja við þær skoðanir. Þetta hefur verið skrifað í fljótfærni vonandi bara. Kemur fyrir besta fólk. Hafðu það sem best! kv. ritstjórar Kratabloggsins

[Sigmar (IP-tala skráð) 16.12.2006 kl. 11:15]

Ég vissi að þú værir ómerkilegur, Páll, en að þú skulir vera svona illa innrættur vissi ég ekki.

[Páll Vilhjálmsson, 16.12.2006 kl. 11:29]

Athugasemd Nýkrata er réttmæt. Ég bið Sigurjón afsökunar á því að hafa í síðustu málsgrein bloggsins haft efnisatriði sem á ekki heima þar. Samkvæmt því hef ég breytt síðustu málsgreininni

[Jónatan (IP-tala skráð) 17.12.2006 kl. 17:51]

Sigurjón fer í sumarfrí.
Meðstjórnandi/samstarfsmaður hringir í hann og spyr hvernig standi á (ie. hvort hann hitti illa á),  því hann eigi sérstakt erindi við hann.

Hvernig tekst þér að skilja þetta sem svo að sá sem hringir sé að spyrja viðtakanda símtalsins afhverju hann sé að hringja?