Læknar og lyfjahagsmunir

Í umræðunni um fjárhagslegan stuðning lyfjafyrirtækja til lækna og samtaka þeirra hefur lítið farið fyrir þeirri staðreynd að læknastofur eru gjarnan reknar í sama húsnæði og apótek.

Lyfsalar hafa hag af nábýli við læknastofur og dæmi eru um að lyfsölur eigi húsnæði læknastofa. Það gefur auga leið að lyfsali getur til að mynda slegið hressilega af leigunni til að fá viðskipti til sín. Læknir í niðurgreiddu húsnæði lyfsala er kominn í hagsmunaárekstur.

Annað atriði í umræðunni er æskilegt að sé upplýst. Læknar hafa einir heimild til að ávísa á lyf. Það felur í sér skráningu á einstökum læknum og lyfseðlum sem þeir skrifa uppá. Hverjir hafa aðgang að þessari skrá?

Hafa lyfsölufyrirtæki aðgang? Það gæti auðveldað þeim sértækar markaðsaðgerðir til að „endurmennta" lækna, eins og talsmaður lyfjaframleiðenda orðaði það svo smekklega.